4. ஸதுல்லபகாயிகவக்³கோ³

1. ஸப்³பி⁴ஸுத்தவண்ணனா

31. ஸதம் ஸாதூ⁴னம் ஸரணக³மனஸீலாதி³பே⁴த³ஸ்ஸ த⁴ம்மஸ்ஸ உல்லபனதோ, அத்தனோ வா புப்³பே³னிவாஸானுஸ்ஸதியா தஸ்ஸ த⁴ம்மஸ்ஸ உல்லபனதோ கத²னதோ ஸதுல்லபா, தே³வதா, தாஸம் காயோ ஸமூஹோ, தத்த² ப⁴வாதி ஸதுல்லபகாயிகா. தேனாஹ ‘‘ஸதம் த⁴ம்ம’’ந்திஆதி³. ஸமாதா³னவஸேன உல்லபேத்வா, ந வண்ணனாகத²னமத்தேன தத்ராதி தஸ்மிம் தாஸம் தே³வதானம் ஸதுல்லபகாயிகபா⁴வே. இத³ம் வத்தூ²தி இத³ம் காரணம். ஸமுத்³த³வாணிஜாதி ஸம்யத்திகா. கி²த்தஸரவேகே³னாதி ஜியாமுத்தஸரஸதி³ஸவேகே³ன, ஸீக⁴ஓகே⁴னாதி அத்தோ². உப்பததீதி உப்பாதோ. உப்பாதே ப⁴வம் ப்³யஸனம் உப்பாதிகம். பதிட்டா²தி ஹிதபதிட்டா². பரலோகே ஹிதஸுகா²வஹம் அப⁴யகாரணம். ஜங்க⁴ஸதந்தி மனுஸ்ஸஸதம். ஜங்கா⁴ஸீஸேன ஹி மனுஸ்ஸே வத³தி ஸஹசாரிபா⁴வதோ. அக்³க³ஹேஸி பஞ்சஸீலானி. ஆஸன்னானாஸன்னேஸு ஆஸன்னஸ்ஸேவ பட²மம் விபச்சனதோ ‘‘ஆஸன்னகாலே க³ஹிதஸீலம் நிஸ்ஸாயா’’தி வுத்தம். க⁴டாவஸேனாதி ஸமூஹவஸேன.

ஸப்³பீ⁴தி ஸாதூ⁴ஹி. தே ஹி ஸபரஹிதஸாத⁴னதோ பாஸம்ஸதாய ஸந்தகு³ணதாய ச ஸந்தோதி வுச்சதி. தே பன யஸ்மா பண்டி³தலக்க²ணேஹி ஸமன்னாக³தா ஹோந்தி, தஸ்மா ‘‘பண்டி³தேஹீ’’தி ஆஹ. ஸமாஸேதா²தி ஸம்வஸேதா²தி அயமேத்த² அதி⁴ப்பாயோதி ஆஹ ‘‘ஸப்³ப³இரியாபதே²’’திஆதி³. மித்தஸந்த²வந்தி மேத்திஸந்தா⁴னம். ஸத்தானம் ஹிதேஸிதாலக்க²ணா ஹி மேத்தி, ஸா ச ஞாணஸஹிதா ஞாணபுப்³ப³ங்க³மாவாதி மித்தஸந்த²வோ அஸம்கிலிட்டோ², இதரோ ஸம்கிலிட்டோ²தி ஆஹ ‘‘ந கேனசி ஸத்³தி⁴ம் காதப்³போ³’’தி. ஸத்³த⁴ம்மந்தி தி³ட்ட²த⁴ம்மிகாதி³ஹிதாவஹம் ஸுந்த³ரத⁴ம்மம். ஸேய்யோதி ஹிதவட்³ட⁴னதாதி³ வுத்தந்தி ஆஹ ‘‘வட்³டீ⁴’’தி.

ஸதம் ஸாதூ⁴னம், பண்டி³தானந்தி அயமேத்த² அத்தோ². தப்படியோக³விஸயத்தா அஞ்ஞ-ஸத்³த³ஸ்ஸ வுத்தம் ‘‘அஞ்ஞதோ அந்த⁴பா³லதோ’’தி. ஸோகனிமித்தம் ஸோககாரணம் உத்தரபத³லோபேன இத⁴ ஸோகஸத்³தே³ன க³ஹிதந்தி ஆஹ ‘‘ஸோகவத்தூ²ன’’ந்திஆதி³. ஸோகவத்தூ²னி நாம சோராத³யோ அச்சி²ந்த³னாதி³வஸேன பரேஸம் ஸோககரணதோ. ஸோகானுக³தா ஸோகப்பத்தா.

தே²ரஸ்ஸாதி ஸம்கிச்சத்தே²ரஸ்ஸ. அத்தனோ ப⁴கி³னியா ஜேட்ட²த்தா ‘‘தும்ஹே’’தி ஆஹ. அயம் ‘‘இத⁴ சோரா படிபஜ்ஜிம்ஸூ’’தி அம்ஹே திணாயபி ந மஞ்ஞதீதி சிந்தேத்வா ஏகச்சே ‘‘மாரேம ந’’ந்தி ஆஹம்ஸு. கருணாய ஏகச்சே ‘‘விஸ்ஸஜ்ஜேமா’’தி ஆஹம்ஸு. மந்தேத்வாதி பா⁴ஸேத்வா.

அஹு அஹோஸி, பூ⁴தபுப்³ப³ந்தி அத்தோ². அரஞ்ஞஸ்மிம் ப்³ரஹாவனேதி தாதி³ஸே ப்³ரஹாவனே, மஹாரஞ்ஞே நிவாஸீதி அத்தோ² சேதோதி ப்³யாதோ⁴. கூடானீதி வாகுராத³யோ. ஓட்³டே³த்வாதி ஸஜ்ஜேத்வா. ஸஸகந்தி பேலகம் உப்³பி³க்³கா³தி பீ⁴ததஸிதா. ஏகரத்திந்தி ஏகரத்தேனேவ. த⁴னஜானீதி பரிப்³ப³யவஸேன அத்³தி⁴கேஹி லத்³த⁴ப்³ப³த⁴னதோ ஹானி, ‘‘ஸமணம்பி நாம ஹந்தி, கிம் அம்ஹேஸு லஜ்ஜிஸ்ஸதீ’’தி அத்³தி⁴கானம் அனாக³மனதோ ஏகதி³வஸம் லத்³த⁴ப்³ப³பரிப்³ப³யம்பி ந லபி⁴ஸ்ஸந்தீதி அதி⁴ப்பாயோ.

ஞாதயோபி மாதாபிதுபா⁴துப⁴கி³னிஆதி³கே ஞாதகே. தே கிர அதி⁴முத்தஸ்ஸ ப⁴கி³னியா ஸந்திகம் உபக³ச்ச²ந்தா அந்தராமக்³கே³ தேன ஸமாக³தா, அதி⁴முத்தோ ஸச்சவாசம் அனுரக்க²ந்தோ சோரப⁴யம் தேஸம் நாரோசேஸி. தேன வுத்தம் ‘‘தேஸம்பீ’’திஆதி³. தம் நிஸ்ஸாய பப்³ப³ஜிதத்தா ‘‘அதி⁴முத்தஸாமணேரஸ்ஸ ஸந்திகே’’தி வுத்தம், ந உபஸம்பதா³சரியோ ஹுத்வா. தேனாஹ ‘‘அத்தனோ அந்தேவாஸிகே கத்வா’’தி. ஸச்சானுரக்க²ணேன அனுத்தரகு³ணாதி⁴க³மேன ச ஞாதிமஜ்ஜே² விரோசதி.

ஸாததந்தி ஸததம். ஸ-ஸத்³த³ஸ்ஸ ஹி இத⁴ ஸாபா⁴வோ யதா² ‘‘ஸாராகோ³’’திஆதீ³ஸு. ஸாதபா⁴வோ வா ஸாததந்தி ஆஹ ‘‘ஸுக²ம் வா’’தி. காரணேனாதி தேன தேன காரணேன. ஸப்³பா³ஸம் தாஸம் வசனம் ஸுபா⁴ஸிதம், ப⁴க³வதோ பன உக்கம்ஸக³தம் ஸுபா⁴ஸிதமேவ. ஸ்வாயமத்தோ² தம்தம்கா³தா²பதே³னேவ விஞ்ஞாயதீதி தம் நீஹரித்வா த³ஸ்ஸேதும் ‘‘ந கேவல’’ந்திஆதி³ வுத்தம். தேன ஸப்புரிஸூபஸம்ஸேவஸத்³த⁴ம்மாபி⁴யோகோ³ யதா² ஸத்தானம் வட்³டி⁴யா பஞ்ஞாபடிலாப⁴ஸ்ஸ ஏகந்திகம் காரணம், ஏவம் ஸோகபச்சயே ஸதி விஸோகபா⁴வஸ்ஸ, ஞாதிமஜ்ஜே² ஸோபா⁴ய, ஸுக³திக³மனஸ்ஸ, சிரம் ஸுக²ட்டா²னஸ்ஸ, வட்டது³க்க²மோசனஸ்ஸபி அஞ்ஞாஸாதா⁴ரணம் ஹோதீதி வுத்தமேவாதி த³ட்ட²ப்³ப³ம்.

ஸப்³பி⁴ஸுத்தவண்ணனா நிட்டி²தா.

2. மச்ச²ரிஸுத்தவண்ணனா

32. பமஜ்ஜனாகாரேன பவத்தா அனுபலத்³தி⁴ பமாதோ³. தேன ஏகந்ததோ ஸதிரஹிதா ஹோந்தீதி வுத்தம் ‘‘ஸதிவிப்பவாஸலக்க²ணேனா’’தி. தி³ட்டி²விசிகிச்சா²த³யோ சேத்த² பமாதே³னேவ ஸங்க³ஹிதா. இதா³னி யதா² மச்ச²ரியனிமித்தஞ்ச பமாத³னிமித்தஞ்ச தா³னம் ந தீ³யதி, தம் த³ஸ்ஸேதும் ‘‘ஏகச்சோ ஹீ’’திஆதி³ வுத்தம். பரிக்க²யம் க³மிஸ்ஸதீதி போ⁴க³பரிஹானிம் க³மிஸ்ஸதி. கி²ட்³டா³தீ³தி ஆதி³-ஸத்³தே³ன மண்ட³னவிபூ⁴ஸனச²ணனக்க²த்தகிச்சப்³யஸனாதி³ம் ஸங்க³ண்ஹாதி. யஸதா³யகந்தி கித்தியஸஸ்ஸ பரிவாரயஸஸ்ஸ ச தா³யகம். ஸிரீதா³யகந்தி ஸோப⁴க்³க³தா³யகம். ஸம்பத்திதா³யகந்தி குலபோ⁴க³ரூபபோ⁴க³ஸம்பதா³ஹி ஸம்பத்திதா³யகம். புஞ்ஞந்தி வா இத⁴ புஞ்ஞப²லம் த³ட்ட²ப்³ப³ம் ‘‘ஏவமித³ம் புஞ்ஞம் பவட்³ட⁴தீ’’திஆதீ³ஸு (தீ³. நி. 3.80) விய. அத்தி² தா³னஸ்ஸ ப²லந்தி ஏத்த² தே³ய்யத⁴ம்மஸ்ஸ அனவட்டி²ததம் ப³ஹுலஸாதா⁴ரணதம், தம் பஹாய க³மனீயதம், தப்³பி³ஸயாய பீதியா ஸாவஜ்ஜதம், தா³னத⁴ம்மஸ்ஸ அனஞ்ஞஸாதா⁴ரணதம் அனுகா³மிகதம், தப்³பி³ஸயாய பீதியா அனவஜ்ஜதம், லோபா⁴தி³பாபத⁴ம்மானம் வினோத³னம், ஸேஸபுஞ்ஞானம் உபனிஸ்ஸயஞ்ச ஜானந்தேனாதி வத்தப்³ப³ம்.

