4. ப³கப்³ரஹ்மஸுத்தவண்ணனா

175. ‘‘ஸஸ்ஸதோ அத்தா ச லோகோ சா’’தி ஏவம் பவத்தா தி³ட்டி² ஸஸ்ஸததி³ட்டி². ஸஹ காயேனாதி ஸஹ தேன ப்³ரஹ்மத்தபா⁴வேன. ப்³ரஹ்மட்டா²னந்தி அத்தனோ ப்³ரஹ்மவத்து²ம். அனிச்சம் ‘‘நிச்ச’’ந்தி வத³தி அனிச்சதாய அத்தனோ அபஞ்ஞாயமானத்தா. தி²ரந்தி த³ள்ஹம், வினாஸாபா⁴வதோ ஸாரபூ⁴தந்தி அத்தோ². உப்பாத³விபரிணாமாபா⁴வதோ ஸதா³ விஜ்ஜமானம். கேவலந்தி பரிபுண்ணம். தேனாஹ ‘‘அக²ண்ட³’’ந்தி. கேவலந்தி வா ஜாதிஆதீ³ஹி அஸம்மிஸ்ஸம், விரஹிதந்தி அதி⁴ப்பாயோ. உப்பாதா³தீ³னம் அபா⁴வதோ ஏவ அசவனத⁴ம்மம். கோசி ஜாயனகோ…பே… உபபஜ்ஜனகோ வா நத்தி² நிச்சபா⁴வதோ டா²னேன ஸத்³தி⁴ம் தன்னிவாஸீனம். நிச்சபா⁴வஞ்ஹி ஸோ படிஜானாதி. திஸ்ஸோ ஜா²னபூ⁴மியோதி து³தியததியசதுத்த²ஜ்ஜா²னபூ⁴மியோ. சதுத்த²ஜ்ஜா²னபூ⁴மிவிஸேஸா ஹி அஸஞ்ஞஸுத்³தா⁴வாஸாருப்பப⁴வா. நிப்³பா³னந்தி வா ஏத்த² இதி-ஸத்³தோ³ ஆதி³அத்தோ², ந பரிஸமாபனத்தோ², தஸ்மா ‘‘ஸப்³ப³’’ந்தி இமினா ‘‘அஸஞ்ஞ…பே… ப⁴வா’’தி வுத்தம் ஸங்க³ண்ஹாதி. படிபா³ஹதீதி ஸந்தம்யேவ ஸமானம் அஜானந்தோவ ‘‘நத்தீ²’’தி படிக்கி²பதி. ஏகே உத்தரவிஹாரவாஸினோ.

ஹேட்டூ²பபத்திகோதி ஹேட்டா² பூ⁴மீஸு உப்பன்னஉபபத்திகோ. இதா³னி தமத்த²ம் விவரிதும் ‘‘அனுப்பன்னே’’திஆதி³ வுத்தம். ஹேட்டு²பபத்திகம் கத்வாதி யதா²டி²தபூ⁴மிதோ ஹேட்டா² ததியஜ்ஜா²னபூ⁴மியம் உபபத்திஜா²னம் கத்வா, ந உபரிஜா²னஸ்ஸ விய பத்த²னாமத்தந்தி அதி⁴ப்பாயோ. பட²மகாலேதி தஸ்மிம் ப⁴வே பட²மகாலே. அஞ்ஞாஸி ஆஸன்னபா⁴வதோ. உப⁴யந்தி தம் தம் அத்தனா கதகம்மஞ்சேவ நிப்³ப³த்தட்டா²னஞ்சாதி உப⁴யம். பமுஸ்ஸித்வா நிப்³ப³த்திம் அனுபதா⁴ரேந்தோ.

அவிஜ்ஜாய க³தோதி அவிஜ்ஜாய ஸஹ பவத்தோ. ஸஹயோகே³ ஹி இத³ம் கரணவசனம். தேனாஹ ‘‘ஸமன்னாக³தோ’’தி. அஞ்ஞாணீதி அவித்³வா. பஞ்ஞாசக்கு²விரஹதோ அந்தீ⁴பூ⁴தோ, அந்த⁴பா⁴வம் ஆபன்னோதி அத்தோ². அனாக³தே ஸத்³தோ³ ஹோதாயம் ‘‘வக்க²தீ’’தி யத்ரஸத்³த³பயோகே³ன, அத்தோ² பன வத்தமானகாலிகோ. தேனாஹ ‘‘ப⁴ணதீ’’தி. தேனாஹ ‘‘யத்ரா’’திஆதி³.

