3. ததியவக்³கோ³

1. புக்³க³லஸுத்தவண்ணனா

132. ‘‘நீசே குலே பச்சாஜாதோ’’திஆதி³ அப்பகாஸனபா⁴வேன தமதீதி தமோ, தேன தமேன யுத்தோதி தமோ புக்³க³லோ வுச்சதி, தம்யோக³தோ புக்³க³லஸ்ஸ தப்³போ³ஹாரோ யதா² ‘‘மச்சே²ரயோக³தோ மச்சே²ரோ’’தி. தஸ்மா தமோதி அப்பகாஸனபா⁴வேன தமோ தமபூ⁴தோ அந்த⁴காரோ விய ஜாதோ, அந்த⁴காரத்தம் வா பத்தோதி அத்தோ². வுத்தலக்க²ணம் தமமேவ பரம்பரதோ அயனம் க³தி நிட்டா² ஏதஸ்ஸாதி தமபராயணோ, தமபராயணதம் வா பத்தோதி அத்தோ². ஞாயேனபி தமக்³க³ஹணேன க²ந்த⁴தமோவ கதி²தோ, ந அந்த⁴காரதமோ. க²ந்த⁴தமோதி ச ஸம்பத்திரஹிதா க²ந்த⁴பவத்தியேவ த³ட்ட²ப்³பா³. ‘‘உச்சே குலே பச்சாஜாதோ’’திஆதி³ பகாஸனபா⁴வேன ஜோதேதீதி ஜோதி, தேன ஜோதினா யுத்தோதிஆதி³ ஸப்³ப³ம் தமே வுத்தனயேனேவ வேதி³தப்³ப³ம். இதரே த்³வேதி ஜோதிதமபராயணோ ஜோதிஜோதிபராயணோதி இதரே த்³வே புக்³க³லே.

வேணுவேத்தாதி³கேஹி பேளாதி³காரகா விலீவகாரகா. மிக³மச்சா²தீ³னம் நிஸாத³னதோ நேஸாதா³, மாக³விகமச்ச²ப³ந்தா⁴த³யோ. ரதே²ஸு சம்மேன ஹனனகரணதோ ரத²காரா சம்மகாரா வுத்தா. ‘‘பு’’ இதி கரீஸஸ்ஸ நாமம், தம் குஸேந்தி அபனேந்தீதி புக்குஸா, புப்ப²ச²ட்³ட³கா. து³ப்³ப³ண்ணோதி விரூபோ. ஓகோடிமகோதி ஆரோஹாபா⁴வேன ஹேட்டி²மகோடிகோ, ரஸ்ஸகாயோதி அத்தோ². தேனாஹ ‘‘லகுண்ட³கோ’’தி. லகு விய க⁴டிகா விய டே³தி பவத்ததீதி ஹி லகுண்ட³கோ, ரஸ்ஸோ. கணதி நிமீலதீதி காணோ. தம் பனஸ்ஸ நிமீலனம் ஏகேன அக்கி²னா த்³வீஹிபி வாதி ஆஹ ‘‘ஏகக்கி²காணோ வா உப⁴யக்கி²காணோ வா’’தி. குணனம் குணோ, ஹத்த²வேகல்லம், ஸோ ஏதஸ்ஸ அத்தீ²தி குணீ. க²ஞ்ஜோ வுச்சதி பாத³விகலோ. ஹேட்டி²மகாயஸங்கா²தோ ஸரீரஸ்ஸ பக்கோ² பதே³ஸோ ஹதோ அஸ்ஸாதி பக்க²ஹதோ. தேனாஹ ‘‘பீட²ஸம்பீ’’தி. பதீ³பே பதீ³பனே ஏதப்³ப³ம் நேதப்³ப³ந்தி பதீ³பேய்யம், தேலகபல்லாதி³உபகரணம். வுத்தந்தி அட்ட²கதா²யம் வுத்தம்.

