3-5. பஞ்சஸிக்கா²பத³ஸுத்தாதி³வண்ணனா

109-111. ஸுராமேரயஸங்கா²தந்தி பிட்ட²ஸுராதி³ஸுராஸங்கா²தம் புப்பா²ஸவாதி³மேரயஸங்கா²தஞ்ச. மஜ்ஜனட்டே²ன மஜ்ஜம். ஸுராமேரயமஜ்ஜப்பமாதோ³தி வுச்சதி ‘‘மஜ்ஜதி தேனா’’தி கத்வா. தஸ்மிம் திட்ட²ந்தீதி தஸ்மிம் பமாதே³ பமஜ்ஜனவஸேன திட்ட²ந்தீதி அத்தோ². ஸேஸம் ததியசதுத்தே²ஸு ஸுவிஞ்ஞேய்யமேவாதி.

பஞ்சமே தானி பதா³னி ஸம்வண்ணேதும் ‘‘பஞ்சமே’’திஆதி³ ஆரத்³த⁴ம். தத்த² பாணோ நாம வோஹாரதோ ஸத்தோ, பரமத்த²தோ ஜீவிதிந்த்³ரியம், தம் பாணம் அதிபாதேந்தி அதிச்ச அந்தரேயேவ, அதிக்கம்ம வா ஸத்தா²தீ³ஹி அபி⁴ப⁴வித்வா பாதேந்தி ஸணிகம் பதிதும் அத³த்வா ஸீக⁴ம் பாதேந்தீதி அத்தோ². காயேன வாசாய வா அதி³ன்னம் பரஸந்தகம். ஆதி³யந்தீதி க³ண்ஹந்தி. மிச்சா²தி ந ஸம்மா, கா³ரய்ஹவஸேன. முஸாதி அதத²ம் வத்து². வத³ந்தீதி விஸம்வாத³னவஸேன வத³ந்தி. பியஸுஞ்ஞகரணதோ பிஸுணா, பிஸதி வா பரே ஸத்தே, ஹிம்ஸதீதி அத்தோ². மம்மச்சே²தி³காதி ஏதேன பரஸ்ஸ மம்மச்சே²த³வஸேன ஏகந்தப²ருஸஸஞ்சேதனா ப²ருஸவாசா நாமாதி த³ஸ்ஸேதி. அபி⁴ஜ்ஜா²ஸத்³தோ³ லுப்³ப⁴னே நிருள்ஹோதி ஆஹ ‘‘பரப⁴ண்டே³ லுப்³ப⁴னஸீலாதி அத்தோ²’’தி. ப்³யாபன்னந்தி தோ³ஸவஸேன விபன்னம். பகதிவிஜஹனேன பூதிபூ⁴தம். ஸாதூ⁴ஹி க³ரஹிதப்³ப³தம் பத்தா ‘‘நத்தி² தி³ன்ன’’ந்திஆதி³னயப்பவத்தா நத்தி²காஹேதுகஅகிரியதி³ட்டி² கம்மபத²பரியாபன்னா நாம. மிச்ச²த்தபரியாபன்னா ஸப்³பா³பி லோகுத்தரமக்³க³படிபக்கா² விபரீததி³ட்டி².

தேஸந்தி கம்மபதா²னம். வோஹாரதோதி இந்த்³ரியப³த்³த⁴ம் உபாதா³ய பஞ்ஞத்திமத்ததோ. திரச்சா²னக³தாதீ³ஸூதி ஆதி³-ஸத்³தே³ன பேதானம் ஸங்க³ஹோ. பயோக³வத்து²மஹந்ததாதீ³ஹி மஹாஸாவஜ்ஜதா தேஹி பச்சயேஹி உப்பஜ்ஜமானாய சேதனாய ப³லவபா⁴வதோ. யதா²வுத்தபச்சயவிபரியாயேபி தம்தம்பச்சயேஹி சேதனாய ப³லவபா⁴வவஸேன அப்பஸாவஜ்ஜமஹாஸாவஜ்ஜதா வா வேதி³தப்³பா³. இத்³தி⁴மயோதி கம்மவிபாகித்³தி⁴மயோ தா³டா²கோடனாதீ³னம் விய.