தம்யேவ பா³லந்தி யோ மச்ச²ரீ, தமேவ. அதா³னஸீலா பா³லா. ஏகச்சோ த⁴னஸ்ஸ பரிபோ⁴க³பரிக்க²யப⁴யேன அத்தனாபி ந பரிபு⁴ஞ்ஜதி அதிலோப⁴ஸேட்டி² வியாதி ஆஹ ‘‘இத⁴லோகபரலோகேஸூ’’தி.

யஸ்மா ஏகச்சோ அதா³னஸீலோ புரிஸோ அத்³தி⁴கே தி³ஸ்வா பஸ்ஸந்தோபி ந பஸ்ஸதி, தேஸம் கத²ம் ஸுணந்தோபி ந ஸுணோதி, ஸயம் கிஞ்சி ந கதே²தி, அதா³துகம்யதாத²ம்பே⁴ ப³த்³தோ⁴ ஹோதி, தஸ்மா தத்த² மதலிங்கா³னி உபலப்³ப⁴ந்தியேவாதி ஆஹ ‘‘அதா³னஸீலதாய மரணேன மதேஸூ’’தி. அட்ட²கதா²யம் பன தா³னமத்தமேவ க³ஹேத்வா மதேனஸ்ஸ ஸமதம் த³ஸ்ஸேதும் ‘‘யதா² ஹீ’’திஆதி³ வுத்தம். தா³னஸீலஸ்ஸ பன அமதலிங்கா³னி வுத்தவிபரியாயதோ வேதி³தப்³பா³னி. வஜந்தி புது²த்தே ஏகவசனம், தஸ்மா வசனவிபல்லாஸேன வுத்தந்தி ஆஹ ‘‘ஸஹ வஜந்தா’’தி. தா³னஸீலாதி³த⁴ம்மோ புராதனோ, ந அஜ்ஜதனோதி ஸனந்தனோ, ஸோ ஏதேஸு அத்தீ²தி ஸனந்தனா, பண்டி³தா, தேஸம் த⁴ம்மாதி தேஸம் வஸேனபி த⁴ம்மோ ஸனந்தனோதி ஆஹ ‘‘ஸனந்தனானம் வா பண்டி³தானம் ஏஸ த⁴ம்மோ’’தி. அப்பஸ்மிம்பி தே³ய்யத⁴ம்மே ஸதி ஏகே தா³னம் த³த³ந்தி, ஏகே ந த³த³ந்தி மச்ச²ரிபா⁴வா. ஸஹஸ்ஸதா³னஸதி³ஸாதி ஏகாபி த³க்கி²ணா பரிச்சாக³சேதனாய உளாரபா⁴வதோ ஸஹஸ்ஸதா³னஸதி³ஸா ஹோதி.

து³ரனுக³மனோதி அஸமங்கி³னா அனுக³ந்தும் து³க்கரோ. அனனுக³மனஞ்சஸ்ஸ த⁴ம்மஸ்ஸ அபூரணமேவாதி ஆஹ ‘‘து³ப்பூரோ’’தி. ‘‘த⁴ம்மம் சரே’’தி அயம் த⁴ம்மசரியா க³ஹட்ட²ஸ்ஸ வஸேன ஆரத்³தா⁴தி ஆஹ ‘‘த³ஸகுஸலகம்மபத²த⁴ம்மம் சரதீ’’தி. தேனாஹ ‘‘தா³ரஞ்ச போஸ’’ந்தி. ஸமுஞ்ஜகந்தி கஸ்ஸகேஹி அத்தனா காதப்³ப³ம் கத்வா விஸட்ட²த⁴ஞ்ஞகரணதோ க²லே உஞ்சா²சரியவஸேன ஸமுஞ்ஜனிஆதி³னா ச²ட்³டி³தத⁴ஞ்ஞஸம்ஹரணம். தேனாஹ ‘‘யோ அபி…பே… ஸமுஞ்ஜகம் சரதீ’’தி. ஏதேனாதி ஸதஸஹஸ்ஸஸஹஸ்ஸயாகி³க்³க³ஹணேன த³ஸன்னம்பி பி⁴க்கு²கோடீனம் பிண்ட³பாதோ த³ஸ்ஸிதோ ஹோதி. ‘‘தி³ன்னோ’’தி பத³ம் ஆனேத்வா யோஜனா. த³ஸன்னம் வா கஹாபணகோடீனம் பிண்ட³பாதோதி த³ஸன்னம் கஹாபணகோடீனம் வினியுஞ்ஜனவஸேன ஸம்பாதி³தபிண்ட³பாதோ. தயித³ம் ஸதஸஹஸ்ஸம் ஸஹஸ்ஸயாகீ³னம் தா³னம் ஏத்தகம் ஹோதீதி கத்வா வுத்தம். ஸமுஞ்ஜகம் சரந்தோபீதி ஸமுஞ்ஜகம் சரித்வாபி, ஸமுஞ்ஜகசரணஹேதூதி அத்தோ². ஸேஸபத³த்³வயேபி ஏஸேவ நயோ. தா³ரம் போஸேந்தோபி த⁴ம்மம் சரதி, அப்பகஸ்மிம் த³த³ந்தோபி த⁴ம்மம் சரதீதி யோஜனா. ததா²வித⁴ஸ்ஸாதி தாதி³ஸஸ்ஸ ததா²த⁴ம்மசாரினோ யா த⁴ம்மசரியா, தஸ்ஸா கலம்பி நக்³க⁴ந்தி ஏதே ஸஹஸ்ஸயாகி³னோ அத்தனோ ஸஹஸ்ஸயாகி³தாய. யம் தேன த³லித்³தே³னாதிஆதி³ தஸ்ஸேவத்த²ஸ்ஸ விவரணம். ஸப்³பே³ஸம்பி தேஸந்தி ‘‘ஸதம்ஸஹஸ்ஸானம் ஸஹஸ்ஸயாகி³ன’’ந்தி வுத்தானம் தேஸம் ஸப்³பே³ஸம்பி. இதரேஸந்தி ‘‘ததா²வித⁴ஸ்ஸா’’தி வுத்தபுரிஸதோ அஞ்ஞேஸம். த³ஸகோடிஸஹஸ்ஸதா³னந்தி த³ஸகோடிஸங்கா²தம் ததோ அனேகஸஹஸ்ஸபே⁴த³தாய ஸஹஸ்ஸதா³னம்.

‘‘கலம் நக்³க⁴தீ’’தி இத³ம் தேஸம் தா³னதோ இமஸ்ஸ தா³னஸ்ஸ உளாரதரபா⁴வேன விபுலதரபா⁴வேன விபுலதரப²லதாய வுத்தந்தி ஆஹ ‘‘கத²ம் நு கோ² ஏதம் மஹப்ப²லதரந்தி ஜானனத்த²’’ந்தி. பச்சயவிஸேஸேன மஹத்தம் க³தோதி மஹக்³க³தோ, உளாரோதி அத்தோ². தேனாஹ ‘‘விபுலஸ்ஸேதம் வேவசன’’ந்தி. ஸமேனாதி ஞாயேன, த⁴ம்மேனாதி அத்தோ². விஸமேதி ந ஸமே மச்ச²ரியலக்க²ணப்பத்தே. சே²த்வாதி பீளேத்வா. தம் பன பீளனம் போத²னந்தி த³ஸ்ஸேந்தோ ‘‘போதே²த்வா’’தி ஆஹ. அஸ்ஸுமுகா²தி திந்தஅஸ்ஸுமுக²ஸம்மிஸ்ஸா பரம் ரோதா³பேத்வா. மஹாதா³னந்தி யதா²வுத்தம் ப³ஹுதே³ய்யத⁴ம்மஸ்ஸ பரிச்சஜனேன மஹந்ததா³னம். உப்பத்தியா அபரிஸுத்³த⁴தாயாதி அஜ்ஜா²ஸயஸ்ஸ தே³ய்யத⁴ம்மக³வேஸனாய ச ஸுத்³த⁴தாய மலீனத்தா. இதரம் த⁴ம்மசரியாய நிப்³ப³த்திததா³னம். பரித்ததா³னந்தி பரித்தஸ்ஸ தே³ய்யத⁴ம்மஸ்ஸ வஸேன பரித்ததா³னம். அத்தனோ உப்பத்தியா பரிஸுத்³த⁴தாயாதி அஜ்ஜா²ஸயஸ்ஸ தே³ய்யத⁴ம்மக³வேஸனாய ச விஸுத்³த⁴தாய. ஏவந்திஆதி³மாஹாதி ‘‘ஏவம் ஸஹஸ்ஸானம் ஸஹஸ்ஸயாகி³ன’’ந்தி அவோச. தத்த² ஸஹஸ்ஸானந்தி ஸதம்ஸஹஸ்ஸானம். கா³தா²ப³ந்த⁴ஸுக²த்த²ம் ஸதக்³க³ஹணம் ந கதம். ஸேஸம் வுத்தனயமேவ.

மச்ச²ரிஸுத்தவண்ணனா நிட்டி²தா.

