3. உபனீயஸுத்தவண்ணனா

3. அனேகத்த²த்தா தா⁴துஸத்³தா³னம் உபஸக்³க³வஸேன அத்த²விஸேஸவாசகோ ஹோதீதி ஆஹ ‘‘உபனீயதீதி பரிக்கீ²யதி நிருஜ்ஜ²தீ’’தி. வினஸ்ஸதீதி அத்தோ². உபனீயதீதி வா ஸரஸேனேவ ஜீவிதஸ்ஸ மரணூபக³மனம் வுத்தந்தி ஆஹ – ‘‘உபக³ச்ச²தி வா, அனுபுப்³பே³ன மரணம் உபேதீதி அத்தோ²’’தி. காமஞ்சேத்த² ‘‘உபனீயதீ’’தி பத³ம் அபாகடகம்மவிஸேஸம் வுத்தம். யதா² பன ‘‘ஸப்³ப³ம் ஆரோக்³யம் ப்³யாதி⁴பரியோஸானம், ஸப்³ப³ம் யோப்³ப³னம் ஜராபரியோஸானம், ஸப்³ப³ம் ஜீவிதம் மரணபரியோஸான’’ந்தி, ‘‘உபனீயதி ஜீவித’’ந்தி வுத்தத்தா ‘‘மரணம் உபேதீ’’தி வுத்தம். கம்மகத்துவஸேன ஹேதம் வுத்தம்.

இதா³னி கம்மஸாத⁴னவஸேன அத்த²ம் த³ஸ்ஸேதும் ‘‘யதா² வா’’திஆதி³ வுத்தம். கோ³பாலேன கோ³க³ணோ நீயதி யதி²ச்சி²தம் டா²னம். ஜீவந்தி தேன ஸத்தா, ஸஹஜாதத⁴ம்மா வாதி ஜீவிதம், ததே³வ தேஸம் அனுபாலனே ஆதி⁴பச்சஸப்³பா⁴வதோ இந்த்³ரியந்தி ஆஹ ‘‘ஜீவிதந்தி ஜீவிதிந்த்³ரிய’’ந்தி பரித்தந்தி இத்தரம். தேனாஹ ‘‘தோ²க’’ந்தி. பப³ந்தா⁴னுபச்சே²த³ஸ்ஸ பச்சயபா⁴வோ இத⁴ ஜீவிதஸ்ஸ மரணகிச்சந்தி அதி⁴ப்பேதந்தி ஆஹ ‘‘ஸரஸபரித்ததாய சா’’திஆதி³. ஆயூதி ச பரமாயு இதா⁴தி⁴ப்பேதம், தஞ்ச அஜ்ஜகாலவஸேன வேதி³தப்³ப³ம்.

இமஸ்மிஞ்ஹி பு³த்³து⁴ப்பாதே³ அயம் கதா²தி ஜீவிதஸ்ஸ அதிஇத்தரபா⁴வதீ³பனபரா அயம் தே³ஸனா. ஜீவிதிந்த்³ரியவஸேன ஜீவிதக்க²யம் நியமேந்தோ ‘‘ஏகசித்தப்பவத்திமத்தோயேவா’’தி ஆஹ, ஏகஸ்ஸ சித்துப்பாத³ஸ்ஸ பவத்திக்க²ணமத்தோ ஏவாதி அத்தோ². இதா³னி தமத்த²ம் உபமாய விபா⁴வேதும் ‘‘யதா² நாமா’’திஆதி³ வுத்தம். தத்த² பவத்தமானந்தி நேமிரதீ²ஸா வத்தந்தீ ஏகேனேவ நேமிப்பதே³ஸேன பவத்ததி ஏகஸ்மிம் க²ணேதி அதி⁴ப்பாயோ. ‘‘ஏகேனேவ திட்ட²தீ’’தி ஏத்தா²பி ஏஸேவ நயோ. ஏகசித்தக்க²ணிகந்தி ஏகசித்தக்க²ணமத்தவந்தம். தஸ்மிம் சித்தேதி தஸ்மிம் யஸ்மிம் கிஸ்மிஞ்சி ஏகஸ்மிம் சித்தே. நிருத்³த⁴மத்தேதி நிருத்³த⁴பா⁴வப்பத்தமத்தே. நிருத்³தோ⁴தி வுச்சதீதி மதோதி வுச்சதி தம்ஸமங்கீ³ ஸத்தோ பரமத்த²தோ. அவிஸேஸவிது³னோ பன அவிஞ்ஞாயமானந்தரேன அனுஸந்தா⁴னஸ்ஸ நிருத்³த⁴னம் நிரோத⁴ம் ஸல்லக்கே²ந்தி. யதா²வுத்தமத்த²ம் ஸுத்தேன விபா⁴வேதும் ‘‘யதா²ஹா’’திஆதி³ வுத்தம். தேன தீஸுபி காலேஸு ஸத்தானம் பரமத்த²தோ ஜீவனம் மரணம் சித்தக்க²ணவஸேனேவாதி த³ஸ்ஸேதி.