ஆக³மனவிபத்தீதி ஆக³மனட்டா²னவஸேன விபத்தி ஆக³மோ ஏத்தா²தி கத்வா. புப்³பு³ப்பன்னபச்சயவிபத்தீதி பட²முப்பன்னபச்சயவஸேன விபத்தி. சண்டா³லாதி³ஸபா⁴வா ஹிஸ்ஸ மாதாபிதரோ பட²முப்பன்னபச்சயா, பட²முப்பத்தியா வா பச்சயா, தேஹேவஸ்ஸ விபத்தி ஏவ, ந ஸம்பத்தி. பவத்தபச்சயவிபத்தீதி பவத்தே ஸுக²பச்சயவிபத்தி. தாதி³ஸே நிஹீனகுலே உப்பன்னோபி கோசி விப⁴வஸம்பன்னோ ஸியா, அயம் பன து³க்³க³தோ து³ரூபோ ஹோதி. ஆஜீவுபாயவிபத்தீதி ஆஜீவனுபாயவஸேன விபத்தி. ஸுகே²ன ஹி ஜீவிகம் பவத்தேதும் உபாயபூ⁴தா ஹத்தி²ஸிப்பாத³யோ இமஸ்ஸ நத்தி², புப்ப²ச²ட்³ட³கஸிலாகோட்டனாதி³கம்மம் பன கத்வா ஜீவிகம் பவத்தேதி. தேனாஹ ‘‘கஸிரவுத்திகே’’தி. அத்தபா⁴வவிபத்தீதி உபதி⁴விபத்தி. து³க்க²காரணஸமாயோகோ³தி காயிகசேதஸிகது³க்கு²ப்பத்தியா பச்சயஸமோதா⁴னம். ஸுக²காரணவிபத்தீதி ஸுக²பச்சயபரிஹானி. உபபோ⁴க³விபத்தீதி உபபோ⁴க³ஸுக²ஸ்ஸ வினாஸோ அனுபலத்³தி⁴. ஜோதி சேவ ஜோதிபராயணபா⁴வோ ச ஸுக்கபக்கோ².

த³ஸஹி அக்கோஸவத்தூ²ஹீதி லக்க²ணவசனம் ஏதம் யதா² ‘‘யதி³ மே ப்³யாதி⁴தா ஹோந்தி, தா³தப்³ப³மித³மோஸத⁴’’ந்தி, தஸ்மா த³ஸஹி அக்கோஸவத்தூ²ஹி, தத்த² வா யேன கேனசி பரிபா⁴ஸதீதி அத்தோ². ஏகக்³க³சித்தோதி தா³னம் தா³தும் அபேக்கி²ததாய ஸமாஹிதசித்தோ.

புக்³க³லஸுத்தவண்ணனா நிட்டி²தா.

2. அய்யிகாஸுத்தவண்ணனா

133. ஜராஜிண்ணாதி ஜராய ஜிண்ணா. தேன பாகடஜராய மத்த²கப்பத்திமாஹ. வயோவுட்³டா⁴தி வயஸா வுட்³டா⁴. தேன பச்சி²மவயஸ்ஸ ஓஸக்கஸம்பவத்திம் வத³தி. ஜாதிமஹல்லிகாதி ஜாதிமஹத்தக³தா. சிரகாலம் அதிக்கந்தாதி த்³வே தயோ ராஜபரிவட்டே வீதிவத்தா. வயோ-ஸத்³தோ³ ஸாதா⁴ரணவசனோபி ஜிண்ணஸத்³த³ஸன்னிதா⁴னதோ ஓஸானவயம் ஏவ வத³தீதி ஆஹ ‘‘பச்சி²மவயம் ஸம்பத்தா’’தி. அய்யிகாதி மாதாமஹிம் ஸந்தா⁴ய வத³தி. ஹத்தீ² ஏவ ரதனபூ⁴தோ ஹத்தி²ரதனந்தி ஆஹ ‘‘ஸதஸஹஸ்ஸக்³க⁴னகேனா’’திஆதி³. ஸப்³பா³னி தானீதி கும்ப⁴காரபா⁴ஜனானி, தேஹி ஸத்³தி⁴ம் ஸத்தஸந்தானஸ்ஸ பமாணம் த³ஸ்ஸேந்தோ ‘‘தேஸு ஹீ’’திஆதி³மாஹ, தம் ஸுவிஞ்ஞேய்யமேவ.

