1. ப்³ரஹ்மாயாசனஸுத்தவண்ணனா

172. பரிவிதக்கோ உத³பாதீ³தி த⁴ம்மக³ம்பீ⁴ரதாபச்சவேக்க²ணஹேதுகோ த⁴ம்மதே³ஸனாய அப்போஸ்ஸுக்கோ உப்பஜ்ஜி. அயம் பரிவிதக்கோ கஸ்மா உத³பாதி³? கத்த² ச உத³பாதீ³தி தம் ஸப்³ப³ம் விபா⁴வேதும் ‘‘ஸப்³ப³பு³த்³தா⁴ன’’ந்திஆதி³ ஆரத்³த⁴ம். தத்த² ஆசிண்ணஸமாசிண்ணோதி ஆசரிதோ சேவ ஆசரந்தேஹி ச ஸம்மதே³வ ஆசரிதோதி அத்தோ². ஏதேன அயம் பரிவிதக்கோ ஸப்³ப³பு³த்³தா⁴னம் பட²மாபி⁴ஸம்போ³தி⁴யம் உப்பஜ்ஜதேவாதி அயமேத்த² த⁴ம்மதாதி த³ஸ்ஸேதி. தத்த² அட்ட²மே ஸத்தாஹேதி இத³ம் ஸத்தமஸத்தாஹதோ பரம் ஸத்தாஹப்³ப⁴ந்தரே உப்பன்னத்தா வுத்தம், ந பன இதரேஸம் விய அட்ட²மஸ்ஸ நாம ஸத்தாஹஸ்ஸ பவத்திதஸ்ஸ ஸப்³பா⁴வா. ஸபச்சக்³கே⁴தி மஹக்³கே⁴. ‘‘பச்சக்³கே⁴’’தி வா பாடோ², அபி⁴னவேதி அத்தோ². ஸேலமயேதி முக்³க³வண்ணஸிலாமயே.

படிவித்³தோ⁴தி ஸயம்பு⁴ஞாணேன ‘‘இத³ம் து³க்க²’’ந்திஆதி³னா படிமுக²ம் நிப்³பி³ஜ்ஜ²னவஸேன பத்தோ, யாதா²வதோ அவபு³த்³தோ⁴தி அத்தோ². த⁴ம்மோதி சதுஸச்சத⁴ம்மோ தப்³பி³னிமுத்தஸ்ஸ படிவிஜ்ஜி²தப்³ப³த⁴ம்மஸ்ஸ அபா⁴வதோ. க³ம்பீ⁴ரோதி மஹாஸமுத்³தோ³ விய மகஸதுண்ட³ஸூசியா அஞ்ஞத்ர ஸமுபசிதபரிபக்கஞாணஸம்பா⁴ரேஹி அஞ்ஞேஸம் ஞாணேன அலப்³ப⁴னேய்யபதிட்டோ². தேனாஹ ‘‘உத்தானபடிக்கே²பவசனமேத’’ந்தி. யோ அலப்³ப⁴னேய்யபதிட்டோ², ஸோ ஓகா³ஹிதும் அஸக்குணேய்யதாய ஸரூபதோ விஸேஸதோ ச பஸ்ஸிதும் ந ஸக்காதி ஆஹ ‘‘க³ம்பீ⁴ரத்தாவ து³த்³த³ஸோ’’தி. து³க்கே²ன த³ட்ட²ப்³போ³தி கிச்சே²ன கேனசி கதா³சிதே³வ த³ட்ட²ப்³போ³. யம் பன த³ட்டு²மேவ ந ஸக்கா, தஸ்ஸ ஓகா³ஹேத்வா அனு அனு பு³ஜ்ஜ²னகோ கதா³சி நத்தீ²தி ஆஹ ‘‘து³த்³த³ஸத்தாவ து³ரனுபோ³தோ⁴’’தி. து³க்கே²ன அவபு³ஜ்ஜி²தப்³போ³ அவபோ³த⁴ஸ்ஸ து³க்கரபா⁴வதோ. இமஸ்மிம் டா²னே ‘‘தம் கிம் மஞ்ஞத², பி⁴க்க²வே, கதமம் நு கோ² து³க்கரதரம் வா து³ரபி⁴ஸம்ப⁴வதரம் வா’’தி (ஸம். நி. 5.1115) ஸுத்தபத³ம் வத்தப்³ப³ம். ஸந்தாரம்மணதாய வா ஸந்தோ. நிப்³பு³தஸப்³ப³பரிளாஹதாய நிப்³பு³தோ. அத்தனோ பச்சயேஹி பதா⁴னபா⁴வம் நீதோதி வா பணீதோ. அதித்திகரணட்டே²ன அதப்பகோ ஸாது³ரஸபோ⁴ஜனம் விய. தத்த² ச நிரோத⁴ஸச்சம் ஸந்தம் ஆரம்மணந்தி ஸந்தாரம்மணம், மக்³க³ஸச்சம் ஸந்தம் ஸந்தாரம்மணஞ்சாதி ஸந்தாரம்மணம், அனுபஸந்தஸபா⁴வானம் கிலேஸானம் ஸங்கா²ரானஞ்ச அபா⁴வதோ ஸந்தோ. நிப்³பு³தஸப்³ப³பரிளாஹத்தா நிப்³பு³தோ. ஸந்தபணீதபா⁴வேனேவ தத³த்தா²ய அஸேசனகதாய அதப்பகதா த³ட்ட²ப்³பா³. தேனாஹ ‘‘இத³ம் த்³வயம் லோகுத்தரமேவ ஸந்தா⁴ய வுத்த’’ந்தி. உத்தமஞாணஸ்ஸ விஸயத்தா ந தக்கேன அவசரிதப்³போ³. ததோ ஏவ நிபுணஞாணகோ³சரதாய ஸண்ஹஸுகு²மஸபா⁴வத்தா ச நிபுணோ. பா³லானம் அவிஸயத்தா யதா²வுத்தேஹி பண்டி³தேஹி ஏவ வேதி³தப்³போ³தி பண்டி³தவேத³னீயோ. ஆலீயந்தி அபி⁴ரமிதப்³ப³ட்டே²ன ஸேவீயந்தீதி ஆலயா, பஞ்ச காமகு³ணா. ஆலயந்தி அல்லீயந்தி அபி⁴ரமணவஸேன ஸேவந்தீதி ஆலயா, தண்ஹாவிசரிதானி. ரமந்தீதி ரதிம் விந்த³ந்தி கீளந்தி லளந்தி. ஆலயரதாதி ஆலயனிரதா.

