4. இஸ்ஸத்தஸுத்தவண்ணனா

135. அட்டு²ப்பத்திகோதி ஏத்த² கா அஸ்ஸ அட்டு²ப்பத்தி? தித்தி²யானம் ப⁴க³வதோ பி⁴க்கு²ஸங்க⁴ஸ்ஸ ச அலாபா⁴ய அயஸாய பரிஸக்கனம். தம் வித்தா²ரதோ த³ஸ்ஸேதும் ‘‘ப⁴க³வதோ கிரா’’திஆதி³ வுத்தம். யதா² தம் ஸப்³ப³தி³ஸாஸு யமகமஹாமேகோ⁴ உட்ட²ஹித்வா மஹாஓக⁴ம் விய ஸப்³பா³ பாரமியோ ‘‘இமஸ்மிம்யேவ அத்தபா⁴வே விபாகம் த³ஸ்ஸாமா’’தி ஸம்பிண்டி³தா விய லாப⁴ஸக்காரமஹோக⁴ம் நிப்³ப³த்தயிம்ஸு. ததோ ததோ அன்னபானயானவத்த²மாலாக³ந்த⁴விலேபனாதி³ஹத்தா² க²த்தியப்³ராஹ்மணாத³யோ ஆக³ந்த்வா – ‘‘கஹம் ப⁴க³வா, கஹம் தே³வதே³வோ நராஸபோ⁴ லோகனாதோ²’’தி ப⁴க³வந்தம் பரியேஸந்தி, ஸகடஸதேஹிபி பச்சயே ஆஹரித்வா ஓகாஸம் அலப⁴மானா ஸமந்தா கா³வுதப்பமாணம்பி ஸகடது⁴ரேன ஸகடது⁴ரம் ஆஹச்ச திட்ட²ந்தி சேவ அனுவத்தந்தி ச அந்த⁴கவிந்த³ப்³ராஹ்மணாத³யோ விய. ஸப்³ப³ம் க²ந்த⁴கே (மஹாவ. 282) தேஸு தேஸு ஸுத்தேஸு ச ஆக³தனயேன வேதி³தப்³ப³ம். யதா² ச ப⁴க³வதோ, ஏவம் பி⁴க்கு²ஸங்க⁴ஸ்ஸபி. வுத்தம்பி – ‘‘தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவர…பே… பரிக்கா²ரானம், பி⁴க்கு²ஸங்கோ⁴பி கோ²’’திஆதி³ (உதா³. 38), ததா² ‘‘யாவதா கோ², சுந்த³, ஏதரஹி ஸங்கோ⁴ வா க³ணோ வா லோகே உப்பன்னோ, நாஹம், சுந்த³, அஞ்ஞம் ஏகம் ஸங்க⁴ம்பி ஏகம் க³ணம்பி ஸமனுபஸ்ஸாமி ஏவம் லாப⁴க்³க³யஸக்³க³ப்பத்தம், யத²ரிவாயம், சுந்த³, பி⁴க்கு²ஸங்கோ⁴’’தி (தீ³. நி. 3.176). ஏவந்தி இதா³னி வுச்சமானாகாரேன. நிஜ்ஜ²த்திந்தி ஸஞ்ஞத்திம். நந்தி கத²ம்.

