3. நானாதித்தி²யவக்³கோ³

1. ஸிவஸுத்தவண்ணனா

102. ததியவக்³க³ஸ்ஸ பட²மந்தி ததியவக்³கே³ பட²மஸுத்தம். வுத்தத்த²மேவ ஹேட்டா² ஸதுல்லபகாயிகவக்³கே³ பட²மஸுத்தே.

ஸிவஸுத்தவண்ணனா நிட்டி²தா.

2. கே²மஸுத்தவண்ணனா

103. பட²மம்யேவாதி ஜராமரணாதி³பா⁴வதோ பகே³வ. ப³லவசிந்தனம் சிந்தேதீதி யதா² ஸாகடிகோ அஜானித்வா விஸமே மக்³கே³ ஸகடம் பாஜேந்தோ அக்கே² சி²ன்னே பதிகாதும் அவிஸஹந்தோ து³க்கீ² து³ம்மனோ ப³லவசிந்தனம் சிந்தேதி, மஹந்தம் சித்தஸந்தாபம் பாபுணாதி, ஏவம் அத⁴ம்மவாதீ³ மச்சுமுக²ம் பத்தோ ப³லவசித்தஸந்தாபம் பாபுணாதி, தஸ்மா த⁴ம்மசரியாய நப்பமஜ்ஜிதப்³ப³ந்தி.

கே²மஸுத்தவண்ணனா நிட்டி²தா.

3. ஸேரீஸுத்தவண்ணனா

104. யம் தா³னம் தே³மீதி யம் தே³ய்யத⁴ம்மம் பரஸ்ஸ தே³மி. தஸ்ஸ பதி ஹுத்வாதி தப்³பி³ஸயம் லோப⁴ம் ஸுட்டு² அபி⁴ப⁴வந்தோ தஸ்ஸ அதி⁴பதி ஹுத்வா தே³மி தேன அனாகட்³ட⁴னீயத்தா. ‘‘ந தா³ஸோ ந ஸஹாயோ’’தி வத்வா தது³ப⁴யம் அன்வயதோ ப்³யதிரேகதோ த³ஸ்ஸேதும் ‘‘யோ ஹீ’’திஆதி³ வுத்தம். தா³ஸோ ஹுத்வா தே³தி தண்ஹாய தா³ஸப்³யஸ்ஸ உபக³தத்தா. ஸஹாயோ ஹுத்வா தே³தி தஸ்ஸ பியபா⁴வாவிஸ்ஸஜ்ஜனதோ. ஸாமீ ஹுத்வா தே³தி தண்ஹாதா³ஸப்³யதோ அத்தானம் மோசேத்வா அபி⁴பு⁴ய்ய பவத்தனதோ. ஸாமிபரிபோ⁴க³ஸதி³ஸா ஹேதஸ்ஸாயம் பவத்ததீதி.

அத² வா யோ தா³னஸீலதாய தா³யகோ புக்³க³லோ, ஸோ தா³னே பவத்திபே⁴தே³ன தா³னதா³ஸோ தா³னஸஹாயோ தா³னபதீதி திப்பகாரோ ஹோதீதி த³ஸ்ஸேதி. தத³ஸ்ஸ திப்பகாரதம் விப⁴ஜித்வா த³ஸ்ஸேதும் ‘‘யோ ஹீ’’திஆதி³ வுத்தம். தா³தப்³ப³ட்டே²ன தா³னம், அன்னபானாதி³. தத்த² யம் அத்தனா பரிபு⁴ஞ்ஜதி தண்ஹாதி⁴பன்னதாய, தஸ்ஸ வஸே வத்தனதோ தா³ஸோ விய ஹோதி. யம் பரேஸம் தீ³யதி, தத்த²பி அன்னபானஸாமஞ்ஞேன இத³ம் வுத்தம் ‘‘தா³னஸங்கா²தஸ்ஸ தே³ய்யத⁴ம்மஸ்ஸ தா³ஸோ ஹுத்வா தே³தீ’’தி. ஸஹாயோ ஹுத்வா தே³தி அத்தனா பரிபு⁴ஞ்ஜிதப்³ப³ஸ்ஸ பரேஸம் தா³தப்³ப³ஸ்ஸ ச ஸமஸமட்ட²பனேன. பதி ஹுத்வா தே³தி ஸயம் தே³ய்யத⁴ம்மஸ்ஸ வஸே அவத்தித்வா தஸ்ஸ அத்தனோ வஸே வத்தாபனதோ.

அபரோ நயோ – யோ அத்தனா பணீதம் பரிபு⁴ஞ்ஜித்வா பரேஸம் நிஹீனம் தே³தி, ஸோ தா³னதா³ஸோ நாம தன்னிமித்தனிஹீனபா⁴வாபத்திதோ. யோ யாதி³ஸம் அத்தனா பரிபு⁴ஞ்ஜதி, தாதி³ஸமேவ பரேஸம் தே³தி, ஸோ தா³னஸஹாயோ நாம தன்னிமித்தனிஹீனாதி⁴கபா⁴வவிஸ்ஸஜ்ஜனேன ஸதி³ஸபா⁴வாபத்திதோ. யோ அத்தனா நிஹீனம் பரிபு⁴ஞ்ஜித்வா பரேஸம் பணீதம் தே³தி, ஸோ தா³னபதி நாம தன்னிமித்தஸேட்ட²பா⁴வப்பத்திதோ. கம்மஸரிக்க²கோ ஹி விபாகோ, தஸ்மா தே³வபுத்தோ ‘‘தா³னபதீ’’தி வத³ந்தோ ‘‘அஹம் தாதி³ஸோ அஹோஸி’’ந்தி த³ஸ்ஸேதி.

‘‘சதூஸு த்³வாரேஸு தா³னம் தீ³யித்தா²’’தி பாளியம் ஸங்கே²பதோ வுத்தமத்த²ம் வித்தா²ரேத்வா த³ஸ்ஸேதும் ‘‘தஸ்ஸ கிரா’’திஆதி³ வுத்தம். தா³னந்தி யிட்ட²ம், தஞ்ச கோ² ஸப்³ப³ஸாதா⁴ரணவஸேன கதந்தி ஆஹ ‘‘ஸமண …பே… யாசகான’’ந்தி. பப்³ப³ஜ்ஜூபக³தாதி யம் கிஞ்சி பப்³ப³ஜ்ஜம் உபக³தா. போ⁴வாதி³னோதி ஜாதிமத்தப்³ராஹ்மணே வத³தி. நாலத்த² பு³த்³த⁴ஸுஞ்ஞத்தா ததா³ லோகஸ்ஸ. து³க்³க³தாதி து³க்க²ஜீவிககப்பகா கஸிரவுத்திகா. தேனாஹ ‘‘த³லித்³த³மனுஸ்ஸா’’தி. கஸிவாணிஜ்ஜாதி³ஜீவிகம் அனுட்டா²தும் அஸமத்தா² இத⁴ ‘‘கபணா’’தி அதி⁴ப்பேதாதி ஆஹ ‘‘காணகுணிஆத³யோ’’தி. பதா²வினோதி அத்³தி⁴கா. வனிப்³ப³காதி தா³யகானம் கு³ணகித்தனகம்மப²லகித்தனவஸேன யாசகா ஸேய்யதா²பி நக்³கா³த³யோ. தேனாஹ ‘‘இட்ட²ம் தி³ன்ன’’ந்திஆதி³. பஸதமத்தந்தி வீஹிதண்டு³லாதி³வஸேன வுத்தம். ஸராவமத்தந்தி யாகு³ப⁴த்தாதி³வஸேன. யதா² கா³மலாபோ⁴ கா³மே உப்பஜ்ஜனகோ ஆயலாபோ⁴, ஏவம் தத்த² த்³வாரலாபோ⁴தி ஆஹ ‘‘தத்த² உப்பஜ்ஜனகஸதஸஹஸ்ஸே’’தி. மஹந்ததரம் தா³னம் அத³ம்ஸு அஞ்ஞஸ்ஸபி த⁴னஸ்ஸ வினியோக³ம் க³தத்தா. தம் ஸந்தா⁴யாதி தம் மஹந்ததரம் தா³னம் கதம் ஸந்தா⁴ய. ரஞ்ஞோ ஹி தத்த² தா³னம் இத்தா²கா³ரஸ்ஸ தா³னேன மஹதா அபி⁴பூ⁴தம் விய படினிவத்தம் ஹோதீதி ஆஹ ‘‘படினிவத்தீ’’தி. கோசீதி பு⁴ம்மத்தே² பச்சத்தவசனம். தேனாஹ ‘‘கத்த²சீ’’தி. அனேகவஸ்ஸஸஹஸ்ஸாயுககாலே தஸ்ஸ உப்பன்னத்தா அஸீதிவஸ்ஸஸஹஸ்ஸானி ஸோ ராஜா தா³னமதா³ஸீதி.