டா²னம் ஸந்தா⁴யாதி டா²னஸத்³த³ம் ஸந்தா⁴ய, அத்த²கோ பன டா²னந்தி ச படிச்சஸமுப்பாதோ³ ஏவ அதி⁴ப்பேதோ. திட்ட²தி ப²லம் ததா³யத்தவுத்திதாயாதி ஹி டா²னம், ஸங்கா²ராதீ³னம் பச்சயபூ⁴தா அவிஜ்ஜாத³யோ. இமேஸம் ஸங்கா²ராதீ³னம் பச்சயா இத³ப்பச்சயா, அவிஜ்ஜாத³யோ. இத³ப்பச்சயா ஏவ இத³ப்பச்சயதா யதா² ‘‘தே³வோ ஏவ தே³வதா’’. இத³ப்பச்சயானம் வா அவிஜ்ஜாதீ³னம் அத்தனோ ப²லம் பதி பச்சயபா⁴வோ உப்பாத³னஸமத்த²தா இத³ப்பச்சயதா. தேன பரமத்த²பச்சயலக்க²ணோ படிச்சஸமுப்பாதோ³ த³ஸ்ஸிதோ ஹோதி. படிச்ச ஸமுப்பஜ்ஜதி ப²லம் ஏதஸ்மாதி படிச்சஸமுப்பாதோ³. பத³த்³வயேனபி த⁴ம்மானம் பச்சயட்டோ² ஏவ விபா⁴விதோ. தேனாஹ ‘‘ஸங்கா²ராதி³பச்சயானம் ஏதம் அதி⁴வசன’’ந்தி. ஸங்கா²ராதீ³னம் பச்சயா ஸங்கா²ராதி³பச்சயா, அவிஜ்ஜாத³யோ. தேஸம் ஸங்கா²ராதி³பச்சயானம். அயமேத்த² ஸங்கே²போ, வித்தா²ரோ பன விஸுத்³தி⁴மக்³க³ஸம்வண்ணனாயம் (விஸுத்³தி⁴. மஹாடீ. 2.572-573) வுத்தனயேன வேதி³தப்³போ³. ஸப்³ப³ஸங்கா²ரஸமதோ²திஆதி³ ஸப்³ப³ந்தி ஸப்³ப³ஸங்கா²ரஸமதா²தி³அபி⁴தே⁴ய்யம் ஸப்³ப³ம் அத்த²தோ நிப்³பா³னமேவ. இதா³னி அஸ்ஸ நிப்³பா³னபா⁴வம் த³ஸ்ஸேதும் ‘‘யஸ்மா ஹீ’’திஆதி³ வுத்தம். தந்தி நிப்³பா³னம். ஆக³ம்மாதி படிச்ச அரியமக்³க³ஸ்ஸ ஆரம்மணபச்சயஹேது. ஸம்மந்தீதி படிப்பஸ்ஸத்³தி⁴வூபஸமவஸேன ஸம்மந்தி. ததா² ஸந்தா ச ஸவிஸேஸம் உபஸந்தா நாம ஹோந்தீதி ஆஹ ‘‘வூபஸம்மந்தீ’’தி. ஏதேன ஸப்³பே³ ஸங்கா²ரா ஸம்மந்தி ஏத்தா²தி ஸப்³ப³ஸங்கா²ரஸமதோ², நிப்³பா³னந்தி த³ஸ்ஸேதி. ஸப்³ப³ஸங்கா²ரவிஸம்யுத்தே ஹி நிப்³பா³னே ஸப்³ப³ஸங்கா²ரவூபஸமபரியாயோ அட்ட²கதா²யம் வுத்தோ ஏவ. ஸேஸபதே³ஸுபி ஏஸேவ நயோ.

