2. து³தியவக்³கோ³

1. ஸத்தஜடிலஸுத்தவண்ணனா

122. புப்³பா³ராமஸங்கா²தேதி ஸாவத்தி²னக³ரஸ்ஸ புப்³ப³தி³ஸாய கதத்தா புப்³பா³ராமேதி ஸங்க²ம் க³தே. தத்ராதி ‘‘மிகா³ரமாதுயா பாஸாதே³’’தி தஸ்மிம் ஸம்கி²த்தவசனே. அயம் இதா³னி வுச்சமானா அனுபுப்³பி³கதா² ஆதி³தோ பட்டா²ய அனுக்கமகதா². பத்த²னம் அகாஸி தஸ்ஸ ப⁴க³வதோ அக்³கு³பட்டா²யிகம் ஏகம் உபாஸிகம் தி³ஸ்வா தம் டா²னந்தரம் ஆகங்க²ந்தீ. மேண்ட³கபுத்தஸ்ஸாதி மேண்ட³கஸேட்டி²புத்தஸ்ஸ. மாதிட்டா²னே ட²பேஸி தஸ்ஸா உபகாரம் க³ருபா⁴வஞ்ச தி³ஸ்வா. தாய காரிதே பாஸாதே³தி தாய மஹாஉபாஸிகாய மஹாலதாபஸாத⁴னம் விஸ்ஸஜ்ஜேத்வா நவஹி கோடீஹி கரீஸமத்தே பூ⁴மிபா⁴கே³ காரிதே ஸஹஸ்ஸக³ப்³ப⁴படிமண்டி³தே பாஸாதே³.

பரூள்ஹகச்சா²தி பரூள்ஹகச்ச²லோமா. கமண்ட³லுக⁴டிகாதி³ம் பப்³ப³ஜிதபரிக்கா²ரம். நக்³க³போ⁴க்³க³னிஸ்ஸிரிகானந்தி நக்³கா³னஞ்சேவ போ⁴க்³கா³னஞ்ச நிஸ்ஸிரிகானஞ்ச. தே ஹி அனிவத்த²வத்த²தாய நக்³கா³ சேவ, அசேலகவதாதி³னா போ⁴க்³க³ஸரீரதாய போ⁴க்³கா³, ஸோபா⁴ரஹிததாய நிஸ்ஸிரிகா ச. அத்தனா தி³ட்ட²ஸுதம் படிச்சா²தே³த்வா ந கதே²ய்யுந்தி அகாரணமேதம் தேஸம் ரஞ்ஞா பயுத்தசரபுரிஸபா⁴வதோ. ஏவம் கதே பன தே ‘‘அஞ்ஞேபி பப்³ப³ஜிதா அத்தீ²தி அயம் ஜானாதீ’’தி மஞ்ஞேய்யுந்தி கோஹஞ்ஞசித்தோ ஏவம் அகாஸீதி ஸக்கா விஞ்ஞாதும். ததா² ஹி தேனத்தே²ன அபரிதோஸமானோ ‘‘அபிசா’’திஆதி³மாஹ.

காஸிகசந்த³னந்தி உஜ்ஜலசந்த³னம். தம் கிர வண்ணவஸேன ஸமுஜ்ஜலம் ஹோதி பப⁴ஸ்ஸரம், தத³த்த²மேவ நம் ஸண்ஹதரம் கரோந்தி. தேனாஹ ‘‘காஸிகசந்த³னந்தி ஸண்ஹசந்த³ன’’ந்தி. வண்ணக³ந்த⁴த்தா²யாதி வண்ணஸோப⁴த்த²ஞ்சேவ ஸுக³ந்த⁴பா⁴வத்த²ஞ்ச. வண்ணக³ந்த⁴த்தா²யாதி ச²விராக³கரணத்த²ஞ்சேவ ஸுக³ந்த⁴த்தா²ய ச. ‘‘கி³ஹினா’’திஆதீ³ஹி பதே³ஹி ஏவம் பமாத³விஹாரினா தயா அரஹந்தோ து³விஞ்ஞேய்யாதி த³ஸ்ஸேதி.

ஸம்வாஸோ நாம இத⁴ காலேன உபஸங்கமனந்தி த³ஸ்ஸேந்தோ ‘‘உபஸங்கமந்தேனா’’தி ஆஹ. காயவாசாஹி அஸம்யதேனபி ஸம்யதாகாரோ, அஸம்வுதிந்த்³ரியேனபி ஸம்வுதிந்த்³ரியாகாரோ. பரிக்³க³ஹேஸ்ஸாமீதி வீமம்ஸிஸ்ஸாமி ‘‘பரிஸுத்³த⁴ம் நு கோ², நோ’’தி. ஸப்பஞ்ஞேனாதி ஸீலபரிக்³க³ண்ஹனபஞ்ஞாய ஸப்பஞ்ஞேன. ஜானிதும் ந ஸக்கோதி ஸபா⁴வஸ்ஸ ஸதோ ஸீலஸ்ஸ அனுபதா⁴ரணதோ.

கத²னேனாதி அபராபரம் கத²னேன. ததா² ஹி வக்க²தி ‘‘ஏகச்சஸ்ஸ ஹீ’’திஆதி³. அரியவோஹாரோதி தி³ட்டா²தி³லக்க²ணேன வோஹரிதோ ‘‘தி³ட்ட²ம் அதி³ட்ட²’’ந்திஆதி³னா பவுத்தஸத்³த³வோஹாரோ. தஸ்ஸ பன காரணமேவ க³ண்ஹந்தோ ‘‘ஏத்த² சேதனா’’தி ஆஹ. ஏஸ நயோ அனரியவோஹாரேபி. பரமத்த²தோ ஹி ஸச்சவாசாத³யோ முஸாவாதா³த³யோ சேதனாலக்க²ணாதி. பஞ்ஞத்திவோஹாரோ ததா² ததா² வோஹரிதப்³ப³தோ ஏவமாஹ ‘‘ஸம்வோஹாரேன கோ², மஹாராஜ, ஸோசேய்யம் வேதி³தப்³ப³’’ந்தி.

ஞாணதா²மோதி ஞாணகு³ணப³லம், யேன டா²னுப்பத்திகபடிபா⁴னாதி³னா அச்சாயிககிச்சகரணீயானி நிட்டா²பேதி. ஸம்கதா²யாதி அத்த²வீமம்ஸனவஸேன பவத்தாய ஸம்மாகதா²ய. உப்பிலவதி லஹுகபா⁴வதோ. ஹேட்டா²சரகாதி அவசரகா. யே அனுபவிஸித்வா பரேஸம் ரஹஸ்ஸவீமம்ஸனவஸேன பவத்தா, தேஸு ஓசரகவோஹாரோதி வுத்தம் ‘‘சரா ஹீ’’திஆதி³.

வண்ணஸண்டா²னேனாதி வண்ணேன வா ஸண்டா²னேன வா வண்ணபோக்க²ரதாய வா ஸண்டா²னஸம்பத்தியா வா. ஸுஜானோ பேஸலோ விஸ்ஸஸேதி யோஜனா. லஹுகத³ஸ்ஸனேனாதி பரித்தத³ஸ்ஸனேன விஜ்ஜுகேன விய. பரிக்கா²ரப⁴ண்ட³கேனாதி பப்³ப³ஜிதபரிக்கா²ரபூ⁴தேன ப⁴ண்ட³கேன. லோஹட்³ட⁴மாஸோதி லோஹமயோ உபட்³ட⁴க்³க⁴னகமாஸோ.

