2. கா³ரவஸுத்தவண்ணனா

173. அயம் விதக்கோதி அயம் ‘‘கிந்தாஹம் விஹரேய்ய’’ந்தி ஏவம் பவத்திதவிதக்கோ. அஞ்ஞஸ்மிந்தி பரஸ்மிம். அத்தா ந ஹோதீதி ஹி அஞ்ஞோ, பரோ. ஸோ பனேத்த² ந யோ கோசி அதி⁴ப்பேதோ, அத² கோ² க³ருட்டா²னீயோ. தேனாஹ ‘‘கஞ்சி க³ருட்டா²னே அட்ட²பேத்வா’’தி. பதிஸ்ஸவதி க³ருனோ ‘‘ஆமா’’தி ஸம்படிச்ச²தீதி பதிஸ்ஸோ, ந பதிஸ்ஸோதி அப்பதிஸ்ஸோ. பதிஸ்ஸயரஹிதோ க³ருபஸ்ஸயரஹிதோதி அத்தோ².

ஸதே³வகேதி அவயவேன விக்³க³ஹோ ஸமுதா³யோ ஸமாஸத்தோ². ஸதே³வகக்³க³ஹணேன பஞ்சகாமாவசரதே³வக்³க³ஹணம் பாரிஸேஸஞாயேன இதரேஸம் பத³ந்தரேஹி ஸங்க³ஹிதத்தா, ஸமாரகக்³க³ஹணேன ச²ட்ட²காமாவசரதே³வக்³க³ஹணம் பச்சாஸத்திஞாயேன. தத்த² ஹி மாரோ ஜாதோ தன்னிவாஸீ ச ஹோதி. ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணம் பச்சாஸத்திஞாயேனேவ. ‘‘ஸஸ்ஸமணப்³ராஹ்மணியா பஜாயா’’தி ஸாஸனஸ்ஸ பச்சத்தி²கஸமணப்³ராஹ்மணக்³க³ஹணம். நித³ஸ்ஸனமத்தஞ்சேதம் அபச்சத்தி²கானம் அஸமிதபாபானம் அபா³ஹிதபாபானஞ்ச ஸமணப்³ராஹ்மணானம் தேனேவ வசனேன க³ஹிதத்தா. காமம் ‘‘ஸதே³வகே’’திஆதி³விஸேஸனானம் வஸேன ஸத்தவிஸயோ லோகஸத்³தோ³தி விஞ்ஞாயதி துல்யயோக³விஸயத்தா தேஸம். ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³பி அயம் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி பஜாவசனேன ஸத்தலோகக்³க³ஹணம். தே³வபா⁴வஸாமஞ்ஞேன மாரப்³ரஹ்மேஸு க³ஹிதேஸுபி இதரேஹி தேஸம் லப்³ப⁴மானவிஸேஸத³ஸ்ஸனத்த²ம் விஸும் க³ஹணந்தி த³ஸ்ஸேந்தோ ‘‘மாரோ நாமா’’திஆதி³மாஹ. மாரோ ப்³ரஹ்மானம்பி விசக்கு²கம்மாய பஹோதீதி ஆஹ ‘‘ஸப்³பே³ஸ’’ந்தி. உபரீதி உபரிபா⁴வே. ப்³ரஹ்மாதி த³ஸஸஹஸ்ஸிப்³ரஹ்மானம் ஸந்தா⁴யாஹ. ததா² சாஹ ‘‘த³ஸஹி அங்கு³லீஹீ’’திஆதி³. இத⁴ தீ³க⁴னிகாயாத³யோ விய பா³ஹிரகானம்பி க³ந்த²னிகாயோ லப்³ப⁴தீதி ஆஹ ‘‘ஏகனிகாயாதி³வஸேனா’’தி.

வத்து²விஜ்ஜாதீ³தி ஆதி³-ஸத்³தே³ன விஜ்ஜாட்டா²னானி ஸங்க³ஹிதானி. யதா²ஸகம் கம்மகிலேஸேஹி பஜாதத்தா நிப்³ப³த்தத்தா பஜா, ஸத்தனிகாயோ. தஸ்ஸா பஜாய. ஸதே³வமனுஸ்ஸாயாதி வா இமினா ஸம்முதிதே³வக்³க³ஹணம் தத³வஸிட்ட²மனுஸ்ஸலோகக்³க³ஹணஞ்ச த³ட்ட²ப்³ப³ம். ஏவம் பா⁴க³ஸோ லோகம் க³ஹேத்வா யோஜனம் த³ஸ்ஸேத்வா இதா³னி அபா⁴க³ஸோ லோகம் க³ஹேத்வா யோஜனம் த³ஸ்ஸேதும் ‘‘அபிசேத்தா²’’திஆதி³ வுத்தம். லோகவஸேன வுத்தானி ‘‘லோகீயந்தி ஏத்த² கம்மகம்மப²லானீ’’தி கத்வா, பஜாவஸேன ‘‘ஹேதுபச்சயேஹி பஜாயதீ’’தி கத்வா. ஸீலஸம்பன்னதரந்தி ஏத்த² பரிபுண்ணஸம்பன்னதா அதி⁴ப்பேதா ‘‘ஸம்பன்னம் ஸாலிகேதா³ர’’ந்திஆதீ³ஸு (ஜா. 1.14.1) விய. தேனாஹ ‘‘அதி⁴கதரந்தி அத்தோ²’’தி. பரிபுண்ணம்பி ‘‘அதி⁴கதர’’ந்தி வத்தப்³ப³தமரஹதி. ஸேஸேஸூதி ‘‘ஸமாதி⁴ஸம்பன்னதர’’ந்திஆதீ³ஸு.

காரணந்திஆதீ³ஸு காரணந்தி யுத்திம். அத்த²ந்தி அவிபரீதத்த²ம். வுட்³டி⁴ந்தி அபி⁴வுட்³டி⁴னிமித்தம்.

இமினா வசனேனாதி இமஸ்மிம் ஸுத்தே அனந்தரம் வுத்தவசனேன. ந கேவலம் இமினாவ, ஸுத்தந்தரம்பி ஆனேத்வா படிபா³ஹிதப்³போ³தி த³ஸ்ஸேந்தோ ‘‘ந மே ஆசரியோ அத்தீ²’’திஆதி³மாஹ. ஏத்த² யம் வத்தப்³ப³ம், தம் ஸுமங்க³லவிலாஸினியா தீ³க⁴னிகாயட்ட²கதா²ய (தீ³. நி. அட்ட². 3.162) வுத்தமேவ. ஸரந்தி கரணே ஏதம் பச்சத்தவசனந்தி ஆஹ ‘‘ஸரந்தேனா’’தி, ஸரந்தி வா ஸரணஹேதூதி அத்தோ².

கா³ரவஸுத்தவண்ணனா நிட்டி²தா.