உபதீ⁴யதி ஏத்த² து³க்க²ந்தி உபதி⁴, க²ந்தா⁴த³யோ. படினிஸ்ஸட்டா²தி ஸமுச்சே²த³வஸேன பரிச்சத்தா ஹோந்தி. ஸப்³பா³ தண்ஹாதி அட்ட²ஸதப்பபே⁴தா³ ஸப்³பா³பி தண்ஹா. ஸப்³பே³ கிலேஸராகா³தி காமராக³ரூபராகா³தி³பே⁴தா³ ஸப்³பே³பி கிலேஸபூ⁴தா ராகா³, ஸப்³பே³பி வா கிலேஸா இத⁴ ‘‘கிலேஸராகா³’’தி அதி⁴ப்பேதா, ந லோப⁴விஸேஸா ஏவ சித்தஸ்ஸ பரிளாஹபா⁴வாபாத³னதோ. யதா²ஹ ‘‘ரத்தம்பி சித்தம் விபரிணதம், து³ட்ட²ம்பி சித்தம் விபரிணதம், மூள்ஹம்பி சித்தம் விபரிணத’’ந்தி (பாரா. 271). விரஜ்ஜந்தீதி பலுஜ்ஜந்தி விக்க²ம்ப⁴னதோ ஸப்³ப³ஸோ தேன விஸம்யுத்தபா⁴வதோ. ஸப்³ப³ம் து³க்க²ந்தி ஜராமரணாதி³பே⁴த³ம் ஸப்³ப³ம் வட்டது³க்க²ம். ப⁴வேன ப⁴வந்தி தேன தேன ப⁴வேன ப⁴வந்தரம் ப⁴வனிகந்திபா⁴வேன ஸம்ஸிப்³ப³தி. ப²லேன வா ஸத்³தி⁴ம் கம்மம் ஸதண்ஹஸ்ஸேவ ஆயதிம் புனப்³ப⁴வபா⁴வதோ. ததோ வானதோ நிக்க²ந்தம் தத்த² தஸ்ஸ ஸப்³ப³ஸோ அபா⁴வதோ. சிரனிஸஜ்ஜாசிரபா⁴ஸனேஹி பிட்டி²ஆகி³லாயனதாலுக³லஸோஸாதி³வஸேன காயகிலமதோ² சேவ காயவிஹேஸா ச வேதி³தப்³பா³. ஸா ச கோ² தே³ஸனாய அத்த²மஜானந்தானம் அபடிபஜ்ஜந்தானஞ்ச வஸேன, ஜானந்தானம் பன படிபஜ்ஜந்தானஞ்ச தே³ஸனாய காயபரிஸ்ஸமோபி ஸத்து² அபரிஸ்ஸமோயேவ. தேனாஹ ப⁴க³வா – ‘‘ந ச மம் த⁴ம்மாதி⁴கரணம் விஹேஸேஸீ’’தி (உதா³. 10). தேனேவாஹ – ‘‘யா அஜானந்தானம் தே³ஸனா நாம, ஸோ மம கிலமதோ² அஸ்ஸா’’தி. உப⁴யந்தி சித்தகிலமதோ² சித்தவிஹேஸா சாதி உப⁴யம்பேதம் பு³த்³தா⁴னம் நத்தி² போ³தி⁴மூலே ஏவ ஸமுச்சி²ன்னத்தா. அனுப்³ரூஹனம் ஸம்பிண்ட³னம். ஸோதி அபிஸ்ஸூதி நிபாதோ. வுத்³தி⁴ப்பத்தா வா அச்ச²ரியா அனச்ச²ரியா, வுத்³தி⁴அத்தோ²பி ஹி -காரோ ஹோதி யதா² ‘‘அஸேக்கா² த⁴ம்மா’’தி. கப்பானம் ஸதஸஹஸ்ஸம் சத்தாரி ச அஸங்க்²யேய்யானி ஸதே³வகஸ்ஸ லோகஸ்ஸ த⁴ம்மஸம்விபா⁴க³கரணத்த²மேவ பாரமியோ பூரேத்வா இதா³னி ஸமதி⁴க³தத⁴ம்மரஜ்ஜஸ்ஸ தத்த² அப்போஸ்ஸுக்கதாபத்திதீ³பனதா கா³த²த்த²ஸ்ஸ ச அச்ச²ரியதா தஸ்ஸ வுத்³தி⁴ப்பத்தீதி வேதி³தப்³ப³ம். அத்த²த்³வாரேன ஹி கா³தா²னம் அனச்ச²ரியதா. கோ³சரா அஹேஸுந்தி உபட்ட²ஹிம்ஸு. உபட்டா²னஞ்ச விதக்கேதப்³ப³தாவாதி ஆஹ ‘‘பரிவிதக்கயிதப்³ப³தம் பாபுணிம்ஸூ’’தி.

யதி³ ஸுகா²படிபதா³வ, கத²ம் கிச்ச²தாதி ஆஹ ‘‘பாரமீபூரணகாலே பனா’’திஆதி³. ஏவமாதீ³னி து³ப்பரிச்சஜானி தே³ந்தஸ்ஸ. ஹ-இதி வா ப்³யத்தந்தி ஏதஸ்மிம் அத்தே² நிபாதோ. ‘‘ஏகம்ஸத்தே²’’தி கேசி. ஹ ப்³யத்தம், ஏகம்ஸேன வா அலம் நிப்பயோஜனம் ஏவம் கிச்சே²ன அதி⁴க³தஸ்ஸ பகாஸிதும் தே³ஸிதுந்தி யோஜனா. ஹலந்தி வா அலந்தி இமினா ஸமானத்த²பத³ம் ‘‘ஹலந்தி வதா³மீ’’திஆதீ³ஸு விய. ராக³தோ³ஸபு²ட்டே²ஹீதி பு²ட்ட²விஸேன விய ஸப்பேன ராகே³ன தோ³ஸேன ச பு²ட்டே²ஹி அபி⁴பூ⁴தேஹி. ராக³தோ³ஸானுக³தேஹீதி ராக³தோ³ஸேஹி அனுப³ந்தே⁴ஹி.

நிச்சாதீ³னந்தி நிச்சாதீ³னம் சதுன்னம் விபல்லாஸானம். ஏவம்க³தந்தி ஏவம் அனிச்சந்திஆதி³னா ஆகாரேன பவத்தம் பு³ஜ்ஜி²தப்³ப³ம். காமராக³ரத்தா ச ப⁴வராக³ரத்தா ச நீவரணேஹி நிவுதசித்ததாய தி³ட்டி²ராக³ரத்தா விபரீதாபி⁴னிவேஸேன ந த³க்க²ந்தி யாதா²வதோ த⁴ம்மம் ந படிவிஜ்ஜி²ஸ்ஸந்தி. ஸபா⁴வேனாதி அவிபரீதஸபா⁴வேன. ஏவம் கா³ஹாபேதுந்தி அனிச்சந்திஆதி³னா ஸபா⁴வேன யாதா²வதோ த⁴ம்மம் ஜானாபேதும். ராக³தோ³ஸபரேததாபி நேஸம் ஸம்மூள்ஹபா⁴வேனேவாதி ஆஹ ‘‘தமோக²ந்தே⁴ன ஆவுடா’’தி.