ஸத்தஜடிலஸுத்தவண்ணனா நிட்டி²தா.

2. பஞ்சராஜஸுத்தவண்ணனா

123. ரூபாதி ரூபஸங்கா²தா காமகு³ணா. தே பன நீலாதி³வஸேன அனேகபே⁴த³பி⁴ன்னாபி ரூபாயதனத்தா சக்கு²விஞ்ஞேய்யதம் நாதிவத்தந்தீதி ஆஹ ‘‘நீலபீதாதி³பே⁴த³ம் ரூபாரம்மண’’ந்தி. தோ-ஸத்³தோ³பி தா³-ஸத்³தோ³ விய காலத்தோ² ஹோதீதி ஆஹ ‘‘யதோதி யதா³’’தி. மனம் ஆபயதி வட்³டே⁴தீதி மனாபம், மனோரமம். மனாபனிப்ப²த்திதந்தி தஸ்ஸ புக்³க³லஸ்ஸ மனஸா பியாயிதம், தஸ்ஸ அக்³க³பா⁴வேன பரியந்தம் பரமம் கோடிம் கத்வா பவத்திதந்தி அத்தோ². புக்³க³லமனாபந்தி ஆரம்மணஸபா⁴வம் அசிந்தேத்வா புக்³க³லஸ்ஸ வஸேன மனாபபா⁴வேனேவ இட்ட²தாய இட்ட²ந்தி. ஸம்முதீதி ஸமஞ்ஞா. புக்³க³லமனாபம் நாம ஸஞ்ஞாவிபல்லாஸவஸேன விபரீதம்பி க³ண்ஹாதி இதரஸபா⁴வதோதி ஆஹ ‘‘யம் ஏகஸ்ஸ…பே… இட்ட²ம் கந்த’’ந்தி. இதா³னி தம் ஜிவ்ஹாவிஞ்ஞேய்யவஸேன யோஜேத்வா த³ஸ்ஸேந்தோ ‘‘பச்சந்தவாஸீன’’ந்திஆதி³மாஹ. இத³ம் புக்³க³லமனாபந்தி இத³ம் யதா²வுத்தம் ஜிவ்ஹாவிஞ்ஞேய்யம் விய அஞ்ஞம்பி ஏவம்ஜாதிகம் தேன தேன புக்³க³லேன மனாபந்தி க³ஹேதப்³பா³ரம்மணம் புக்³க³லமனாபம் நாம.

லோகே படிவிப⁴த்தம் நத்தி², விப⁴ஜித்வா த³ஸ்ஸனேன லோகேன மது⁴ரஜாதேனபி படிவிப⁴த்தம் கத்வா க³ஹேதும் ந ஸக்குணேய்யாதி அதி⁴ப்பாயோ. தேனாஹ ‘‘விப⁴ஜித்வா பன த³ஸ்ஸேதப்³ப³’’ந்தி. தி³ப்³ப³கப்பம்பீதி தே³வலோகபரியாபன்னஸதி³ஸம்பி அமனாபம் உபட்டா²தி உளாரபணீதாரம்மணபரிசயதோ. மஜ்ஜி²மானம் பன…பே… விப⁴ஜிதப்³ப³ம் தேஸம் மனாபஸ்ஸ மனாபதோ, அமனாபஸ்ஸ அமனாபதோ உபட்டா²னதோ. தத்த²பி இட்டா²னிட்ட²பரிச்சே²தோ³ நிப்பரியாயதோ ஏவம் வேதி³தப்³போ³தி த³ஸ்ஸேந்தோ ஆஹ ‘‘தஞ்ச பனேத’’ந்திஆதி³. தஞ்ச பனேதம் இட்டா²னிட்ட²பூ⁴தம் ஆரம்மணம் காமாவசரஜவனேஸு அகுஸலஸ்ஸ வஸேன யேபு⁴ய்யேன பவத்ததீதி கத்வா தத்த² ‘‘ரஜ்ஜதி து³ஸ்ஸதீ’’தி அகுஸலஸ்ஸேவ பவத்தி த³ஸ்ஸிதா. ஸேஸகாமாவசரஸ்ஸபி வஸேன பவத்தி லப்³ப⁴தேவ. ததா² ஹி தம் அப்படிகூலேபி படிகூலாகாரதோ, படிகூலேபி அப்படிகூலாகாரதோ பவத்ததீதி. விபாகசித்தம் இட்டா²னிட்ட²ம் பரிச்சி²ந்த³தி, ந ஸக்கா விபாகம் வஞ்சேதுந்தி. குஸலகம்மம் ஹி ஏகந்ததோ இட்ட²மேவ, அகுஸலகம்மஞ்ச அனிட்ட²மேவ, தஸ்மா தத்த² உப்பஜ்ஜமானம் விபாகசித்தம் யதா²ஸபா⁴வதோ பவத்ததீதி.

யம் பன ஸம்மோஹவினோத³னியம் ‘‘குஸலகம்மஜம் அனிட்ட²ம் நாம நத்தீ²’’தி ஏத்தகமேவ வுத்தம், தம் பன நித³ஸ்ஸனமத்தம் த³ட்ட²ப்³ப³ம். தேன ஸோப⁴னம் அகுஸலகம்மஜம்பி ஏகச்சானம் ஸத்தானம் இட்ட²ந்தி அனுஞ்ஞாதம் ஸியா. குஸலகம்மஜம் பன ஸப்³பே³ஸம் இட்ட²மேவாதி வத³ந்தி. திரச்சா²னக³தானம் கேஸஞ்சி மனுஸ்ஸரூபம் அமனாபம், யதோ தே தி³ஸ்வாவ பலாயந்தி. மனுஸ்ஸா ச தே³வதானம் ரூபம் தி³ஸ்வா பா⁴யந்தி, தேஸம்பி விபாகவிஞ்ஞாணம் தம் ரூபம் ஆரப்³ப⁴ குஸலவிபாகமேவ உப்பஜ்ஜதி, தாதி³ஸஸ்ஸ பன புஞ்ஞஸ்ஸ அபா⁴வா ந தேஸம் தத்த² அபி⁴ரதி ஹோதீதி த³ட்ட²ப்³ப³ம். குஸலகம்மஜஸ்ஸ பன அனிட்ட²ஸ்ஸ அபா⁴வோ விய அகுஸலகம்மஜஸ்ஸ ஸோப⁴னஸ்ஸ இட்ட²ஸ்ஸ அபா⁴வோ வத்தப்³போ³. ஹத்தி²ஆதீ³னம்பி ஹி அகுஸலகம்மஜம் மனுஸ்ஸானம் அகுஸலவிபாகஸ்ஸேவ ஆரம்மணம், குஸலகம்மஜம் பன பவத்தே ஸமுட்டி²தம் குஸலவிபாகஸ்ஸ, இட்டா²ரம்மணேன வோமிஸ்ஸகத்தா அப்பகம் அகுஸலகம்மஜம் ப³ஹுலம் அகுஸலவிபாகுப்பத்தியா காரணம் ந ப⁴விஸ்ஸதீதி ஸக்கா வத்தும். இதா³னி தமேவ விபாகவஸேன இட்டா²னிட்டா²ரம்மணவவத்தா²னம் விபா⁴வேதும் ‘‘கிஞ்சாபி ஹீ’’திஆதி³ வுத்தம். தயித³ம் ஸம்முதிமனாபஸம்விபா⁴க³த்த²ம் வுத்தம், இத⁴ பன ந ததா² விப⁴த்தந்தி ஆஹ ‘‘ப⁴க³வா பனா’’திஆதி³.