அய்யிகாஸுத்தவண்ணனா நிட்டி²தா.

4. இஸ்ஸத்தஸுத்தவண்ணனா

135. அட்டு²ப்பத்திகோதி ஏத்த² கா அஸ்ஸ அட்டு²ப்பத்தி? தித்தி²யானம் ப⁴க³வதோ பி⁴க்கு²ஸங்க⁴ஸ்ஸ ச அலாபா⁴ய அயஸாய பரிஸக்கனம். தம் வித்தா²ரதோ த³ஸ்ஸேதும் ‘‘ப⁴க³வதோ கிரா’’திஆதி³ வுத்தம். யதா² தம் ஸப்³ப³தி³ஸாஸு யமகமஹாமேகோ⁴ உட்ட²ஹித்வா மஹாஓக⁴ம் விய ஸப்³பா³ பாரமியோ ‘‘இமஸ்மிம்யேவ அத்தபா⁴வே விபாகம் த³ஸ்ஸாமா’’தி ஸம்பிண்டி³தா விய லாப⁴ஸக்காரமஹோக⁴ம் நிப்³ப³த்தயிம்ஸு. ததோ ததோ அன்னபானயானவத்த²மாலாக³ந்த⁴விலேபனாதி³ஹத்தா² க²த்தியப்³ராஹ்மணாத³யோ ஆக³ந்த்வா – ‘‘கஹம் ப⁴க³வா, கஹம் தே³வதே³வோ நராஸபோ⁴ லோகனாதோ²’’தி ப⁴க³வந்தம் பரியேஸந்தி, ஸகடஸதேஹிபி பச்சயே ஆஹரித்வா ஓகாஸம் அலப⁴மானா ஸமந்தா கா³வுதப்பமாணம்பி ஸகடது⁴ரேன ஸகடது⁴ரம் ஆஹச்ச திட்ட²ந்தி சேவ அனுவத்தந்தி ச அந்த⁴கவிந்த³ப்³ராஹ்மணாத³யோ விய. ஸப்³ப³ம் க²ந்த⁴கே (மஹாவ. 282) தேஸு தேஸு ஸுத்தேஸு ச ஆக³தனயேன வேதி³தப்³ப³ம். யதா² ச ப⁴க³வதோ, ஏவம் பி⁴க்கு²ஸங்க⁴ஸ்ஸபி. வுத்தம்பி – ‘‘தேன கோ² பன ஸமயேன ப⁴க³வா ஸக்கதோ ஹோதி க³ருகதோ மானிதோ பூஜிதோ அபசிதோ லாபீ⁴ சீவர…பே… பரிக்கா²ரானம், பி⁴க்கு²ஸங்கோ⁴பி கோ²’’திஆதி³ (உதா³. 38), ததா² ‘‘யாவதா கோ², சுந்த³, ஏதரஹி ஸங்கோ⁴ வா க³ணோ வா லோகே உப்பன்னோ, நாஹம், சுந்த³, அஞ்ஞம் ஏகம் ஸங்க⁴ம்பி ஏகம் க³ணம்பி ஸமனுபஸ்ஸாமி ஏவம் லாப⁴க்³க³யஸக்³க³ப்பத்தம், யத²ரிவாயம், சுந்த³, பி⁴க்கு²ஸங்கோ⁴’’தி (தீ³. நி. 3.176). ஏவந்தி இதா³னி வுச்சமானாகாரேன. நிஜ்ஜ²த்திந்தி ஸஞ்ஞத்திம். நந்தி கத²ம்.