த⁴ம்மதே³ஸனாய அப்போஸ்ஸுக்கதாபத்தியா காரணம் விபா⁴வேதும் ‘‘கஸ்மா பனா’’திஆதி³னா ஸயமேவ சோத³னம் ஸமுட்டா²பேதி. அஞ்ஞாதவேஸேனாதி இமஸ்ஸ ப⁴க³வதோ ஸாவகபா⁴வூபக³மனேன அஞ்ஞாதவேஸேன. ‘‘அஞ்ஞதரதாபஸவேஸேனா’’தி கேசி, ஸோ பனஸ்ஸ அரஹத்தாதி⁴க³மனேனேவ விக³ச்சே²ய்ய. திவித⁴ம் காரணம் அப்போஸ்ஸுக்கதாபத்தியா படிபக்க²ஸ்ஸ ப³லவபா⁴வோ, த⁴ம்மஸ்ஸ க³ம்பீ⁴ரதா, தத்த² ச ப⁴க³வதோ ஸாதிஸயம் கா³ரவந்தி தம் த³ஸ்ஸேதும் ‘‘தஸ்ஸ ஹீ’’திஆதி³ ஆரத்³த⁴ம். தத்த² படிபக்கா² நாம ராகா³த³யோ கிலேஸா ஸம்மாபடிபத்தியா அந்தராயகரத்தா. தேஸம் ப³லவபா⁴வதோ சிரபரிபா⁴வனாய ஸத்தஸந்தானதோ து³ப்³பி³ஸோதி⁴யதாய தே ஸத்தே மத்தஹத்தி²னோ விய து³ப்³ப³லபுரிஸம் அதி⁴ப⁴வித்வா அஜ்ஜோ²த்த²ரித்வா அனயப்³யஸனம் ஆபாதே³ந்தா அனேகஸதயோஜனாயாமவித்தா²ரம் ஸுனிசிதம் க⁴னஸன்னிவேஸம் கண்டகது³க்³க³ம்பி அதி⁴ஸேந்தி. தூ³ரபபே⁴த³து³ச்சே²ஜ்ஜதாஹி து³ப்³பி³ஸோதி⁴யதம் பன த³ஸ்ஸேதும் ‘‘அத²ஸ்ஸா’’திஆதி³ வுத்தம். தத்த² ச அந்தோ அமட்ட²தாய கஞ்ஜியபுண்ணா லாபு³, சிரபாரிவாஸிகதாய தக்கப⁴ரிதா சாடி, ஸ்னேஹதிந்தது³ப்³ப³லபா⁴வேன வஸாபீதபிலோதிகா, தேலமிஸ்ஸிததாய அஞ்ஜனமக்கி²தஹத்தோ² து³ப்³பி³ஸோத⁴னீயா வுத்தா. ஹீனூபமா சேதா ரூபபப³ந்த⁴பா⁴வதோ அசிரகாலிகத்தா ச மலீனதாய, கிலேஸஸம்கிலேஸோ ஏவ பன து³ப்³பி³ஸோத⁴னீயதரோ அனாதி³காலிகத்தா அரூபனிஸ்ஸிதத்தா ச. தேனாஹ ‘‘அதிஸம்கிலிட்டா²’’தி.

யதா² ச து³ப்³பி³ஸோத⁴னீயதரதாய, ஏவம் க³ம்பீ⁴ரது³த்³த³ஸது³ரனுபோ³தா⁴னம்பி வுத்தஉபமா ஹீனூபமாவ. க³ம்பீ⁴ரோபி த⁴ம்மோ படிபக்க²வித⁴மனேன ஞாணேன விஸத³பா⁴வம் ஆபன்னேன ஸுபாகடோ ப⁴வேய்ய, படிபக்க²வித⁴மனம் பன ஸம்மாபடிபத்திபடிப³த்³த⁴ம், ஸா ஸத்³த⁴ம்மஸ்ஸவனாதீ⁴னா, தம் ஸத்த²ரி த⁴ம்மே ச பஸாதா³யத்தம். ஸோ க³ருட்டா²னியானம் அஜ்ஜே²ஸனஹேதுகோதி பணாலிகாய ஸத்தானம் த⁴ம்மஸம்படிபத்தியா ப்³ரஹ்மாயாசனானிமித்தந்தி தம் த³ஸ்ஸேந்தோ ‘‘அபிசா’’திஆதி³மாஹ.

உபக்கிலேஸபூ⁴தம் அப்பம் ராகா³தி³ரஜம் ஏதஸ்ஸாதி அப்பரஜம், அப்பரஜம் அக்கி² பஞ்ஞாசக்கு² யேஸம் தே தம்ஸபா⁴வாதி கத்வா அப்பரஜக்க²ஜாதிகாதி இமமத்த²ம் த³ஸ்ஸேந்தோ ‘‘பஞ்ஞாமயே’’திஆதி³மாஹ. அப்பம் ராகா³தி³ரஜம் யேஸம் தம்ஸபா⁴வா அப்பரஜக்க²ஜாதிகாதி ஏவமேத்த² அத்தோ² வேதி³தப்³போ³. அஸ்ஸவனதாதி ‘‘ஸயம் அபி⁴ஞ்ஞா’’திஆதீ³ஸு விய கரணே பச்சத்தவசனந்தி ஆஹ ‘‘அஸ்ஸவனதாயா’’தி. த³ஸபுஞ்ஞகிரியவஸேனாதி தா³னாதி³த³ஸவித⁴புஞ்ஞகிரியவத்தூ²னம் வஸேன. தேனாஹ ‘‘கதாதி⁴காரா’’திஆதி³. பபஞ்சஸூத³னியம் (ம. நி. அட்ட². 1.282) பன ‘‘த்³வாத³ஸபுஞ்ஞகிரியவஸேனா’’தி வுத்தம், தம் தா³னாதீ³ஸு ஸரணக³மன-பரஹிதபரிணாமனாதி³பக்கி²பனவஸேன வுத்தம்.

