8. மஹத்³த⁴னஸுத்தவண்ணனா

28. நிதீ⁴யதீதி நிதா⁴னம். நிதா⁴தப்³ப³தம் க³தம் நிஹிதந்தி அத்தோ². முத்தஸாராதீ³தி முத்தாமணிவேளுரியபவாளரஜதஜாதரூபாதி³. ஸுவண்ணரஜதபா⁴ஜனாதீ³தி ஆதி³-ஸத்³தே³ன கஹாபண-த⁴ஞ்ஞகோட்ட²ப⁴ண்டா³தி³ம் ஸங்க³ண்ஹாதி. தம்பி ஹி நிச்சபரிப்³ப³யவஸேன பு⁴ஞ்ஜீயதீதி ‘‘போ⁴கோ³’’தி வுச்சதி. அஞ்ஞமஞ்ஞம் அபி⁴கி³ஜ்ஜ²ந்தீதி அஞ்ஞமஞ்ஞஸ்ஸ ஸந்தகம் அபி⁴கி³ஜ்ஜ²ந்தி. தேனாஹ ‘‘பத்தே²ந்தீ’’தி. அனலங்கதாதி ந அலம் பரியத்தந்தி ஏவம் கதசித்தா, அத்ரிச்ச²தாமஹிச்ச²தாஹி அபி⁴பூ⁴தா. தேனாஹ ‘‘அதித்தா அபரியத்தஜாதா’’தி. உஸ்ஸுக்கஜாதேஸூதி தம்தம்கிச்சே ஸஞ்ஜாதஉஸ்ஸுக்கேஸு. நானாகிச்சஜாதேஸூதி நானாவித⁴கிச்சேஸு, ஸஞ்ஜாதனானாகிச்சேஸு வா. வட்டகா³மிகபஸுதேன வட்டஸோதம் அனுஸரந்தேஸு. தண்ஹானிவாஸதாய கே³ஹந்திபி அகா³ரந்திபி வுச்சதீதி ஆஹ ‘‘மாதுகா³மேன ஸத்³தி⁴ம் கே³ஹ’’ந்தி. விராஜியாதி ஹேதுஅத்த²தீ³பகம் பத³ந்தி ஆஹ ‘‘விராஜேத்வா’’தி, த்வா-ஸத்³தோ³பி சாயம் ஹேதுஅத்தோ²தி.

மஹத்³த⁴னஸுத்தவண்ணனா நிட்டி²தா.