3. ப்³ரஹ்மதே³வஸுத்தவண்ணனா

174. ஏககோதி விவேகட்டி²ததாய நிஸ்ஸடோ. க³ணஸங்க³ணிகாபா⁴வோ தஸ்ஸானேன தீ³பிதோ, கிலேஸஸங்க³ணிகாபா⁴வோ பன ‘‘அப்பமத்தோ’’திஆதீ³ஹி பகாஸிதோ. பேஸிதத்தோதி நிப்³பா³னம் பதி பேஸிதசித்தோ. ஸம்மதே³வாதி ஞாயேனேவ. ஸோ பன யதி³ ஆக³மனதோ பட்டா²ய லப்³ப⁴தி, வத்தப்³ப³மேவ நத்தி², அத² படிபதா³ரம்ப⁴தோ பட்டா²ய லப்³ப⁴தி, ஏவம்பி வட்டதேவாதி த³ஸ்ஸேதும் ‘‘யதா² வா ததா² வா’’திஆதி³ வுத்தம். அக்³க³மக்³கா³தி⁴க³மேன அஸம்மோஹபடிவேத⁴ஸ்ஸ ஸிகா²ப்பத்தத்தா மக்³க³த⁴ம்மேஸு விய ப²லத⁴ம்மேஸுபி ஸாதிஸயோ அஸம்மோஹோதி ‘‘ஸயம் அபி⁴ஞ்ஞா’’தி வுத்தந்தி ஆஹ ‘‘ஸாமம் ஜானித்வா’’தி. யதா² ஜானனா பனஸ்ஸ ஸச்சி²கரணம் அத்தபச்சக்க²கிரியாதி ‘‘ஸச்சி²கத்வா’’தி வுத்தந்தி ஆஹ ‘‘பச்சக்க²ம் கத்வா’’தி. ததா² ஸச்சி²கிரியா சஸ்ஸ விபஸ்ஸனாபடிலாபோ⁴தி ‘‘உபஸம்பஜ்ஜா’’தி வுத்தந்தி ஆஹ ‘‘படிலபி⁴த்வா’’தி. ஏதேனாதி ‘‘கீ²ணா ஜாதீ’’திஆதி³வசனேன.

ஜாதி கீ²ணாதி ஏத்த² ஜாதிஸீஸேன தப்³பி³காரவந்தோ க²ந்தா⁴ வுத்தா. புப்³பே³வ கீ²ணத்தாதி மக்³கா³தி⁴க³மனதோ பகே³வ அதீதபா⁴வேனேவ கீ²ணத்தா. தத்த² அனாக³தேஸு. வாயாமாபா⁴வதோதி அவிஜ்ஜமானத்தா. அனாக³தபா⁴வஸாமஞ்ஞம் க³ஹேத்வா லேஸேன வுத்தம். ந பச்சுப்பன்னா விஜ்ஜமானத்தாதி ஸம்கிலிட்டா² ச மக்³க³பா⁴வனாதி ஸியாதி வசனஸேஸோ. யதா² அஜாதப²லதருணருக்க²மூலே சி²ன்னே ஆயதிஉப்பஜ்ஜனாரஹானி ப²லானி சே²த³னபச்சயா அனுப்பஜ்ஜமானானி நட்டா²னி நாம ஹோந்தி, ஏவமேவ பா⁴வனாய அஸதி உப்பஜ்ஜனாரஹா கிலேஸா தப்பச்சயா ஜாதி ச மக்³க³பா⁴வனாய ஸதி ந உப்பஜ்ஜமானா பஹீனாதி வுச்சந்தீதி இமமத்த²ம் த³ஸ்ஸேதி ‘‘மக்³க³ஸ்ஸ பனா’’திஆதி³னா. அனுப்பாத³த⁴ம்மதம் ஆபஜ்ஜனேன ஞாணேன கீ²ணராக³வஸேன.