ஸோ உபாஸகோ சந்த³னங்க³லகா³மே ஜாதத்தா ‘‘சந்த³னங்க³லிகோ’’தி பஞ்ஞாயதி, ‘‘சந்த³னவிலாஸோ’’தி கேசி. தஸ்ஸ உபாஸகஸ்ஸ படிபா⁴னம் உத³பாதீ³தி யோஜனா. தே ராஜானோ ஹதப்பபே⁴ ஹதஸோபே⁴ தி³ஸ்வாதி ஸம்ப³ந்தோ⁴. உத³காபி⁴ஸித்தேதி உத³கேன அபி⁴ஸிஞ்சிதே. அங்கா³ரே வியாதி அங்கா³ரக்க²ணே விய.

காலஸ்ஸேவாதி பகே³வ. அவிக³தக³ந்த⁴ம் தங்க²ணவிகஸிததாய. ஈதி³ஸம் வசனந்தி ‘‘அச்சா²தே³ஸீ’’தி ஏவரூபம் வசனந்தி.

பஞ்சராஜஸுத்தவண்ணனா நிட்டி²தா.

3. தோ³ணபாகஸுத்தவண்ணனா

124. ‘‘தோ³ணபாககுர’’ந்தி ஏத்த² விப⁴த்திலோபம் கத்வா நித்³தே³ஸோதி ஆஹ ‘‘தோ³ணபாகம் குர’’ந்தி. தோ³ணஸ்ஸாதி சதுன்னம் ஆள்ஹகானம், ஸோளஸனாளீனந்தி அத்தோ². தது³பியந்தி தத³னுரூபம், தஸ்ஸ வுத்தபரிமாணஸ்ஸ அனுச்ச²விகந்தி அத்தோ². புப்³பே³தி தம்தி³வஸதோ புரிமதரதி³வஸேஸு. ப³லவாதி மஹா. ப⁴த்தபரிளாஹோதி ப⁴த்தஸம்மத³ஹேதுகோ. அஸ்ஸ ரஞ்ஞோ உபோ⁴ஸு பஸ்ஸேஸு க³ஹிததாலவண்டா பீ³ஜந்தி யமகதாலவண்டேஹி. பா²ஸுவிஹாரந்தி போ⁴ஜனே மத்தஞ்ஞுதாய லத்³த⁴ப்³ப³ஸுக²விஹாரம். போ⁴ஜனமத்தஞ்ஞூ ஹி ஸுக²விஹாரோ ஹோதி. தேனாஹ ‘‘தனுகஸ்ஸ ப⁴வந்தி வேத³னா, ஸணிகம் ஜீரதி ஆயு பாலய’’ந்தி.

தனுகஸ்ஸாதி தனுகா அஸ்ஸ புக்³க³லஸ்ஸ, பு⁴த்தபச்சயா விஸபா⁴க³வேத³னா ந ஹோந்தீதி அத்தோ². ஸணிகந்தி மந்த³ம் முது³கம், அபரிஸ்ஸயமேவாதி அத்தோ². ஜீரதீதி பரிபு⁴த்தாஹாரோ பச்சதி. ஆயுபாலயந்தி நிரோதோ⁴ அவேத³னோ ஜீவிதம் ரக்க²ந்தோ. அத² வா ஸணிகம் ஜீரதீதி ஸோ போ⁴ஜனே மத்தஞ்ஞூ புக்³க³லோ பரிமிதாஹாரதாய ஸணிகம் சிரேன ஜீரதி ஜரம் பாபுணாதி ஜீவிதம் பாலேந்தோ.

பரியாபுணித்வாதி ஏத்த² யதா² ஸப்³ப³ம் ஸோ பரியாபுணி, ததோ பரஞ்ச யதா² படிபஜ்ஜி, தம் த³ஸ்ஸேதும் ‘‘ரஞ்ஞா ஸத்³தி⁴’’ந்திஆதி³ வுத்தம். தாவதகே தண்டு³லே ஹாரேய்யாஸி தது³பியஞ்ச ப்³யஞ்ஜனந்தி ஆனேத்வா ஸம்ப³ந்தோ⁴.

புரிஸபா⁴கோ³ ஏஸாதி மஜ்ஜி²மேன புரிஸேன பு⁴ஞ்ஜிதப்³ப³பா⁴கோ³ ஏஸோ, யதி³த³ம் நாளிகோத³னமத்தம். ஸல்லிகி²தஸரீரதாதி ப⁴மம் ஆரோபேத்வா உல்லிகி²தஸ்ஸ விய ஸப்³ப³பரிளாஹவூபஸமஸ்ஸ புது²லதாபக³தஸரீரஸ்ஸ. ஸீலம் ஸம்பராயிகத்தோ²தி வுத்தம், குதோ பனேத்த² ஸீலந்தி ஆஹ ‘‘போ⁴ஜனே’’திஆதி³. ஸீலங்க³ம் நாம ஹோதீதி சதுபாரிஸுத்³தி⁴ஸீலஸ்ஸ அவயவோ ஏகோ பா⁴கோ³ ஹோதி.

தோ³ணபாகஸுத்தவண்ணனா நிட்டி²தா.

4. பட²மஸங்கா³மஸுத்தவண்ணனா

125. வேதே³ன ஞாணேன ஈஹதி இரியதீதி வேதே³ஹீ, கோஸலராஜப⁴கி³னீ அஜாதஸத்துனோ மாதா, ஸா கிர ஸம்பஜஞ்ஞஜாதிகா. தேனாஹ ‘‘பண்டி³தாதி⁴வசன’’ந்தி, சத்தாரி அங்கா³னி ஏதிஸ்ஸந்தி சதுரங்கி³னீ. த்³வின்னம் ரஜ்ஜானந்தி காஸிகரஜ்ஜமக³த⁴ரஜ்ஜானம் அந்தரே, ஸோ பன கா³மோ காஸிகரஜ்ஜோ.

பாபாதி லாமகா நிஹீனாசாரா. மேஜ்ஜதி ஸினிய்ஹதீதி மேத்தி, ஸா ஏதேஸு அத்தீ²தி மித்தா. ஸஹ அயந்தி பவத்தந்தீதி ஸஹாயா. ஸம்பவங்கந்தி ஸுட்டு² ஓனதம். ஜயகாரணம் தி³ஸ்வா ஆஹ, ததா² ஹி ‘‘அஜ்ஜ இமம் ரத்திம் து³க்க²ம் ஸேதீ’’தி காலபரிச்சே²த³வஸேன வுத்தம். வேரிகா⁴தோ நாம வேரிபுக்³க³லே ஸதீதி ஆஹ ‘‘வேரிபுக்³க³லம் லப⁴தீ’’தி.

பட²மஸங்கா³மஸுத்தவண்ணனா நிட்டி²தா.