ஸேரீஸுத்தவண்ணனா நிட்டி²தா.

4. க⁴டீகாரஸுத்தவண்ணனா

105. சதுத்த²ம் ஹேட்டா² தே³வதாஸம்யுத்தவண்ணனாயம் வுத்தத்த²மேவ.

க⁴டீகாரஸுத்தவண்ணனா நிட்டி²தா.

5. ஜந்துஸுத்தவண்ணனா

106. யே வினயே அபகதஞ்ஞுனோ ஸம்கிலேஸிகேஸு வோதா³னியேஸு த⁴ம்மேஸு ந குஸலா யம் கிஞ்சி ந காரினோ விப்படிஸாரப³ஹுலா. தேஸம் அனுப்பன்னஞ்ச உத்³த⁴ச்சம் உப்பஜ்ஜதி, உப்பன்னஞ்ச பி⁴ய்யோபா⁴வம் வேபுல்லம் ஆபஜ்ஜதீதி ஆஹ ‘‘அகப்பியே கப்பியஸஞ்ஞிதாய…பே… உத்³த⁴ச்சபகதிகா’’தி. ஸாராபா⁴வேன துச்ச²த்தா ச நளோ வியாதி நளோ, மானோதி ஆஹ ‘‘உன்னளாதி உக்³க³தனளா’’தி. தேனாஹ ‘‘உட்டி²ததுச்ச²மானா’’தி. மானோ ஹி ஸேய்யஸ்ஸ ஸேய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²க²ராதி முகே²ன ப²ருஸா, ப²ருஸவாதி³னோதி அத்தோ². விகிண்ணவாசாதி விஸடவசனா, ஸம்ப²ப்பலாபதாய அபரியந்தவசனா. தேனாஹ ‘‘அஸம்யதவசனா’’திஆதி³. சண்ட³ஸோதே ப³த்³த⁴னாவாஸதி³ஸாதி ஏதேன அனவட்டி²தகிரியதம் த³ஸ்ஸேதி. யேன ஸமன்னாக³தா ஸத்தா ஏகஸ்மிம் டா²னே டா²தும் வா நிஸீதி³தும் வா ந ஸக்கோந்தி, இதோ சிதோ ச விசரந்தி. அனவட்டி²தசித்தாதி ஏகஸ்மிம் ஆரம்மணே ந அவட்டி²தசித்தா. விவடஇந்த்³ரியாதி அஸம்வுதசக்கா²தி³இந்த்³ரியா.

கு³ணகதா²ய ஸத்³தி⁴ம் கதி²யமானோ நிக்³கு³ணஸ்ஸ அகு³ணோ பாகடோ ஹோதி ஜாதிமணிஸமீபே டி²தஸ்ஸ விய காசமணினோ தோ³ஸோ. ஸுக²ஜீவினோதி ஸுகே² டி²தா. யதா² தா³யகானம் ஸுப⁴ரம் ஹோதி, ஏவம் ஸுகே²ன அகிச்சே²ன பவத்தஜீவிகா. தேனாஹ ‘‘புப்³பே³ பி⁴க்கூ²’’திஆதி³.

அத்தனோ ருசிவஸேன கா³மகிச்சம் நேதீதி கா³மணி, தே பன ஹீளேந்தோ வத³தி ‘‘கா³மணிகா’’தி. விஸ்ஸஜ்ஜேத்வாதி ஸதிவோஸ்ஸக்³க³வஸேன விஸ்ஸஜ்ஜேத்வா கிலேஸமுச்சா²யாதி மஹிச்சா²ஸங்கா²தாய தண்ஹாமுச்சா²ய. ஸீலவந்தானம்யேவ ஹி து³ப்படிபத்திம் ஸந்தா⁴ய தே³வபுத்தோ வத³தி. வத்தப்³ப³யுத்தகேயேவாதி ஓவாதே³ன மயா அனுக்³க³ஹேதப்³ப³மேவ. ச²ட்³டி³தகாதி பரிச்சத்தா ஆசரியுபஜ்ஜா²யாதீ³ஹி. ததோ ஏவ அனாதா² அப்பதிட்டா². பேதாதி விக³தஜீவிதா மதா. யதா² பேதா, ததே²வ ஹோந்தி அத்தஹிதாஸமத்த²தாய விஞ்ஞூனம் ஜிகு³ச்சி²தப்³ப³தாய ச.

ஜந்துஸுத்தவண்ணனா நிட்டி²தா.

6. ரோஹிதஸ்ஸஸுத்தவண்ணனா

107. ஏகோகாஸேதி சக்கவாளஸ்ஸ பரியந்தஸஞ்ஞிதே ஏகஸ்மிம் ஓகாஸே. பு⁴ம்மந்தி ‘‘யத்தா²’’தி இத³ம் பு⁴ம்மவசனம், ஸாமஞ்ஞதோ வுத்தம்பி ‘‘ஸோ லோகஸ்ஸ அந்தோ’’தி வசனதோ விஸிட்ட²விஸயமேவ ஹோதி. ‘‘ந ஜாயதி ந மீயதீ’’தி வத்வா புன ‘‘ந சவதி ந உபபஜ்ஜதீ’’தி கஸ்மா வுத்தந்தி ஆஹ ‘‘இத³ம் அபராபரம்…பே… க³ஹித’’ந்தி. பத³க³மனேனாதி பத³ஸா க³மனேன. ஸங்கா²ரலோகஸ்ஸ அந்தம் ஸந்தா⁴ய வத³தி உபரி ஸச்சானி பகாஸேதுகாமோ. ஸங்கா²ரலோகஸ்ஸ ஹி அந்தோ நிப்³பா³னம்.

த³ள்ஹம் தி²ரம் த⁴னு ஏதஸ்ஸாதி த³ள்ஹத⁴ன்வா. ஸோ ஏவ த³ள்ஹத⁴ம்மோதி வுத்தோ. தேனாஹ ‘‘த³ள்ஹத⁴னூ’’தி. உத்தமப்பமாணேனாதி ஸஹஸ்ஸதா²மப்பமாணேன. த⁴னுஸிப்பஸிக்கி²ததாய த⁴னுக்³க³ஹோ, ந த⁴னுக்³க³ஹமத்தேனாதி ஆஹ ‘‘த⁴னுக்³க³ஹோதி த⁴னுஆசரியோ’’தி. ‘‘த⁴னுக்³க³ஹோ’’தி வத்வா ‘‘ஸிக்கி²தோ’’தி வுத்தே த⁴னுஸிக்கா²ய ஸிக்கி²தோதி விஞ்ஞாயதி, ஸிக்கா² ச ஏத்தகே காலே ஸமத்த²ஸ்ஸ உக்கம்ஸக³தோ ஹோதீதி ஆஹ ‘‘த³ஸ த்³வாத³ஸ வஸ்ஸானி த⁴னுஸிப்பம் ஸிக்கி²தோ’’தி. உஸப⁴ப்பமாணேபீதி வீஸதியட்டி²யோ உஸப⁴ம், தஸ்மிம் உஸப⁴ப்பமாணே பதே³ஸே. வாலக்³க³ந்தி வாளகோடிம். கதஹத்தோ²தி பரிசிதஹத்தோ². கதஸரக்கே²போதி விவடஸரக்கே²பபதே³ஸத³ஸ்ஸனவஸேன ஸரக்கே²பகதாவீ. தேனாஹ ‘‘த³ஸ்ஸிதஸிப்போ’’தி. ‘‘கதஸிப்போ’’தி கேசி. அஸந்தி ஏதேனாதி அஸனம், கண்டோ³. தாலச்சா²யந்தி தாலச்சா²தி³ம், ஸா பன ரதனமத்தா, வித³த்தி²சதுரங்கு³லா வா.

