3. பே²ணபிண்டூ³பமஸுத்தவண்ணனா

95. கேனசி காரணேன யுஜ்ஜி²த்வா க³ஹேதும் ந ஸக்காதி அயுஜ்ஜா² நாம. நிவத்தனட்டா²னேதி உத³கப்பவாஹஸ்ஸ நிவத்திதட்டா²னே.

அனுஸோதாக³மனேதி அனுஸோதம் ஆக³மனஹேது, ‘‘அனுஸோதாக³மனேனா’’தி வா பாடோ². அனுபுப்³பே³ன பவட்³டி⁴த்வாதி தத்த² தத்த² உட்டி²தானம் கு²த்³த³கமஹந்தானம் பே²ணபிண்டா³னம் ஸம்ஸக்³கே³ன பகாரதோ வுத்³தி⁴ம் பத்வா. ஆவஹேய்யாதி ஆனேத்வா வஹேய்ய. காரணேன உபபரிக்கே²ய்யாதி ஞாணேன வீமம்ஸேய்ய. ‘‘ஸாரோ நாம கிம் ப⁴வேய்யா’’தி வத்வா ஸப்³ப³ஸோ தத³பா⁴வம் த³ஸ்ஸேந்தோ ‘‘விலீயித்வா வித்³த⁴ம்ஸேய்யேவா’’தி ஆஹ. தேன ரூபம்பி நிஸ்ஸாரதாய பி⁴ஜ்ஜதேவாதி த³ஸ்ஸேதி. யதா² ஹி அனிச்சதாய அஸாரதாஸித்³தி⁴, ஏவம் அஸாரதாயபி அனிச்சதாஸித்³தீ⁴தி அனிச்சதாய ஏவ நிச்சஸாரம் தி²ரபா⁴வஸாரம் து⁴வஸாரம் ஸாமீனிவாஸீகாரகபூ⁴தஸ்ஸ அத்தனோ வஸே பவத்தனம்பேத்த² நத்தீ²தி ஆஹ ‘‘ரூபம்பி…பே… நிஸ்ஸாரமேவா’’தி. ஸோதி பே²ணபிண்டோ³. க³ஹிதோபி உபாயேன தமத்த²ம் ந ஸாதே⁴தி அனரஹத்தா. அனேகஸந்தி⁴க⁴டிதோ ததா² ததா² க⁴டிதோ ஹுத்வா.

ப்³யாமமத்தம்பி ஏதரஹி மனுஸ்ஸானம் வஸேன. அவஸ்ஸமேவ பி⁴ஜ்ஜதி தரங்க³ப்³பா⁴ஹதம் ஹுத்வா.

தஸ்மிம் தஸ்மிம் உத³கபி³ந்து³ம்ஹி பதிதே. உத³கதலந்தி உத³கபிட்டி²ம். அஞ்ஞதோ பதந்தம் உத³கபி³ந்து³ம். உத³கஜல்லந்தி ஸந்தானகம் ஹுத்வா டி²தம் உத³கமலம். தஞ்ஹி ஸம்கட்³டி⁴த்வா ததோ உத³கம் புடம் கரோதி, தஸ்மிம் புடே புப்³பு³ளஸமஞ்ஞா. வத்து²ந்தி சக்கா²தி³வத்து²ம். ஆரம்மணந்தி ரூபாதி³ஆரம்மணம். கிலேஸஜல்லந்தி புரிமஸித்³த⁴ம், படிலப்³ப⁴மானம் வா கிலேஸமலம். ப²ஸ்ஸஸங்க⁴ட்டனந்தி ப²ஸ்ஸஸமோதா⁴னம். புப்³பு³ளஸதி³ஸா முஹுத்தரமணீயதாய. யஸ்மா க⁴ம்மகாலே ஸூரியாதபஸந்தாபாபி⁴னிப்³ப³த்தரஸ்மிஜாலனிபாதே தாதி³ஸே பூ⁴மிபதே³ஸே இதோ சிதோ ஸமுக்³க³தவாதவேக³ஸமுத்³த⁴டவிருள்ஹஸங்கா²தேஸு பரிப்³ப⁴மந்தேஸு அணுபரமாணுதஜ்ஜாரிப்பகாரேஸு பூ⁴தஸங்கா⁴தேஸு மரீசிஸமஞ்ஞா, தஸ்மா ஸப்³ப³ஸோ ஸாரவிரஹிதாதி வுத்தம் ‘‘ஸஞ்ஞாபி அஸாரகட்டே²ன மரீசிஸதி³ஸா’’தி. யஸ்மா ச பஸ்ஸந்தானம் யேபு⁴ய்யேன உத³காகாரேன கா²யதி, தஸ்மா ‘‘க³ஹேத்வா பிவிதும் வா’’திஆதி³ வுத்தம். நீலாதி³அனுப⁴வனத்தா²யாதி நீலாதி³ஆரம்மணஸ்ஸ அனுப⁴வனத்தா²ய. ப²ந்த³தீதி ப²ந்த³னாகாரப்பத்தா விய ஹோதி அப்பஹீனதண்ஹஸ்ஸ புக்³க³லஸ்ஸ. விப்பலம்பே⁴தி அப்பஹீனவிபல்லாஸம் புக்³க³லம். தேனாஹ ‘‘இத³ம் நீலக’’ந்திஆதி³. ஸஞ்ஞாவிபல்லாஸதோ ஹி சித்தவிபல்லாஸோ, ததோ தி³ட்டி²விபல்லாஸோதி. விப்பலம்ப⁴னேனாதி விப்பகாரவஸேனேவ ஆரம்மணஸ்ஸ லம்ப⁴னேன. விப்பகாரவஸேன ஹி ஏதம் லம்ப⁴னம், யதி³த³ம் அனுத³கமேவ உத³கம் கத்வா த³ஸ்ஸனம் அனக³ரமேவ நக³ரம் கத்வா க³ந்த⁴ப்³ப³னாடகாதி³த³ஸ்ஸனம்.