5. து³தியஸங்கா³மஸுத்தவண்ணனா

126. ஸுணாதா²தி ‘‘வத்வா’’தி வசனஸேஸோ. உபகப்பதீதி ஸம்ப⁴வதி. ஸய்ஹம் ஹோதீதி காதும் ஸக்கா ஹோதி. ‘‘யதா³ சஞ்ஞே’’தி ச-காரோ நிபாதமத்தந்தி ஆஹ ‘‘யதா³ அஞ்ஞே’’தி. விலும்பந்தீதி வினாஸம் அச்சி²ந்த³னம் கரோந்தி. விலும்பீயதீதி விலுத்தபரஸந்தகஸ்ஸ அஸகத்தா புக்³க³லோ தி³ட்ட²த⁴ம்மிகம் கம்மப²லம் படிஸம்வேதே³ந்தோ விய ஸயம்பி பரேன விலும்பீயதி, த⁴னஜானிம் பாபுணாதி. ‘‘காரண’’ந்தி ஹி மஞ்ஞதீதி பாபகிரியம் அத்தனோ ஹிதாவஹம் காரணம் கத்வா மஞ்ஞதி. ஜயந்தோ புக்³க³லோ ‘‘இத³ம் நாம ஜினாமீ’’தி மஞ்ஞமானோ ஸயம்பி ததோ பராஜயம் பாபுணாதி. க⁴ட்டேதாரந்தி பாபகம்மவிபாகம். கம்மவிவட்டேனாதி கம்மஸ்ஸ விவட்டனேன, பச்சயலாபே⁴ன லத்³தா⁴வஸரேன விவட்டேத்வா விக³மிதேன கம்மேனாதி அத்தோ².

து³தியஸங்கா³மஸுத்தவண்ணனா நிட்டி²தா.

6. மல்லிகாஸுத்தவண்ணனா

127. ஏகச்சாதி பண்டி³தா ஸபஞ்ஞா. ஸேய்யாதி வரா. கா³தா²ஸுக²த்த²ம் ஸஸுரஸத்³த³லோபம் கத்வா ‘‘ஸஸ்ஸுதே³வா’’தி வுத்தந்தி ஆஹ ‘‘ஸஸ்ஸுஸஸுரதே³வதா’’தி. தி³ஸாஜேட்ட²காதி சதூஸுபி தி³ஸாஸு ஜேட்ட²கஸீஸேன ஹி லோகம் வத³தி. தாதி³ஸாயாதி ததா²ரூபாய மேதா⁴விதாதி³கு³ணவுத்தியா. ஸுப⁴ரியாயாதி ஸுகே²த்தபூ⁴தாய ஸுந்த³ரித்தி²யாதி அத்தோ².

மல்லிகாஸுத்தவண்ணனா நிட்டி²தா.

7. அப்பமாத³ஸுத்தவண்ணனா

128. ஸமதி⁴க்³க³ய்ஹாதி ஸம்மா அதிவிய க³ஹேத்வா, ஞாயேன விஸேஸதோ க³ண்ஹித்வா. காராபகஅப்பமாதோ³தி திண்ணம் புஞ்ஞகிரியவத்தூ²னம் பவத்தகஅப்பமாதோ³. ஸமவதா⁴னந்தி ஸமவரோத⁴ம் அந்தோக³த⁴ம். உபக்கே²பந்தி ப³ஹி அஹுத்வா பக்கி²பிதப்³ப³தம். ஸேஸபத³ஜாதானி விய அவ…பே… த⁴ம்மா ஸப்பதே³ஸத்தா. அப்பமாதே³ ஸமோதா⁴னம் க³ச்ச²ந்தி தஸ்ஸ நிப்பதே³ஸத்தா. அக்³க³ம் ஸேட்ட²ம் மஹந்தம் ஸேஸத⁴ம்மானம் அப்பமாதோ³. படிலாப⁴கட்டே²னாதி அதி⁴க³மஹேதுதாய. லோகியோபி ஸமானோதி காமாவசரோபி ஸமானோ. மஹக்³க³தானுத்தரானம் புப்³ப³பா⁴கே³ பவத்தஅப்பமாதோ³ ஹி இதா⁴தி⁴ப்பேதோ.

பஸம்ஸந்தி பண்டி³தாதி யோஜனா. அப்பமாத³ஸ்ஸ பாஸம்ஸபா⁴வே ஏகந்ததோ கத்தப்³ப³தாய பன ‘‘ஏதானீ’’திஆதி³னா காரணம் ஆஹ. இமிஸ்ஸா யோஜனாய ‘‘புஞ்ஞகிரியாஸூ’’தி பத³ஸ்ஸ ‘‘அப்பமத்தோ’’தி இமினா ஸம்ப³ந்தோ⁴. யஸ்மா பண்டி³தா அப்பமாத³ம் பஸம்ஸந்தி, யஸ்மா ச புஞ்ஞகிரியாஸு அப்பமத்தோ உபோ⁴ அத்தே² அதி⁴க்³க³ண்ஹாதி, தஸ்மா ஆயுஆதீ³னி பத்த²யந்தேன அப்பமாதோ³வ காதப்³போ³தி. து³தியயோஜனாய பன பண்டி³தா அப்பமாத³ம் பஸம்ஸந்தி. கத்த²? புஞ்ஞகிரியாஸு. கஸ்மாதி சே? அப்பமத்தோதிஆதி³. தேனாஹ ‘‘யஸ்மா…பே… அத்தோ²’’தி. அத்த²படிலாபா⁴தி தி³ட்ட²த⁴ம்மிகாதி³ஹிதபடிலாபா⁴.

அப்பமாத³ஸுத்தவண்ணனா நிட்டி²தா.

8. கல்யாணமித்தஸுத்தவண்ணனா

129. ஸீலாதி³கு³ணஸமன்னாக³தோ கல்யாணோ ப⁴த்³த³கோ மித்தோ ஏதஸ்ஸாதி கல்யாணமித்தோ, தஸ்ஸ த⁴ம்மோ கல்யாணமித்தஸ்ஸேவ ஸ்வாகா²தோ நாம ஹோதி ஸுத்வா கத்தப்³ப³கிச்சஸ்ஸ ஸாத⁴னதோ. தேனாஹ ‘‘அத்த²ம் பூரேதீ’’தி. இதரஸ்ஸாதி பாபமித்தஸ்ஸ. தேனாதி அத்த²பூரணேன. ஏதந்தி ‘‘ஸோ ச கோ² கல்யாணமித்தஸ்ஸா’’தி ஏதம் வசனம். தே³ஸனாத⁴ம்மோதி பரியத்தித⁴ம்மோ. ஸோ ஹி கல்யாணமித்ததோ பச்சக்க²தோ லத்³த⁴ப்³போ³, இதரே தது³பனிஸ்ஸயா பச்சத்தபுரிஸகாரேஹி, தேன லத்³த⁴ப்³போ³ கல்யாணமித்தோதி ஏவமத்தோ² க³ஹேதப்³போ³. ஸாவகபோ³தி⁴ஸத்தவஸேன ஹேஸா தே³ஸனா ஆக³தா. ந ஹி ஸேஸபோ³தி⁴ஸத்தானம் பரோபதே³ஸேன பயோஜனம் அத்தி².