3. ஸாது⁴ஸுத்தவண்ணனா

33. உதா³னம் உதா³னேஸீதி பீதிவேகே³ன உக்³கி³ரிதப்³ப³தாய உதா³னம் உக்³கி³ரி உச்சாரேஸி. தயித³ம் யஸ்மா பீதிஸமுட்டா²பிதம் வசனம், தஸ்மா வுத்தம் ‘‘உதா³ஹாரம் உதா³ஹரீ’’தி. யதா² பன தம் வசனம் ‘‘உதா³ன’’ந்தி வுச்சதி, தம் த³ஸ்ஸேதும் ‘‘யதா² ஹீ’’திஆதி³ வுத்தம். ஸத்³தா⁴யாதி ஏத்த² ய-காரோ ஹேதுஅத்தோ². பரிச்சாக³சேதனாய ஹி ஸத்³தா⁴ விஸேஸபச்சயோ அஸ்ஸத்³த⁴ஸ்ஸ தத³பா⁴வதோ. பி-ஸத்³தோ³ வுத்தத்த²ஸம்பிண்ட³னத்தோ². ‘‘ஸாஹூ’’தி பத³ம் ஸாது⁴ஸத்³தே³ன ஸமானத்த²ம் த³ட்ட²ப்³ப³ம். கத²ந்தி தா³னயுத்³தா⁴னம் விபக்க²ஸபா⁴வாதி அதி⁴ப்பாயோ. ஏதம் உப⁴யந்தி தா³னம் யுத்³த⁴ந்தி இத³ம் த்³வயம். ஜீவிதபீ⁴ருகோதி ஜீவிதவினாஸபீ⁴ருகோ. க²யபீ⁴ருகோதி போ⁴க³க்க²யஸ்ஸ பீ⁴ருகோ. வத³ந்தோதி ஜீவிதே ஸாலயதம், ததோ ஏவ யுஜ்ஜ²னே அஸமத்த²தம் பவேதே³ந்தோ. சே²ஜ்ஜந்தி ஹத்த²பாதா³தி³சே²தோ³. உஸ்ஸஹந்தோதி வீரியம் கரோந்தோ. ஏவம் போ⁴கே³ ரக்கி²ஸ்ஸாமீதி ததா² போ⁴கே³ அபரிக்கீ²ணே கரிஸ்ஸாமீதி. வத³ந்தோதி இத⁴ போ⁴கே³ஸு லோப⁴ம், ததோ ஏவ தா³தும் அஸமத்த²தம் பவேதே³ந்தோ. ஏவந்தி ஏவம் ஜீவிதபோ⁴க³னிரபேக்க²தாய தா³னஞ்ச யுத்³த⁴ஞ்ச ஸமம் ஹோதி. ஸத்³தா⁴தி³ஸம்பன்னோதி ஸத்³தா⁴த⁴ம்மஜீவிதாவீமம்ஸாஸீலாதி³கு³ணஸமன்னாக³தோ. ஸோ ஹி தே³ய்யவத்து²னோ பரித்தகத்தா அப்பகம்பி த³த³ந்தோ அத்தனோ பன சித்தஸம்பத்தியா கே²த்தஸம்பத்தியா ச ப³ஹும் உளாரபுஞ்ஞம் பவட்³டே⁴ந்தோ ப³ஹுவித⁴ம் லோப⁴-தோ³ஸ-இஸ்ஸா-மச்ச²ரிய-தி³ட்டி²விசிகிச்சா²தி³பே⁴த³ம் தப்படிபக்க²ம் அபி⁴ப⁴வதி, ததோ ஏவ ச தம் மஹப்ப²லம் ஹோதி மஹானிஸம்ஸம். அட்ட²கதா²யம் பன ‘‘மச்சே²ரம் மத்³த³தி’’ச்சேவ வுத்தம், தஸ்ஸ பன உஜுவிபச்சனீகபா⁴வதோ.

பரத்தா²தி பரலோகே. ஏகஸாடகப்³ராஹ்மணவத்து² அன்வயவஸேன, அங்குரவத்து² ப்³யதிரேகவஸேன வித்தா²ரேதப்³ப³ம்.

த⁴ம்மோ லத்³தோ⁴ ஏதேனாதி த⁴ம்மலத்³தோ⁴, புக்³க³லோ. அக்³கி³ஆஹிதபத³ஸ்ஸ விய ஸத்³த³ஸித்³தி⁴ த³ட்ட²ப்³பா³. ‘‘உட்டா²னந்தி காயிகம் வீரியம், வீரியந்தி சேதஸிக’’ந்தி வத³ந்தி. உட்டா²னந்தி போ⁴கு³ப்பாதே³ யுத்தபயுத்ததா. வீரியந்தி தஜ்ஜோ உஸ்ஸாஹோ. யமஸ்ஸ ஆணாபவத்திட்டா²னம். வேதரணிம்பி இதரே நிரயே ச அதிக்கம்ம. தே பன அப்³பு³தா³தீ³னம் வஸேன அவீசிம் த³ஸதா⁴ கத்வா அவஸேஸமஹானிரயே ஸத்தபி ஆயுப்பமாணபே⁴தே³ன தயோ தயோ கத்வா ஏகதிம்ஸாதி வத³ந்தி. ஸஞ்ஜீவாதி³னிரயஸம்வத்தனஸ்ஸ கம்மஸ்ஸ திக்க²மஜ்ஜ²முது³பா⁴வேன தஸ்ஸ ஆயுப்பமாணஸ்ஸ திவித⁴தா விபா⁴வேதப்³பா³. அபரே பன ‘‘அட்ட² மஹானிரயா ஸோளஸ உஸ்ஸத³னிரயா ஆதி³தோ சத்தாரோ ஸிதனிரயே ஏகம் கத்வா ஸத்த ஸிதனிரயாதி ஏவம் ஏகதிம்ஸ மஹானிரயா’’தி வத³ந்தி. மஹானிரயக்³க³ஹணதோ ஆதி³தோ சத்தாரோ ஸிதனிரயா ஏகோ நிரயோ கதோதி.

தேஸந்தி விசினித்வா க³ஹிதபச்சயானம். பஞ்சனவுதிபாஸண்ட³பே⁴தா³ பபஞ்சஸூத³னிஸம்வண்ணனாயம் வுத்தனயேன வேதி³தப்³பா³. தத்தா²தி தேஸு த்³வீஸு விசினனேஸு. த³க்கி²ணாவிசினனம் ஆஹ, உபமானானி ஹி நாம யாவதே³வ உபமேய்யத்த²விபா⁴வனத்தா²னி. ஏதேன ஸுகே²த்தக³ஹணதோபி த³க்கி²ணேய்யவிசினனம் த³ட்ட²ப்³ப³ம்.

பாணேஸு ஸம்யமோதி இமினா த³ஸவித⁴ம்பி குஸலகம்மபத²த⁴ம்மம் த³ஸ்ஸேதி. யதா² ஹி ‘‘பாணேஸு ஸம்யமோ’’தி இமினா ஸத்தானம் ஜீவிதாவோரோபனதோ ஸம்யமோ வுத்தோ, ஏவம் தேஸம் ஸாபதேய்யாவஹாரதோ பரதா³ராமஸனதோ விஸம்வாத³னதோ அஞ்ஞமஞ்ஞபே⁴த³னதோ ப²ருஸவசனேன ஸங்க⁴ட்டனதோ நிரத்த²கவிப்பலபனதோ பரஸந்தகாபி⁴ஜ்ஜா²னதோ உச்சே²த³சிந்தனதோ மிச்சா²பி⁴னிவேஸனதோ ச ஸம்யமோ ஹோதீதி. தேனாஹ ‘‘ஸீலானிஸம்ஸம் கதே²துமாரத்³தா⁴’’தி. ப²ருஸவசனஸம்யமோ பனேத்த² ஸரூபேனேவ வுத்தோ.

பரஸ்ஸ உபவாத³ப⁴யேனாதி பாபகிரியஹேது பரேன அத்தனோ வத்தப்³ப³உபவாத³ப⁴யேன. உபவாத³ப⁴யாதி உபவாத³ப⁴யனிமித்தம். ‘‘கத²ம் நு கோ² அம்ஹே பரே ந உபவதே³ய்யு’’ந்தி ஆஸீஸந்தா பாபம் ந கரோந்தி. த⁴ம்மபத³மேவாதி அஸங்க²தத⁴ம்மகோட்டா²ஸோ ஏவ ஸேய்யோ ஸேட்டோ². யஸ்மா ஸப்³ப³ஸங்க²தம் அனிச்சம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம், தஸ்மா தத³தி⁴க³மாய உஸ்ஸாஹோ கரணீயோதி த³ஸ்ஸேதி. புப்³ப³ஸத்³தோ³ காலவிஸேஸவிஸயோதி ஆஹ ‘‘புப்³பே³ ச கஸ்ஸபபு³த்³தா⁴தி³காலேபீ’’திஆதி³. புன அகாலவிஸேஸோ அபாடியேக்கோ பு⁴ம்மத்த²விஸயோவாதி ஆஹ ‘‘ஸப்³பே³பி வா’’திஆதி³. தத்த² ஸப்³பே³பி வாதி ஏதே ஸப்³பே³பி கஸ்ஸபபு³த்³தா⁴த³யோ லோகனாதா² ஸந்தோ நாம வூபஸந்தஸப்³ப³கிலேஸஸந்தாபா ஸந்தஸப்³பூ⁴தகு³ணத்தா.

ஸாது⁴ஸுத்தவண்ணனா நிட்டி²தா.

4. நஸந்திஸுத்தவண்ணனா

34. கமனீயானீதி கந்தானி. ததோ ஏவ ஏதானி இட்டா²ரம்மணானி ஸுகா²ரம்மணானி ரூபாதீ³னி, தே பன வத்து²காமா, ததா³ரம்மணகிலேஸகாமா வா. ‘‘ந ஸந்தி காமா மனுஜேஸூ’’தி தே³ஸனாஸீஸமேதம், நிச்ச²யேன காமா அனிச்சாயேவ. மச்சு தீ⁴யதி ஏத்தா²தி மச்சுதே⁴ய்யம். ந புன ஆக³ச்ச²தி ஏத்த² தம் அபுனாக³மனம். அபுனாக³மனஸங்கா²தம் நிப்³பா³னம் அனுபக³ச்ச²னதோ. நிப்³பா³னம் ஹீதிஆதி³ வுத்தஸ்ஸேவத்த²ஸ்ஸ விவரணம். ப³த்³தோ⁴தி படிப³த்³த⁴சித்தோ. பமத்தோதி வோஸ்ஸக்³க³பமாத³ம் ஆபன்னோ.

தண்ஹாச²ந்த³தோ ஜாதம் தஸ்ஸ விஸேஸபச்சயத்தா. இச்சி²தம் ஹனதீதி அக⁴ம், து³க்க²ம். இத⁴ பன அனவஸேஸபரியாதா³னவஸேன பஞ்சுபாதா³னக்க²ந்தா⁴ து³க்க²ந்தி. ச²ந்த³வினயா அக⁴வினயோதி ஹேதுனிரோதே⁴ன ஹி ப²லனிரோதோ⁴, ஏவம் ஸஉபாதி³ஸேஸனிப்³பா³னம் வத்வா அக⁴வினயா து³க்க²வினயோதி அனுபாதி³ஸேஸனிப்³பா³னம் வத³தி.