புரத்தி²மஸமுத்³தா³தி ஏகஸ்மிம் சக்கவாளே புரத்தி²மஸமுத்³தா³. ஸமுத்³த³ஸீஸேன புரத்தி²மசக்கவாளமுக²வட்டிம் வத³தி. பச்சி²மஸமுத்³தோ³தி ஏத்தா²பி ஏஸேவ நயோ. நிப்பபஞ்சதந்தி அத³ந்த⁴காரிதம். ஸம்பத்தேதி தாதி³ஸேன ஜவேன க³ச்ச²ந்தேன ஸம்பத்தே. அனோதத்தேதி ஏத்தா²பி ‘‘ஸம்பத்தே’’தி பத³ம் ஆனேத்வா ஸம்ப³ந்தோ⁴, ததா² ‘‘நாக³லதாத³ந்தகட்ட²ம் கா²தி³த்வா’’தி ஏத்தா²பி. ததா³தி யதா³ ஸோ லோகந்தக³வேஸகோ அஹோஸி, ததா³. தீ³கா⁴யுககாலோதி அனேகவஸ்ஸஸஹஸ்ஸாயுககாலோ. சக்கவாளலோகஸ்ஸாதி ஸாமஞ்ஞவஸேன ஏகவசனம், சக்கவாளலோகந்தி அத்தோ². இமஸ்மிம்யேவ சக்கவாளே நிப்³ப³த்தி புப்³ப³பரிசரியஸித்³தா⁴ய நிகந்தியா. ஸஸஞ்ஞிம்ஹி ஸமனகேதி ந ரூபத⁴ம்மமத்தகே, அத² கோ² பஞ்சக்க²ந்த⁴ஸமுதா³யேதி த³ஸ்ஸேதி. ஸமிதபாபோதி ஸமுச்சி²ன்னஸம்கிலேஸத⁴ம்மோ.

ரோஹிதஸ்ஸஸுத்தவண்ணனா நிட்டி²தா.

7-8. நந்த³ஸுத்தனந்தி³விஸாலஸுத்தவண்ணனா

108-109. நந்த³ஸுத்தவிஸாலஸுத்தானி ஸத்தமஅட்ட²மானி ஹேட்டா² ஸம்வண்ணிதரூபத்தா வுத்தத்தா²னேவ.

நந்த³ஸுத்தனந்தி³விஸாலஸுத்தவண்ணனா நிட்டி²தா.

9. ஸுஸிமஸுத்தவண்ணனா

110. துய்ஹம்பி நோதி துய்ஹம்பி நு, நு-ஸத்³தோ³ புச்சா²யம், தஸ்மா வண்ணம் கதே²துகாமோ புச்ச²தீதி அதி⁴ப்பாயோ. ந வட்டதீதி ந யுஜ்ஜதி, கதி²தோதி கதே²தும் ஆரத்³தோ⁴, தேனாஹ ‘‘மத்த²கம் ந பாபுணாதீ’’தி. தமேவ மத்த²காபாபுணனம் த³ஸ்ஸேதும் ‘‘ஸோ ஹீ’’திஆதி³ வுத்தம். ஸதிஸம்பஜஞ்ஞாயோக³தோ கோ³ரூபஸீலோ, மூள்ஹோ க²லிதபஞ்ஞோ, கோ³ரூபஸ்ஸ விய ஸீலம் ஏதஸ்ஸாதி ஹி கோ³ரூபஸீலோ. ஸபா⁴கோ³ ஏகரூபசித்ததாய. அரியானம் ஸபா⁴க³தா நாம கு³ணவந்தவஸேனாதி ஆஹ ‘‘அஞ்ஞமஞ்ஞஸ்ஸ கு³ணேஸு பஸீதி³த்வா’’தி. ஸோளஸவித⁴ம் பஞ்ஞந்தி மஹாபஞ்ஞாதி³கா ச², நவ அனுபுப்³ப³விஹாரஸமாபத்திபஞ்ஞா, ஆஸவக்க²யபஞ்ஞாதி இமம் ஸோளஸவித⁴ம் பஞ்ஞம். தேஸட்டி² ஸாவகஸாதா⁴ரணஞாணானிபி ஏத்தே²வ ஸங்க³ஹம் ஸமோஸரணம் க³ச்ச²ந்தி.

ஆனந்தா³தி தே²ரம் ஆஹ. ஆசாரோதி சாரித்தஸீலமாஹ. கோ³சரோதி கோ³சரஸம்பத்தி. விஹாரோதி ஸமாபத்திவிஹாரோ. அபி⁴க்கமோதிஆதி³னா இரியாபத²விஹாரம். துய்ஹம்பீதி பி-ஸத்³தே³ன ப⁴க³வதா அத்தானம் ஆதி³ம் கத்வா தத³ஞ்ஞேஸம் விஞ்ஞூனம் ஸப்³பே³ஸம் தே²ரஸ்ஸ ருச்சனஸபா⁴வோ தீ³பிதோதி த³ஸ்ஸேந்தோ ‘‘மய்ஹம் ருச்சதீ’’திஆதி³மாஹ. தத்த² ஸதிபி ஆனந்த³த்தே²ரஸ்ஸபி அஸீதியா மஹாதே²ரானம் அந்தோக³த⁴பா⁴வே ‘‘அஸீதியா மஹாதே²ரானம் ருச்சதீ’’தி வத்வா ‘‘துய்ஹம்பி ருச்சதீ’’தி வசனம் தேன த⁴ம்மஸேனாபதினோ வண்ணம் கதா²பேதுகாமதாயாதி த³ட்ட²ப்³ப³ம்.

ஸாடகந்தரேதி நிவத்த²வத்த²ந்தரே. லத்³தோ⁴காஸோதி நிப்³பு³த்³த⁴ம் கரோந்தோ ஸாடகந்தரே லத்³த⁴ம் க³ஹேதும் லத்³தா⁴வஸரோ. லபி⁴ஸ்ஸாமினோதி லபி⁴ஸ்ஸாமி வத. தீ³பத⁴ஜபூ⁴தந்தி ஸதயோஜனவித்தி²ண்ணம் ஜம்பு³தீ³பஸ்ஸ த⁴ஜபூ⁴தம். புக்³க³லபலாபேதி அந்தோஸாராபா⁴வதோ பலாபபூ⁴தே புக்³க³லே ஹரந்தோ. பா³லதாயாதி ருசிக²ந்திஆதி³அபா⁴வதாய. தோ³ஸதாயாதி து³ஸ்ஸகபா⁴வேன. மோஹேனாதி மஹாமூள்ஹதாய. கேசி பன ‘‘பா³லோ பா³லதாயாதி மூள்ஹதாய பகதிபா³லபா⁴வேன ந ஜானாதி. மூள்ஹோ மோஹேனாதி ஸயம் அபா³லோ ஸமானோபி யதா³ மோஹேன பரியுட்டி²தோ ஹோதி, ததா³ மோஹேன ந ஜானாதி, அயம் பத³த்³வயஸ்ஸ விஸேஸோ’’தி வத³ந்தி. விபல்லத்த²சித்தோதி யக்கு²ம்மாதே³ன பித்தும்மாதே³ன வா விபரீதசித்தோ.