உபட்³ட⁴ம் கல்யாணமித்ததோதி ப்³ரஹ்மசரியம் சரந்தஸ்ஸ உபட்³ட⁴கு³ணோ கல்யாணமித்ததோ லத்³த⁴ப்³போ³. உபட்³ட⁴ம் பச்சத்தபுரிஸகாரதோதி இதரம் உபட்³ட⁴ம் ஞாணம் படிபஜ்ஜந்தஸ்ஸ அத்தனோ புரிஸகாரதோ. லோகேபி பாகடோயமத்தோ² ‘‘ஆசரியதோ உபட்³ட⁴ம், பச்சத்தபுரிஸகாரதோ உபட்³ட⁴ம் லத்³த⁴ப்³பா³ தேவிஜ்ஜதா’’தி, தஸ்மா தே²ரோ ததா² சிந்தேஸி. நிப்பதே³ஸந்தி அனவஸேஸதோ. ததோதி கல்யாணமித்ததோ. உபட்³ட⁴ம் ஆக³ச்ச²தீதி உபட்³ட⁴கு³ணோ படிபஜ்ஜந்தம் உபக³ச்ச²தி. ப³ஹூஹி புரிஸேஹி. வினிப்³போ⁴கோ³ விவேசனம் நத்தி² ஏகஜ்ஜ²ம் அத்த²ஸ்ஸ விவேசேதும் அஸக்குணேய்யத்தா. ஏஸாதி பரதோகோ⁴ஸபச்சத்தபுரிஸகாரதோ ச ஸிஜ்ஜ²மானோ அத்தோ². ஏத்தகந்தி ஏத்தகோ பா⁴கோ³. யதி³ ந ஸக்கா லத்³து⁴ம், அத² கஸ்மா உபட்³ட⁴ந்தி வுத்தந்தி ஆஹ ‘‘கல்யாணமித்ததாயா’’திஆதி³. ஸம்மாதி³ட்டி²ஆதீ³ஸு ந ஸக்கா லத்³து⁴ம். அஸக்குணேய்யே ஸகலம்பி ந ஸம்ப⁴வதி பரதோகோ⁴ஸமத்தேன தேஸம் அஸிஜ்ஜ²னதோ, பதா⁴னஹேதுபா⁴வதீ³பனத்த²ம் பன ‘‘ஸகலமேவா’’தி வுத்தம். புப்³ப³பா⁴க³படிலாப⁴ங்க³ந்தி புப்³ப³பா⁴கே³ படிலத்³த⁴ப்³ப³காரணம் கல்யாணமித்தஸ்ஸ உபதே³ஸேன வினா தேன உத்தரி விஸேஸதோ அலத்³த⁴ப்³ப³தோ. அத்த²தோதி பரமத்த²தோ. ‘‘கல்யாணமித்தம்…பே… சத்தாரோ க²ந்தா⁴’’தி வத்வா ஸுத்வாதி அத்தோ². தே பன ஸீலாத³யோ ஸங்கா²ரக்க²ந்த⁴பரியாபன்னாதி ஆஹ ‘‘ஸங்கா²ரக்க²ந்தோ⁴திபி வத³ந்தியேவா’’தி.

மாஹேவந்தி மா அஹ ஏவந்தி சே²தோ³, அஹாதி நிபாதமத்தம், மாதி படிஸேதே⁴ நிபாதோ. தேனாஹ ‘‘மா ஏவம் அப⁴ணீ’’தி. ‘‘மாஹேவம் ஆனந்தா³’’தி வத³தோ ப⁴க³வதோ இமஸ்மிம் டா²னே தாதி³ஸஸ்ஸ நாம தே, ஆனந்த³, கல்யாணமித்தகு³ணே ஸேவதோ வத்தும் யுத்தம் அயாதா²வதோதி த⁴ம்மப⁴ண்டா³கா³ரிகஸ்ஸ யதா²பூ⁴தகு³ணகித்தனமுகே²ன படிக்கே²போ யுத்தோதி த³ஸ்ஸேந்தோ ‘‘ப³ஹுஸ்ஸுதோ’’திஆதி³மாஹ. இத³ந்தி இத³ம் வசனம் ப⁴க³வா ஆஹாதி ஸம்ப³ந்தோ⁴. ஸகலமேவ ஹீதி ஏத்த² ஹி-ஸத்³தோ³ ஹேதுஅத்தோ². தேன ‘‘மாஹேவ’’ந்தி தஸ்ஸ படிக்கே²பஸ்ஸ காரணம் ஜோதிதம், ந ஸரூபதோ வுத்தம். ‘‘கல்யாணமித்தஸ்ஸேத’’ந்திஆதி³னா பன தம் ஸரூபதோ த³ஸ்ஸிதந்தி ஆஹ ‘‘இதா³னி…பே… ஆதி³மாஹா’’தி. பாடிகங்கி²தப்³ப³ந்தி இச்ச²னட்டே²ன பாடிகங்கி²தப்³ப³ம், ந படிகங்கா²னிமித்தேனாதி ஆஹ ‘‘அவஸ்ஸம்பா⁴வீதி அத்தோ²’’தி.

இதா⁴தி அந்தோக³தா⁴வதா⁴ரணபத³ம், இதே⁴வாதி அத்தோ². இமஸ்மிம்யேவ ஹி ஸாஸனே அரியமக்³க³பா⁴வனா, ந அஞ்ஞத்த². ஆதி³பதா³னம்யேவாதி தஸ்மிம் தஸ்மிம் வாக்யே ஆதி³தோ ஏவ வுத்தஸம்மாதி³ட்டி²ஆதி³பதா³னம்யேவ. ஸம்மாத³ஸ்ஸனலக்க²ணாதி சதுன்னம் அரியஸச்சானம் பரிஞ்ஞாபி⁴ஸமயாதி³வஸேன ஸம்மதே³வ த³ஸ்ஸனஸபா⁴வா. ஸம்மாஅபி⁴ரோபனலக்க²ணோதி நிப்³பா³னஸங்கா²தே ஆரம்மணே ஸம்பயுத்தத⁴ம்மே ஸம்மதே³வ ஆரோபனஸபா⁴வோ. ஸம்மாபரிக்³க³ஹணலக்க²ணாதி முஸாவாதா³தீ³னம் விஸம்வாத³னாதி³கிச்சதாய லூகா²னம் அபரிக்³கா³ஹகானம் படிபக்க²பா⁴வதோ பரிக்³கா³ஹகஸபா⁴வா ஸம்மாவாசா ஸினித்³த⁴பா⁴வேன ஸம்பயுத்தத⁴ம்மே ஸம்மாவாசாபச்சயம் ஸுபா⁴ஸிதஸோதாரஞ்ச புக்³க³லம் பரிக்³க³ண்ஹாதீதி ஸம்மாபரிக்³க³ஹணலக்க²ணா. யதா² காயிககிரியா கிஞ்சி கத்தப்³ப³ம் ஸமுட்டா²பேதி, ஸயஞ்ச ஸமுட்ட²ஹனம் க⁴டனம் ஹோதி, ததா² ஸம்மாகம்மந்த ஸங்கா²தா விரதிபீதி ஸமுட்டா²பனலக்க²ணா த³ட்ட²ப்³பா³, ஸம்பயுத்தத⁴ம்மானம் வா உக்கி²பனம் ஸமுட்டா²பனம் காயிககிரியாய பா⁴ருக்கி²பனம் விய. ஜீவமானஸ்ஸ ஸத்தஸ்ஸ, ஸம்பயுத்தத⁴ம்மானம் வா, ஜீவிதப்பவத்தியா ஆஜீவஸ்ஸேவ வா ஸுத்³தி⁴ வோதா³னம். யதா² உப்பன்னுப்பன்னானம் வஜ்ஜானம் த⁴ம்மேன பஹானானுப்பாத³அத்த²லாபா⁴தி³பரிவுட்³டி⁴ ஹோதி, ஏவம் ஸம்பயுத்தானம் பக்³க³ஹணஸபா⁴வோதி ஸம்மாபக்³க³ஹலக்க²ணோ ஸம்மாவாயாமோ. காயவேத³னாசித்தத⁴ம்மேஸு ஸுப⁴ஸுக²னிச்சஅத்தகா³ஹானஞ்ச வித⁴மனவஸேன ஸம்மாபதிட்டா²னஸபா⁴வாதி ஸம்மாஉபட்டா²னலக்க²ணா ஸம்மாஸதி. ஸம்பயுத்தத⁴ம்மானம் ஸம்மா ஸமாத³ஹனம் ஏகக்³க³தாகரணம் ஸபா⁴வோ ஏதஸ்ஸாதி ஸம்மாஸமாதா⁴னலக்க²ணோ ஸம்மாஸமாதி⁴. தீணி கிச்சானி ஹோந்தி படிபக்க²த⁴ம்மேஸு, ஆரம்மணத⁴ம்மேஸு, ஸம்பயுத்தத⁴ம்மேஸு ச ஏகஸ்மிம்யேவ க²ணே பவத்திவிஸேஸபூ⁴தானி. இதா³னி தானி ஸரூபதோ த³ஸ்ஸேதும் ‘‘ஸேய்யதி²த³’’ந்திஆதி³ வுத்தம். ஸத்³தி⁴ந்தி இமினா ‘‘அஞ்ஞேஹீ’’தி வுத்தகிலேஸா மிச்சா²தி³ட்டி²யா ஸஹ ஏகட்டா² வா அனேகட்டா² வாதி த³ஸ்ஸேதி. பஜஹதி பஹாய நம் படிவிஜ்ஜ²தி. நிரோத⁴ந்தி நிப்³பா³னம் ஆரம்மணம் கரோதி ஸச்சி²கிரியாபடிவேதே⁴ன படிவிஜ்ஜ²தி.