சித்ரானீதி கிலேஸகாமாபி வேத³னாதி³ட்டி²ஸம்பயோக³பே⁴தே³ன ஹோந்தி, ஆகாரபே⁴தே³ன ச அத்தி² ஸவிகா⁴தாவிகா⁴தாதி ததோ விஸேஸேதும் ‘‘ஆரம்மணசித்தானீ’’தி வுத்தம். ஸங்கப்பிதராகோ³தி ஸுபா⁴தி³வஸேன ஸங்கப்பிதவத்து²ம்ஹி ராகோ³. கிலேஸகாமோ காமோதி வுத்தோ தஸ்ஸேவித⁴ விஸேஸதோ காமபா⁴வஸித்³தி⁴தோ. பஸூரஸுத்தேன விபா⁴வேதப்³போ³ ‘‘ந தே காமா’’திஆதி³னா தஸ்ஸ வத்து²ம்ஹி ஆக³தத்தா. இதா³னி தமத்த²ம் ஸங்கே²பேனேவ விபா⁴வேந்தோ ‘‘பஸூரபரிப்³பா³ஜகோ ஹீ’’திஆதி³மாஹ. ந தே காமா யானி சித்ரானி லோகேதி தே சே காமா ந ஹோந்தி, யானி லோகே சித்ரானி ரூபாதி³ஆரம்மணானி. வேதே³ஸீதி கேவலம் ஸங்கப்பராக³ஞ்ச காமம் கத்வா வதே³ஸி சே. ஹேஹிந்தீதி ப⁴வேய்யுந்தி அத்தோ². ஸுணந்தோ ஸத்³தா³னி மனோரமானி, ஸத்தா²பி தே ஹேஹிதி காமபோ⁴கீ³தி பச்சேகம் கா³தா², இத⁴ பன ஸம்கி²பித்வா த³ஸ்ஸிதா. தீ⁴ரா நாம தி⁴திஸம்பன்னாதி ஆஹ ‘‘பண்டி³தா’’தி.

தஸ்ஸாதி யோ பஹீனகோத⁴மானோ ஸப்³ப³ஸோ ஸம்யோஜனாதிகோ³ நாமரூபஸ்மிம் அஸஜ்ஜந்தோ ராகா³தி³கிஞ்சனரஹிதோ, தஸ்ஸ. மோக⁴ராஜா நாம தே²ரோ பா³வரீப்³ராஹ்மணஸ்ஸ பரிசாரகானம் ஸோளஸன்னம் அஞ்ஞதரோ. யதா²னுஸந்தி⁴ம் அப்பத்தோ ஸாவஸேஸ-அத்தோ², கிஞ்சி வத்தப்³ப³ம் அத்தீ²தி அதி⁴ப்பாயோ. ஸப்³ப³ஸோ விமுத்தத்தாவ தே³வமனுஸ்ஸா நமஸ்ஸந்தி, யே தம் படிபஜ்ஜந்தி. தேஸம் கிம் ஹோதி? கிஞ்சிபி ந ஸியாதி அயமேத்த² அத்த²விஸேஸோ? த³ஸப³லம் ஸந்தா⁴யேவமாஹ உக்கட்ட²னித்³தே³ஸேன. அனுபடிபத்தியாதி படிபத்திம் அனுக³ந்த்வா படிபஜ்ஜனேன. நமஸ்ஸந்தி தம் பூஜேந்தி.

சதுஸச்சத⁴ம்மம் ஜானித்வாதி தேன படிவித்³த⁴ம் சதுஸச்சத⁴ம்மம் படிவிஜ்ஜி²த்வா. ததா² ச பு³த்³த⁴ஸுபு³த்³த⁴தாய நிப்³பே³மதிகா ஹோந்தீதி ஆஹ ‘‘விசிகிச்ச²ம் பஹாயா’’தி. ததோ பரம் பன அனுக்கமேன அக்³க³மக்³கா³தி⁴க³மேன ஸங்கா³திகா³பி ஹோந்தி. அஸேக்க²த⁴ம்மபாரிபூரியா பஸம்ஸியா விஞ்ஞூனம் பஸம்ஸாபி ஹோந்தீதி.

நஸந்திஸுத்தவண்ணனா நிட்டி²தா.

5. உஜ்ஜா²னஸஞ்ஞிஸுத்தவண்ணனா

35. உஜ்ஜா²னவஸேன பவத்தா ஸஞ்ஞா ஏதேஸம் அத்தி², உஜ்ஜா²னவஸேன வா ஸஞ்ஜானந்தீதி உஜ்ஜா²னஸஞ்ஞீ. காரயேதி கதானம் பரியந்தம் காரயேதி அத்தோ². பரியந்தகாரிதந்தி பரிச்சி²ன்னகாரிதம் பரிமிதவசனந்தி அத்தோ². பம்ஸுகூலாதி³படிபக்க²னயேன பத்துண்ணது³குலாதி³ வுத்தம். நாமம் க³ஹிதந்தி ஏதேன ‘‘உஜ்ஜா²னஸஞ்ஞிகா’’தி ஏத்த² க-ஸத்³தோ³ ஸஞ்ஞாயந்தி த³ஸ்ஸேதி.

அஞ்ஞேனாகாரேன பூ⁴தந்தி அத்தனா பவேதி³யமானாகாரதோ அஞ்ஞேன அஸுத்³தே⁴ன ஆகாரேன விஜ்ஜமானம் உபலப்³ப⁴மானம் அத்தானம். வஞ்சேத்வாதி பலம்பே⁴த்வா. தஸ்ஸ குஹகஸ்ஸ. தம் சதுன்னம் பச்சயானம் பரிபு⁴ஞ்ஜனம். பரிஜானந்தீதி தஸ்ஸ படிபத்திம் பரிச்சி²ஜ்ஜ ஜானந்தி. காரகோதி ஸம்மாபடிபத்தியா கத்தா, ஸம்மாபடிபஜ்ஜிதாதி அத்தோ².

இத³ந்தி லிங்க³விபல்லாஸேன வுத்தம், அயந்தி அத்தோ². த⁴ம்மானுத⁴ம்மபடிபதா³தி நிப்³பா³னத⁴ம்மஸ்ஸ அனுச்ச²விகதாய அனுத⁴ம்மபூ⁴தா படிபதா³. படிபக்க²வித⁴மனே அஸிதி²லதாய த³ள்ஹா. பா⁴ஸிதமத்தேன ச ஸவனமத்தேன சாதி ஏத்த² ச-ஸத்³தோ³ விஸேஸனிவத்திஅத்தோ². தேன பா⁴ஸிதஸ்ஸ ஸுதஸ்ஸ ச ஸம்மாபடிபத்திவிஸேஸம் நிவத்தேதி. லோகபரியாயந்தி லோகஸ்ஸ பரிவித⁴மனம் உப்பாத³னிரோத⁴வஸேன ஸங்கா²ரானம் பராவுத்திம். தேனாஹ ‘‘ஸங்கா²ரலோகஸ்ஸ உத³யப்³ப³ய’’ந்தி. ஸ்வாயமத்தோ² ஸச்சபடிவேதே⁴னேவ ஹோதீதி ஆஹ ‘‘சதுஸச்சத⁴ம்மஞ்ச அஞ்ஞாயா’’தி. ஏவம் ந குப்³ப³ந்தீதி அத்தனி விஜ்ஜமானம்பி கு³ணம் அனாவீகரோந்தோ ‘‘யதா² தும்ஹே வத³த², ஏவம் ந குப்³ப³ந்தீ’’தி அவிஜ்ஜமானதம் ப்³யாகரோதீதி அத்தோ².

அகாரகமேவாதி தோ³ஸம் அகாரகமேவ. அச்சயஸ்ஸ படிக்³க³ண்ஹனம் நாம அதி⁴வாஸனம், ஏவம் ஸோ தே³ஸகேன தே³ஸியமானோ ததோ விக³தோ நாம ஹோதி. தேனாஹ ‘‘படிக்³க³ண்ஹாதூதி க²மதூ’’தி.

ஸபா⁴வேனாதி ஸபா⁴வதோ. ஏகஸதி³ஸந்தி பரேஸம் சித்தாசாரம் ஜானந்தம்பி அஜானந்தேஹி ஸஹ ஏகஸதி³ஸம் கரோந்தா. பரதோதி பச்சா². கதா²ய உப்பன்னாயாதி ‘‘கஸ்ஸச்சயா ந விஜ்ஜந்தீ’’திஆதி³கதா²ய பவத்தமானாய ‘‘ததா²க³தஸ்ஸ பு³த்³த⁴ஸ்ஸா’’திஆதி³னா பு³த்³த⁴ப³லம் பு³த்³தா⁴னுபா⁴வம் தீ³பேத்வா. க²மிஸ்ஸாமீதி அச்சயதே³ஸனம் படிக்³க³ண்ஹிஸ்ஸாமி. தப்படிக்³க³ஹோ ஹி இத⁴ க²மனந்தி அதி⁴ப்பேதம், ஸத்தா² பன ஸப்³ப³காலம் க²மோ ஏவ.

கோபோ அந்தரே சித்தே ஏதஸ்ஸாதி கோபந்தரோ. தோ³ஸோ க³ரு க³ருகாதப்³போ³ அஸ்ஸாதி தோ³ஸக³ரு. ‘‘படிமுச்சதீ’’தி வா பாடோ², அயமேவ அத்தோ². அச்சாயிககம்மந்தி ஸஹஸா அனுபதா⁴ரேத்வா கிரியா. நோ சிதா⁴தி நோ சே இத⁴. இதா⁴தி நிபாதமத்தம். அபக³தம் அபனீதம். தோ³ஸோ நோ சே ஸியா, தேன பரியாயேன யதி³ அபராதோ⁴ நாம ந ப⁴வேய்யாதி. ந ஸம்மேய்யும் ந வூபஸமேய்யும். குஸலோதி அனவஜ்ஜோ.