ஏவம் புச்சி²தும் அயுத்தம் தித்தி²யானம் கதா² மஹாஜனஸன்னிபாதே நிய்யாதிதா ஹோதீதி. தஸ்மிம் தா³தப்³ப³ம், சித்தப்பஸாத³மத்தேன தே³ந்தேபி ஹி புஞ்ஞம் பவட்³ட⁴தி. ஆரோசிதம் அத்தனோதி அதி⁴ப்பாயோ. ப⁴க³வாதி ஸத்து² ஆமந்தனம். சித்தம் நாம யதா²பச்சயம் பவத்தமானம் நிக³ண்டா²…பே… பஸீத³தி பஸன்னஸ்ஸாதி அதி⁴ப்பாயோ. புப்³பே³ அவிஸேஸதோ தே³ய்யத⁴ம்மஸ்ஸ தா³தப்³ப³ட்டா²னம் நாம புச்சி²தம், இதா³னி தஸ்ஸ மஹப்ப²லபா⁴வகரோ த³க்கி²ணேய்யவிஸேஸோதி ஆஹ ‘‘அஞ்ஞம் தயா பட²மம் புச்சி²தம், அஞ்ஞம் பச்சா²’’தி. ஸல்லக்கே²ஹி ஏதம். பச்சி²மம் புரிமேன ஸத்³தி⁴ம் ஆனேஹீதி அதி⁴ப்பாயோ. புச்சி²தஸ்ஸ நாம பஞ்ஹஸ்ஸ கத²னம் மய்ஹமேவ பா⁴ரோ. ஸமுபப்³யூள்ஹோதி ஏகதோ ஸேனாய ராஸிவஸேன ஸம்பிண்டி³தோதி அத்தோ². தேனாஹ ‘‘ராஸிபூ⁴தோ’’தி. அஸிக்கி²தோதி ஸத்தட்ட²ஸம்வச்ச²ரானி த⁴னுஸிப்பேன ஸிக்கி²தோ. த⁴னுஸிப்பம் ஸிக்கி²த்வாபி கோசி கதஹத்தோ² ந ஹோதி, அயம் பன அஸிக்கி²தோ ந கதஹத்தோ², போங்கா²னுபோங்க²பா⁴வோயேவ ப்³யாமமுட்டி²ப³ந்தோ⁴. திணபுஞ்ஜமத்திகாபுஞ்ஜாதீ³ஸூதி ஆதி³-ஸத்³தே³ன பம்ஸுபுஞ்ஜவாலுகபுஞ்ஜஸாரப²லகஅயோக⁴னாதி³கே ஸங்க³ண்ஹாதி. அகதபரிசயோதி தேஸம் ஸந்திகா விஜ்ஜ²னட்டே²ன அகதபரிசயோ. ராஜராஜமஹாமத்தாதி³கே உபேச்ச அஸனம் உபாஸனம், ந கதம் உபாஸனம் ஏதேனாதி அகதூபாஸனோ. அஸிக்கி²ததாதி³னா பீ⁴ருபா⁴வேன வா காயஸ்ஸ ச²ம்ப⁴னம் ஸங்கம்பனம் உத்தாஸோ ஏதஸ்ஸ அத்தீ²தி ச²ம்பீ⁴தி ஆஹ ‘‘பவேதி⁴தகாயோ’’தி.