ந கேவலம் மக்³க³த⁴ம்மா வுத்தனயேனேவ, அத² கோ² அபரேனபி நயேன வேதி³தப்³பா³தி த³ஸ்ஸேந்தோ ‘‘அபிசா’’திஆதி³மாஹ. நானாக²ணா புனப்புனம் உப்பஜ்ஜனதோ. நானாரம்மணா அனிச்சானுபஸ்ஸனாதி³பா⁴வதோ. ஏகக்க²ணா ஸகிதே³வ உப்பஜ்ஜனதோ. ஏகாரம்மணா நிப்³பா³னவிஸயத்தா. சத்தாரி நாமானி லப⁴தி பரிஞ்ஞாபி⁴ஸமயாதி³வஸேன பவத்தியா. தீணி நாமானி லப⁴தி காமஸங்கப்பாதீ³னம் பஹானவஸேன பவத்தியா. படிபக்க²பஹானவஸேன ஹிஸ்ஸ நாமத்தயலாபோ⁴. ஏஸ நயோ ஸேஸேஸுபி. விரதியோபி ஹோந்தி சேதனாயோபி புப்³ப³பா⁴கே³பி விக்க²ம்ப⁴னவஸேன பவத்தனதோ. மக்³க³க்க²ணே பன விரதியோவ படிபக்க²ஸமுச்சி²ந்த³னஸ்ஸ மக்³க³கிச்சத்தா. ந ஹி சேதனா மக்³க³ஸபா⁴வா. ஸம்மப்பதா⁴னஸதிபட்டா²னவஸேனாதி சதுப்³பி³த⁴ஸம்மப்பதா⁴னசதுப்³பி³த⁴ஸதிபட்டா²னவஸேன சத்தாரி நாமானி லப⁴தி அனுப்பன்னாகுஸலானுப்பாத³னாதீ³னம் குஸலானஞ்ச வட்³ட⁴னதோ. புப்³ப³பா⁴கே³பி மக்³க³க்க²ணேபீதி யதா² புப்³ப³பா⁴கே³ பட²மஜ்ஜா²னாதி³வஸேன நானா. ஏவம் மக்³க³க்க²ணேபி. ந ஹி ஏகோபி ச மக்³க³ஸமாதி⁴ பட²மஜ்ஜா²னஸமாதி⁴ஆதி³னாமானி லப⁴தி ஸம்மாதி³ட்டி²ஆதீ³னம் விய கிச்சவஸேன பே⁴தா³பா⁴வதோ. தேனாஹ ‘‘மக்³க³க்க²ணேபி ஸம்மாஸமாதி⁴யேவா’’தி.

ஞத்வா ஞாதப்³பா³தி ஸம்ப³ந்தோ⁴. வுத்³தி⁴ நாம வேபுல்லம் பி⁴ய்யோபா⁴வோ புனப்புனம் உப்பாதோ³ ஏவாதி ஆஹ ‘‘புனப்புனம் ஜனேதீ’’தி. அபி⁴னிப்³ப³த்தேதீதி அபி⁴வட்³ட⁴ம் பாபேந்தோ நிப்³ப³த்தேதி. விவித்ததாதி விவித்தபா⁴வோ. ஸோ ஹி விவேசனீயதோ விவிச்சதி, யம் விவிச்சித்வா டி²தம், தது³ப⁴யம்பி இத⁴ விவித்தபா⁴வஸாமஞ்ஞேன ‘‘விவித்ததா’’தி வுத்தம். தேஸு புரிமோ விவேசனீயதோ விவிச்சமானதாய விவிச்சனகிரியாய ஸமங்கீ³ த⁴ம்மஸமூஹோ தாய ஏவ விவிச்சனகிரியாய வஸேன விவேகோதி க³ஹிதோ. இதரோ ஸப்³ப³ஸோ ததோ விவித்தஸபா⁴வதாய. தத்த² யஸ்மிம் த⁴ம்மபுஞ்ஜே ஸம்மாதி³ட்டி² பவத்ததி, தம் யதா²வுத்தாய விவிச்சமானதாய விவேகஸங்கா²தம் நிஸ்ஸாயேவ பவத்ததி, இதரம் பன தம்னின்னதாதம்ஆரம்மணதாஹீதி வுத்தம் ‘‘விவேகம் நிஸ்ஸிதம், விவேகே வா நிஸ்ஸித’’ந்தி.