குக்குகம் வுச்சதி கத³லிக்க²ந்த⁴ஸ்ஸ ஸப்³ப³பத்தவட்டீனம் அப்³ப⁴ந்தரே த³ண்ட³கந்தி ஆஹ ‘‘அகுக்குகஜாதந்தி அந்தோ அஸஞ்ஜாதக⁴னத³ண்ட³க’’ந்தி. ந ததா² ஹோதீதி யத³த்தா²ய உபனீதம், தத³த்தா²ய ந ஹோதி. நானாலக்க²ணோதி நானாஸபா⁴வோ. ஸங்கா²ரக்க²ந்தோ⁴வாதி ஏகோ ஸங்கா²ரக்க²ந்தோ⁴த்வேவ வுச்சதி.

அஸ்ஸாதி புரிஸஸ்ஸ. அபக³தபடலபிளகந்தி அபக³தபடலதோ³ஸஞ்சேவ அபக³தபிளகதோ³ஸஞ்ச. அஸாரபா⁴வத³ஸ்ஸனஸமத்த²ந்தி அஸாரஸ்ஸ அஸாரபா⁴வத³ஸ்ஸனஸமத்த²ம். இத்தராதி பரித்தகாலா, ந சிரட்டி²திகா. தேனாஹ ‘‘லஹுபச்சுபட்டா²னா’’தி. அஞ்ஞதே³வ ச ஆக³மனகாலே சித்தந்தி இத³ஞ்ச ஓளாரிகவஸேனேவ வுத்தம். ததா² ஹி ஏகச்ச²ரக்க²ணே அனேககோடிஸதஸஹஸ்ஸஸங்கா²னி சித்தானி உப்பஜ்ஜித்வா நிருஜ்ஜ²ந்தி. மாயாய த³ஸ்ஸிதம் ரூபம் மாயாதி வுத்தம். யம்கிஞ்சிதே³வ கபாலிட்ட²கபாஸாணவாலிகாதி³ம். வஞ்சேதீதி அஸுவண்ணமேவ ஸுவண்ணந்தி, அமுத்தமேவ முத்தாதிஆதி³னா வஞ்சேதி. நனு ச ஸஞ்ஞாபி மரீசி விய விப்பலம்பே⁴தி வஞ்சேதி, இத³ம்பி விஞ்ஞாணம் மாயா விய வஞ்சேதீதி கோ இமேஸம் விஸேஸோதி? வசனத்தோ² நேஸம் ஸாதா⁴ரணோ. ததா²பி ஸஞ்ஞா அனுத³கம்யேவ உத³கம் கத்வா கா³ஹாபேந்தீ, அபுரிஸஞ்ஞேவ புரிஸம் கத்வா கா³ஹாபேந்தீ விப்பலம்ப⁴னவஸேன அப்பவிஸயா, விஞ்ஞாணம் பன யம் கிஞ்சி அதம்ஸபா⁴வம் தம் கத்வா த³ஸ்ஸேந்தீ மாயா விய மஹாவிஸயா. தேனாஹ ‘‘யம்கிஞ்சிதே³வா’’திஆதி³. ஏவம்பீதி அதிவிய லஹுபரிவத்திபா⁴வேனபி மாயாஸதி³ஸந்தி.

தே³ஸிதாதி ஏவம் தே³ஸிதா பே²ணபிண்டா³தி³உபமாஹி.

பூ⁴ரி வுச்சதி பத²வீ, ஸண்ஹட்டே²ன விபுலட்டே²ன ச பூ⁴ரிஸதி³ஸபஞ்ஞதாய பூ⁴ரிபஞ்ஞோ. தேனாஹ ‘‘ஸண்ஹபஞ்ஞேன சேவா’’திஆதி³. கிமிக³ணாதீ³னந்தி ஆதி³-ஸத்³தே³ன அனேககி³ஜ்ஜா²தி³கே ஸங்க³ண்ஹாதி. பவேணீதி த⁴ம்மபப³ந்தோ⁴. பா³லலாபினீ ‘‘அஹம் மமா’’திஆதி³னா. ஸேஸதா⁴துயோ க³ஹேத்வாவ பி⁴ஜ்ஜதி ஏகுப்பாதே³கனிரோத⁴த்தா, வத்து²ரூபனிஸ்ஸயபச்சயத்தா ‘‘அய’’ந்தி ந விஸும் க³ஹிதம். வத⁴பா⁴வதோதி வத⁴ஸ்ஸ மரணஸ்ஸ அத்தி²பா⁴வதோ. ஸரணந்தி படிஸரணம்.

பே²ணபிண்டூ³பமஸுத்தவண்ணனா நிட்டி²தா.