த³க்கி²ணேய்யதாய அதி⁴ப்பேதத்தா ‘‘அரஹத்தமக்³கே³ன காமச்ச²ந்தோ³ பஹீனோ ஹோதீ’’தி ஆஹ. அச்சந்தப்பஹானஸ்ஸ இச்சி²தத்தா ததியேனேவ குக்குச்சம் பஹீனம் ஹோதி படிக⁴ஸம்பயோக³ம். அஸேக்க²ஸ்ஸ அயந்தி அஸேக்க²ம், ஸீலக்க²ந்தோ⁴. தயித³ம் ந அக்³க³ப²லம் ஸீலமேவ அதி⁴ப்பேதம், அத² கோ² யம் கிஞ்சி அஸேக்க²ஸந்தானே பவத்தம் ஸீலம், லோகுத்தரோ ஏவ ந அதி⁴ப்பேதோ ஸிக்கா²ய ஜாதத்தா, ஏவம் விமுத்திக்க²ந்தோ⁴பீதி. ஸேக்க²ஸ்ஸ ஏஸோதி வா, அபரியோஸிதஸிக்க²த்தா ஸயமேவ ஸிக்க²தீதி வா ஸேக்கோ², சதூஸு மக்³கே³ஸு ஹேட்டி²மேஸு ச தீஸு ப²லேஸு ஸீலக்க²ந்தோ⁴. உபரி ஸிக்கி²தப்³பா³பா⁴வதோ அஸேக்கோ². வுட்³டி⁴ப்பத்தோ ஸேக்கோ²தி அஸேக்கோ². அக்³க³ப²லபூ⁴தோ ஸீலக்க²ந்தோ⁴ வுச்சேய்ய, அட்ட²கதா²யம் பன விபஸ்ஸகஸ்ஸ ஸீலஸ்ஸ அதி⁴ப்பேதத்தா ததா² அத்தோ² வுத்தோ. ஸப்³ப³த்தா²தி ‘‘அஸேக்கே²னா’’திஆதீ³ஸு. ஏத்த² ச யதா² ஸீலஸமாதி⁴பஞ்ஞாக்க²ந்தா⁴ மிஸ்ஸகா அதி⁴ப்பேதா, ஏவம் விமுத்திக்க²ந்தா⁴பீதி தத³ங்க³விமுத்திஆத³யோபி வேதி³தப்³பா³, ந படிப்பஸ்ஸத்³தி⁴விமுத்தி ஏவ.

யேன ஸிப்பேன இஸ்ஸாஸோ ஹோதி, தம் இஸ்ஸத்தந்தி ஆஹ ‘‘உஸுஸிப்ப’’ந்தி. யஸ்ஸா வாயோதா⁴துயா வஸேன ஸரீரம் ஸஞ்ஜாததா²மம் ஹோதி, தம் ப³லபச்சயம் ஸந்தா⁴யாஹ ‘‘ப³லம் நாம வாயோதா⁴தூ’’தி. ஸமப்பவத்திதோ ஹி விஸமப்பவத்தினிவாரகதா⁴து ப³லம் நாம, தேன ததோ அஞ்ஞம் ப³லரூபம் நாம நத்தி².

யஸ்மா அரஹா ஏவ ஏகந்ததோ ஸோரதோ, தஸ்ஸ பா⁴வோ ஸோரச்சந்தி ஆஹ ‘‘ஸோரச்சந்தி அரஹத்த’’ந்தி. ஏதே த்³வேதி க²ந்தி ஸோரச்சந்தி ஏதே த்³வே த⁴ம்மா. பானீயம் பிவந்தி ஏத்தா²தி பபா, யோ கோசி ஜலாஸயோ யம் கிஞ்சி பானீயட்டா²னந்தி ஆஹ ‘‘சதுரஸ்ஸபோக்க²ரணீஆதீ³னீ’’தி. உத³கவிகூலாதீ³ஸு கமந்தி அதிக்கமந்தி ஏதேஹீதி ஸங்கமனானி, ஸேதுஆதீ³னி. ஸேதுகரணயுத்தட்டா²னே ஸேதும், சங்கமனகரணயுத்தட்டா²னே சங்கமனம், மக்³க³கரணயுத்தட்டா²னே மக்³க³ம் கரேய்யாதி அயமேத்த² அதி⁴ப்பாயோ. தேனாஹ ‘‘பண்ணாஸா’’திஆதி³.