யதா² வா விவேகவஸேன பவத்தம் ஜா²னம் ‘‘விவேகஜ’’ந்தி வுத்தம், ஏவம் விவேகவஸேன பவத்தா ஸம்மாதி³ட்டி² ‘‘விவேகனிஸ்ஸிதா’’தி த³ட்ட²ப்³பா³. நிஸ்ஸயோ ச விபஸ்ஸனாமக்³கா³னம் வஸேன மக்³க³ப²லானம் வேதி³தப்³போ³. அஸதிபி தாஸம் புப்³பா³பரபா⁴வே ‘‘படிச்சஸமுப்பாதோ³’’தி ஏத்த² பச்சயானம் ஸமுப்பாத³னம் விய அபி⁴ன்னத⁴ம்மாதா⁴ரா நிஸ்ஸயபா⁴வனா ஸம்ப⁴வந்தி. தஸ்ஸ தத³ங்க³-ஸமுச்சே²த³னிஸ்ஸரணவிவேகனிஸ்ஸிததம் வத்வா படிப்பஸ்ஸத்³தி⁴விவேகனிஸ்ஸிததாய அவசனம் அரியமக்³க³பா⁴வனாய வுச்சமானத்தா. பா⁴விதமக்³க³ஸ்ஸ ஹி யே ஸச்சி²காதப்³பா³ த⁴ம்மா. தேஸம் கிச்சம் படிப்பஸ்ஸத்³தி⁴விவேகோ. அஜ்ஜா²ஸயதோதி ‘‘நிப்³பா³னம் ஸச்சி²கரிஸ்ஸாமீ’’தி மஹந்தஅஜ்ஜா²ஸயதோ. யதி³பி ஹி விபஸ்ஸனாக்க²ணே ஸங்கா²ராரம்மணம் சித்தம், ஸங்கா²ரேஸு பன ஆதீ³னவம் ஸுட்டு², தி³ஸ்வா தப்படிபக்கே² நிப்³பா³னே நின்னதாய அஜ்ஜா²ஸயதோ நிஸ்ஸரணவிவேகனிஸ்ஸிதோ ஹோதி, உண்ஹாபி⁴பூ⁴தஸ்ஸ புக்³க³லஸ்ஸ ஸீதனின்னசித்ததா விய. கேசி பன ‘‘யதா² ஸபா⁴வதோ, யதா² அஜ்ஜா²ஸயதோ நிஸ்ஸரணவிவேகனிஸ்ஸிததா, ஏவம் படிப்பஸ்ஸத்³தி⁴விவேகனிஸ்ஸிததாபி ஸியா’’தி வத³ந்தி. யத³க்³கே³ன ஹி நிப்³பா³னனின்னதா ஸியா, தத³க்³கே³ன ப²லனின்னதாபி ஸியா ‘‘குதா³ஸ்ஸு நாமாஹம் ததா³யதனம் உபஸம்பஜ்ஜ விஹரேய்ய’’ந்தி அஜ்ஜா²ஸயஸம்பத்தியா பா⁴வதோ. யஸ்மா பஹானவினயோ விய ராக³னிரோதோ⁴பி இதா⁴தி⁴ப்பேதவிவேகேன அத்த²தோ நிப்³பி³ஸிட்டோ², தஸ்மா வுத்தம் ஏஸ நயோ விராக³னிஸ்ஸிதாதீ³ஸூதி. தேனாஹ ‘‘விவேகத்தா² ஏவ ஹி விராகா³த³யோ’’தி.

வோஸ்ஸக்³க³ஸத்³தோ³ பரிச்சாக³த்தோ² பக்க²ந்த³னத்தோ² சாதி வோஸ்ஸக்³க³ஸ்ஸ து³வித⁴தா வுத்தா. வோஸ்ஸஜ்ஜனஞ்ஹி பஹானம், விஸ்ஸட்ட²பா⁴வேன நிராஸங்கபவத்தி ச, தஸ்மா விபஸ்ஸனாக்க²ணே தத³ங்க³வஸேன, மக்³க³க்க²ணே ஸமுச்சே²த³வஸேன படிபக்க²ஸ்ஸ பஹானம் வோஸ்ஸக்³கோ³, ததா² விபஸ்ஸனாக்க²ணே தம்னின்னபா⁴வேன, மக்³க³க்க²ணே ஆரம்மணகரணேன விஸ்ஸட்ட²ஸபா⁴வதா வோஸ்ஸக்³கோ³தி வேதி³தப்³ப³ம். தேனேவாஹ ‘‘தத்த² பரிச்சாக³வோஸ்ஸக்³கோ³’’திஆதி³. அயம் ஸம்மாதி³ட்டீ²தி அயம் மிஸ்ஸகவஸேன வுத்தா ஸம்மாதி³ட்டி². யதா²வுத்தேன பகாரேனாதி தத³ங்க³ப்பஹானஸமுச்சே²த³ப்பஹானபகாரேன தம்னின்னததா³ரம்மணகரணப்பகாரேன ச.

புப்³பே³ வோஸ்ஸக்³க³வசனஸ்ஸேவ அத்த²ஸ்ஸ வுத்தத்தா ஆஹ ‘‘ஸகலேன வசனேனா’’தி. பரிணமந்தம் விபஸ்ஸனாக்க²ணே, பரிணதம் மக்³க³க்க²ணே. பரிணாமோ நாம இத⁴ பரிபாகோதி ஆஹ ‘‘பரிபச்சந்தம் பரிபக்கஞ்சா’’தி. பரிபாகோ ச ஆஸேவனலாபே⁴ன லத்³த⁴ஸாமத்தி²யஸ்ஸ கிலேஸே பரிச்சஜிதும் நிப்³பா³னம் பக்க²ந்தி³தும் திக்க²விஸத³பா⁴வோ. தேனாஹ ‘‘அய’’ந்திஆதி³. ஏஸ நயோதி ய்வாயம் நயோ ‘‘விவேகனிஸ்ஸித’’ந்திஆதி³னா ஸம்மாதி³ட்டி²யம் வுத்தோ, ஸேஸேஸு ஸம்மாஸங்கப்பாதீ³ஸுபி ஏஸேவ நயோ, ஏவம் தத்த² நேதப்³ப³ந்தி அத்தோ². படிச்சாதி நிஸ்ஸாய. ஜாதிஸபா⁴வாதி ஜாயனஸபா⁴வா. ஸகலோதி அனவஸேஸோ, ஸப்³போ³தி அத்தோ². ந கோசி மக்³கோ³ ஸாவஸேஸோ ஹுத்வா ஸம்ப⁴வதி. ஹேட்டி²மே மக்³கே³ உப்பன்னே உபரிமோ உப்பன்னோ ஏவ நாம அனந்தராயேன உப்பஜ்ஜனதோ. வவஸ்ஸக்³க³த்தே²தி வசஸாயத்தே². வண்ணயந்தீதி கு³ணவண்ணனவஸேன வித்தா²ரேந்தி.

கல்யாணமித்தஸுத்தவண்ணனா நிட்டி²தா.

9. பட²மஅபுத்தகஸுத்தவண்ணனா

130. தி³வ-ஸத்³தோ³ தி³வா-ஸத்³தோ³ விய தி³வஸபரியாயோ, தஸ்மா விஸேஸனபா⁴வேன வுச்சமானோ தி³வஸத்³தோ³ அத்த²விஸேஸம் தீ³பேதீதி ஆஹ ‘‘தி³வஸஸ்ஸ தி³வா’’திஆதி³. ஸம் வுச்சதி த⁴னம், தஸ்ஸ பதீதி ஸம்பதி, த⁴னஸாமிகோ, தஸ்ஸ ஹிதாவஹத்தா ஸாபதேய்யந்தி ஆஹ ‘‘ஸாபதேய்யந்தி த⁴ன’’ந்தி. தஸ்ஸ கே³ஹே கதாகதப⁴ண்ட³ஸ்ஸ அதிப³ஹுபா⁴வதோ விம்ஹயப்பத்தோ ராஜா ‘‘கோ பன வாதோ³’’தி ஆஹ. காளலோஹம் நாம அயோப²லம். கச்ச²பாதி³ரூபேஹிபி ஸோவண்ணாதீ³னி ட²பேந்தி. ஸகுண்ட³கப⁴த்தந்தி ஸகுண்டே³ஹி வா ஸது²ஸேஹி வா பக்கப⁴த்தம். பி³லங்க³ம் வுச்சதி த⁴ஞ்ஞபி³லங்க³ம், ஆரனாலந்திபி வுச்சதி, தம் து³தியம் அஸ்ஸாதி பி³லங்க³து³தியம். தஞ்ஹி கஞ்ஜிதோ நிப்³ப³த்தத்தா கஞ்ஜிகம் நாம. தீஹி பக்கே²ஹி வத்த²க²ண்டே³ஹி கதனிவாஸனம் திபக்க²வஸனம். தேனாஹ ‘‘தீணி…பே… நிவாஸன’’ந்தி.