ராகா³தி³மலேன ஸமலேஹி பூரணாதீ³ஹி ச²ஹி ஸத்தா²ரேஹி ஸத்து²படிஞ்ஞேஹி கப்³ப³ரசனாவஸேன சிந்தாகவிஆதி³பா⁴வே ட²த்வா தக்கபரியாஹதம் வீமம்ஸானுசரிதம் ஸயம்படிபா⁴னம் சிந்திதோ. தே கிர பு³த்³த⁴கோலாஹலானுஸ்ஸவேன ஸஞ்ஜாதகுதூஹலம் லோகம் வஞ்சேந்தா கோஹஞ்ஞே ட²த்வா ஸப்³ப³ஞ்ஞுதம் படிஜானந்தா யம் கஞ்சி அத⁴ம்மமேவ ‘‘த⁴ம்மோ’’தி தீ³பேஸும். தேனாஹ ‘‘தே ஹி புரேதரம் உப்பஜ்ஜித்வா’’திஆதி³. அபாபுரேதந்தி ஏதம் கஸ்ஸபஸ்ஸ ப⁴க³வதோ ஸாஸனந்தரதா⁴னதோ பபு⁴தி பிஹிதம் நிப்³பா³னமஹாத்³வாரம் அரியமக்³க³ம் ஸத்³த⁴ம்மதே³ஸனாஹத்தே²ன அபாபுர விவர.

ஸேலோ பப்³ப³தோ உச்சோ ஹோதி தி²ரோ ச, ந பம்ஸுபப்³ப³தோ மிஸ்ஸகபப்³ப³தோ சாதி ஆஹ ‘‘ஸேலே யதா² பப்³ப³தமுத்³த⁴னீ’’தி. த⁴ம்மமயம் பாஸாத³ந்தி லோகுத்தரத⁴ம்மமாஹ. ஸோ ஹி ஸப்³ப³ஸோ பஸாதா³வஹோ, ஸப்³ப³த⁴ம்மே அதிக்கம்ம அப்³பு⁴க்³க³தட்டே²ன பாஸாத³ஸதி³ஸோ ச. பஞ்ஞாபரியாயோ வா இத⁴ த⁴ம்ம-ஸத்³தோ³தி வுத்தம் ‘‘பஞ்ஞாமய’’ந்தி. ஸா ஹி அப்³பு⁴க்³க³தட்டே²ன பாஸாதோ³தி அபி⁴த⁴ம்மே ஆக³தா. ததா² சாஹ –

‘‘பஞ்ஞாபாஸாத³மாருய்ஹ, அஸோகோ ஸோகினிம் பஜம்;

பப்³ப³தட்டோ²வ பூ⁴மட்டே², தீ⁴ரோ பா³லே அவேக்க²தீ’’தி. (த⁴. ப. 28);

யதா² ஹீதிஆதீ³ஸு யதா² ச பப்³ப³தே ட²த்வா அந்த⁴காரே ஹேட்டா² ஓலோகேந்தஸ்ஸ புரிஸஸ்ஸ கே²த்தகேதா³ரபாளிகுடிகாயோ தத்த² ஸயிதமனுஸ்ஸா ச ந பஞ்ஞாயந்தி அனுஜ்ஜலபா⁴வதோ, குடிகாஸு பன அக்³கி³ஜாலா பஞ்ஞாயதி ஸமுஜ்ஜலபா⁴வதோ, ஏவம் த⁴ம்மபாஸாத³மாருய்ஹ ஸத்தலோகம் ஓலோகயதோ ப⁴க³வதோ ஞாணஸ்ஸ ஆபாத²ம் நாக³ச்ச²ந்தி அகதகல்யாணா ஸத்தா, ஞாணக்³கி³னா அனுஜ்ஜலபா⁴வதோ அனுளாரபா⁴வதோ ச ரத்திம் கி²த்தா ஸரா விய ஹோந்தி, கதகல்யாணா பன ப⁴ப்³ப³புக்³க³லா தூ³ரே டி²தாபி ப⁴க³வதோ ஆபாத²ம் ஆக³ச்ச²ந்தி பரிபக்கஞாணக்³கி³தாய ஸமுஜ்ஜலபா⁴வதோ உளாரஸந்தானதாய ஹிமவந்தபப்³ப³தோ விய சாதி ஏவம் யோஜனா வேதி³தப்³பா³.