தீ⁴ரோ ஸதோதி பத³த்³வயேன வட்டசி²ந்த³ம் ஆஹ. கோ நிச்சமேவ பண்டி³தோ நாமாதி அத்தோ²தி ‘‘கஸ்ஸச்சயா’’திஆதி³காய புச்சா²கா³தா²ய அத்தோ². தீ³க⁴மஜ்ஜி²மஸம்வண்ணனாஸு ததா²க³த-ஸத்³தோ³ வித்தா²ரதோ ஸம்வண்ணிதோதி ஆஹ ‘‘ஏவமாதீ³ஹி காரணேஹி ததா²க³தஸ்ஸா’’தி. பு³த்³த⁴த்தாதீ³ஹீதி ஆதி³-ஸத்³தே³ன ‘‘போ³தே⁴தா பஜாயா’’திஆதி³னா (மஹானி. 192; சூளனி. பாராயனத்து²திகா³தா²னித்³தே³ஸ 97) நித்³தே³ஸே ஆக³தகாரணானி ஸங்க³ய்ஹந்தி. விமோக்க²ம் வுச்சதி அரியமக்³கோ³, தஸ்ஸ அந்தோ அக்³க³ப²லம், தத்த² ப⁴வா பண்ணத்தி, தஸ்ஸா வஸேன. ஏவம் பு³த்³த⁴ப³லம் தீ³பேதி. இதா³னி கி²த்தம் ஸங்கே²பேன ஸம்ஹராபிதம் ஹோதீதி த³ஸ்ஸேதி.

உஜ்ஜா²னஸஞ்ஞிஸுத்தவண்ணனா நிட்டி²தா.

6. ஸத்³தா⁴ஸுத்தவண்ணனா

36. தத்வஸ்ஸாதி ஓ-காரஸ்ஸ வ-காராதே³ஸம் அ-காரஸ்ஸ ச லோபம் கத்வா நித்³தே³ஸோதி ஆஹ ‘‘ததோ அஸ்ஸா’’தி. ‘‘ததஸ்ஸா’’தி வா பாடோ², ததோதி ச ஸத்³தா⁴ஹேதூதி அத்தோ². நானுபதந்தீதி ந வத்தந்தி. பமாத³ம் கரோந்தீதி பமஜ்ஜந்தி, மிச்சா² படிபஜ்ஜந்தீதி அத்தோ². லக்க²ணானீதி அனிச்சாதி³லக்க²ணானி. உபனிஜ்ஜா²யதீதி உபேச்ச ஞாணசக்கு²னா பேக்க²தி, அனுபஸ்ஸதீதி அத்தோ². ஆக³தகிச்சந்தி ஆஹதகிச்சம், அயமேவ வா பாடோ². ஸாதே⁴தீதி அஸம்மோஹபடிவேத⁴வஸேன நிப்பா²தே³தி, தத²லக்க²ணம் நிரோத⁴ஸச்சம் உபனிஜ்ஜா²யதீதி அயமத்தோ² மக்³கே³பி வத்தப்³போ³ தேன வினா அஸம்மோஹபடிவேத⁴ஸ்ஸ அஸம்ப⁴வதோ. கஸிணாரம்மணஸ்ஸாதி இத³ம் லக்க²ணவசனம். அகஸிணாரம்மணஸமாபத்தியோபி ஹி ஸந்தீதி. யதா² ச கஸிணாரம்மணானி அட்ட²ன்னம் ஸமாபத்தீனம் அவஸேஸானஞ்ச ததா³ரம்மணானம் பச்சவேக்க²ணவஸேன சித்தானம், ஏவம் தேன தானி ஆரம்மணானி க³ஹிதானீதி ‘‘கஸிணாரம்மணஸ்ஸ’’இச்சேவ வுத்தம். பரமம் உத்தமம் ஸுக²ந்தி வத்தப்³ப³தோ பரமஸுக²ம் அரஹத்தம்.

ஸத்³தா⁴ஸுத்தவண்ணனா நிட்டி²தா.

7. ஸமயஸுத்தவண்ணனா

37. உதா³னம் படிச்சாதி உக்காகரஞ்ஞா ஜாதிஸம்பே⁴த³பரிஹாரனிமித்தம் அத்தனோ வம்ஸபரிஸுத்³த⁴ம் நிஸ்ஸாய வுத்தம் பீதிஉதா³ஹாரம் படிச்ச கோ³த்தவஸேன ‘‘ஸக்கா’’தி லத்³த⁴னாமானம். யதி³ ஏகோபி ஜனபதோ³, கத²ம் ப³ஹுவசனந்தி ஆஹ ‘‘ருள்ஹீஸத்³தே³னா’’தி. அக்க²ரசிந்திகா ஹி ஈதி³ஸேஸு டா²னேஸு யுத்தே விய ஸலிங்க³வசனானி இச்ச²ந்தி, அயமேத்த² ருள்ஹீ யதா² ‘‘அவந்தீ குரூ’’தி, தப்³பி³ஸேஸனே பன ஜனபத³ஸத்³தே³ ஜாதிஸத்³த³தாய ஏகவசனமேவ. அரோபிமேதி கேனசி ந ரோபிமே.

ஆவரணேனாதி ஸேதுனா. ப³ந்தா⁴பேத்வாதி பண்டு³பலாஸபாஸாணமத்திகக²ண்டா³தீ³ஹி ஆலிம் தி²ரம் காராபேத்வா. ஸஸ்ஸானி காரேந்தீதி ஜேட்ட²மாஸே கிர க⁴ம்மஸ்ஸ ப³லவபா⁴வேன ஹிமவந்தே ஹிமம் விலீயித்வா ஸந்தி³த்வா அனுக்கமேன ரோஹிணிம் நதி³ம் பவிஸதி, தம் ப³ந்தி⁴த்வா ஸஸ்ஸானி காரேந்தி. ‘‘ஜாதிம் க⁴ட்டேத்வா கலஹம் வட்³ட⁴யிம்ஸூ’’தி ஸங்கே²பேன வுத்தமத்த²ம் பாகடதரம் காதும் ‘‘கோலியகம்மகரா வத³ந்தீ’’தி ஆஹ. நியுத்தஅமச்சானந்தி தஸ்மிம் ஸஸ்ஸபரிபாலனகம்மே நியோஜிதமஹாமத்தானம்.

தீணி ஜாதகானீதி ‘‘குடா²ரிஹத்தோ² புரிஸோ’’திஆதி³னா ப²ந்த³னஜாதகம் (ஜா. 1.13.14 ஆத³யோ) ‘‘து³த்³து³பா⁴யதி ப⁴த்³த³ந்தே’’திஆதி³னா து³த்³து³ப⁴ஜாதகம், (ஜா. 1.4.85 ஆத³யோ) ‘‘வந்தா³மி தம் குஞ்ஜரா’’திஆதி³னா லடுகிகஜாதகந்தி (ஜா. 1.5.39 ஆத³யோ) இமானி தீணி ஜாதகானி. த்³வே ஜாதகானீதி –

‘‘ஸாது⁴ ஸம்ப³ஹுலா ஞாதீ, அபி ருக்கா² அரஞ்ஞஜா;

வாதோ வஹதி ஏகட்ட²ம், ப்³ரஹந்தம்பி வனப்பதி’’ந்தி. –

ஆதி³னா ருக்க²த⁴ம்மஜாதகம் (ஜா. 1.1.74).

‘‘ஸம்மோத³மானா க³ச்ச²ந்தி, ஜாலமாதா³ய பக்கி²னோ;

யதா³ தே விவதி³ஸ்ஸந்தி, ததா³ ஏஹிந்தி மே வஸ’’ந்தி. (ஜா. 1.1.33) –

ஆதி³னா ஸம்மோத³மானஜாதகந்தி இமானி த்³வே ஜாதகானி.

‘‘அத்தத³ண்டா³ ப⁴யம் ஜாதம், ஜனம் பஸ்ஸத² மேத⁴க³ம்;

ஸம்வேக³ம் கித்தயிஸ்ஸாமி, யதா² ஸம்விஜிதம் மயா’’தி. (ஸு. நி. 941) –

ஆதி³னா அத்தத³ண்ட³ஸுத்தம்.

தேனாதி ப⁴க³வதா. கலஹகரணபா⁴வோதி கலஹகரணஸ்ஸ அத்தி²பா⁴வோ. மஹாபத²வியா மஹக்³கே⁴ க²த்தியே கஸ்மா நாஸேதா²தி த³ஸ்ஸேத்வா கலஹம் வூபஸமேதுகாமோ ப⁴க³வா பத²விம் நித³ஸ்ஸனபா⁴வேன க³ண்ஹீதி த³ஸ்ஸேந்தோ ‘‘பத²வீ நாம கிம் அக்³க⁴தீ’’திஆதி³மாஹ. அட்டா²னேதி அகாரணே. வேரம் கத்வாதி விரோத⁴ம் உப்பாதே³த்வா. தம்தம்பலோப⁴னகிரியாய பரக்கமந்தியோ ‘‘உக்கண்ட²ந்தூ’’தி ஸாஸனம் பேஸேந்தி. குணாலத³ஹேதி குணாலத³ஹதீரே பதிட்டா²ய. புச்சி²தம் கதே²ஸி அனுக்கமேன குணாலஸகுணராஜஸ்ஸ புச்சா²பஸங்கே³ன குணாலஜாதகம் (ஜா. 2.21.குணாலஜாதக) கதே²ஸ்ஸாமீதி. அனபி⁴ரதிம் வினோதே³ஸி இத்தீ²னம் தோ³ஸத³ஸ்ஸனமுகே²ன காமானம் ஆதீ³னவோகாரஸம்கிலேஸவிபா⁴வனவஸேன. புரிஸபுரிஸேஹீதி கோஸஜ்ஜம் வித்³த⁴ம்ஸேத்வா புரிஸதா²மப்³ரூஹனேன உத்தமபுரிஸேஹி நோ ப⁴விதும் வட்டதீதி உப்பன்னசித்தா. அவிஸ்ஸட்ட²ஸமணகம்மந்தா அபரிச்சத்தகம்மட்டா²னாபி⁴யோகா³தி அத்தோ². நிஸீதி³தும் வட்டதீதி ப⁴க³வா சிந்தேஸீதி யோஜனா.

பது³மினியந்தி பது³மவனே. விகஸிம்ஸு கு³ணக³ணவிபோ³தே⁴ன. அயம்இமஸ்ஸ…பே… ந கதே²ஸீதி இமினா ஸப்³பே³பி தே பி⁴க்கூ² தாவதே³வ படிபாடியா ஆக³தத்தா அஞ்ஞமஞ்ஞஸ்ஸ லஜ்ஜமானா அத்தனா படிலத்³த⁴விஸேஸம் ப⁴க³வதோ நாரோசேஸுந்தி த³ஸ்ஸேதி. கீ²ணாஸவானந்திஆதி³னா தத்த² காரணமாஹ.