அஸந்தோ நீசோ புரிஸோதி அஸப்புரிஸோதி ஆஹ ‘‘லாமகபுரிஸோ’’தி. கம்மஸ்ஸ நிப்³ப³த்தபா⁴வேன ஓதரணதாய ப²லம் அக்³க³ம் நாம, உபரிபூ⁴மிக³தத்தா உத்³த⁴ம் அக்³க³ம் அஸ்ஸாதி உத்³த⁴க்³கி³கம். த³க்கி²ணந்தி தா³னமாஹ. ஸக்³கோ³ நாம காமப⁴வூபபத்திப⁴வோ, தஸ்ஸ நிப்³ப³த்தனதோ ‘‘ஸக்³க³ஸ்ஸ ஹிதா’’தி வுத்தம். தத்ருபபத்திஜனனதோதி தத்ர உபபத்தியா ஜனனதோ, உப்பாத³னதோதி அத்தோ².

ஸேதம் உத³கம் ஏதிஸ்ஸாதி ஸேதோத³கா. ஸோ யேன பா⁴வேன யத்த² பாகடதரோ ஹுத்வா தி³ஸ்ஸதி, தம் த³ஸ்ஸேதும் ‘‘வீசீனம் பி⁴ன்னட்டா²னே’’தி ஆஹ. ஸுகோ²தரணட்டா²னதாய கத்³த³மாதி³தோ³ஸவிரஹதோ ச ஸுந்த³ரதித்தா². தம் அபேய்யமானந்தி தம் உத³கம் கேனசி அபரிபு⁴ஞ்ஜியமானம். அத்தனா கத்தப்³ப³கிச்சகரோதி அத்தனா காதப்³ப³கம்மஸங்கா²தகிச்சகரோ, பரிபோ⁴க³வஸேன சேவ ஸங்க³ஹேதப்³ப³ஸங்க³ண்ஹனவஸேன ச நியோஜகோதி அத்தோ². குஸலகிச்சகரோதி அத்தனா காதப்³ப³புஞ்ஞகரோ.

பட²மஅபுத்தகஸுத்தவண்ணனா நிட்டி²தா.

10. து³தியஅபுத்தகஸுத்தவண்ணனா

131. பிண்ட³பாதேனாதி ஸஹயோகே³ கரணவசனம். படிபாத³னம் தேன ஸஹ யோஜனந்தி ஆஹ ‘‘பிண்ட³பாதேன ஸத்³தி⁴ம் ஸம்யோஜேஸி, பிண்ட³பாதம் அதா³ஸீதி அத்தோ²’’தி. ‘‘பணீதபோ⁴ஜனம் பு⁴ஞ்ஜித்வா’’தி வுத்தம், பாளியம் பன ‘‘கணாஜகம் பு⁴ஞ்ஜதி பி³லங்க³து³திய’’ந்தி. தம் தம் பவத்திதம் யேபு⁴ய்யவஸேன வுத்தந்தி த³ட்ட²ப்³ப³ம். இதா³னி ‘‘இமஸ்ஸ ஸேட்டி²ஸ்ஸ கஸ்ஸசி ஸமணஸ்ஸ வா ப்³ராஹ்மணஸ்ஸ வா தே³தா²’’தி வசனம் ந ஸுதபுப்³ப³ம், யஸ்மா பச்சேகபு³த்³தா⁴ நாம அத்தனோ கு³ணானுபா⁴வேஹி லோகே பாகடா ஸஞ்ஜாதா ஏவ ஹோந்தி, தஸ்மா ஸேட்டி²ப⁴ரியாய ‘‘ந யஸ்ஸ வா தஸ்ஸ வா’’திஆதி³ சிந்திதம். ததா² ஹி தேஸம் தே³ந்தாபி ஸக்கச்சம் யேபு⁴ய்யேன பணீதமேவ தே³ந்தி. நாஸாபுடம் பஹரி அத்தனோ ஆனுபா⁴வேன. ஸோ லுத்³த⁴தாய ‘‘ப³ஹு வத த⁴ஞ்ஞம் மமஸ்ஸா’’தி சித்தம் ஸம்யமேதும் ஸந்தா⁴ரேதும் அஸக்கோந்தோ.

விப்படிஸாருப்பன்னாகாரம் த³ஸ்ஸேதும் ‘‘வரமேத’’ந்திஆதி³ வுத்தம். ‘‘இமஸ்ஸ ஸமணஸ்ஸ பிண்ட³பாதம் தே³ஹீ’’தி வத³தோ ந ஏகாய ஏவ ஜவனவீதி²யா வஸேன அத்த²ஸித்³தி⁴. அத² கோ² தத்த² ஆதி³தோ பவத்தஜவனவாரோபி அத்தி² மஜ்ஜே² பவத்தஜவனவாரோபி, தம் ஸந்தா⁴யாஹ ‘‘புப்³ப³பச்சி²மசேதனாவஸேனா’’தி. ஏகா சேதனா த்³வே படிஸந்தி⁴யோ ந தே³தீதி ஏத்த² ஸாகேதபஞ்ஹவஸேன நிச்ச²யோ வேதி³தப்³போ³. சுத்³த³ஸன்னம் சேதனானம் புப்³பே³ புரேதரம் கதத்தா புராணம்.

பரிக³ய்ஹதீதி பரிக்³க³ஹோதி ஆஹ ‘‘பரிக்³க³ஹிதம் வத்து²’’ந்தி. அன்வாய உபனிஸ்ஸாய ஜீவந்தீதி அனுஜீவினோ. ஸப்³ப³மேதந்தி த⁴னத⁴ஞ்ஞாதி³ஸப்³ப³ம் ஏதம் யதா²வுத்தபரிக்³க³ஹவத்து²ம். நிக்கி²ப்பகா³மினந்தி நிக்கி²பிதப்³ப³தாகா³மினம். நிக்கி²பிதப்³ப³ஸபா⁴வம் ஹோதீதி ஆஹ ‘‘நிக்கி²ப்பஸபா⁴வ’’ந்தி. பஹாய க³மனீயந்தி அயமேத்த² அத்தோ²தி ஆஹ ‘‘பரிச்சஜிதப்³ப³ஸபா⁴வமேவா’’தி.

து³தியஅபுத்தகஸுத்தவண்ணனா நிட்டி²தா.

து³தியவக்³க³வண்ணனா நிட்டி²தா.