மேது²னஸமாசாரேஸூதி ஸதா³ரபரதா³ரக³மனவஸேன து³விதே⁴ஸு மேது²னஸமாசாரேஸு. தேபி ஹீனாதி⁴முத்திகேஹி கத்தப்³ப³தோ காமா நாம. மிச்சா²சாரோதி கா³ரய்ஹாசாரோ. கா³ரய்ஹதா சஸ்ஸ ஏகந்தனிஹீனதாயாதி ஆஹ ‘‘ஏகந்தனிந்தி³தோ லாமகாசாரோ’’தி அஸத்³த⁴ம்மாதி⁴ப்பாயேனாதி அஸத்³த⁴ம்மஸேவனாதி⁴ப்பாயேன. கோ³த்தரக்கி²தாதி ஸகோ³த்தேஹி ரக்கி²தா. த⁴ம்மரக்கி²தாதி ஸஹத⁴ம்மேஹி ரக்கி²தா. ஸஸ்ஸாமிகா நாம ஸாரக்கா². யஸ்ஸா க³மனே த³ண்டோ³ ட²பிதோ, ஸா ஸபரித³ண்டா³. ப⁴ரியபா⁴வாய த⁴னேன கீதா த⁴னக்கீதா. ச²ந்தே³ன வஸதீதி ச²ந்த³வாஸினீ. போ⁴க³த்த²ம் வஸதீதி போ⁴க³வாஸினீ. படத்த²ம் வஸதீதி படவாஸினீ. உத³கபத்தம் ஆமஸித்வா க³ஹிதா ஓத³பத்தகினீ. சும்ப³டம் அபனேத்வா க³ஹிதா ஓப⁴டசும்ப³டா. கரமரானீதா த⁴ஜாஹடா. தங்க²ணிகம் க³ஹிதா முஹுத்திகா. அபி⁴ப⁴வித்வா வீதிக்கமோ மிச்சா²சாரோ மஹாஸாவஜ்ஜோ, ந ததா² த்³வின்னம் ஸமானச்ச²ந்த³தாய. அபி⁴ப⁴வித்வா வீதிக்கமனே ஸதிபி மக்³கே³னமக்³க³படிபத்திஅதி⁴வாஸனே புரிமுப்பன்னஸேவனாபி⁴ஸந்தி⁴பயோகா³பா⁴வதோ மிச்சா²சாரோ ந ஹோதி அபி⁴பு⁴ய்யமானஸ்ஸாதி வத³ந்தி. ஸேவனாசித்தே ஸதி பயோகா³பா⁴வோ அப்பமாணம் யேபு⁴ய்யேன இத்தி²யா ஸேவனாபயோக³ஸ்ஸ அபா⁴வதோ. ததா² ஸதி புரேதரம் ஸேவனாசித்தஸ்ஸ உபட்டா²னேபி தஸ்ஸா மிச்சா²சாரோ ந ஸியா, ததா² புரிஸஸ்ஸபி ஸேவனாபயோகா³பா⁴வே. தஸ்மா அத்தனோ ருசியா பவத்திதஸ்ஸ வஸேன தயோ, ப³லக்காரேன பவத்திதஸ்ஸ வஸேன தயோதி ஸப்³பே³பி அக்³க³ஹிதக்³க³ஹணேன ‘‘சத்தாரோ ஸம்பா⁴ரா’’தி வுத்தம்.

ஆஸேவனமந்த³தாயாதி யாய அகுஸலசேதனாய ஸம்ப²ம் பலபதி, தஸ்ஸா இத்தரகாலதாய பவத்தியா அனாஸேவனாதி பரிது³ப்³ப³லா ஹோதி சேதனா.

உபஸக்³க³வஸேன அத்த²விஸேஸவாசினோ தா⁴துஸத்³தா³தி அபி⁴ஜ்ஜா²யதீதி பத³ஸ்ஸ பரப⁴ண்டா³பி⁴முகீ²திஆதி³அத்தோ² வுத்தோ. தன்னின்னதாயாதி தஸ்மிம் பரப⁴ண்டே³ லுப்³ப⁴னவஸேன நின்னதாய. அபி⁴புப்³போ³ ஜே²-ஸத்³தோ³ லுப்³ப⁴னே நிருள்ஹோதி த³ட்ட²ப்³போ³. யஸ்ஸ ப⁴ண்ட³ம் அபி⁴ஜ்ஜா²யதி, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜாதிஆதி³னா நயேன தத்த² அப்பஸாவஜ்ஜமஹாஸாவஜ்ஜவிபா⁴கோ³ வேதி³தப்³போ³. தேனாஹ ‘‘அதி³ன்னாதா³னம் வியா’’திஆதி³. அத்தனோ பரிணாமனம் சித்தேனேவாதி த³ட்ட²ப்³ப³ம்.