ஓஸடமத்தேதி ப⁴க³வதோ ஸந்திகம் உபக³தமத்தே. அரியமண்ட³லேதி அரியபுக்³க³லஸமூஹே. பாசீனயுக³ந்த⁴ரபரிக்கே²பதோதி யுக³ந்த⁴ரபப்³ப³தஸ்ஸ பாசீனபரிக்கே²பதோ, ந பா³ஹிரகேஹி வுச்சமானஉத³யபப்³ப³ததோ. ராமணேய்யகத³ஸ்ஸனத்த²ந்தி பு³த்³து⁴ப்பாத³படிமண்டி³தத்தா விஸேஸதோ ரமணீயஸ்ஸ லோகஸ்ஸ ரமணீயபா⁴வத³ஸ்ஸனத்த²ம். உல்லங்கி⁴த்வாதி உட்ட²ஹித்வா. ஏவரூபே க²ணே லயே முஹுத்தேதி யதா²வுத்தே சந்த³மண்ட³லஸ்ஸ உட்டி²தக்க²ணே உட்டி²தவேலாயம் உட்டி²தமுஹுத்தேதி உபரூபரிகாலஸ்ஸ வட்³டி⁴தபா⁴வத³ஸ்ஸனத்த²ம் வுத்தம்.

தேஸம் பி⁴க்கூ²னம் ஜாதிஆதி³வஸேன ப⁴க³வதோ அனுரூபபரிவாரபா⁴வம் த³ஸ்ஸேந்தோ ‘‘தத்தா²’’திஆதி³மாஹ. மஹாஸம்மதஸ்ஸ வம்ஸே உப்பன்னோதிஆதி³ குலவம்ஸஸுத்³தி⁴த³ஸ்ஸனம். க²த்தியக³ப்³பே⁴ ஜாதோதி இத³ம் ஸதிபி ஜாதிவிஸுத்³தி⁴யம் மாதாபிதூனம் வஸேன அவிஸுத்³த⁴தா ஸியாதி தேஸம்பி ‘‘அவிஸுத்³த⁴தா நத்தி² இமேஸ’’ந்தி விஸுத்³தி⁴த³ஸ்ஸனத்த²ம் வுத்தம். ஸதிபி ச க³ப்³ப⁴விஸுத்³தி⁴யம் கததோ³ஸேன மிஸ்ஸகத்தா அரஜ்ஜாரஹதாபி ஸியாதி ‘‘தம்பி நத்தி² இமேஸ’’ந்தி த³ஸ்ஸனத்த²ம் ‘‘ராஜபப்³ப³ஜிதா’’திஆதி³ வுத்தம்.

ஸாமந்தாதி ஸமீபே. சலிம்ஸூதி உட்ட²ஹிம்ஸு. கோஸமத்தம் டா²னம் ஸத்³த³ந்தரம், ‘‘ஸத்³த³ஸவனட்டா²னமேவ ஸத்³த³ந்தர’’ந்தி அபரே. திக்க²த்தும் தேஸட்டி²யா நக³ரஸஹஸ்ஸேஸூதி ஜம்பு³தீ³பே கிர ஆதி³தோ மஹந்தானி தேஸட்டி² நக³ரஸஹஸ்ஸானி உப்பன்னானி, ததா² து³தியம், ததா² ததியம். தம் ஸந்தா⁴யாஹ ‘‘திக்க²த்தும் தேஸட்டி²யா நக³ரஸஹஸ்ஸேஸூ’’தி. தானி பன ஸம்பிண்டே³த்வா ஸதஸஹஸ்ஸதோ பரம் நவஸஹஸ்ஸாதி⁴கானி அஸீதிஸஹஸ்ஸானி. நவனவுதியா தோ³ணமுக²ஸதஸஹஸ்ஸேஸூதி நவஸதஸஹஸ்ஸாதி⁴கேஸு நவுதிஸதஸஹஸ்ஸேஸு தோ³ணமுகே²ஸு. தோ³ணமுக²ந்தி ச மஹானக³ரஸ்ஸ ஆயுப்பத்திட்டா²னபூ⁴தம் பாத³னக³ரம் வுச்சதி. ச²னவுதியா பட்டனகோடிஸதஸஹஸ்ஸேஸூதி ச²கோடிஸதஸஹஸ்ஸஅதி⁴கேஸு நவுதிகோடிஸதஸஹஸ்ஸபட்டனேஸு. தம்ப³பண்ணிதீ³பாதி³ச²பண்ணாஸாய ரதனாகரேஸு. ஏவம் பன நக³ர-தோ³ணமுக²பட்டன-ரதனாகராதி³பா⁴வேன கத²னம் தம்தம்அதி⁴வத்தா²ய வஸந்தீனம் தாஸம் தே³வதானம் ப³ஹுபா⁴வத³ஸ்ஸனத்த²ம். யதி³ த³ஸஸஹஸ்ஸசக்கவாளேஸு தே³வதா ஸன்னிபதிதா. அத² கஸ்மா பாளியம் ‘‘த³ஸஹி ச லோகதா⁴தூஹீ’’தி? வுத்தந்தி ஆஹ ‘‘த³ஸஸஹஸ்ஸ…பே… அதி⁴ப்பேத’’ந்தி. தேன ஸஹஸ்ஸிலோகதா⁴து இத⁴ ‘‘ஏகா லோகதா⁴தூ’’தி வேதி³தப்³பா³.

லோஹபாஸாதே³தி ஸப்³ப³பட²மகதே லோஹபாஸாதே³. ப்³ரஹ்மலோகேதி ஹேட்டி²மே ப்³ரஹ்மலோகே. யதி³ தா தே³வதா ஏவம் நிரந்தரா ஹுத்வா ஸன்னிபதிதா, பச்சா² ஆக³தானம் ஓகாஸோ ஏவ ந ப⁴வேய்யாதி சோத³னம் ஸந்தா⁴யாஹ ‘‘யதா² கோ² பனா’’திஆதி³.

ஸுத்³தா⁴வாஸகாயே உப்பன்னா ஸுத்³தா⁴வாஸகாயிகா. தாஸம் பன யஸ்மா ஸுத்³தா⁴வாஸபூ⁴மி நிவாஸட்டா²னம், தஸ்மா வுத்தம் ‘‘ஸுத்³தா⁴வாஸவாஸீன’’ந்தி. ஆவாஸாதி ஆவாஸட்டா²னபூ⁴தா. தே³வதா பன ஓரம்பா⁴கி³யானம் இதரேஸஞ்ச ஸம்யோஜனானம் ஸமுச்சி²ன்னட்டே²ன ஸுத்³தோ⁴ ஆவாஸோ விஹாரோ ஏதேஸந்தி ஸுத்³தா⁴வாஸா. மஹாஸமாக³மம் ஞத்வாதி மஹாஸமாக³மம் க³தாதி ஞத்வா.

புரத்தி²மசக்கவாளமுக²வட்டியம் ஓதரி அஞ்ஞத்த² ஓகாஸம் அலப⁴மானோ. ஏவம் ஸேஸாபி. மணிவம்மந்தி இந்த³னீலமணிமயம் கவசம். பு³த்³தா⁴னம் அபி⁴முக²பா⁴கோ³ பு³த்³த⁴வீதி², ஸா யாவ சக்கவாளா உத்தரிதும் ந ஸக்கா. மஹதியா பு³த்³த⁴வீதி²யாவாதி பு³த்³தா⁴னம் ஸந்திகம் உபஸங்கமந்தேஹி தேஹி தே³வப்³ரஹ்மேஹி வலஞ்ஜிதபு³த்³த⁴வீதி²யாவ.

ஸமிதி ஸங்க³தி ஸன்னிபாதோ ஸமயோ, மஹந்தோ ஸமயோ மஹாஸமயோதி ஆஹ ‘‘மஹாஸமூஹோ’’தி. பவத்³த⁴ம் வனம் பவனந்தி ஆஹ ‘‘வனஸண்டோ³’’தி. தே³வக⁴டாதி தே³வஸமூஹா. ஸமாத³ஹம்ஸூதி ஸமாஹிதம் லோகுத்தரஸமாதி⁴ம் ஸுட்டு² அப்பிதம் அகம்ஸு. ததா² ஸமாஹிதம் பன ஸமாதி⁴னா நியோஜிதம் நாம ஹோதீதி வுத்தம் ‘‘ஸமாதி⁴னா யோஜேஸு’’ந்தி. ஸப்³பே³ஸம் கோ³முத்தவங்காதீ³னம் தூ³ரஸமுஸ்ஸாரிதத்தா அத்தனோ…பே… அகரிம்ஸு. வினயதி அஸ்ஸே ஏதேஹீதி நேத்தானி, யோத்தானி. அவீதி²படிபன்னானம் அஸ்ஸானம் வீதி²படிபாத³னம் ரஸ்மிக்³க³ஹணேன ஹோதீதி ‘‘யோத்தானி க³ஹேத்வா அசோதே³ந்தோ’’தி வத்வா தம் பன அசோத³னம் அவாரணமேவாதி ஆஹ ‘‘அசோதே³ந்தோ அவாரேந்தோ’’தி.

யதா² கீ²லம் பி⁴த்தியம், பூ⁴மியம் வா ஆகோடிதம் து³ன்னீஹரணம், யதா² ச பலிக⁴ம் நக³ரப்பவேஸனிவாரணம், யதா² ச இந்த³கீ²லம் க³ம்பீ⁴ரனேமி ஸுனிகா²தம் து³ன்னீஹரணம், ஏவம் ராகா³த³யோ ஸத்தஸந்தானதோ து³ன்னீஹரணா நிப்³பா³னனக³ரப்பவேஸனிவாரணா சாதி தே ‘‘கீ²லம் பலிக⁴ம் இந்த³கீ²ல’’ந்தி ச வுத்தா. ஊஹச்சாதி உத்³த⁴ரித்வா. தண்ஹாஏஜாய அபா⁴வேன அனேஜா. பரமஸந்துட்ட²பா⁴வேன சாதுத்³தி³ஸத்தா அப்படிஹதசாரிகம் சரந்தி. பு³த்³த⁴சக்கு²-த⁴ம்மசக்கு²-தி³ப்³ப³சக்கு²-ஸமந்தசக்கு²-பகதிசக்கூ²னம் வஸேன பஞ்சஹி சக்கூ²ஹி. ஸுத³ந்தா குதோதி ஆஹ ‘‘சக்கு²தோபீ’’தி. ச²ந்தா³தீ³ஹீதி ச²ந்தா³தீ³னம் வஸேன ந க³ச்ச²ந்தி ந வத்தந்தி. ந ஆக³ச்ச²ந்தி அனுப்பாத³னதோ. ஆகு³ந்தி அபராத⁴ம்.