ஸோளஸகிச்சபா⁴வாயாதி ஸோளஸகிச்சதாய, ஸோளஸவித⁴ஸ்ஸ வா கிச்சஸ்ஸ பா⁴வாய உப்பாத³னாய. பாளியம் ஸபதா³னந்தி ஸபதா³னசாரோ வுத்தோ பா⁴வனபும்ஸகனித்³தே³ஸேனாதி ஆஹ ‘‘ஸபதா³னசார’’ந்தி. அனுக்கம்மாதி அனதிக்கமித்வா. ஆஹுதிபிண்ட³ந்தி ஜுஹிதப்³ப³பிண்ட³ம், ஜுஹனவஸேன அக்³கி³ம்ஹி பக்கி²பிதப்³ப³பாயாஸபிண்ட³ந்தி அதி⁴ப்பாயோ. பூ⁴தப³லிகம்மந்தி ததா² பக்கி²பித்வா ப³லிகம்மகரணம். ஹரிதுபலித்தந்தி அல்லகோ³மயேன கதபரிப⁴ண்ட³ம். வனமாலபரிக்கி²த்தந்தி மனோஹராஹி வனபுப்ப²மாலாஹி பரிக்கி²த்தம். தூ⁴மகடச்சூ²தி தூ⁴மபானம். ஸீலக³ந்த⁴ந்தி ஸீலம் படிச்ச உப்பன்னகித்திக³ந்த⁴ம். கா⁴யமானஸ்ஸாதி உபக³தம் க³ண்ஹந்தஸ்ஸ.

இமம்ஹா டா²னாதி இமஸ்மா மனுஸ்ஸானம் வஸனட்டா²னா, மஹாபத²விதலதோதி அதி⁴ப்பாயோ. ஸப்³ப³ஹேட்டி²மோதி ப்³ரஹ்மபாரிஸஜ்ஜானம் வாஸப்³ரஹ்மலோகமாஹ. ப்³ரஹ்மபதோ² நாம சத்தாரி குஸலஜ்ஜா²னானி ப்³ரஹ்மலோகமக்³க³பா⁴வதோ. ஜீவிதபதோ² நாம ஜீவிதபவத்திஉபாயபா⁴வதோ. ‘‘பு⁴ஞ்ஜது ப⁴வம் மஹாப்³ரஹ்மா’’தி வசனம் ஸந்தா⁴யாஹ ‘‘கிம் ஜப்பஸீ’’திஆதி³. திணபீ³ஜானீதி ஸாலிதண்டு³லாதீ³னி. கோ³யூஸந்தி கீ²ரம் ஜிகு³ச்ச²ந்தோ வத³தி. அயம்பி அத்தோ² ‘‘நேதாதி³ஸோ ப்³ரஹ்மப⁴க்கோ²’’தி வத³ந்தேன தீ³பிதோதி.

அதிதே³வபத்தோபி பஞ்சக²ந்தூ⁴பதீ⁴னம் அத்தி²தாய கிலேஸூபதி⁴ஆதீ³னம்யேவ விரஹிதபா⁴வோ க³ஹிதோ. அஞ்ஞத்ர ஹி பா⁴வபச்சயம் தத³த்தோ² விஞ்ஞாயதீதி ஆஹ ‘‘அதிதே³வபா⁴வம் பத்தோ’’தி. யஸ்மா ப்³ரஹ்மானோபி தே³வக³திபரியாபன்னத்தா தே³வா ஏவ, தஸ்மா வுத்தம் ‘‘அதிப்³ரஹ்மபா⁴வம் பத்தோ’’தி.

அத்தானம் பா⁴வேத்வாதி ஸீலாதீ³ஹி கு³ணேஹி அத்தானம் வட்³டே⁴த்வா பரிப்³ரூஹித்வா டி²தோ.

புது²ஜ்ஜனா தஸா தண்ஹாமானதி³ட்டி²பரித்தாஸவஸேன தாஸனதோ. கீ²ணாஸவா தா²வரா நாம ஸப்³ப³ஸோ க³தீஸு ஸஞ்சரணாபா⁴வதோ. ததா² ஹி சதுன்னம் ஸச்சானம் ஸப்³ப³ஸோ அதி³ட்ட²த்தா ப⁴வதா³யஜ்ஜஸ்ஸ தண்ஹாதா³ஸப்³யஸ்ஸ பா⁴வதோ ஏகச்சாஸு க³தீஸு ஸஞ்சரணஸபா⁴வதோ ஸேக்கா² தா²வரா ந ஹோந்தி. ப⁴ஜமானாதி ப⁴ஜாபியமானா. தா²வரபக்க²மேவ ப⁴ஜந்தி ஸப்³ப³ஸேட்ட²பக்க²ம் ஏகந்தபஸட்ட²ம் ப⁴ஜமானபா⁴வம் உபாதா³ய.

பஹீனகிலேஸோ கீ²ணாஸவோ விஸேனோ. ஸுக²ம் ஆயதி ஸுகா²யதி, தஸ்ஸ காரகம் ஸுகா²யதிகம்.

ப்³ரஹ்மதே³வஸுத்தவண்ணனா நிட்டி²தா.