‘‘சதூஸு கோஸல்லேஸூ’’தி வுத்தம் சதுப்³பி³த⁴ம் கோஸல்லம் பாளியா ஏவ த³ஸ்ஸேதும் ‘‘வுத்தம் ஹேத’’ந்திஆதி³ வுத்தம். தத்த² யோ அட்டா²ரஸ தா⁴துயோ ஸமுத³யதோ அத்த²ங்க³மதோ அஸ்ஸாத³தோ ஆதீ³னவதோ நிஸ்ஸரணதோ ச யதா²பூ⁴தம் பஜானாதி, அயம் தா⁴துகுஸலோ. வுத்தனயேன ஆயதனேஸு குஸலோ ஆயதனகுஸலோ. அவிஜ்ஜாதீ³ஸு த்³வாத³ஸபடிச்சஸமுப்பாத³ங்கே³ஸு குஸலோ படிச்சஸமுப்பாத³குஸலோ. ‘‘இத³ம் இமஸ்ஸ ப²லஸ்ஸ டா²னம் காரணம், இத³ம் அட்டா²னம் அகாரண’’ந்தி ஏவம் டா²னஞ்ச டா²னதோ, அட்டா²னஞ்ச அட்டா²னதோ யதா²பூ⁴தம் பஜானதோ டா²னாட்டா²னகுஸலோ. யோ பன இமேஸு தா⁴துஆதீ³ஸு பரிஞ்ஞாபி⁴ஸமயாதி³வஸேன நிஸ்ஸங்க³க³தியா பண்டா³தி லத்³த⁴னாமேன ஞாணேன இதோ க³தோ பவத்தோ, அயம் பண்டி³தோ நாம.

மஹந்தானம் அத்தா²னம் பரிக்³க³ண்ஹனதோ மஹதீ பஞ்ஞா ஏதஸ்ஸாதி மஹாபஞ்ஞோ. ஸேஸபதே³ஸுபி ஏஸேவ நயோதி ஆஹ ‘‘மஹாபஞ்ஞாதீ³ஹி ஸமன்னாக³தோதி அத்தோ²’’தி. நானத்தந்தி யாஹி மஹாபஞ்ஞாதீ³ஹி ஸமன்னாக³தத்தா தே²ரோ ‘‘மஹாபஞ்ஞோ’’திஆதி³னா கித்திதோ, தாஸம் மஹாபஞ்ஞாதீ³னம் இத³ம் நானத்தம் அயம் வேமத்ததா. யஸ்ஸ கஸ்ஸசி விஸேஸதோ அரூபத⁴ம்மஸ்ஸ மஹத்தம் நாம கிச்சஸித்³தி⁴யா வேதி³தப்³ப³ந்தி தத³ஸ்ஸ கிச்சஸித்³தி⁴யா த³ஸ்ஸேந்தோ ‘‘மஹந்தே ஸீலக்க²ந்தே⁴ பரிக்³க³ண்ஹாதீ’’திஆதி³மாஹ. தத்த² ஹேதுமஹந்ததாய பச்சயமஹந்ததாய நிஸ்ஸயமஹந்ததாய பபே⁴த³மஹந்ததாய கிச்சமஹந்ததாய ப²லமஹந்ததாய ஆனிஸம்ஸமஹந்ததாய ச ஸீலக்க²ந்த⁴ஸ்ஸ மஹந்தபா⁴வோ வேதி³தப்³போ³. தத்த² ஹேதூ அலோபா⁴த³யோ. பச்சயா ஹிரோத்தப்பஸத்³தா⁴ஸதிவீரியாத³யோ. நிஸ்ஸயா ஸாவகபோ³தி⁴பச்சேகபோ³தி⁴ஸம்மாஸம்போ³தி⁴னியததா, தம்ஸமங்கி³னோ ச புரிஸவிஸேஸா. பபே⁴தோ³ சாரித்தாதி³விபா⁴கோ³. கிச்சம் தத³ங்கா³தி³வஸேன படிபக்க²ஸ்ஸ வித⁴மனம். ப²லம் ஸக்³க³ஸம்பதா³ நிப்³பா³னஸம்பதா³ ச. ஆனிஸம்ஸோ பியமனாபதாதி³. அயமேத்த² ஸங்கே²போ, வித்தா²ரோ பன விஸுத்³தி⁴மக்³கே³ (விஸுத்³தி⁴. 1.8-9) ஆகங்கே²ய்யஸுத்தாதீ³ஸு (ம. நி. 1.64 ஆத³யோ) ச ஆக³தனயேன வேதி³தப்³போ³. இமினா நயேன ஸமாதி⁴க்க²ந்தா⁴தீ³னம்பி மஹந்ததா யதா²ரஹம் நித்³தா⁴ரேத்வா வேதி³தப்³பா³. டா²னாட்டா²னாதீ³னம் பன மஹந்தபா⁴வோ மஹாவிஸயதாய வேதி³தப்³போ³. தத்த² டா²னாட்டா²னானம் மஹாவிஸயதா ப³ஹுதா⁴துகஸுத்தாதீ³ஸு ஆக³தனயேன, விஹாரஸமாபத்தீனம் ஸமாதி⁴க்க²ந்தே⁴ நித்³தா⁴ரிதனயேன வேதி³தப்³பா³. அரியஸச்சானம் ஸகலஸாஸனஸங்க³ண்ஹனதோ ஸச்சவிப⁴ங்கே³ (விப⁴. 189 ஆத³யோ) தம்ஸம்வண்ணனாஸு (விப⁴. அட்ட². 189 ஆத³யோ) ஆக³தனயேன; ஸதிபட்டா²னாதீ³னம் ஸதிபட்டா²னவிப⁴ங்கா³தீ³ஸு (விப⁴. 355 ஆத³யோ) தம்ஸம்வண்ணனாதீ³ஸு (விப⁴. அட்ட². 355 ஆத³யோ) ச ஆக³தனயேன; ஸாமஞ்ஞப²லானம் மஹதோ ஹிதஸ்ஸ மஹதோ ஸுக²ஸ்ஸ மஹதோ அத்த²ஸ்ஸ மஹதோ யோக³க்கே²மஸ்ஸ நிப்ப²த்திபா⁴வதோ ஸந்தபணீதனிபுணஅதக்காவசரபண்டி³தவேத³னீயபா⁴வதோ ச; அபி⁴ஞ்ஞானம் மஹாஸம்பா⁴ரதோ மஹாவிஸயதோ மஹாகிச்சதோ மஹானுபா⁴வதோ மஹானிப்ப²த்திதோ ச; நிப்³பா³னஸ்ஸ மத³னிம்மத³னாதி³மஹத்த²ஸித்³தி⁴தோ மஹந்ததா வேதி³தப்³பா³. பரிக்³க³ண்ஹாதீதி ஸபா⁴வாதி³தோ பரிச்சி²ஜ்ஜ க³ண்ஹாதி ஜானாதி படிவிஜ்ஜ²தீதி அத்தோ². ஸா பனாதி மஹாபஞ்ஞதா.