பி⁴க்கா²சாரவத்தந்தி அரியானம் ஹிதம் வத்தபடிபத்திம். தே³ந்தோபீதி பி-ஸத்³தே³ன அகீ²ணாஸவஸ்ஸ தே³ந்தோபீதி இமமத்த²ம் த³ஸ்ஸேதி யஸ்ஸ கஸ்ஸசிபி தே³ந்தேனபி கம்மப²லம் ஸத்³த³ஹித்வா விப்பஸன்னசித்தேனேவ தா³தப்³ப³த்தா. த²னயந்தி இத³ம் தஸ்ஸ மஹாமேக⁴பா⁴வத³ஸ்ஸனம், யோ ஹி மஹாவஸ்ஸம் வஸ்ஸதி, ஸோ க³ஜ்ஜந்தோ விஜ்ஜும்மாலம் விஸ்ஸஜ்ஜேந்தோ பவஸ்ஸதி. அபி⁴ஸங்க²ரித்வா ஸமோதா⁴னேத்வாதி கா²த³னீயஸ்ஸ விவித⁴ஜாதியானி ஸம்பிண்டே³த்வா. தேனாஹ ‘‘ராஸிம் கத்வா’’தி.

பகிரணம் நாம விகிரணம்பி ஹோதி அனேகத்த²த்தா தா⁴தூனந்தி ஆஹ ‘‘விகிரதீ’’தி. பகிரந்தோ விய வா தா³னம் தே³தீதி இமினா கு³ணகே²த்தமேவ அபரியேஸித்வா கருணாகே²த்தேபி மஹாதா³னம் பவத்தேதீதி த³ஸ்ஸேதி. தேன ‘‘பகிரேதீ’’தி வத³ந்தேன ப⁴க³வதா அட்டு²ப்பத்தியம் ஆக³ததித்தி²யவாதே³ன அப்படிஸேதி⁴ததாபி தீ³பிதா ஹோதி. புஞ்ஞதா⁴ராதி புஞ்ஞமயதா⁴ரா புஞ்ஞாபி⁴ஸந்தா³. ஸினேஹயந்தீதி தூ²லதா⁴ரேனபி ஸினேஹேன ஸினித்³த⁴ம் கரோந்தீ. கிலேத³யந்தீதி அல்லபா⁴வம் பாபயந்தீ. யதா²யம் புஞ்ஞதா⁴ரா தா³தாரம் அந்தோ ஸினேஹேதி பூரேதி அபி⁴ஸந்தே³தி, ஏவம் படிக்³கா³ஹகானம்பி அந்தோ ஸினேஹேதி பூரேதி அபி⁴ஸந்தே³தி. தேனேவாஹ ‘‘த³த³ம் பியோ ஹோதி ப⁴ஜந்தி நம் ப³ஹூ’’திஆதி³ (அ. நி. 5.34) ஏவம் ஸந்தேபி ‘‘தா³தாரம் அபி⁴வஸ்ஸதீ’’தி வுத்தத்தா அட்ட²கதா²யம் தா³யகவஸேனேவ ‘‘ஸினேஹேதீ’’தி வுத்தம், யஸ்மா வா படிக்³கா³ஹகஸ்ஸ ஸினேஹுப்பத்தி ஆமிஸனிஸ்ஸிதாதி தா³யகவஸேனேவ வுத்தம்.

இஸ்ஸத்தஸுத்தவண்ணனா நிட்டி²தா.

5. பப்³ப³தூபமஸுத்தவண்ணனா

136. க²த்தியாதி அபி⁴ஸேகப்பத்தா. இஸ்ஸரியமதோ³ காமகே³தோ⁴. பத²விமண்ட³லஸ்ஸ மஹந்ததா தம்னிவாஸினம் அனுயந்ததாதி ஸப்³ப³மித³ம் யதி²ச்சி²தஸ்ஸ ராஜகிச்சஸ்ஸ ஸுகே²ன ஸமிஜ்ஜ²னஸ்ஸ காரணகித்தனம். யாதி³ஸே ராஜகிச்சே உஸ்ஸுக்கம் ஆபன்னோ, தம் வித்தா²ரதோ த³ஸ்ஸேதும் ‘‘ஏஸ கிரா’’திஆதி³ வுத்தம். அந்தரக³மனானீதி திண்ணம் நிரந்தரக³மனானம் அந்தரந்தரா க³மனானி. சோரா சிந்தயிம்ஸூதி ஏகோ அந்தரபோ⁴கி³கோ ராஜாபராதி⁴கோ பஞ்சஸதமனுஸ்ஸபரிவாரோ சோரியம் கரோந்தோ விசரதி, தே ஸந்தா⁴ய வுத்தம்.

