10. ஏணிஜங்க⁴ஸுத்தவண்ணனா

30. ஏணிமிக³ஸ்ஸ வியாதி ஏணிமிக³ஸ்ஸ ஜங்கா⁴ விய. அவயவீஸம்ப³ந்தே⁴ ஹி இத³ம் ஸாமிவசனம். பிண்டி³மம்ஸஸ்ஸ பரிதோ ஸமஸண்டி²தத்தா ஸுவட்டீதஜங்கோ⁴. கிஸந்தி தூ²லபா⁴வபடிக்கே²பபராஜோதனா, ந ஸுட்டு² கிஸபா⁴வதீ³பனபராதி ஆஹ ‘‘அதூ²லம் ஸமஸரீர’’ந்தி. ஆதபேன மிலாதந்தி தபஸா மிலாதகாயம் இந்த்³ரியஸந்தாபனபா⁴வதோ. தேனேவாஹ – ‘‘தபோ மிலாத’’ந்திஆதி³, ததா² சாஹ பாளியம் ‘‘அப்பாஹாரம் அலோலுப’’ந்தி. யதா² ‘‘வீரஸ்ஸ பா⁴வோ வீரிய’’ந்தி வீரபா⁴வேன வீரியம் லக்கீ²யதி, ஏவம் வீரியஸம்ப⁴வேன வீரபா⁴வோதி ஆஹ ‘‘வீரந்தி வீரியவந்த’’ந்தி. ‘‘சத்தாரோ பஞ்ச ஆலோபே, அபு⁴த்வா உத³கம் பிவே’’தி (தே²ரகா³. 983; மி. ப. 6.5.10) த⁴ம்மஸேனாபதிவுத்தனியாமேன பரிமிதபோ⁴ஜிதாய அப்பாஹாரதா போ⁴ஜனே மத்தஞ்ஞுதா. ‘‘மிதாஹார’’ந்தி வத்வா புன பரிச்சி²ன்னகாலபோ⁴ஜிதாயபி அப்பாஹாரதம் த³ஸ்ஸேந்தோ ‘‘விகால…பே… பரித்தாஹார’’ந்தி ஆஹ. சதூஸு பச்சயேஸு லோலுப்பவிரஹிதம் போ³தி⁴மூலே ஏவ ஸப்³ப³ஸோ லோலுப்பஸ்ஸ பஹீனத்தா. ‘‘சதூஸு பச்சயேஸூ’’தி ஹி இமினாவ ஸப்³ப³த்த² லோலுப்பவிக³மோ தீ³பிதோவாதி. ரஸதண்ஹாபடிக்கே²போ வா ஏஸ ‘‘அப்பாஹார’’ந்தி வத்வா ‘‘அலோலுப’’ந்தி வுத்தத்தா. ‘‘ஸீஹம் வா’’தி ஏத்த² ஏகசரஸத்³தோ³ விய இவ-ஸத்³தோ³ அத்த²தோ ‘‘நாக³’’ந்தி ஏத்தா²பி ஆனேத்வா, ஸம்ப³ந்தி⁴தப்³போ³தி ஆஹ – ‘‘ஏகசரம் ஸீஹம் விய, ஏகசரம் நாக³ம் வியா’’தி. ஏகசரா அப்பமத்தா ஏகீகதாய.

பஞ்சகாமகு³ணவஸேன ரூபம் க³ஹிதம் தேஸம் ரூபஸபா⁴வத்தா. மனேன நாமம் க³ஹிதம் மனஸ்ஸ நாமஸபா⁴வத்தா. அவினிபு⁴த்தத⁴ம்மேதி அவினாபா⁴வத⁴ம்மே க³ஹேத்வா. ஆதி³-ஸத்³தே³ன ஆயதனதா⁴துஆத³யோ க³ஹிதா. காமகு³ணக்³க³ஹணேன ஹேத்த² ரூபபா⁴வஸாமஞ்ஞேன பஞ்ச வத்தூ²னி க³ஹிதானேவ ஹோந்தி, மனோக³ஹணேன த⁴ம்மாயதனம், ஏவம் த்³வாத³ஸாயதனானி க³ஹிதானி ஹோந்தி. இமினா நயேன தா⁴துஆதீ³னம்பி க³ஹிததா யோஜேதப்³பா³. தேனாஹ ‘‘பஞ்சக்க²ந்தா⁴தி³வஸேனபேத்த² பு⁴ம்மம் யோஜேதப்³ப³’’ந்தி. ஏத்தா²தி பாளியம். காமவத்து² பு⁴ம்மம்.

ஏணிஜங்க⁴ஸுத்தவண்ணனா நிட்டி²தா.

ஸத்திவக்³க³வண்ணனா நிட்டி²தா.