ஸப்³ப³ஸம்யோகா³தி விப⁴த்திலோபேன நித்³தே³ஸோ, ஸப்³பே³ ஸம்யோகே³தி அத்தோ². விஸஜ்ஜாதி விஸஜ்ஜித்வா. ஏவம்பீதி இமாயபி கா³தா²ய வஸேன ‘‘ஆகு³ம் ந கரோதீ’’தி பதே³.

க³தாஸேதி க³தா ஏவ. ந க³மிஸ்ஸந்தி பரினிட்டி²தஸரணக³மனத்தா. லோகுத்தரஸரணக³மனஞ்ஹேத்த² அதி⁴ப்பேதம். தேனாஹ ‘‘நிப்³பே³மதிகஸரணக³மனேன க³தா’’தி. தே ஹி நியமேன அபாயம் ந க³மிஸ்ஸந்தி, தே³வகாயஞ்ச பரிபூரேஸ்ஸந்தி. யே பன லோகியேன ஸரணக³மனேன பு³த்³த⁴ம் ஸரணம் க³தா, ந தே க³மிஸ்ஸந்தி அபாயம், ஸதி ச பச்சயந்தரஸமவாயே பஹாய மானுஸம் தே³ஹம் தே³வகாயம் பரிபூரேஸ்ஸந்தீதி. தேனாஹ ஸோ ப்³ரஹ்மா ‘‘யே கேசி பு³த்³த⁴ம்…பே… பரிபூரேஸ்ஸந்தீ’’தி.

ஸமயஸுத்தவண்ணனா நிட்டி²தா.

8. ஸகலிகஸுத்தவண்ணனா

38. தந்தி உய்யானம் ஸங்க²ம் க³தந்தி ஸம்ப³ந்தோ⁴. த⁴னுனா ஸரேன க³ஹந்தி போத²யந்தி பா³தே⁴ந்தீதி த⁴னுக்³க³ஹா. தம் ஸம்படிச்சீ²தி தஸ்ஸா ஸிலாய ஹேட்டா²பா⁴கே³ன உக்³க³ந்த்வா ஸம்படிச்சி². ஸத்து² புஞ்ஞானுபா⁴வேன உபஹதத்தா ஸயம்பி பரிபதந்தீ வாதம் உபத்த²ம்பே⁴தி. அபி⁴ஹனி ஸத்தா²ரா அனாவஜ்ஜிதத்தா. தஞ்ச கோ² கம்மப²லவஸேனாதி த³ட்ட²ப்³ப³ம். ததோ ஏவ ததோ பட்டா²ய ப⁴க³வதோ அபா²ஸு ஜாதந்தி ஏதேனபி உபாதி³ண்ணகஸரீரே நாம அனிட்டா²பி ஸம்ப²ஸ்ஸகா பதந்தி ஏவ ததா²ரூபேன கம்முனா கதோகாஸேதி த³ஸ்ஸேதி. அயம் விஹாரோதி கி³ஜ்ஜ²கூடவிஹாரோ. உஜ்ஜங்க³லோ ந கத்தப்³ப³பரோ. விஸமோதி பூ⁴மிபா⁴க³வஸேன விஸமோ. ஸிவிகாகாரேன ஸஜ்ஜிதோ மஞ்சோ ஏவ மஞ்சஸிவிகா.

பு⁴ஸாதி த³ள்ஹா. து³க்கா²தி து³க்க²மா து³த்திதிக்கா². க²ராதி கக்கஸா. கடுகாதி அனிட்டா². அஸாதாதி ந ஸாதா அப்பியா. ந அப்பேதீதி ந உபேதி. ந அப்பாயந்தீதி ந க²மந்தி. வேத³னாதி⁴வாஸனக²ந்தியா ஸதிஸம்பஜஞ்ஞயுத்தத்தா ஸப்³ப³ஸத்தட்டி²தாஹாரஸமுத³யவத்து²ஜாதஸ்ஸ ஆதீ³னவனிஸ்ஸரணானம் பகே³வ ஸுப்படிவிதி³தத்தா யதா² ஸமுதா³சாரோ சித்தம் நாபி⁴ப⁴வதி, ஏவம் ஸம்மதே³வ உபட்டா²பிதஸதிஸம்பஜஞ்ஞத்தா வுத்தம் ‘‘வேத³னாதி⁴வாஸன…பே… ஹுத்வா’’தி. அபீளியமானோதி அபா³தி⁴யமானோ. காமம் அனிட்டா²ய வேத³னாய பு²ட்டோ² தாய அபீளியமானோ நாம நத்தி², பரிஞ்ஞாதவத்து²கத்தா பன தஸ்ஸா வஸே அவத்தமானோ ‘‘அவிஹஞ்ஞமானோ’’தி வுத்தோ. தேனாஹ ‘‘ஸம்பரிவத்தஸாயிதாய வேத³னானம் வஸம் அக³ச்ச²ந்தோ’’தி.

ஸீஹஸேய்யந்தி ஏத்த² ஸயனம் ஸேய்யா, ஸீஹஸ்ஸ விய ஸேய்யா ஸீஹஸேய்யா, தம் ஸீஹஸேய்யம். அத² வா ஸீஹஸேய்யந்தி ஸேட்ட²ஸேய்யம் உத்தமஸேய்யம். ஸ்வாயமத்தோ² அட்ட²கதா²யமேவ ஆக³மிஸ்ஸதி. ‘‘வாமேன பஸ்ஸேன ஸேந்தீ’’தி ஏவம் வுத்தா காமபோ⁴கி³ஸேய்யா. த³க்கி²ணபஸ்ஸேன ஸயானோ நாம நத்தி² த³க்கி²ணஹத்த²ஸ்ஸ ஸரீரக்³க³ஹணாதி³யோக³க்க²மதோ. புரிஸவஸேன சேதம் வுத்தம். ஏகேன பஸ்ஸேன ஸயிதும் ந ஸக்கோந்தி து³க்கு²ப்பத்திதோ. அயம் ஸீஹஸேய்யாதி அயம் யதா²வுத்தா ஸீஹஸேய்யா. தேஜுஸ்ஸத³த்தாதி இமினா ஸீஹஸ்ஸ அபீ⁴தபா⁴வம் த³ஸ்ஸேதி. பீ⁴ருகஜாதிகா ஹி ஸேஸமிகா³ அத்தனோ ஆஸயம் பவிஸித்வா உத்ராஸப³ஹுலா ஸந்தாஸபுப்³ப³கம் யதா² ததா² ஸயந்தி, ஸீஹோ பன அபி⁴ருகபா⁴வதோ ஸதோகாரீ பி⁴க்கு² விய ஸதிம் உபட்ட²பேத்வாவ ஸயதி. தேனாஹ ‘‘த்³வே புரிமபாதே³’’திஆதி³. புரிமபாதே³தி த³க்கி²ணபுரிமபாதே³ வாமஸ்ஸ புரிமபாத³ஸ்ஸ ட²பனவஸேன த்³வே புரிமபாதே³ ஏகஸ்மிம் டா²னே ட²பேத்வா. பச்சி²மபாதே³தி த்³வே பச்சி²மபாதே³. வுத்தனயேனேவ இதா⁴பி ஏகஸ்மிம் டா²னே ட²பனம் வேதி³தப்³ப³ம். டி²தோகாஸஸல்லக்க²ணம் அபீ⁴ருகபா⁴வேனேவ. ஸீஸம் பன உக்கி²பித்வாதிஆதி³னா வுத்தஸீஹகிரியா அனுத்ராஸபபு³ஜ்ஜ²னம் விய அபீ⁴ருகபா⁴வஸித்³தா⁴ த⁴ம்மதாவஸேனேவாதி வேதி³தப்³பா³. ஸீஹவிஜம்பி⁴தவிஜம்ப⁴னம் அதிவேலம் ஏகாகாரேன ட²பிதானம் ஸரீராவயவானம் க³மனாதி³கிரியாஸு யோக்³க³பா⁴வாபாத³னத்த²ம். திக்க²த்தும் ஸீஹனாத³னத³னம் அப்பேஸக்க²மிக³ஜாதபரிஹரணத்த²ம்.

ஸேதி அப்³யாவடபா⁴வேன பவத்ததி ஏத்தா²தி ஸேய்யா, சதுத்த²ஜ்ஜா²னமேவ ஸேய்யா சதுத்த²ஜ்ஜா²னஸேய்யா. கிம் பனேத்த² தம் சதுத்த²ஜ்ஜா²னந்தி? ஆனாபானசதுத்த²ஜ்ஜா²னம். ததோ ஹி வுட்ட²ஹித்வா விபஸ்ஸனம் வட்³டே⁴த்வா அனுக்கமேன அக்³க³மக்³க³ம் அதி⁴க³ந்த்வா ததா²க³தோ ஜாதோதி. ‘‘தயித³ம் பத³ட்டா²னம் நாம, ந ஸேய்யா, ததா²பி யஸ்மா ‘சதுத்த²ஜ்ஜா²னா வுட்ட²ஹித்வா ஸமனந்தரம் ப⁴க³வா பரினிப்³பா³யீ’தி மஹாபரினிப்³பா³னே (தீ³. நி. 2.219) ஆக³தம். தஸ்மா லோகியசதுத்த²ஜ்ஜா²னஸமாபத்தி ஏவ ததா²க³தஸேய்யா’’தி கேசி. ஏவம் ஸதி பரினிப்³பா³னகாலிகாவ ததா²க³தஸேய்யாதி ஆபஜ்ஜதி; ந ச ததா²க³தோ லோகியசதுத்த²ஜ்ஜா²னஸமாபஜ்ஜனப³ஹுலோ விஹாஸி. அக்³க³ப²லவஸேன பவத்தம் பனேத்த² சதுத்த²ஜ்ஜா²னம் வேதி³தப்³ப³ம். தத்த² யதா² ஸத்தானம் நித்³து³பக³மலக்க²ணா ஸேய்யா ப⁴வங்க³சித்தவஸேன ஹோதி, ஸா ச நேஸம் பட²மம் ஜாதிஸமன்வயா யேபு⁴ய்யவுத்திகா, ஏவம் ப⁴க³வதோ அரியஜாதிஸமன்வயம் யேபு⁴ய்யவுத்திகம் அக்³க³ப²லபூ⁴தம் சதுத்த²ஜ்ஜா²னம் ததா²க³தஸேய்யாதி வேதி³தப்³பா³. ஸீஹஸேய்யா நாம ஸேட்ட²ஸேய்யாதி ஆஹ ‘‘உத்தமஸேய்யா’’தி.