க³ருட்டா²னீயம் பயிருபாஸித்வா க³ருதரம் பயோஜனம் உத்³தி³ஸ்ஸ அபி⁴பத்த²னா அஜ்ஜே²ஸனா, ஸாபி அத்த²தோ யாசனாவ ஹோதீதி ஆஹ ‘‘அஜ்ஜே²ஸனந்தி யாசன’’ந்தி. பதே³ஸவிஸயம் ஞாணத³ஸ்ஸனம் அஹுத்வா பு³த்³தா⁴னம்யேவ ஆவேணிகபா⁴வதோ இத³ம் ஞாணத்³வயம் ‘‘பு³த்³த⁴சக்கூ²’’தி வுச்சதீதி ஆஹ ‘‘இமேஸஞ்ஹி த்³வின்னம் ஞாணானம் ‘பு³த்³த⁴சக்கூ²’தி நாம’’ந்தி. திண்ணம் மக்³க்³க³ஞாணானந்தி ஹேட்டி²மானம் திண்ணம் மக்³க³ஞாணானம் ‘‘த⁴ம்மசக்கூ²’’தி நாமம் சதுஸச்சத⁴ம்மத³ஸ்ஸனமத்தபா⁴வதோ. யதோ தானி ஞாணானி விஜ்ஜூபமபா⁴வேன வுத்தானி, அக்³க³மக்³க³ஞாணம் பன ஞாணகிச்சஸ்ஸ ஸிகா²ப்பத்தியா த³ஸ்ஸனமத்தம் ந ஹோதீதி ‘‘த⁴ம்மசக்கூ²’’தி ந வுச்சதி, யதோ தம் வஜிரூபமபா⁴வேன வுத்தம். வுத்தனயேனாதி ‘‘அப்பரஜக்க²ஜாதிகா’’தி ஏத்த² வுத்தனயேன. யஸ்மா மந்த³கிலேஸா ‘‘அப்பரஜக்கா²’’தி வுத்தா, தஸ்மா ப³ஹலகிலேஸா ‘‘மஹாரஜக்கா²’’தி வேதி³தப்³பா³. படிபக்க²வித⁴மனஸமத்த²தாய திக்கா²னி ஸூரானி விஸதா³னி, வுத்தவிபரியாயேன முதூ³னி. ஸத்³தா⁴த³யோ ஆகாராதி ஸத்³த³ஹனாதி³ப்பகாரே வத³தி. ஸுந்த³ராதி கல்யாணா. ஸம்மோஹவினோத³னியம் பன ‘‘யேஸம் ஆஸயாத³யோ கோட்டா²ஸா ஸுந்த³ரா, தே ஸ்வாகாரா’’தி வுத்தம், தம் இமாய அத்த²வண்ணனாய அஞ்ஞத³த்து² ஸம்ஸந்த³தீதி த³ட்ட²ப்³ப³ம். காரணம் நாம பச்சயாகாரோ, ஸச்சானி வா. பரலோகந்தி ஸம்பராயம். தம் து³க்கா²வஹம் வஜ்ஜம் விய ப⁴யதோ பஸ்ஸிதப்³ப³ந்தி வுத்தம் ‘‘பரலோகஞ்சேவ வஜ்ஜஞ்ச ப⁴யதோ பஸ்ஸந்தீ’’தி. ஸம்பத்திப⁴வதோ வா அஞ்ஞத்தா விபத்திப⁴வோ பரலோகோதி வுத்தம் ‘‘பர…பே… பஸ்ஸந்தீ’’தி.

அயம் பனேத்த² பாளீதி ஏத்த² ‘‘அப்பரஜக்கா²’’தி பதா³னம் அத்த²விபா⁴வனே அயம் தஸ்ஸ ததா²பா⁴வஸாத⁴னபாளி. ஸத்³தா⁴தீ³னஞ்ஹி விமுத்தபரிபாசகத⁴ம்மானம் ப³லவபா⁴வோ தப்படிபக்கா²னம் பாபத⁴ம்மானம் து³ப்³ப³லபா⁴வே ஸதி ஹோதி. தேஸஞ்ச ப³லவபா⁴வோ ஸத்³தா⁴தீ³னம் து³ப்³ப³லபா⁴வேதி விமுத்திபரிபாசகத⁴ம்மானம் ஸவிஸேஸம் அத்தி²தானத்தி²தாவஸேன அப்பரஜக்கா² மஹாரஜக்கா²திஆத³யோ பாளியம் (படி. ம. 1.111) விப⁴ஜித்வா த³ஸ்ஸிதா ‘‘ஸத்³தோ⁴ புக்³க³லோ அப்பரஜக்கோ²’’திஆதி³னா. க²ந்தா⁴த³யோ ஏவ லுஜ்ஜனபலுஜ்ஜனட்டே²ன லோகோ ஸம்பத்திப⁴வபூ⁴தோ லோகோ ஸம்பத்திப⁴வலோகோ, ஸுக³திஸங்கா²தோ உபபத்திப⁴வோ. ஸம்பத்தி ப⁴வதி ஏதேனாதி ஸம்பத்திஸம்ப⁴வலோகோ, ஸுக³திஸம்வத்தனியோ கம்மப⁴வோ. து³க்³க³திஸங்கா²தஉபபத்திப⁴வ-து³க்³க³திஸம்வத்தனியகம்மப⁴வா விபத்திப⁴வலோக-விபத்திஸம்ப⁴வலோகா. புன ஏககது³காதி³வஸேன லோகம் விப⁴ஜித்வா த³ஸ்ஸேதும் ‘‘ஏகோ லோகோ’’திஆதி³ வுத்தம். ஆஹாராத³யோ விய ஹி ஆஹாரட்டி²திகா ஸங்கா²ரா ஸப்³பே³ லுஜ்ஜனட்டே²ன லோகோதி. தத்த² ஏகோ லோகோ ஸப்³பே³ ஸத்தா ஆஹாரட்டி²திகாதி யாயம் புக்³க³லாதி⁴ட்டா²னாய கதா²ய ஸப்³பே³ஸம் ஸங்கா²ரானம் பச்சயாயத்தவுத்திதா வுத்தா, தாய ஸப்³போ³ ஸங்கா²ரலோகோ ஏகோ ஏகவிதோ⁴ பகாரந்தரஸ்ஸ அபா⁴வதோ. த்³வே லோகாதிஆதீ³ஸுபி இமினா நயேன அத்தோ² வேதி³தப்³போ³. நாமக்³க³ஹணேன சேத்த² நிப்³பா³னஸ்ஸ அக்³க³ஹணம் தஸ்ஸ அலோகஸபா⁴வத்தா.