‘‘அயுத்தம் தே கத’’ந்தி ஸசாஹம் வக்கா²மீதி யோஜனா. து⁴ரவிஹாரேதி ரத²ஸ்ஸ து⁴ரம் விய நக³ரஸ்ஸ து⁴ரபூ⁴தே விஹாரே. ஸந்த²ம்பி⁴துந்தி விஸ்ஸாஸபா⁴வேன உபட்டா²தும். ஸத்³தா⁴யிகோதி ஸத்³தா⁴ய அயிதப்³போ³, ஸத்³தே⁴ய்யோதி அத்தோ². தேனாஹ ‘‘ஸத்³தா⁴தப்³போ³’’தி. பச்சயிகோதி பத்தியாயிதப்³போ³. அப்³ப⁴ஸமம் புது²லபா⁴வேன. நிப்போதே²ந்தோதி நிம்மத்³தே³ந்தோ. ஸண்ஹகரணீயம் அதிஸண்ஹம் பிஸந்தோ நிஸத³போதோ விய பிஸந்தோ.

த⁴ம்மசரியாதிஆதி³த்தம்பி ஸீஸம் சேலஞ்ச அஜ்ஜு²பேக்கி²த்வா ஸம்மாபடிபத்தி ஏவ காதப்³பா³ தஸ்ஸா ஏவ பரலோகே பதிட்டா²பா⁴வதோ. ஆசிக்கா²மீதி கதே²மி, கதே²ந்தோ ச யதா² தமத்த²ம் ஸம்மதே³வ ராஜா ஜானாதி, ஏவம் ஜானாபேமீதி. நிப்ப²த்தி யுத்³தே⁴ன காதப்³ப³அத்த²ஸித்³தி⁴. விஸினோதி ப³ந்த⁴தி யதா²தி⁴ப்பேதம் சித்தம் ஏதேனாதி விஸயோ, ஸமத்த²பா⁴வோ. மந்தஸம்பன்னாதி ஸம்பன்னராஜமந்தா. மஹாஅமச்சாதி மஹோஸதா⁴தி³ஸதி³ஸா நீதிஸத்த²சே²கா அமச்சபுரிஸா. உபலாபேதுந்தி பரேஸம் அந்தரே விரோத⁴த்த²ம் ஸங்க³ண்ஹிதும்.

த்³வேயேவ பப்³ப³தாதி பப்³ப³தஸதி³ஸா த்³வேயேவ க³ஹிதா. ராஜோவாதே³தி ராஜோவாத³ஸுத்தே. ஆக³தாவ தத்தந்தியா அனுரூபத்த²ம். விலும்பமானாதி இதி-ஸத்³தோ³ ஆதி³அத்தோ². விபத்தீதி போ⁴க³பரிஹானாதி³வினாஸோ. ஹத்தி²யுத்³தா⁴தீ³ஹி ஜராமரணம் ஜினிதும் ந ஸக்கா ஸத்தஸ்ஸ அவிஸயபா⁴வதோ. யேன பன ஜினிதும் ஸக்கா, தம் த³ஸ்ஸேந்தோ ப⁴க³வா ‘‘பு³த்³தே⁴…பே… நிவேஸயே’’தி ஆஹ. ரதனத்தயே ஹி ஸத்³தா⁴ நிவிட்டா² மூலஜாதா பதிட்டி²தா ஏகந்ததோ ஜராமரணவிஜயாய ஹோதி. தேனாஹ ‘‘தஸ்மா ஸத்³த⁴’’ந்தி.

பப்³ப³தூபமஸுத்தவண்ணனா நிட்டி²தா.

ததியவக்³க³வண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

கோஸலஸம்யுத்தவண்ணனாய லீனத்த²ப்பகாஸனா ஸமத்தா.