மக்³க³சோரோதி மக்³க³பரிபு³ந்த⁴கசோரோ. ஸந்தஜ்ஜியமானோதி ‘‘அவிஜ்ஜாக³தோ வத, போ⁴, ப³கோ ப்³ரஹ்மா’’திஆதி³னா ஸந்தஜ்ஜியமானோ. ஸதிம் லபி⁴த்வாதி தேனேவ ஸந்தஜ்ஜனேன யோனிஸோ உம்முஜ்ஜித்வா புரிமஜாதிவிஸயம் ஸதிம் லபி⁴த்வா. நிப்பீளிதுகாமோதி க⁴ம்ஸேதுகாமோ தோ³ஸம் த³ஸ்ஸேதுகாமோ ‘‘இத³ம் பஸ்ஸ யாவஞ்ச தே அபரத்³த⁴’’ந்தி. புஞ்ஞகம்மாதி புஞ்ஞகாரினோ. வேதே³ஹி ஞாணேஹி க³தத்தா பவத்தத்தா. அந்திமா ப்³ரஹ்முபபத்தீதி ஸப்³ப³பச்சி²மா ப்³ரஹ்மபா⁴வப்பத்தி. அஸ்மாபி⁴ஜப்பந்தீதி அஸ்மே அபி⁴ஜப்பந்தி. ஆயுவண்ணாதி³வஸேன ப்³ரூஹிதகு³ணத்தா ப்³ரஹ்மா. அஞ்ஞேஹி மஹந்தா ப்³ரஹ்மா மஹாப்³ரஹ்மா. அபி⁴பூ⁴தி தம் ப்³ரஹ்மலோகம் ஜேட்ட²கபா⁴வேன அபி⁴ப⁴வித்வா டி²தோ. அனபி⁴பூ⁴தோதி அஞ்ஞேஹி ந அபி⁴பூ⁴தோ. அஞ்ஞத³த்தூ²தி ஏகம்ஸவசனமேதம். த³ஸ்ஸனவஸேன த³ஸோ, ஸப்³ப³ம் பஸ்ஸதீதி அதி⁴ப்பாயோ. வஸவத்தீதி ஸப்³ப³ஜனம் வஸே வத்தேதி. இஸ்ஸரோதி லோகே இஸ்ஸரோ. கத்தா நிம்மாதாதி லோகஸ்ஸ கத்தா நிம்மாதா. ஸேட்டோ² ஸஜிதாதி அயம் லோகஸ்ஸ உத்தமோ ஸம்விப⁴ஜிதா ச. வஸீ பிதா பூ⁴தப⁴ப்³யானந்தி ஆசிண்ணவஸித்தா வஸீ, அயம் பிதா பூ⁴தானம் நிப்³ப³த்தானம் ப⁴ப்³யானம் ஸம்ப⁴வேஸீனந்தி பத்தே²ந்தி விகத்தே²ந்தி பிஹேந்தி மானேந்தி.