ஹிதஸுக²ம் ப்³யாபாத³யதீதி யோ நம் உப்பாதே³தி, யஸ்ஸ உப்பாதே³தி, தஸ்ஸ ஸதி ஸமவாயே ஹிதஸுக²ம் வினாஸேதி. அஹோ வதாதி இமினா யதா² அபி⁴ஜ்ஜா²னே வத்து²னோ ஏகந்ததோ அத்தனோ பரிணாமனம் த³ஸ்ஸிதம், ஏவமிதா⁴பி வத்து²னோ ‘‘அஹோ வதா’’தி இமினா பரஸ்ஸ வினாஸசிந்தாய ஏகந்ததோ நியமிதபா⁴வம் த³ஸ்ஸேதி. ஏவஞ்ஹி நேஸம் தா³ருணப்பவத்தியா கம்மபத²ப்பவத்தி.

யதா²பு⁴ச்சக³ஹணாபா⁴வேனாதி யதா²தச்ச²க³ஹணஸ்ஸ அபா⁴வேன அனிச்சாதி³ஸபா⁴வஸ்ஸ நிச்சாதி³தோ க³ஹணேன. மிச்சா² பஸ்ஸதீதி விதத²ம் பஸ்ஸதி. ஸம்ப²ப்பலாபோ வியாதி இமினா ஆஸேவனஸ்ஸ அப்பமஹந்ததாஹி மிச்சா²தி³ட்டி²யா அப்பஸாவஜ்ஜமஹாஸாவஜ்ஜதா. வத்து²னோதி க³ஹிதவத்து²னோ. க³ஹிதாகாரவிபரீததாதி மிச்சா²தி³ட்டி²யா க³ஹிதாகாரஸ்ஸ விபரீததா. ததா²பா⁴வேனாதி அத்தனோ க³ஹிதாகாரேனேவ தஸ்ஸா தி³ட்டி²யா, க³ஹிதஸ்ஸ வா வத்து²னோ உபட்டா²னம் ‘‘ஏவமேதம், ந இதோ அஞ்ஞதா²’’தி.

த⁴ம்மதோதி ஸபா⁴வதோ. கோட்டா²ஸதோதி சித்தங்க³கோட்டா²ஸதோ, யம்கோட்டா²ஸா ஹோந்தி, ததோதி அத்தோ². சேதனாத⁴ம்மாவாதி சேதனாஸபா⁴வா ஏவ. படிபாடியா ஸத்தாதி ஏத்த² நனு சேதனா அபி⁴த⁴ம்மே கம்மபதே²ஸு ந வுத்தாதி படிபாடியா ஸத்தன்னம் கம்மபத²பா⁴வோ ந யுத்தோதி? ந, அவசனஸ்ஸ அஞ்ஞஹேதுகத்தா. ந ஹி தத்த² சேதனாய அகம்மபத²த்தா கம்மபத²ராஸிம்ஹி அவசனம், கதா³சி பன கம்மபதோ² ஹோதி, ந ஸப்³ப³தா³தி கம்மபத²பா⁴வஸ்ஸ அனியதத்தா அவசனம். யதா³, பனஸ்ஸ கம்மபத²பா⁴வோ ஹோதி, ததா³ கம்மபத²ராஸிஸங்க³ஹோ ந நிவாரிதோ. ஏத்தா²ஹ – யதி³ சேதனாய ஸப்³ப³தா³ கம்மபத²பா⁴வாபா⁴வதோ அனியதோ கம்மபத²பா⁴வோதி கம்மபத²ராஸிம்ஹி அவசனம், நனு அபி⁴ஜ்ஜா²தீ³னம்பி கம்மபத²பா⁴வம் அப்பத்தானம் அத்தி²தாய அனியதோ கம்மபத²பா⁴வோதி தேஸம்பி கம்மபத²ராஸிம்ஹி அவசனம் ஆபஜ்ஜதீதி? நாபஜ்ஜதி, கம்மபத²தாதம்ஸபா⁴க³தாஹி தேஸம் தத்த² வுத்தத்தா. யதி³ ஏவம் சேதனாபி தத்த² வத்தப்³பா³ ஸியா? ஸச்சமேதம். ஸா பன பாணாதிபாதாதி³காதி பாகடோ தஸ்ஸா கம்மபத²பா⁴வோதி ந வுத்தா ஸியா. சேதனாய ஹி ‘‘சேதனாஹம், பி⁴க்க²வே, கம்மம் வதா³மி (அ. நி. 6.63; கதா². 539) திவிதா⁴, பி⁴க்க²வே, காயஸஞ்சேதனா அகுஸலம் காயகம்ம’’ந்திஆதி³வசனதோ (கதா². 539) கம்மபா⁴வோ பாகடோ. கம்மம்யேவ ச ஸுக³திது³க்³க³தீனம் தத்து²ப்பஜ்ஜனகஸுக²து³க்கா²னஞ்ச பத²பா⁴வேன பவத்தம் கம்மபதோ²தி வுச்சதீதி பாகடோ, தஸ்ஸா கம்மபத²பா⁴வோ. அபி⁴ஜ்ஜா²தீ³னம் பன சேதனாஸமீஹனபா⁴வேன ஸுசரிதது³ச்சரிதபா⁴வோ, சேதனாஜனிதபிட்டி²வட்டகபா⁴வேன ஸுக³திது³க்³க³திதது³ப்பஜ்ஜனகஸுக²து³க்கா²னம் பத²பா⁴வோ சாதி, ந ததா² பாகடோ கம்மபத²பா⁴வோதி, தே ஏவ தேன ஸபா⁴வேன த³ஸ்ஸேதும் அபி⁴த⁴ம்மே கம்மபத²ராஸிபா⁴வேன வுத்தா. அததா²ஜாதியகத்தா வா சேதனா தேஹி ஸத்³தி⁴ம் ந வுத்தாதி த³ட்ட²ப்³ப³ம். மூலம் பத்வாதி மூலதே³ஸனம் பத்வா, மூலஸபா⁴வேஸு த⁴ம்மேஸு தே³ஸியமானேஸூதி அத்தோ².