புது²பஞ்ஞாதி ஏத்த² நானாக²ந்தே⁴ஸு ஞாணம் பவத்ததீதி அயம் ரூபக்க²ந்தோ⁴ நாம…பே… அயம் விஞ்ஞாணக்க²ந்தோ⁴ நாமாதி ஏவம் பஞ்சன்னம் க²ந்தா⁴னம் நானாகரணம் படிச்ச ஞாணம் பவத்ததி. தேஸு ஏகவிதே⁴ன ரூபக்க²ந்தோ⁴, ஏகாத³ஸவிதே⁴ன ரூபக்க²ந்தோ⁴, ஏகவிதே⁴ன வேத³னாக்க²ந்தோ⁴, ப³ஹுவிதே⁴ன வேத³னாக்க²ந்தோ⁴, ஏகவிதே⁴ன ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴தி ஏவம் ஏகேகஸ்ஸ க²ந்த⁴ஸ்ஸ ஏகவிதா⁴தி³வஸேன அதீதாதி³வஸேனபி நானாகரணம் படிச்ச ஞாணம் பவத்ததி. ததா² இத³ம் சக்கா²யதனம் நாம…பே… இத³ம் த⁴ம்மாயதனம் நாமம். தத்த² த³ஸாயதனா காமாவசரா, த்³வே சதுபூ⁴மகாதி ஏவம் ஆயதனானம் நானாகரணம் படிச்ச ஞாணம் பவத்ததி. நானாதா⁴தூஸூதி அயம் சக்கு²தா⁴து நாம…பே… அயம் மனோவிஞ்ஞாணதா⁴து நாம. தத்த² ஸோளஸ தா⁴துயோ காமாவசரா, த்³வே சதுபூ⁴மகாதி ஏவம் தா⁴துனானாகரணம் படிச்ச ஞாணம் பவத்ததி, தம் உபாதி³ண்ணதா⁴துவஸேன வுத்தந்தி வேதி³தப்³ப³ம் பச்சேகபு³த்³தா⁴னஞ்ஹி த்³வின்னம் அக்³க³ஸாவகானஞ்ச உபாதி³ண்ணதா⁴தூஸு ஏவ நானாகரணம் படிச்ச ஞாணம் பவத்ததி. தஞ்ச கோ² ஏகதே³ஸமத்ததோ, ந நிப்பதே³ஸதோ, அனுபாதி³ண்ணகதா⁴தூனம் பன நானாகரணம் ந ஜானந்தி ஏவ. இதரஸாவகேஸு வத்தப்³ப³மேவ நத்தி², ஸப்³ப³ஞ்ஞுபு³த்³தா⁴னம்யேவ பன இமாய நாம தா⁴துயா உஸ்ஸன்னத்தாவ இமஸ்ஸ ருக்க²ஸ்ஸ க²ந்தோ⁴ ஸேதோ ஹோதி, இமஸ்ஸ காளோ, இமஸ்ஸ மட்டோ², இமஸ்ஸ ப³ஹலத்தசோ, இமஸ்ஸ தனுத்தசோ, இமஸ்ஸ பத்தம் வண்ணஸண்டா²னாதி³வஸேன ஏவரூபம்; இமஸ்ஸ புப்ப²ம் நீலம் பீதகம் லோஹிதகம் ஓதா³தம், ஸுக³ந்த⁴ம் து³க்³க³ந்த⁴ம்; ப²லம் கு²த்³த³கம் மஹந்தம் தீ³க⁴ம் வட்டம் ஸுஸண்டா²னம் மட்ட²ம் ப²ருஸம் ஸுக³ந்த⁴ம் மது⁴ரம் தித்தகம் அம்பி³லம் கடுகம் கஸாவம்; கண்டகோ திகி²ணோ அதிகி²ணோ உஜுகோ குடிலோ தம்போ³ லோஹிதோ ஓதா³தோ ஹோதீதி தா⁴துனானத்தம் படிச்ச ஞாணம் பவத்ததி.

அத்தே²ஸூதி ரூபாதீ³ஸு ஆரம்மணேஸு. நானாபடிச்சஸமுப்பாதே³ஸூதி அஜ்ஜ²த்தப³ஹித்³தா⁴பே⁴த³தோ ச ஸண்டா²னபே⁴த³தோ ச நானப்பபே⁴தே³ஸு படிச்சஸமுப்பாத³ங்கே³ஸு. அவிஜ்ஜாதி³அங்கா³னஞ்ஹி பச்சேகம் படிச்சஸமுப்பாத³ஸஞ்ஞிதாதி. தேனாஹ ஸங்கா²ரபிடகே ‘‘த்³வாத³ஸ பச்சயா த்³வாத³ஸ படிச்சஸமுப்பாதா³’’தி. நானாஸுஞ்ஞதமனுபலப்³பே⁴ஸூதி நானாஸபா⁴வேஸு நிச்சஸாராதி³விரஹதோ ஸுஞ்ஞஸபா⁴வேஸு, ததோ ஏவ இத்தி²புரிஸஅத்தஅத்தனியாதி³வஸேன அனுபலப்³பே⁴ஸு ஸபா⁴வேஸு. ம-காரோ ஹேத்த² பத³ஸந்தி⁴கரோ. நானாஅத்தே²ஸூதி அத்த²படிஸம்பி⁴தா³விஸயேஸு பச்சயுப்பன்னாதி³பே⁴தே³ஸு நானாவிதே⁴ஸு அத்தே²ஸு. த⁴ம்மேஸூதி த⁴ம்மபடிஸம்பி⁴தா³விஸயேஸு பச்சயாதி³னானாத⁴ம்மேஸு. நிருத்தீஸூதி தேஸம்யேவ அத்த²த⁴ம்மானம் நித்³தா⁴ரணவசனஸங்கா²தாஸு நிருத்தீஸு. படிபா⁴னேஸூதி அத்த²படிஸம்பி⁴தா³தீ³ஸு விஸயபூ⁴தேஸு ‘‘இமானி இத³மத்த²ஜோதகானீ’’தி ததா² ததா² படிபா⁴னதோ பதிட்டா²னதோ படிபா⁴னானீதி லத்³த⁴னாமேஸு ஞாணேஸு. புது² நானாஸீலக்க²ந்தே⁴ஸூதிஆதீ³ஸு ஸீலஸ்ஸ புது²த்தம் நானத்தஞ்ச வுத்தமேவ. இதரேஸம் பன வுத்தனயானுஸாரேன ஸுவிஞ்ஞேய்யத்தா பாகடமேவ. யம் பன அபி⁴ன்னம் ஏகமேவ நிப்³பா³னம், தத்த² உபசாரவஸேன புது²த்தம் க³ஹேதப்³ப³ந்தி ஆஹ ‘‘புது² ஜனஸாதா⁴ரணே த⁴ம்மே ஸமதிக்கம்மா’’தி. தேனஸ்ஸ இத⁴ மத³னிம்மத³னாதி³பரியாயேன புது²த்தம் தீ³பிதம் ஹோதி.

ஏவம் விஸயவஸேன பஞ்ஞாய மஹத்தம் புது²த்தஞ்ச த³ஸ்ஸேத்வா இதா³னி ஸம்பயுத்தத⁴ம்மவஸேன ஹாஸபா⁴வம், பவத்திஆகாரவஸேன ஜவனபா⁴வம், கிச்சவஸேன திக்கா²தி³பா⁴வஞ்ச த³ஸ்ஸேதும் ‘‘கதமா ஹாஸபஞ்ஞா’’திஆதி³ வுத்தம். தத்த² ஹாஸப³ஹுலோதி பீதிப³ஹுலோ. ஸேஸபதா³னி தஸ்ஸ வேவசனானி. ஸீலம் பரிபூரேதீதி ஹட்ட²பஹட்டோ² உத³க்³கு³த³க்³கோ³ ஹுத்வா பீதிஸஹக³தாய பஞ்ஞாய பாதிமோக்க²ஸீலம் ட²பேத்வா ஹாஸனீயதரஸ்ஸேவ விஸும் க³ஹிதத்தா இதரம் திவித⁴ம் ஸீலம் பரிபூரேதி. பீதிஸோமனஸ்ஸஸஹக³தா ஹி பஞ்ஞா அபி⁴ரதிவஸேன ததா³ரம்மணே பு²ல்லிதா விகஸிதா விய வத்ததி, ந உபேக்கா²ஸஹக³தா. ஸீலக்க²ந்த⁴ம் ஸமாதி⁴க்க²ந்த⁴ந்திஆதீ³ஸுபி ஏஸேவ நயோ. தே²ரோதிஆதி³னா அபி⁴னீஹாரஸித்³தா⁴ தே²ரஸ்ஸ ஹாஸபஞ்ஞதாதி த³ஸ்ஸேதி.