ஏவம் புச்சி²தும் அயுத்தம் தித்தி²யானம் கதா² மஹாஜனஸன்னிபாதே நிய்யாதிதா ஹோதீதி. தஸ்மிம் தா³தப்³ப³ம், சித்தப்பஸாத³மத்தேன தே³ந்தேபி ஹி புஞ்ஞம் பவட்³ட⁴தி. ஆரோசிதம் அத்தனோதி அதி⁴ப்பாயோ. ப⁴க³வாதி ஸத்து² ஆமந்தனம். சித்தம் நாம யதா²பச்சயம் பவத்தமானம் நிக³ண்டா²…பே… பஸீத³தி பஸன்னஸ்ஸாதி அதி⁴ப்பாயோ. புப்³பே³ அவிஸேஸதோ தே³ய்யத⁴ம்மஸ்ஸ தா³தப்³ப³ட்டா²னம் நாம புச்சி²தம், இதா³னி தஸ்ஸ மஹப்ப²லபா⁴வகரோ த³க்கி²ணேய்யவிஸேஸோதி ஆஹ ‘‘அஞ்ஞம் தயா பட²மம் புச்சி²தம், அஞ்ஞம் பச்சா²’’தி. ஸல்லக்கே²ஹி ஏதம். பச்சி²மம் புரிமேன ஸத்³தி⁴ம் ஆனேஹீதி அதி⁴ப்பாயோ. புச்சி²தஸ்ஸ நாம பஞ்ஹஸ்ஸ கத²னம் மய்ஹமேவ பா⁴ரோ. ஸமுபப்³யூள்ஹோதி ஏகதோ ஸேனாய ராஸிவஸேன ஸம்பிண்டி³தோதி அத்தோ². தேனாஹ ‘‘ராஸிபூ⁴தோ’’தி. அஸிக்கி²தோதி ஸத்தட்ட²ஸம்வச்ச²ரானி த⁴னுஸிப்பேன ஸிக்கி²தோ. த⁴னுஸிப்பம் ஸிக்கி²த்வாபி கோசி கதஹத்தோ² ந ஹோதி, அயம் பன அஸிக்கி²தோ ந கதஹத்தோ², போங்கா²னுபோங்க²பா⁴வோயேவ ப்³யாமமுட்டி²ப³ந்தோ⁴. திணபுஞ்ஜமத்திகாபுஞ்ஜாதீ³ஸூதி ஆதி³-ஸத்³தே³ன பம்ஸுபுஞ்ஜவாலுகபுஞ்ஜஸாரப²லகஅயோக⁴னாதி³கே ஸங்க³ண்ஹாதி. அகதபரிசயோதி தேஸம் ஸந்திகா விஜ்ஜ²னட்டே²ன அகதபரிசயோ. ராஜராஜமஹாமத்தாதி³கே உபேச்ச அஸனம் உபாஸனம், ந கதம் உபாஸனம் ஏதேனாதி அகதூபாஸனோ. அஸிக்கி²ததாதி³னா பீ⁴ருபா⁴வேன வா காயஸ்ஸ ச²ம்ப⁴னம் ஸங்கம்பனம் உத்தாஸோ ஏதஸ்ஸ அத்தீ²தி ச²ம்பீ⁴தி ஆஹ ‘‘பவேதி⁴தகாயோ’’தி.

த³க்கி²ணேய்யதாய அதி⁴ப்பேதத்தா ‘‘அரஹத்தமக்³கே³ன காமச்ச²ந்தோ³ பஹீனோ ஹோதீ’’தி ஆஹ. அச்சந்தப்பஹானஸ்ஸ இச்சி²தத்தா ததியேனேவ குக்குச்சம் பஹீனம் ஹோதி படிக⁴ஸம்பயோக³ம். அஸேக்க²ஸ்ஸ அயந்தி அஸேக்க²ம், ஸீலக்க²ந்தோ⁴. தயித³ம் ந அக்³க³ப²லம் ஸீலமேவ அதி⁴ப்பேதம், அத² கோ² யம் கிஞ்சி அஸேக்க²ஸந்தானே பவத்தம் ஸீலம், லோகுத்தரோ ஏவ ந அதி⁴ப்பேதோ ஸிக்கா²ய ஜாதத்தா, ஏவம் விமுத்திக்க²ந்தோ⁴பீதி. ஸேக்க²ஸ்ஸ ஏஸோதி வா, அபரியோஸிதஸிக்க²த்தா ஸயமேவ ஸிக்க²தீதி வா ஸேக்கோ², சதூஸு மக்³கே³ஸு ஹேட்டி²மேஸு ச தீஸு ப²லேஸு ஸீலக்க²ந்தோ⁴. உபரி ஸிக்கி²தப்³பா³பா⁴வதோ அஸேக்கோ². வுட்³டி⁴ப்பத்தோ ஸேக்கோ²தி அஸேக்கோ². அக்³க³ப²லபூ⁴தோ ஸீலக்க²ந்தோ⁴ வுச்சேய்ய, அட்ட²கதா²யம் பன விபஸ்ஸகஸ்ஸ ஸீலஸ்ஸ அதி⁴ப்பேதத்தா ததா² அத்தோ² வுத்தோ. ஸப்³ப³த்தா²தி ‘‘அஸேக்கே²னா’’திஆதீ³ஸு. ஏத்த² ச யதா² ஸீலஸமாதி⁴பஞ்ஞாக்க²ந்தா⁴ மிஸ்ஸகா அதி⁴ப்பேதா, ஏவம் விமுத்திக்க²ந்தா⁴பீதி தத³ங்க³விமுத்திஆத³யோபி வேதி³தப்³பா³, ந படிப்பஸ்ஸத்³தி⁴விமுத்தி ஏவ.

யேன ஸிப்பேன இஸ்ஸாஸோ ஹோதி, தம் இஸ்ஸத்தந்தி ஆஹ ‘‘உஸுஸிப்ப’’ந்தி. யஸ்ஸா வாயோதா⁴துயா வஸேன ஸரீரம் ஸஞ்ஜாததா²மம் ஹோதி, தம் ப³லபச்சயம் ஸந்தா⁴யாஹ ‘‘ப³லம் நாம வாயோதா⁴தூ’’தி. ஸமப்பவத்திதோ ஹி விஸமப்பவத்தினிவாரகதா⁴து ப³லம் நாம, தேன ததோ அஞ்ஞம் ப³லரூபம் நாம நத்தி².