அதி³ன்னாதா³னம் ஸத்தாரம்மணந்தி இத³ம் ‘‘பஞ்ச ஸிக்கா²பதா³ பரித்தாரம்மணா ஏவா’’தி இமாய பாளியா விருஜ்ஜ²தி. யஞ்ஹி பாணாதிபாதாதி³து³ஸ்ஸீல்யஸ்ஸ ஆரம்மணம், ததே³வ தம் வேரமணியா ஆரம்மணம். வீதிக்கமிதப்³ப³வத்து²தோ ஏவ ஹி விரதீதி. ‘‘ஸத்தாரம்மண’’ந்தி வா ஸத்தஸங்கா²தம் ஸங்கா²ராரம்மணமேவ உபாதா³ய வுத்தத்தா ந கோசி விரோதோ⁴. ததா² ஹி வுத்தம் ஸம்மோஹவினோத³னியம் (விப⁴. அட்ட². 714) ‘‘யானி ஸிக்கா²பதா³னி ஏத்த² ‘ஸத்தாரம்மணானீ’தி வுத்தானி, தானி யஸ்மா ‘ஸத்தோதி’தி ஸங்க²ம் க³தே ஸங்கா²ரேயேவ ஆரம்மணம் கரோந்தீ’’தி. இதோ பரேஸுபி ஏஸேவ நயோ. விஸபா⁴க³வத்து²னோ ‘‘இத்தி²புரிஸா’’தி க³ஹேதப்³ப³தோ ஸத்தாரம்மணோதிபி ஏகே. ‘‘ஏகோ தி³ட்டோ², த்³வே ஸுதா’’திஆதி³னா ஸம்ப²ப்பலபனே தி³ட்ட²ஸுதமுதவிஞ்ஞாதவஸேன. ததா² அபி⁴ஜ்ஜா²தி ஏத்த² ததா²-ஸத்³தோ³ ‘‘தி³ட்ட²ஸுதமுதவிஞ்ஞாதவஸேனா’’தி இத³ம்பி உபஸம்ஹரதி, ந ஸத்தஸங்கா²ராரம்மணதம் ஏவ த³ஸ்ஸனாதி³வஸேன அபி⁴ஜ்ஜா²யனதோ. ‘‘நத்தி² ஸத்தா ஓபபாதிகா’’தி பவத்தமானாபி மிச்சா²தி³ட்டி² தேபூ⁴மகத⁴ம்மாரம்மணா ஏவாதி அதி⁴ப்பாயேன தஸ்ஸா ஸங்கா²ராரம்மணதா வுத்தா. கத²ம் பன மிச்சா²தி³ட்டி²யா மஹக்³க³தப்பத்தா த⁴ம்மா ஆரம்மணம் ஹோந்தீதி? ஸாதா⁴ரணதோ. நத்தி² ஸுகடது³க்கடானம் கம்மானம் ப²லம் விபாகோதி ஹி பவத்தமானாய அத்த²தோ ரூபாரூபாவசரத⁴ம்மாபி க³ஹிதாவ ஹோந்தீதி.