‘‘காலபரிச்சே²த³ம் கத்வா யதா²பரிச்சே²த³ம் உட்ட²ஹிஸ்ஸாமீ’’தி ஏவம் ததா³ மனஸிகாரஸ்ஸ அகதத்தா பாளியம் ‘‘உட்டா²னஸஞ்ஞம் மனஸிகரித்வா’’தி ந வுத்தந்தி ஆஹ ‘‘உட்டா²னஸஞ்ஞந்தி பனேத்த² ந வுத்த’’ந்தி. தத்த² காரணமாஹ ‘‘கி³லானஸேய்யா ஹேஸா’’தி. ஸா ஹி சிரகாலப்பவத்திகா ஹோதி.

விஸும் விஸும் ராஸிவஸேன அனாக³ந்த்வா ஏகஜ்ஜ²ம் புஞ்ஜவஸேன ஆக³தத்தா வுத்தம் ‘‘ஸப்³பா³பி தா’’தி. தேனாஹ ‘‘ஸத்தஸதா’’தி. விகாரமத்தம்பீதி வேத³னாய அஸஹனவஸேன பவத்தனாகாரமத்தம்பி. ஸுஸம்மட்ட²கஞ்சனம் வியாதி ஸம்மட்ட²ஸுஸஜ்ஜிதஸுவண்ணம் விய.

த⁴ம்மாலபனந்தி அஸங்கா²ரிகஸமுப்பன்னஸபா⁴வாலபனம். ஸமுல்லபிதஞ்ஹி ஆகாரஸமானவசனமேதம். நாகோ³ விய வாதி பவத்ததீதி நாக³வோ. தஸ்ஸ பா⁴வோ நாக³வதா. விப⁴த்திலோபேன ஹேஸ நித்³தே³ஸோ, மஹானாக³ஹத்தி²ஸதி³ஸதாயாதி அத்தோ². ப்³யத்துபரிசரணட்டே²னாதி ப்³யத்தம் உபரூபரி அத்தனோ கிரியாசரணேன. ஆஜானீயோதி ஸம்மாபதிதம் து³க்க²ம் ஸஹந்தோ அத்தனா காதப்³ப³கிரியம் தீ⁴ரோ ஹுத்வா நித்தா²ரகோ. காரணாகாரணஜானனேனாதி நிய்யானிகானிய்யானிககரணஞாததாய. தேனேவட்டே²னாதி அப்படிஸமட்டே²னேவ. ‘‘முத்தோ மோசேய்ய’’ந்திஆதி³ து⁴ரவாஹட்டே²ன. நிப்³பி³ஸேவனட்டே²னாதி ராகா³தி³விஸவிக³தபா⁴வேன.

அனியமிதாணத்தீதி அனுத்³தே³ஸிகம் ஆணாபனம். ஸாமஞ்ஞகதோபி ஸமாதி⁴ஸத்³தோ³ பகரணதோ இத⁴ விஸேஸத்தோ²தி ஆஹ ‘‘ஸமாதி⁴ந்தி அரஹத்தப²லஸமாதி⁴’’ந்தி. படிப்பஸ்ஸத்³தி⁴வஸேன ஸப்³ப³கிலேஸேஹி ஸுட்டு² விமுத்தந்தி ஸுவிமுத்தம். அபி⁴னதம் நாம ஆரம்மணே அபி⁴முக²பா⁴வேன பவத்தியா. அபனதம் அபக³மனவஸேன பவத்தியா, விமுக²தாயாதி அத்தோ². லோகியஜ்ஜா²னசித்தம் விய விபஸ்ஸனா விய ச ஸஸங்கா²ரேன ஸப்பயோகே³ன தத³ங்க³ப்பஹானவிக்க²ம்ப⁴னபஹானவஸேன ச விக்க²ம்பே⁴த்வா ந அதி⁴க³தம் ந ட²பிதம், கிஞ்சரஹி கிலேஸானம் ஸப்³ப³ஸோ சி²ன்னதாயாதி ஆஹ ‘‘சி²ன்னத்தா வதம் ப²லஸமாதி⁴னா ஸமாஹித’’ந்தி. அதிக்கமிதப்³ப³ந்தி ஆசாராதிக்கமவஸேன லங்கி⁴தப்³ப³ம். ஸா பன லங்க⁴னா ஆஸாத³னா க⁴ட்டனாதி ஆஹ ‘‘க⁴ட்டேதப்³ப³’’ந்தி.

பஞ்சவேதா³ நாம – இருவேதோ³, யஜுவேதோ³, ஸாமவேதோ³, ஆத²ப்³ப³ணவேதோ³, இதிஹாஸோ சாதி ஏவம் இதிஹாஸபஞ்சமானம் வேதா³னம். ‘‘சர’’ந்தி வசனவிபல்லாஸேன வுத்தந்தி ஆஹ ‘‘சரந்தா’’தி, தபந்தாதி அத்தோ². ஹீனத்தரூபாதி ஹீனாதி⁴முத்திகதாய நிஹீனசித்தஸபா⁴வா. விமுத்திகதாய அபா⁴வதோ நிப்³பா³னங்க³மா ந ஹோந்தி. அரஹத்தாதி⁴க³மகம்மஸ்ஸ அப⁴ப்³ப³தாய பரிஹீனத்தா². அஜ்ஜோ²த்த²டாதி அபி⁴பூ⁴தா. தாதி³ஸேஹேவ ஸீலேஹீதி கோ³ஸீலாதீ³ஹி. ப³த்³தா⁴தி ஸமாத³பேத்வா பவத்தனவஸேன அனுப³த்³தா⁴. லூக²ம் தபந்தி அத்தகிலமதா²னுயோக³ம். தம் பன ஏகதே³ஸேன த³ஸ்ஸேந்தோ ‘‘பஞ்சாதபதாபன’’ந்திஆதி³மாஹ. ‘‘ஏவம் படிபன்னஸ்ஸ மோக்கோ² நத்தி², ஏவம் படிபன்னஸ்ஸ வட்டதோ முத்தி அத்தீ²’’தி வத³ந்தீ ஸா அத்ததோ ஸாஸனஸ்ஸ நிய்யானபா⁴வோ கதி²தோ நாம ஹோதீதி ஆஹ ‘‘ஸாஸனஸ்ஸ நிய்யானிகபா⁴வம் கதே²ந்தீ’’தி. ஆதி³ந்தி கா³தா²த்³வயம்.

ஸகலிகஸுத்தவண்ணனா நிட்டி²தா.

9. பட²மபஜ்ஜுன்னதீ⁴துஸுத்தவண்ணனா

39. சாதுமஹாராஜிகஸ்ஸாதி சாதுமஹாராஜிககாயிகஸ்ஸ. த⁴ம்மோ அனுபு³த்³தோ⁴தி சதுஸச்சத⁴ம்மோ பரிஞ்ஞேய்யாதி³பா⁴வஸ்ஸ அனுரூபதோ பு³த்³தோ⁴. பச்சக்க²மேவாதி பரபத்தியா அஹுத்வா அத்தபச்சக்க²மேவ கத்வா ஜானாமி. த⁴ம்மம் க³ரஹந்தா நாம ஸத்³த³தோ³ஸவஸேன வா அத்த²தோ³ஸவஸேன வா க³ரஹேய்யுந்தி தம் த³ஸ்ஸேந்தோ ‘‘ஹீனக்க²ர…பே… கோதிவா’’தி ஆஹ. ஸா பன ‘‘தேஸம் விக³ரஹா து³ம்மேத⁴தாய மஹானத்தா²வஹாவா’’தி த³ஸ்ஸேந்தீ தே³வதா ஆஹ ‘‘து³ம்மேதா⁴ உபேந்தி ரோருவ’’ந்தி. விஸும் ஹோதீதி அவீசிமஹானிரயதோ விஸும் ஏவ ஹோதி. க²ந்தியாதி ஞாணக²ந்தியா. உபஸமேனாதி ராகா³தீ³னம் ஸப்³ப³ஸோ வூபஸமேன. தேனாஹ ‘‘ருச்சித்வா’’திஆதி³.

பட²மபஜ்ஜுன்னதீ⁴துஸுத்தவண்ணனா நிட்டி²தா.

10. து³தியபஜ்ஜுன்னதீ⁴துஸுத்தவண்ணனா

40. பு³த்³த⁴ஞ்ச த⁴ம்மஞ்ச நமஸ்ஸமானாதி பு³த்³த⁴ஸுபு³த்³த⁴தம் த⁴ம்மஸுத⁴ம்மதஞ்ச ஞத்வா தது³ப⁴யம் நமஸ்ஸமானா. யஸ்மா பு³த்³தே⁴ ச த⁴ம்மே ச பஸன்னோ ஸங்கே⁴ ச பஸன்னோ ஏவ ஹோதி தஸ்ஸ ஸுப்படிபத்தியா விஜானனதோ, தஸ்மா ஸோ அத்தோ² கா³தா²ய ச-ஸத்³த³ஸங்க³ஹிதோதி த³ஸ்ஸேந்தோ ‘‘ச-ஸத்³தே³ன ஸங்க⁴ஞ்சா’’தி ஆஹ அத்த²வதியோதி லோகியலோகுத்தரஅத்த²ஸங்க³ஹிதா லோகியகுஸலலோகுத்தரமக்³க³ஸங்க³ண்ஹனதோ. யம் த⁴ம்மம் ஸா அபா⁴ஸீதி யம் தும்ஹாகம் த⁴ம்மம் படிவிஜ்ஜி²த்வா டி²தா, ஸா மஹாகோகனதா³ அத்தனோ ப³லானுரூபம் அபா⁴ஸி. ப³ஹுனாதி நானப்பகாரேன. பரியாயேனாதி காரணேன. தாதி³ஸோதி ததா²ரூபோ ததா²படிவித்³த⁴ஸச்சோ அத்த²த⁴ம்மாதீ³ஸு குஸலோ ஏகேகம் பத³ம்பி உதா³ஹரணஹேதுனிக³மனானி நீஹரந்தோ ஆசிக்க²தி தே³ஸேதி பஞ்ஞபேதி பட²பேதி விவரதி விப⁴ஜதி உத்தானீகரோதி. தேனாஹ ‘‘அயம் ப⁴க³வா’’திஆதி³. ஏதேன அதிவிய வித்தா²ரக்க²மோ ஸுக³தத⁴ம்மோதி த³ஸ்ஸேதி. பரியாபுடந்தி பரிவத்திதம். ஏவம் வித்தா²ரக்க²மம் த⁴ம்மம் யஸ்மா தே³வதீ⁴தா ‘‘ஸம்கி²த்தமத்த²ம் லபயிஸ்ஸாமீ’’தி அவோச, தஸ்மா வுத்தம் ‘‘தஸ்ஸத்த²’’ந்திஆதி³.

து³தியபஜ்ஜுன்னதீ⁴துஸுத்தவண்ணனா நிட்டி²தா.

ஸதுல்லபகாயிகவக்³க³வண்ணனா நிட்டி²தா.