ஸப்³ப³ம் ரூபம் அனிச்சலக்க²ணதோ கி²ப்பம் ஜவதீதி ரூபக்க²ந்த⁴ம் அனிச்சந்தி ஸீக⁴வேகே³ன பவத்தியா படிபக்க²தூ³ரீபா⁴வேன புப்³பா³பி⁴ஸங்கா²ரஸ்ஸ ஸாதிஸயத்தா இந்தே³ன விஸட்ட²வஜிரம் விய லக்க²ணம் படிவிஜ்ஜ²ந்தீ அத³ந்தா⁴யந்தீ ரூபக்க²ந்தே⁴ அனிச்சலக்க²ணம் வேகே³ன படிவிஜ்ஜ²தி, தஸ்மா ஸா ஜவனபஞ்ஞா நாமாதி அத்தோ². ஸேஸபதே³ஸுபி ஏஸேவ நயோ. ஏவம் லக்க²ணாரம்மணிகவிபஸ்ஸனாவஸேன ஜவனபஞ்ஞம் த³ஸ்ஸேத்வா ப³லவவிபஸ்ஸனாவஸேன த³ஸ்ஸேதும் ‘‘ரூப’’ந்திஆதி³ வுத்தம். தத்த² க²யட்டே²னாதி யத்த² யத்த² உப்பஜ்ஜதி, தத்த² தத்தே²வ க²ணேனேவ பி⁴ஜ்ஜனதோ க²யஸபா⁴வதோ. ப⁴யட்டே²னாதி ப⁴யானகதோ. அஸாரகட்டே²னாதி அத்தஸாரவிரஹதோ நிச்சஸாராதி³விரஹதோ ச. துலயித்வாதி துலாபூ⁴தாய விபஸ்ஸனாய துலயித்வா. தீரயித்வாதி தாய ஏவ தீரணபூ⁴தாய தீரேத்வா. விபா⁴வயித்வாதி யாதா²வதோ பகாஸேத்வா பஞ்சக்க²ந்த⁴ம் விபூ⁴தம் கத்வா பாகடம் கத்வா. ரூபனிரோதே⁴தி ரூபக்க²ந்த⁴ஸ்ஸ நிரோத⁴பூ⁴தே நிப்³பா³னே நின்னபோணபப்³பா⁴ரபா⁴வேன. இதா³னி ஸிகா²ப்பத்தவிபஸ்ஸனாவஸேன ஜவனபஞ்ஞம் த³ஸ்ஸேதும் புன ‘‘ரூப’’ந்திஆதி³ வுத்தம். ‘‘வுட்டா²னகா³மினிவிபஸ்ஸனாவஸேனா’’தி கேசி.

ஞாணதிக்க²பா⁴வோ நாம ஸவிஸேஸம் படிபக்க²ஸமுச்சி²ந்த³னே வேதி³தப்³போ³தி ‘‘கி²ப்பம் கிலேஸே சி²ந்த³தீதி திக்க²பஞ்ஞோ’’தி வத்வா தே பன கிலேஸே விபா⁴கே³ன த³ஸ்ஸேந்தோ ‘‘உப்பன்னம் காமவிதக்க’’ந்திஆதி³மாஹ. திக்க²பஞ்ஞோ கி²ப்பாபி⁴ஞ்ஞோ ஹோதி, படிபதா³ சஸ்ஸ ந சலதீதி ஆஹ ‘‘ஏகஸ்மிம் ஆஸனே சத்தாரோ ச அரியமக்³கா³ அதி⁴க³தா ஹோந்தீ’’திஆதி³. தே²ரோ சாதிஆதி³னா த⁴ம்மஸேனாபதினோ திக்க²பஞ்ஞதா ஸிகா²ப்பத்தாதி த³ஸ்ஸேதி.

‘‘ஸப்³பே³ ஸங்கா²ரா அனிச்சா து³க்கா² விபரிணாமத⁴ம்மா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா’’தி யாதா²வதோ த³ஸ்ஸனேன ஸச்சஸம்படிவேதோ⁴ இஜ்ஜ²தி, ந அஞ்ஞதா²தி காரணமுகே²ன நிப்³பே³தி⁴கபஞ்ஞம் த³ஸ்ஸேதும் ‘‘ஸப்³ப³ஸங்கா²ரேஸு உப்³பே³க³ப³ஹுலோ ஹோதீ’’திஆதி³ வுத்தம். தத்த² உப்³பே³க³ப³ஹுலோதி வுத்தனயேன ஸப்³ப³ஸங்கா²ரேஸு அபி⁴ண்ஹப்பவத்தஸம்வேகோ³. உத்தாஸப³ஹுலோதி ஞாணுத்தாஸவஸேன ஸப்³ப³ஸங்கா²ரேஸு ப³ஹுஸோ உத்ரஸ்தமானஸோ. தேன ஆதீ³னவானுபஸ்ஸனமாஹ. உக்கண்ட²னப³ஹுலோதி இமினா பன நிப்³பி³தா³னுபஸ்ஸனமாஹ, அரதிப³ஹுலோதிஆதி³னா தஸ்ஸா ஏவ அபராபருப்பத்திம். ப³ஹிமுகோ² ஸப்³ப³ஸங்கா²ரதோ ப³ஹிபூ⁴தம் நிப்³பா³னம் உத்³தி³ஸ்ஸ பவத்தஞாணமுகோ², ததா² வா பவத்திதவிமோக்க²முகோ². நிப்³பி³ஜ்ஜ²னம் நிப்³பே³தோ⁴, ஸோ ஏதிஸ்ஸா அத்தி², நிப்³பி³ஜ்ஜ²தீதி வா நிப்³பே³தா⁴, ஸா ஏவ பஞ்ஞா நிப்³பே³தி⁴கா. யம் பனேத்த² அத்த²தோ ந விப⁴த்தம், தம் ஹேட்டா² வுத்தனயத்தா ஸுவிஞ்ஞேய்யமேவ.

அப்பிச்சோ²தி ஸந்தகு³ணனிகு³ஹனதாதி அத்தனி விஜ்ஜமானானம் பா³ஹுஸச்சது⁴தத⁴ம்மஸீலாதி³கு³ணானஞ்சேவ படிவேத⁴கு³ணஸ்ஸ ச நிகு³ஹனம், படிக்³க³ஹணே ச மத்தஞ்ஞுதாதி ஏதேனேவ பரியேஸனபரிபோ⁴க³மத்தஞ்ஞுதாபி வுத்தா ஹோதி. தீஹி ஸந்தோஸேஹீதி சதூஸு பச்சயேஸு பச்சேகம் தீஹி ஸந்தோஸேஹி, ஸப்³பே³ பன த்³வாத³ஸ. படிஸல்லீனேன விவேகட்ட²காயானம் ந ஸங்க³ணிகாராமானம். நேக்க²ம்மாபி⁴ரதானந்தி பப்³ப³ஜ்ஜம் உபக³தானம். பரிஸுத்³த⁴சித்தானம் விக³தசித்தஸம்கிலேஸானம். பரமவோதா³னப்பத்தானம் அட்ட²ஸமாபத்திஸமதி⁴க³மேன அதிவிய வோதா³னம் விஸுத்³தி⁴ம் பத்தானம். கிலேஸுபதி⁴ஆதீ³னம் அபா⁴வதோ நிருபதீ⁴னம். ப²லஸமாபத்திவஸேன ஸப்³ப³ஸங்கா²ரவினிஸ்ஸடத்தா விஸங்கா²ரம் நிப்³பா³னம். உபக³தானம், இமேஸம் திண்ணம் விவேகானம் லாபீ⁴ பவிவித்தோ ‘‘பகாரேஹி விவித்தோ’’தி கத்வா. ஸமாஸஜ்ஜனம் பரிஸினேஹுப்பாதோ³ ஸம்ஸக்³கோ³, ஸவனவஸேன உப்பஜ்ஜனகஸம்ஸக்³கோ³ ஸவனஸம்ஸக்³கோ³. ஏஸ நயோ ஸேஸேஸுபி. ஸமுல்லபனம் ஆலாபஸல்லபனம். ஸம்ஸக்³க³வத்து²னா இமினா தஸ்ஸ பரிபோ⁴கோ³ பரிபோ⁴க³ஸம்ஸக்³கோ³.