ஜீவிதந்தி ஜீவிதிந்த்³ரியம். அத்தபா⁴வோதி ஜீவிதவேத³னாவிஞ்ஞாணானி ட²பேத்வா அவஸிட்ட²த⁴ம்மா அதி⁴ப்பேதா. ஸுக²து³க்கா²தி ஸுக²து³க்கா² வேத³னா, உபேக்கா²பி இத⁴ ஸுக²து³க்கா²ஸ்வேவ அந்தோக³தா⁴ இட்டா²னிட்ட²பா⁴வதோ. கேவலாதி அத்தனா, நிச்சபா⁴வேன வா அவோமிஸ்ஸா. ஏகசித்தஸமாயுத்தாதி ஏககேன சித்தேன ஸஹிதா. லஹுஸோ வத்ததே க²ணோதி வுத்தனயேன ஏகசித்தக்க²ணிகதாய லஹுகோ அதிஇத்தரோ ஜீவிதாதீ³னம் க²ணோ வத்ததி.

யே நிருத்³தா⁴ மரந்தஸ்ஸாதி சவந்தஸ்ஸ ஸத்தஸ்ஸ சுதிதோ உத்³த⁴ம் நிருத்³தா⁴தி வத்தப்³பா³ யே க²ந்தா⁴. திட்ட²மானஸ்ஸ வா இதா⁴தி யே வா இத⁴ பவத்தியம் திட்ட²மானஸ்ஸ த⁴ரந்தஸ்ஸ ப⁴ங்க³ப்பத்தியா நிருத்³தா⁴ க²ந்தா⁴, ஸப்³பே³பி ஸதி³ஸா தே ஸப்³பே³பி ஏகஸதி³ஸா க³தா அத்த²ங்க³தா அப்படிஸந்தி⁴யா புன ஆக³ந்த்வா படிஸந்தா⁴னாபா⁴வேன விக³தா. யதா² ஹி சுதிக²ந்தா⁴ ந நிப்³ப³த்தந்தி, ஏவம் ததோ புப்³பே³பி க²ந்தா⁴. தஸ்மா ஏகசித்தக்க²ணிகம் ஸத்தானம் ஜீவிதந்தி அதி⁴ப்பாயோ.

அனிப்³ப³த்தேன ந ஜாதோதி அனுப்பன்னேன சித்தேன ஜாதோ ந ஹோதி ‘‘அனாக³தே சித்தக்க²ணே ந ஜீவித்த² ந ஜீவதி ஜீவிஸ்ஸதீ’’தி வத்தப்³ப³தோ. பச்சுப்பன்னேன வத்தமானேன சித்தேன ஜீவதி ஜீவமானோ நாம ஹோதி, ந ஜீவித்த² ந ஜீவிஸ்ஸதி. சித்தப⁴ங்கா³ மதோ லோகோதி சுதிசித்தஸ்ஸ விய ஸப்³ப³ஸ்ஸபி தஸ்ஸ தஸ்ஸ சித்தஸ்ஸ ப⁴ங்க³ப்பத்தியா அயம் லோகோ பரமத்த²தோ மதோ நாம ஹோதி ‘‘அதீதே சித்தக்க²ணே ஜீவித்த² ந ஜீவதி ந ஜீவிஸ்ஸதீ’’தி வத்தப்³ப³தோ, நிருத்³த⁴ஸ்ஸ அப்படிஸந்தி⁴கத்தா. ஏவம் ஸந்தேபி பஞ்ஞத்தி பரமத்தி²யா, யாயம் தம் தம் பவத்தம் சித்தம் உபாதா³ய ‘‘திஸ்ஸோ ஜீவதி, பு²ஸ்ஸோ ஜீவதீ’’தி வசனப்பவத்தியா விஸயபூ⁴தா ஸந்தானபஞ்ஞத்தி, ஸா ஏத்த² பரமத்தி²யா பரமத்த²பூ⁴தா. ததா² ஹி வுத்தம் ‘‘நாமகோ³த்தம் ந ஜீரதீ’’தி (ஸம். நி. 1.76).

