9. சதுசக்கஸுத்தவண்ணனா

29. இரியா வுச்சதி காயேன கத்தப்³ப³கிரியா, தஸ்ஸா பவத்திட்டா²னபா⁴வதோ இரியாபதோ², க³மனாதி³. தம் அபராபரப்பவத்தியா சக்கம். தேனாஹ ‘‘சதுசக்கந்தி சதுஇரியாபத²’’ந்தி. நவத்³வாரந்தி கரஜகாயோ அதி⁴ப்பேதோ. ஸோ ச கேஸாதி³அஸுசிபரிபூரோதி ஆஹ ‘‘புண்ணந்தி அஸுசிபூர’’ந்தி. தண்ஹாய ஸம்யுத்தந்தி தண்ஹாஸஹிதம். தேன ந கேவலம் ஸபா⁴வதோ ஏவ, அத² கோ² நிஸ்ஸிதத⁴ம்மோ ச அஸுசிம் த³ஸ்ஸேதி. மாதுகுச்சி²ஸங்கா²தே அஸுசிபங்கே ஜாதத்தா பங்கஜாதம், கேஸாதி³அஸுசிபங்கஜாதத்தா ச பங்கஜாதம். யாத்ராதி அபக³மோ. தேன ஸபா⁴வதோ நிஸ்ஸிதத⁴ம்மதோ ச அஸுசிஸபா⁴வதோ காயதோ கத²ம் அபக³மோ ஸியாதி புச்ச²தி. தேனாஹ ‘‘ஏதஸ்ஸா’’திஆதி³.

நஹனட்டே²ன ப³ந்த⁴னட்டே²ன நத்³தீ⁴தி உபனாஹோ இதா⁴தி⁴ப்பேதோதி ஆஹ ‘‘நத்³தி⁴ந்தி உபனாஹ’’ந்தி. ஸோ பன இதோ புப்³ப³காலே கோதோ⁴தி ஆஹ ‘‘புப்³ப³காலே’’திஆதி³. பாளினித்³தி³ட்டே²தி உபனாஹஇச்சாதி³கே இத⁴ பாளியம் நித்³தி³ட்டே² கிலேஸே ட²பேத்வா அவஸேஸா தி³ட்டி²விசிகிச்சா²த³யோ ஸத்த கிலேஸா து³ம்மோசயதாய வரத்தா வியாதி வரத்தாதி வேதி³தப்³பா³. ஆரம்மணக்³க³ஹணஸபா⁴வதோ ஏகோ ஏவேஸ த⁴ம்மோ, பவத்தி-ஆகாரபே⁴தே³ன பன இச்ச²னட்டே²ன பத்த²னட்டே²ன இச்சா², லுப்³ப⁴னட்டே²ன கி³ஜ்ஜ²னட்டே²ன லோபோ⁴தி வுத்தோ. பட²முப்பத்திகாதி ஏகஸ்மிம் ஆரம்மணே, வாரே வா பட²மம் உப்பன்னா. அபராபருப்பத்திகோதி புனப்புனம் உப்பஜ்ஜமானகோ. அலத்³த⁴பத்த²னா அப்படிலத்³த⁴வத்து²ம்ஹி ஆஸத்தி லோபோ⁴. உப்பாடேத்வாதி ஸஸந்தானதோ உத்³த⁴ரித்வா.

சதுசக்கஸுத்தவண்ணனா நிட்டி²தா.