நனு ச ‘‘ஆஹாரட்டி²திகா’’தி ஏத்த² பச்சயாயத்தவுத்திதாய மக்³க³ப²லானம்பி லோகதா ஆபஜ்ஜதீதி? நாபஜ்ஜதி, பரிஞ்ஞேய்யானம் து³க்க²ஸச்சத⁴ம்மானம் இத⁴ ‘‘லோகோ’’தி அதி⁴ப்பேதத்தா. அத² வா ந லுஜ்ஜதி ந பலுஜ்ஜதீதி யோ க³ஹிதோ ததா² ந ஹோதி, ஸோ லோகோதி தம்க³ஹணரஹிதானம் லோகுத்தரானம் நத்தி² லோகதா. உபாதா³னானம் ஆரம்மணபூ⁴தா க²ந்தா⁴ உபாதா³னக்க²ந்தா⁴. அனுரோதா⁴தி³வத்து²பூ⁴தா லாபா⁴த³யோ அட்ட² லோகத⁴ம்மா. த³ஸாயதனானீதி த³ஸ ரூபாயதனானி. ஸேஸம் ஸுவிஞ்ஞேய்யமேவ. விவட்டஜ்ஜா²ஸயஸ்ஸ அதி⁴ப்பேதத்தா தஸ்ஸ ச ஸப்³ப³ம் தேபூ⁴மககம்மம் க³ரஹிதப்³ப³ம் வஜ்ஜிதப்³ப³ஞ்ச ஹுத்வா உபட்டா²தீதி வுத்தம் ‘‘ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா’’தி. அப்பரஜக்க²தாதீ³ஸு பஞ்சஸு து³கேஸு ஏகேகஸ்மிம் த³ஸ த³ஸ கத்வா ‘‘பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதீ’’தி வுத்தம். அத² வா அன்வயதோ ப்³யதிரேகதோ ச ஸத்³தா⁴தீ³னம் இந்த்³ரியானம் பரோபரியத்தம் ஜானாதீதி கத்வா ததா² வுத்தம். ஏத்த² ச அப்பரஜக்கா²தி³ப⁴ப்³பா³தி³வஸேன ஆவஜ்ஜேந்தஸ்ஸ ப⁴க³வதோ தே ஸத்தா புஞ்ஜபுஞ்ஜாவ ஹுத்வா உபட்ட²ஹந்தி, ந ஏகேகா.

உப்பலானி ஏத்த² ஸந்தீதி உப்பலினீ. உப்பலக³ச்சோ²பி ஜலாஸயோபி ச. இத⁴ பன ஜலாஸயோ அதி⁴ப்பேதோதி ஆஹ ‘‘உப்பலவனே’’தி. யானி ஹி உத³கஸ்ஸ அந்தோ நிமுக்³கா³னேவ ஹுத்வா புஸந்தி வட்³ட⁴ந்தி, தானி அந்தோனிமுக்³க³போஸீனி. தீ³பிதானீதி அட்ட²கதா²யம் பகாஸிதானி, இதே⁴வ வா ‘‘அஞ்ஞானிபீ’’திஆதி³னா த³ஸ்ஸிதானி. உக்³க⁴டிதஞ்ஞூதி உக்³க⁴டனம் நாம ஞாணுக்³க⁴டனம், ஞாணேன உக்³க⁴டிதமத்தேனேவ ஜானாதீதி அத்தோ². விபஞ்சிதம் வித்தா²ரிதமேவ அத்த²ம் ஜானாதீதி விபஞ்சிதஞ்ஞூ. நித்³தே³ஸாதீ³ஹி த⁴ம்மாபி⁴ஸமயாய நேதப்³போ³தி நேய்யோ. பஜ்ஜதி அத்தோ² ஏதேனாதி பத³ம், பஜ்ஜதே ஞாயதேதி வா பத³ம், தத³த்தோ². பத³ம் பரமம் ஏதஸ்ஸ, ந ஸச்சாபி⁴ஸம்போ³தோ⁴தி பத³பரமோ.

உதா³ஹடவேலாயாதி உதா³ஹாரே த⁴ம்மஸ்ஸ உத்³தே³ஸே உதா³ஹடமத்தேயேவ. த⁴ம்மாபி⁴ஸமயோதி சதுஸச்சத⁴ம்மஸ்ஸ ஞாணேன ஸத்³தி⁴ம் அபி⁴ஸமயோ. அயம் வுச்சதீதி அயம் ‘‘சத்தாரோ ஸதிபட்டா²னா’’திஆதி³னா நயேன ஸம்கி²த்தேன மாதிகாய ட²பியமானாய தே³ஸனானுஸாரேன ஞாணம் பேஸேத்வா அரஹத்தம் க³ண்ஹிதும் ஸமத்தோ² புக்³க³லோ ‘‘உக்³க⁴டிதஞ்ஞூ’’தி வுச்சதி. அயம் வுச்சதீதி ஸம்கி²த்தேன மாதிகம் ட²பேத்வா வித்தா²ரேன அத்தே² விப⁴ஜியமானே அரஹத்தம் பாபுணிதும் ஸமத்தோ² புக்³க³லோ ‘‘விபஞ்சிதஞ்ஞூ’’தி வுச்சதி. உத்³தே³ஸதோதி உத்³தே³ஸஹேது. உத்³தி³ஸந்தஸ்ஸ உத்³தி³ஸாபேந்தஸ்ஸ வாதி அத்தோ². பரிபுச்ச²தோதி அத்த²ம் பரிபுச்ச²ந்தஸ்ஸ. அனுபுப்³பே³ன த⁴ம்மாபி⁴ஸமயோ ஹோதீதி அனுக்கமேன அரஹத்தப்பத்தி ஹோதி. ந தாய ஜாதியா த⁴ம்மாபி⁴ஸமயோ ஹோதீதி தேன அத்தபா⁴வேன மக்³க³ம் வா ப²லம் வா அந்தமஸோ ஜா²னம் வா விபஸ்ஸனம் வா நிப்³ப³த்தேதும் ந ஸக்கோதி. அயம் வுச்சதி பத³பரமோதி அயம் புக்³க³லோ ச²ப்³பி³த⁴ம் ப்³யஞ்ஜனபத³ம் ச²ப்³பி³த⁴ம் அத்த²பத³ந்தி இத³ம் பத³மேவ பரமம் அஸ்ஸாதி பத³பரமோதி வுச்சதீதி அத்தோ².