ஏதந்தி விபரீதஸஞ்ஞாவஸேன ‘‘இத³ம் நிச்சம் இத³ம் து⁴வம் இத³ம் ஸஸ்ஸத’’ந்திஆதி³னா வுத்தம் ஏதம் அப்பம் பரித்தகந்தி தம் ப⁴க³வா பரிச்சி²ந்தி³த்வா த³ஸ்ஸேதி. தம் பன ‘‘ஏகஸ்மிம் கோஸலகே திலவாஹே வஸ்ஸஸதே வஸ்ஸஸதே ஏகேகதிலுத்³தா⁴ரே கயிரமானே திலானி பரிக்க²யம் க³ச்ச²ந்தி, ந த்வேவ அப்³பு³தே³ ஆயூ’’தி ஏவம் வுத்தோ அப்³பு³தோ³, தம்வஸேன வீஸதிகு³ணம் நிரப்³பு³தோ³, தேஸம் நிரப்³பு³தா³னம் வஸேன நிரப்³பு³த³ஸதஸஹஸ்ஸம். அயமேத்த² ஸங்கே²போ, வித்தா²ரதோ பன பது³மே ஆயுனோ வஸ்ஸக³ணனா இமஸ்மிம்யேவ ஸம்யுத்தே பரதோ ஆக³மிஸ்ஸதி. அனந்தத³ஸ்ஸீதி அனந்தஸ்ஸ ஞேய்யஸ்ஸ அனவஸேஸதோ த³ஸ்ஸீ. வதஸீலவத்தந்தி ஸமாதா³னவஸேன வதபூ⁴தம் சாரித்தஸீலவஸேன ஸமாசிண்ணத்தா ஸீலவத்தம். தம் பன ஏகமேவாதி ஆஹ ‘‘ஸீலமேவா’’தி.

அபாயேஸீதி ஏத்த² யதா³ ஸோ பிபாஸிதே மனுஸ்ஸே பானீயம் பாயேஸி, தம் ஸமுதா³க³மதோ பட்டா²ய த³ஸ்ஸேதும் ‘‘தத்ரா’’திஆதி³ ஆரத்³த⁴ம். புப்³பே³தி புரிமஜாதியம். ஏஸ ப்³ரஹ்மா ‘‘ஜராமரணஸ்ஸ அந்தம் கரிஸ்ஸாமீ’’தி அஜ்ஜா²ஸயவஸேன ஜா²னம் நிப்³ப³த்தேத்வா ப்³ரஹ்மலோகே நிப்³ப³த்தி, ஸோ தத்த² நிப்³பா³னஸஞ்ஞீ அஹோஸி. ஜா²னரதியா வீதினாமேதீதி ததா³ தஸ்ஸா கிரியாய அவிச்சே²த³தோ பவத்திம் உபாதா³ய வத்தமானபயோகோ³. ரத்தந்த⁴காரே புரதோ புரதோ க³ச்ச²ந்தஸ்ஸ ஸகடஸ்ஸ அனுஸ்ஸரணவஸேன க³ச்ச²ந்தானம் ஸகடானம் நிவத்தனம் ஹோதீதி ‘‘ஸப்³ப³ஸகடானி ததே²வ நிவத்தித்வா’’தி வுத்தம்.

கம்மஸஜ்ஜாதி யுத்³த⁴ஸஜ்ஜா. விலோபந்தி விலுத்தப⁴ண்ட³ம். ஏணிகூலஸ்மிந்தி ஏத்த² ‘‘பனிஹதாய நிச்சக³ங்கா³ய நாம’’ந்தி கேசி. ‘‘ஏணிமிக³ப³ஹுலதாய ஸோ க³ங்கா³ய தீரப்பதே³ஸோ ஏணிகூலந்தி வுத்த’’ந்தி அபரே. க³ங்கே³ய்யகோதி க³ங்கா³ஸன்னிவாஸீ.

ப³த்³த⁴சரோதி படிப³த்³த⁴சரியோ. தேனாஹ ‘‘அந்தேவாஸிகோ’’தி. யஸ்மா பு³த்³தோ⁴ ஸப்³ப³ஞ்ஞூ, தஸ்மா அஞ்ஞாஸி, இத⁴ மய்ஹம் பமுட்ட²ஞ்ச ஸப்³ப³ம் ஜானாஸீதி அதி⁴ப்பாயோ. ஸப்³ப³ம் ப்³ரஹ்மலோகம் ஓபா⁴ஸயந்தோ ஸப்³ப³ம்பிமம் ப்³ரஹ்மலோகம் ப⁴க³வா ஓபா⁴ஸம் அபி⁴ப⁴வித்வா அனஞ்ஞஸாதா⁴ரணம் அத்தனோ ஓபா⁴ஸம் ஓபா⁴ஸேந்தோ திட்ட²தி.

ப³கப்³ரஹ்மஸுத்தவண்ணனா நிட்டி²தா.