ஸுக²ப³ஹுலதாய ராஜானோ ஹஸமானாபி ‘‘சோரம் கா⁴தேதா²’’தி வத³ந்தி, ஹாஸோ பன தேஸம் அஞ்ஞவிஸயோதி ஆஹ ‘‘ஸன்னிட்டா²பகசேதனா பன நேஸம் து³க்க²ஸம்பயுத்தாவ ஹோதீ’’தி. மஜ்ஜ²த்தவேத³னோ ந ஹோதி, ஸுக²வேத³னோவ. தத்த² ‘‘காமானம் ஸமுத³யா’’திஆதி³னா வேத³னாபே⁴தோ³ வேதி³தப்³போ³. லோப⁴ஸமுட்டா²னோ முஸாவாதோ³ ஸுக²வேத³னோ வா ஸியா மஜ்ஜ²த்தவேத³னோ வா, தோ³ஸஸமுட்டா²னோ து³க்க²வேத³னோ வாதி முஸாவாதோ³ திவேத³னோ ஸியா. இமினா நயேன ஸேஸேஸுபி யதா²ரஹம் வேத³னானம் ‘‘லோபோ⁴ நிதா³னம் கம்மானம் ஸமுத³யாயா’’திஆதி³னா பே⁴தோ³ வேதி³தப்³போ³.

பாணாதிபாதோ தோ³ஸமோஹவஸேன த்³விமூலகோதி ஸம்பயுத்தமூலமேவ ஸந்தா⁴ய வுத்தம். தஸ்ஸ ஹி மூலட்டே²ன உபகாரபா⁴வோ தோ³ஸவிஸேஸோ, நிதா³னமூலே பன க³ய்ஹமானே லோப⁴மோஹவஸேனபி வட்டதி. ஸம்மூள்ஹோ ஆமிஸகிஞ்ஜக்க²காமோபி ஹி பாணம் ஹனதி. தேனேவாஹ ‘‘லோபோ⁴ நிதா³னம் கம்மானம் ஸமுத³யாயா’’திஆதி³ (அ. நி. 3.34). ஸேஸேஸுபி ஏஸேவ நயோ.

அஸமாதி³ன்னஸீலஸ்ஸ ஸம்பத்ததோ யதா²உபட்டி²தவீதிக்கமிதப்³ப³வத்து²தோ விரதி ஸம்பத்தவிரதி. ஸமாதா³னேன உப்பன்னா விரதி ஸமாதா³னவிரதி. கிலேஸானம் ஸமுச்சி²ந்த³னவஸேன பவத்தா மக்³க³ஸம்பயுத்தா விரதி ஸமுச்சே²த³விரதி. காமஞ்சேத்த² பாளியம் விரதியோவ ஆக³தா, ஸிக்கா²பத³விப⁴ங்கே³ பன சேதனாபி ஆஹரித்வா த³ஸ்ஸிதாதி தது³ப⁴யம்பி க³ண்ஹந்தோ ‘‘சேதனாபி வட்டந்தி விரதியோபீ’’தி ஆஹ.

அது³ஸ்ஸீல்யாரம்மணா ஜீவிதிந்த்³ரியாதி³ஆரம்மணா கத²ம் து³ஸ்ஸீல்யானி பஜஹந்தீதி த³ஸ்ஸேதும் ‘‘யதா² பனா’’திஆதி³ வுத்தம். பாணாதிபாதாதீ³ஹி விரமணவஸேன பவத்தனதோ ததா³ரம்மணபா⁴வேனேவ தானி பஜஹந்தி. ந ஹி ததே³வ ஆரப்³ப⁴ தம் பஜஹிதும் ஸக்கா ததோ அனிஸ்ஸடபா⁴வதோ.

அனபி⁴ஜ்ஜா²…பே… விரமந்தஸ்ஸாதி அபி⁴ஜ்ஜ²ம் பஜஹந்தஸ்ஸாதி அத்தோ². ந ஹி மனோது³ச்சரிததோ விரதி அத்தி² அனபி⁴ஜ்ஜா²தீ³ஹேவ தப்பஹானஸித்³தி⁴தோ.

பஞ்சஸிக்கா²பத³ஸுத்தாதி³வண்ணனா நிட்டி²தா.