ஆரத்³த⁴வீரியோதி ஏத்த² வீரியாரம்போ⁴ நாம வீரியஸ்ஸ பக்³க³ண்ஹனம் பரிபுண்ணகரணம். தம் பன ஸப்³ப³ஸோ கிலேஸானம் நிக்³க³ண்ஹனந்தி த³ஸ்ஸேந்தோ ‘‘தத்தா²’’திஆதி³மாஹ. ஓது⁴னனவத்தாதி கிலேஸானம் யஸ்ஸ கஸ்ஸசி ஸாவஜ்ஜஸ்ஸ ஓது⁴னனவஸேன வத்தா. தேனாஹ ‘‘பி⁴க்கூ²ன’’ந்திஆதி³. ஓதிண்ணம் நாம வஜ்ஜம் அஜ்ஜா²சரிதந்தி ஆரோசிதம். அனோதிண்ணம் அனாரோசிதம். தந்திவஸேனாதி பாளித⁴ம்மவஸேன, யுத்தஸத்³த³ஸ்ஸ வஸேனாதி அத்தோ². பாபே லாமகே புக்³க³லே த⁴ம்மே ச க³ரஹதி ஜிகு³ச்ச²தீதி பாபக³ரஹீ. தேனாஹ ‘‘பாபபுக்³க³லே’’திஆதி³. ஏகத³ஸ்ஸீதி ஏகப⁴வத³ஸ்ஸீ, இத⁴லோகமத்தத³ஸ்ஸீ தி³ட்ட²த⁴ம்மிகஸுக²மத்தாபேக்கீ². ஸமந்தாதி ஸமந்ததோ, பரிதோ மே கத்த²சி மா அஹூதி யோஜனா.

ஸோளஸஹி பதே³ஹீதி ஸோளஸஹி கோட்டா²ஸேஹி. அகுப்பந்தி கேனசி அகோபனீயம். அயம் த⁴ம்மஸேனாபதினோ கு³ணகதா² ஸத்து² வசனானுஸாரேன த³ஸஸஹஸ்ஸசக்கவாளப்³யாபினீ அஹோஸி, தம் த³ஸ்ஸேதும் ‘‘ஏவ’’ந்திஆதி³ வுத்தம். சதுப்³பி³தா⁴ வண்ணனிபா⁴ பாதுப⁴வி உளாரபீதிஸோமனஸ்ஸஸமுட்டா²னத்தா. ஸுட்டு² ஓபா⁴ஸதீதி ஸுபோ⁴. ஓபா⁴ஸஸம்பத்தியா மணினோ ப⁴த்³த³கதாதி ஆஹ ‘‘ஸுபோ⁴தி ஸுந்த³ரோ’’தி. ஜாதிமா பரிஸுத்³த⁴ஆகரஸமுட்டி²தத்தா. குருவிந்த³ஜாதிஆதி³ஜாதிவிஸேஸோபி மணி ஆகரபரிஸுத்³த⁴மூலகோ ஏவாதி ஆஹ ‘‘ஜாதிஸம்பன்னோ’’தி. தோ⁴வனாதி³பரிகம்மேனாதி சதூஸு பாஸாணேஸு தோ⁴வனதோ³ஸனீஹரணதாபனஸண்ஹகரணாதி³பரிகம்மேன. ரத்தகம்ப³லஸ்ஸ வஸேன ஸபா⁴வவண்ணஸித்³தி⁴யா வேளுரியமணி அதிவிய ஸோப⁴தீதி ஆஹ ‘‘பண்டு³கம்ப³லே நிக்கி²த்தோ’’தி. நிக்க²ந்தி ப⁴ண்ட³மாஹ. தஞ்ச அப்பகேன ஸுவண்ணேன கதம் ப⁴ண்ட³ம் ந ஸோப⁴தி ஸோபா⁴விபுலேனாதி ஆஹ ‘‘அதிரேகபஞ்சஸுவண்ணேன கதபிளந்த⁴ன’’ந்தி. ஸுவண்ணந்தி பஞ்சத⁴ரணஸ்ஸ ஸமஞ்ஞா, தஸ்மா பஞ்சவீஸதிஸுவண்ணஸாரியா விசித்தஆப⁴ரணம் இத⁴ ‘‘நிக்க²’’ந்தி அதி⁴ப்பேதம். தஞ்ஹி விபுலம் ந பரித்தகம். மஹாஜம்பு³ஸாகா²ய பவத்தனதி³யந்தி மஹாஜம்பு³ஸாகா²ய ஹேட்டா² ஸஞ்ஜாதனதி³யம். தம் கிர ரதனம் ரத்தம். ஸுகுஸலேன…பே… ஸம்பஹட்ட²ந்தி ஸுட்டு² குஸலேன ஸுவண்ணகாரேன உக்காய தாபேத்வா ஸம்மா பஹட்ட²ம் மஜ்ஜனாதி³வஸேன ஸுகதபரிகம்மம். தா⁴துவிப⁴ங்கே³தி தா⁴துவிப⁴ங்க³ஸுத்தே. கதப⁴ண்ட³ந்தி ஆப⁴ரணபா⁴வேன கதம் ப⁴ண்ட³ம்.

நாதிஉச்சோ நாதினீசோ தருணஸூரியோ நாம. ஸத்தா²ரா ஆப⁴தவண்ணோ உப்³ப⁴தகு³ணோதி அத்தோ². நேவ மரணம் அபி⁴னந்த³தீதி அத்தனோபி மரணம் நேவ அபி⁴னந்த³தி அத்தவினிபாதஸ்ஸ ஸாவஜ்ஜபா⁴வதோ. போ³தி⁴ஸத்தோ பன பரேஸம் அத்தா²ய அத்தனோ அத்தபா⁴வம் பரிச்சஜதி கருணாவஸேன, ஏவம் வோஸஜ்ஜனம் பரமத்த²பாரமீபாரிபூரிம் க³ச்ச²தீதி ஸாவகா ந ததா² காதும் ஸக்கா ஸிக்கா²பத³தோ. ந ஜீவிதம் பத்தே²தி ஜீவிதாஸாய ஸமுச்சி²ன்னத்தா. தி³வஸஸங்கே²பந்தி அஜ்ஜ த்வம் இத³ம் நாம கம்மம் கரோஹி, இத³ம் தே வேதனந்தி தி³வஸபா⁴கே³ன பரிச்சி²ன்னம் வேதனம். தாதி³ஸோ ஹி ப⁴தகோ தி³வஸக்க²யமேவ உதி³க்க²தி, ந கம்மனிட்டா²னம். நிப்³பி³ஸம் ப⁴தகோ யதா²தி வேதனம் ப⁴திம் இச்ச²ந்தோ காலக்க²யம் உதி³க்க²ந்தோ ப⁴தகபுரிஸோ விய.