யஸ்மா அரஹா ஏவ ஏகந்ததோ ஸோரதோ, தஸ்ஸ பா⁴வோ ஸோரச்சந்தி ஆஹ ‘‘ஸோரச்சந்தி அரஹத்த’’ந்தி. ஏதே த்³வேதி க²ந்தி ஸோரச்சந்தி ஏதே த்³வே த⁴ம்மா. பானீயம் பிவந்தி ஏத்தா²தி பபா, யோ கோசி ஜலாஸயோ யம் கிஞ்சி பானீயட்டா²னந்தி ஆஹ ‘‘சதுரஸ்ஸபோக்க²ரணீஆதீ³னீ’’தி. உத³கவிகூலாதீ³ஸு கமந்தி அதிக்கமந்தி ஏதேஹீதி ஸங்கமனானி, ஸேதுஆதீ³னி. ஸேதுகரணயுத்தட்டா²னே ஸேதும், சங்கமனகரணயுத்தட்டா²னே சங்கமனம், மக்³க³கரணயுத்தட்டா²னே மக்³க³ம் கரேய்யாதி அயமேத்த² அதி⁴ப்பாயோ. தேனாஹ ‘‘பண்ணாஸா’’திஆதி³.

பி⁴க்கா²சாரவத்தந்தி அரியானம் ஹிதம் வத்தபடிபத்திம். தே³ந்தோபீதி பி-ஸத்³தே³ன அகீ²ணாஸவஸ்ஸ தே³ந்தோபீதி இமமத்த²ம் த³ஸ்ஸேதி யஸ்ஸ கஸ்ஸசிபி தே³ந்தேனபி கம்மப²லம் ஸத்³த³ஹித்வா விப்பஸன்னசித்தேனேவ தா³தப்³ப³த்தா. த²னயந்தி இத³ம் தஸ்ஸ மஹாமேக⁴பா⁴வத³ஸ்ஸனம், யோ ஹி மஹாவஸ்ஸம் வஸ்ஸதி, ஸோ க³ஜ்ஜந்தோ விஜ்ஜும்மாலம் விஸ்ஸஜ்ஜேந்தோ பவஸ்ஸதி. அபி⁴ஸங்க²ரித்வா ஸமோதா⁴னேத்வாதி கா²த³னீயஸ்ஸ விவித⁴ஜாதியானி ஸம்பிண்டே³த்வா. தேனாஹ ‘‘ராஸிம் கத்வா’’தி.

பகிரணம் நாம விகிரணம்பி ஹோதி அனேகத்த²த்தா தா⁴தூனந்தி ஆஹ ‘‘விகிரதீ’’தி. பகிரந்தோ விய வா தா³னம் தே³தீதி இமினா கு³ணகே²த்தமேவ அபரியேஸித்வா கருணாகே²த்தேபி மஹாதா³னம் பவத்தேதீதி த³ஸ்ஸேதி. தேன ‘‘பகிரேதீ’’தி வத³ந்தேன ப⁴க³வதா அட்டு²ப்பத்தியம் ஆக³ததித்தி²யவாதே³ன அப்படிஸேதி⁴ததாபி தீ³பிதா ஹோதி. புஞ்ஞதா⁴ராதி புஞ்ஞமயதா⁴ரா புஞ்ஞாபி⁴ஸந்தா³. ஸினேஹயந்தீதி தூ²லதா⁴ரேனபி ஸினேஹேன ஸினித்³த⁴ம் கரோந்தீ. கிலேத³யந்தீதி அல்லபா⁴வம் பாபயந்தீ. யதா²யம் புஞ்ஞதா⁴ரா தா³தாரம் அந்தோ ஸினேஹேதி பூரேதி அபி⁴ஸந்தே³தி, ஏவம் படிக்³கா³ஹகானம்பி அந்தோ ஸினேஹேதி பூரேதி அபி⁴ஸந்தே³தி. தேனேவாஹ ‘‘த³த³ம் பியோ ஹோதி ப⁴ஜந்தி நம் ப³ஹூ’’திஆதி³ (அ. நி. 5.34) ஏவம் ஸந்தேபி ‘‘தா³தாரம் அபி⁴வஸ்ஸதீ’’தி வுத்தத்தா அட்ட²கதா²யம் தா³யகவஸேனேவ ‘‘ஸினேஹேதீ’’தி வுத்தம், யஸ்மா வா படிக்³கா³ஹகஸ்ஸ ஸினேஹுப்பத்தி ஆமிஸனிஸ்ஸிதாதி தா³யகவஸேனேவ வுத்தம்.

இஸ்ஸத்தஸுத்தவண்ணனா நிட்டி²தா.