ந ஸந்தி தாணாதி ஜரம் உபக³தஸ்ஸ ததோ தம்னிமித்தம் யம் வா பாபகாரினோ பாபகம்மானம் உபட்டா²னவஸேன புஞ்ஞகாரினோ பியவிப்பயோக³வஸேன சித்தது³க்க²ம் உப⁴யேஸம்பி ப³ந்த⁴னச்சே²த³னாதி³வஸேன விதுஜ்ஜமானம் அனப்பகம் ஸரீரது³க்க²ம் ஸம்மோஹப்பத்தி ச ஹோதி, ததோ தாயந்தா ந ஸந்தி. தேனாஹ – ‘‘தாணம் லேணம் ஸரணம் ப⁴விதும் ஸமத்தா² நாம கேசி நத்தீ²’’தி. பா⁴யதி ஏதஸ்மாதி ப⁴யம், ப⁴யனிமித்தந்தி ஆஹ ‘‘ப⁴யவத்தூ²’’தி. தக்³க³ஹணேன ச சித்துத்ராஸலக்க²ணம் ப⁴யம் க³ஹிதமேவ, ஸதி நிமித்தே நேமித்தம் ஸந்தமேவாதி. புப்³ப³சேதனந்தி ஏகாவஜ்ஜனவீதி²யம் நானாவஜ்ஜனவீதி²யம் ஸம்பவத்தம் உபசாரஜ்ஜா²னசேதனம். அபரசேதனந்தி வஸீபா⁴வாபாத³னவஸேன பரதோ ஸமாபஜ்ஜனவஸேன ச பவத்தம் ஸமாபத்திசேதனம். முஞ்சசேதனந்தி விக்க²ம்ப⁴னவஸேன பவத்தம் பட²மப்பனாசேதனம். குஸலஜ்ஜா²னஸ்ஸ விபாகஜ்ஜா²னேவ லப்³ப⁴மானம் ஸுக²ம் ஜா²னஸுக²ம். இட்ட²பரியாயோ சேத்த² ஸுக²-ஸத்³தோ³. ஜா²னே அபேக்கா² ஜா²னனிகந்தி. ஜா²னஸ்ஸ அஸ்ஸாத³வஸேன பவத்தோ லோபோ⁴ ஜா²னஸ்ஸாதோ³. யேன தே தே ப்³ரஹ்மானோ ஜா²னதோ வுட்டா²ய ‘‘அஹோ ஸுக²ம் அஹோ ஸுக²’’ந்தி வாசம் நிச்சா²ரேஸுந்தி. யதா² தே³வா ஸுக²ப³ஹுலா திஹேதுபடிஸந்தி⁴காவாதி படிபஜ்ஜந்தா ஜா²னம் அதி⁴க³ந்தும் ப⁴ப்³பா³, ந இதரேதி ‘‘காமாவசரதே³வேஸூ’’தி வுத்தம். காமாவசரா ச உபரிதே³வா ச காமாவசரதே³வாதி ஏகதே³ஸஸரூபேகஸேஸோ த³ட்ட²ப்³போ³. தேன மனுஸ்ஸானம்பி ஏகச்சானம் ஸப்³பே³ஸம்பி வா ஸங்க³ஹோ ஸித்³தோ⁴ ஹோதி பத்த²னாபரிகப்பனாய விஸயபா⁴வதோ. தேனாஹ ‘‘அஹோ வதிமே ச…பே… திட்டே²ய்யு’’ந்தி. து²ல்லானி பு²ஸிதானி விப்பு²ரானி ஏத்தா²தி து²ல்லபு²ஸிதகோ, காலோ, தே³ஸோ வா. தஸ்மிம் து²ல்லபு²ஸிதகே.

‘‘புஞ்ஞானி கயிராத² ஸுகா²வஹானீ’’தி வுத்தத்தா ‘‘அனிய்யானிகம் வட்டகத²ம் கதே²தீ’’தி வுத்தம். லுஜ்ஜனபலுஜ்ஜனட்டே²ன லோகோ, கிலேஸேஹி ஆமஸிதப்³ப³தோ ஆமிஸஞ்சாதி லோகாமிஸம். நிப்பரியாயாமிஸம் பன லோகே ஆமிஸந்திபி லோகாமிஸம். பரியாயேதி ஸபா⁴வதோ பரிவத்தேத்வா ஞாபேதி ஏதேனாதி பரியாயோ, லேஸோ, காரணம் வாதி ஆஹ ‘‘நிப்பரியாயேன சத்தாரோ பச்சயா’’தி, வட்டஸ்ஸ ஏகந்ததோ பா³லலோகேஹேவ ஆமஸிதப்³ப³பா⁴வதோ பரியாயாமிஸதா வுத்தா. இத⁴ பரி..பே… அதி⁴ப்பேதம் விவட்டபடியோகி³னோ இச்சி²தத்தா. சதுபச்சயாபேக்க²ஞ்ஹி பஹானம். ஏகச்சஸ்ஸ ஸகலவட்டாபேக்க²ப்பஹானஸ்ஸபி பச்சயோ ஹோதீதி ‘‘வட்டதியேவா’’தி ஸாஸங்கம் வத³தி. வூபஸமதி ஏத்த² ஸகலவட்டது³க்க²ந்தி ஸந்தி, அஸங்க²ததா⁴தூதி ஆஹ ‘‘நிப்³பா³னஸங்கா²த’’ந்தி.

உபனீயஸுத்தவண்ணனா நிட்டி²தா.