ஸுஸிமஸுத்தவண்ணனா நிட்டி²தா.

10. நானாதித்தி²யஸாவகஸுத்தவண்ணனா

111. நானாதித்தி²யஸாவகாதி புது²தித்தி²யானம் ஸாவகா. சி²ந்தி³தேதி ஹத்த²ச்சே²தா³தி³வஸேன சே²தே³. மாரிதேதி மாரணே. ந பாபம் ஸமனுபஸ்ஸதீதி கிஞ்சி பாபம் அத்தீ²தி ந பஸ்ஸதி, பரேஸஞ்ச ததா² பவேதே³தி. விஸ்ஸாஸந்தி விஸ்ஸத்த²பா⁴வம். ‘‘கதகம்மானம்பி விபாகோ நத்தீ²’’தி வத³ந்தோ கதபாபானம் அகதபுஞ்ஞானஞ்ச விஸ்ஸத்த²தம் நிராஸங்கதம் ஜனேதி.

தபோஜிகு³ச்சா²யாதி தபஸா அசேலவதாதி³னா பாபதோ ஜிகு³ச்ச²னேன, ‘‘பாபம் விராஜயாமா’’தி அசேலவதாதி³ஸமாதா³னேனாதி அத்தோ². தஸ்மிஞ்ஹி ஸமாதா³னே டி²தேன ஸம்வரேன ஸம்வுதசித்தோ ஸமன்னாக³தோ பிஹிதோ ச நாம ஹோதீதி ‘‘ஸுஸம்வுதத்தோ’’திஆதி³ வுத்தம். சத்தாரோ யாமா பா⁴கா³ சதுயாமா, சதுயாமா ஏவ சாதுயாமா. பா⁴க³த்தோ² ஹி இத⁴ யாம-ஸத்³தோ³ யதா² ‘‘ரத்தியம் பட²மோ யாமோ’’தி. ஸோ பனேத்த² பா⁴கோ³ ஸம்வரலக்க²ணோதி ஆஹ ‘‘சாதுயாமேன ஸுஸம்வுதோ’’தி, சதுகோட்டா²ஸேன ஸம்வரேன ஸுட்டு² ஸம்வுதோதி அத்தோ². படிக்கி²த்தஸப்³ப³ஸீதோத³கோதி படிக்கி²த்தஸப்³ப³ஸீதுத³கபரிபோ⁴கோ³. ஸப்³பே³ன பாபவாரணேன யுத்தோதி ஸப்³ப³ப்பகாரேன ஸம்வரலக்க²ணேன பாபவாரணேன ஸமன்னாக³தோ. து⁴தபாபோதி ஸப்³பே³ன நிஜ்ஜரலக்க²ணேன பாபவாரணேனபி து⁴தபாபோ. பு²ட்டோ²தி அட்ட²ன்னம்பி கம்மானம் கே²பனேன விக்கே²பப்பத்தியா கம்மக்க²யலக்க²ணேன ஸப்³பே³ன பாபவாரணேன பு²ட்டோ², தம் பு²ஸித்வா டி²தோ. ந நிகு³ஹந்தோதி ந நிகு³ஹனஹேது தி³ட்ட²ஸுதே ததே²வ கதே²ந்தோ.

நானாதித்தி²யானம்யேவ உபட்டா²கோதி பரவாதீ³னம் ஸப்³பே³ஸம்யேவ தித்தி²யானம் உபட்டா²கோ, தேஸு ஸாதா⁴ரணவஸேன அபி⁴ப்பஸன்னோ. கோடிப்பத்தாதி மோக்கா²தி⁴க³மேன ஸமணத⁴ம்மே பத்தப்³ப³மரியாத³ப்பத்தா.

ஸஹசரிதமத்தேனாதி ஸீஹனாதே³ன ஸஹ வஸ்ஸகரணமத்தேன. ஸீஹேன ஸீஹனாத³ம் நத³ந்தேன ஸஹேவ ஸிங்கா³லேன அத்தனோ ஸிங்கா³லரவகரணமத்தேன. கோத்து²கோதி கு²த்³த³ககோத்து². ஆஸங்கிதஸமாசாரோதி அத்தனா ச பரேஹி ச ஆஸங்கிதப்³ப³ஸமாசாரோ. ஸப்புரிஸானந்தி பு³த்³தா⁴தீ³னம்.

தஸ்ஸாதி வேக³ப்³ப⁴ரிஸ்ஸ தே³வபுத்தஸ்ஸ. ஸரீரே அனுஆவிஸீதி ஸரீரே அனுபவிஸித்வா விய ஆவிஸி. அதி⁴முச்சீதி யதா² க³ஹிதஸ்ஸ வஸேன சித்தம் ந வத்ததி, அத்தனோ ஏவ வஸே வத்ததி, ஏவம் அதி⁴ட்ட²ஹி. ஆயுத்தாதி த³ஸ்ஸனேன ஸம்யுத்தா. பவிவேகியந்தி கப்பகவத்த²பு⁴ஞ்ஜனஸேனாஸனேஹி பவிவித்தபா⁴வம். தேனாஹ ‘‘தே கிரா’’திஆதி³. ரூபே நிவிட்டா²தி சக்கு²ரூபத⁴ம்மே அபி⁴னிவிட்டா². தேனாஹ ‘‘தண்ஹாதி³ட்டீ²ஹி பதிட்டி²தா’’தி. தே³வலோகபத்த²னகாமாதி தே³வலோகஸ்ஸேவ அபி⁴பத்த²னகாமா. மரணத⁴ம்மதாய மாதியா. தேனாஹ ‘‘மாதியாதி மச்சா’’தி. பரலோகத்தா²யாதி பரஸம்பத்திபா⁴வாய லோகஸ்ஸ அத்தா²ய.

பபா⁴ஸவண்ணாதி பபா⁴ய ஸமானவண்ணா. கேஸம் பபா⁴யாதி ஆஹ ‘‘சந்தோ³பா⁴ஸா’’திஆதி³. ஸஜ்ஜா²ராக³பபா⁴ஸவண்ணா இந்த³த⁴னுபபா⁴ஸவண்ணாதி பச்சேகம் யோஜனா. ஆமோ ஆமக³ந்தோ⁴ ஏதஸ்ஸ அத்தீ²தி ஆமிஸம். வதா⁴யாதி வித்³த⁴ம்ஸிதும். ரூபாதி ரூபாயதனாதி³ரூபித⁴ம்மா.

ராஜக³ஹஸமீபப்பவத்தீனம் ராஜக³ஹியானம். ‘‘ஸேதோ’’தி கேலாஸகூடோ அதி⁴ப்பேதோதி ஆஹ ‘‘ஸேதோதி கேலாஸோ’’தி. கேனசி ந க⁴ட்டேதீதி அக⁴ம், அந்தலிக்க²ந்தி ஆஹ ‘‘அக⁴கா³மீனந்தி ஆகாஸகா³மீன’’ந்தி. உத³கம் தீ⁴யதி ஏத்தா²தி உத³தி⁴, மஹோத³தி⁴. விபுலோதி வேபுல்லபப்³ப³தோ. ஹிமவந்தபப்³ப³தானந்தி ஹிமவந்தபப்³ப³தபா⁴கா³னம். பு³த்³தோ⁴ ஸேட்டோ² ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனாதீ³ஹி ஸப்³ப³கு³ணேஹி.

நானாதித்தி²யஸாவகஸுத்தவண்ணனா நிட்டி²தா.

ததியவக்³க³வண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

தே³வபுத்தஸம்யுத்தவண்ணனாய லீனத்த²ப்பகாஸனா ஸமத்தா.