வாஸனா ஹோதீதி தே³ஸனா ப²லவோஹாரேன வாஸனா ஹோதீதி வுத்தா. ந ஹி காசி பு³த்³தா⁴னம் தே³ஸனா நிரத்த²கா. யேதி யே து³விதே⁴ புக்³க³லே. விப⁴ங்கே³ கம்மாவரணேனாதி பஞ்சவிதே⁴ன ஆனந்தரியகம்மேன. விபாகாவரணேனாதி அஹேதுகபடிஸந்தி⁴யா. யஸ்மா பன து³ஹேதுகானம்பி அரியமக்³க³படிவேதோ⁴ நத்தி², தஸ்மா து³ஹேதுகா படிஸந்தி⁴பி விபாகாவரணமேவாதி வேதி³தப்³பா³. கிலேஸாவரணேனாதி நியதமிச்சா²தி³ட்டி²யா. அஸ்ஸத்³தா⁴தி பு³த்³தா⁴தீ³ஸு ஸத்³தா⁴ரஹிதா. அச்ச²ந்தி³காதி கத்துகம்யதாச²ந்த³ரஹிதா. உத்தரகுருகா மனுஸ்ஸா அச்ச²ந்தி³கட்டா²னம் பவிட்டா². து³ப்பஞ்ஞாதி ப⁴வங்க³பஞ்ஞாய பரிஹீனா. ப⁴வங்க³பஞ்ஞாய பன பரிபுண்ணாயபி யஸ்ஸ ப⁴வங்க³சலனம் லோகுத்தரஸ்ஸ பச்சயோ ந ஹோதி, ஸோபி து³ப்பஞ்ஞோ ஏவ நாம. அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தந்தி குஸலேஸு த⁴ம்மேஸு ஸம்மத்தனியாமஸங்கா²தம் மக்³க³ம் ஓக்கமிதும் அதி⁴க³ந்தும் அப⁴ப்³பா³. ந கம்மாவரணேனாதிஆதீ³னி வுத்தவிபரியாயேன வேதி³தப்³பா³னி. ராக³சரிதாதி³ஆதீ³ஸு யம் வத்தப்³ப³ம், தம் பரமத்த²தீ³பனியம் விஸுத்³தி⁴மக்³க³ஸம்வண்ணனாயம் (விஸுத்³தி⁴. மஹாடீ. 1.43) வுத்தனயேன வேதி³தப்³ப³ம்.

நிப்³பா³னஸ்ஸ த்³வாரம் பவிஸனமக்³கோ³ விவரித்வா ட²பிதோ மஹாகருணூபனிஸ்ஸயேன ஸயம்பு⁴ஞாணேன அதி⁴க³தத்தா. ஸத்³த⁴ம் பமுஞ்சந்தூதி அத்தனோ ஸத்³த⁴ம் த⁴ம்மஸம்படிச்ச²னயோக்³யம் கத்வா விஸ்ஸஜ்ஜேந்து, ஸத்³த³ஹனாகாரேன நம் உபட்ட²பேந்தூதி அத்தோ². ஸுகே²ன அகிச்சே²ன பவத்தனீயதாய ஸுப்பவத்திதம். ந பா⁴ஸிம் ந பா⁴ஸிஸ்ஸாமீதி சிந்தேஸிம்.

ஸத்து² ஸந்திகம் உபக³தானம் தே³வானம் ப்³ரஹ்மானஞ்ச தஸ்ஸ புரதோ அந்தரதா⁴னம் நாம அதிட்ட²னந்தி ஆஹ ‘‘ஸகட்டா²னமேவ க³தோ’’தி. ஸத்³தி⁴ந்த்³ரியாதி³ ஸம்மாதி³ட்டி²ஆதி³கோ த⁴ம்மோ ஏவ வினேய்யஸந்தானே பவத்தனட்டே²ன சக்கந்தி த⁴ம்மசக்கம். அத² வா சக்கந்தி ஆணா. த⁴ம்மந்தி தே³ஸனா. அத² வா அத்த²த⁴ம்மதோ அனபேதத்தா த⁴ம்மஞ்ச தம் பவத்தனட்டே²ன சக்கஞ்சாதி த⁴ம்மசக்கம். த⁴ம்மேன ஞாயேன சக்கந்திபி த⁴ம்மசக்கம். யதா²ஹ ‘‘த⁴ம்மஞ்ச பவத்தேதி சக்கஞ்சாதி த⁴ம்மசக்கம், சக்கஞ்ச பவத்தேதி த⁴ம்மஞ்சாதி த⁴ம்மசக்கம், த⁴ம்மேன பவத்தேதீதி த⁴ம்மசக்கம், த⁴ம்மசரியாய பவத்தேதீதி த⁴ம்மசக்க’’ந்திஆதி³ (படி. ம. 2.40-41). பவத்தேஸீதி பட்ட²பேஸி.

ப்³ரஹ்மாயாசனஸுத்தவண்ணனா நிட்டி²தா.