4. அச்சேந்திஸுத்தவண்ணனா

4. காலயந்தி கே²பேந்தீதி காலா. புரேப⁴த்தாத³யோ ஹி காலா த⁴ம்மப்பவத்திமத்ததாய பரமத்த²தோ அவிஜ்ஜமானாபி லோகஸங்கேதமத்தஸித்³தா⁴ தஸ்ஸாயேவ த⁴ம்மப்பவத்தியா க³தக³தாய அனிவத்தனதோ தம் தம் த⁴ம்மப்பவத்திம் கே²பேந்தா வினாஸயந்தா விய ஸயஞ்ச தாஹி ஸத்³தி⁴ம் அச்சேந்தா விய ஹோந்தி. தேனாஹ – ‘‘காலோ க⁴ஸதி பூ⁴தானி, ஸப்³பா³னேவ ஸஹத்தனா’’தி (ஜா. 1.2.190). ‘‘தரயந்தி ரத்தியோ’’தி ஏத்தா²பி வுத்தனயேனேவ அத்தோ² வேதி³தப்³போ³. ‘‘ஏதம் ப⁴யம் மரணே பேக்க²மானோ’’தி வுச்சமானத்தா புக்³க³லம் மரணூபக³மனாய தரயந்தீதி அத்தோ² வுத்தோ. வயோகு³ணாதி ஏத்த² கோட்டா²ஸா கு³ணா. தித்தி²யானம் ஹி சரிமசித்தேன ஸகலசித்தே வயஸமூஹே வயஸமஞ்ஞாதி ஆஹ – ‘‘பட²மமஜ்ஜி²மபச்சி²மவயானம் கு³ணா, ராஸயோதி அத்தோ²’’தி. ஆனிஸம்ஸட்டோ² கு³ணட்டோ² ‘‘வாகசிரம் நிவாஸேஸிம், த்³வாத³ஸகு³ணமுபாக³த’’ந்திஆதீ³ஸு (பு³. வம். 2.30) விய. ‘‘தந்தி³கு³ணாஹம் கரிஸ்ஸாமி, தி³கு³ணம் தி³கு³ணம் வத்³தே⁴ய்யா’’தி ச ஏவமாதீ³ஸு பன தப்³பா⁴வவுத்திஅத்தோ² கு³ணட்டோ².

‘‘அஸங்க்²யேய்யானி நாமானி, ஸகு³ணேன மஹேஸினோ;

கு³ணேன நாமமுத்³தே⁴ய்யம், அபி நாம ஸஹஸ்ஸதோ’’தி. (த⁴. ஸ. அட்ட². 1313; உதா³. 53; படி. ம. அட்ட². 1.1.76) –

ஆதீ³ஸு பஸம்ஸட்டோ² கு³ணட்டோ² த³ட்ட²ப்³போ³. ‘‘வயோகு³ணா அனுபுப்³ப³ம் ஜஹந்தீ’’தி ஏத்த² அத்தோ² ‘‘அச்சேந்தி காலா’’தி ஏத்த² வுத்தனயோ ஏவ. பட²மமஜ்ஜி²மவயாதி பட²மக்³க³ஹணஞ்சேத்த² வயஸ்ஸ க³தஸ்ஸ அபுனராவத்தித³ஸ்ஸனத்த²ம் கதம். தேனேவாஹ – ‘‘மரணக்க²ணே பன தயோபி வயா ஜஹந்தேவா’’தி.

ஏத்த² ச பாளியம் ‘‘அச்சேந்தி காலா’’தி ஸாமஞ்ஞதோ காலஸ்ஸ அபக³மனம் த³ஸ்ஸிதம், புன தம் விஸேஸதோபி த³ஸ்ஸேதும் இதரத்³வயம் வுத்தம். அட்ட²கதா²யம் பன முதி³ந்த்³ரியஸ்ஸ வஸேன ‘‘வயோகு³ணா அனுபுப்³ப³ம் ஜஹந்தீ’’தி வுத்தம், மஜ்ஜி²மிந்த்³ரியஸ்ஸ வஸேன ‘‘தரயந்தி ரத்தியோ’’தி வுத்தந்தி அதி⁴ப்பாயேன ‘‘காலாதி புரேப⁴த்தாத³யோ காலா’’தி வுத்தம். தஸ்மா தத்த² ஆதி³-ஸத்³தே³ன பச்சா²ப⁴த்தபட²மயாம-முஹுத்தகாலாதி³-காலகோட்டா²ஸோ ஏவ அணுபபே⁴தோ³ காலவிபா⁴கோ³ க³ஹிதோதி வேதி³தப்³போ³. ஸேஸந்தி இத⁴ த்³வீஸு கா³தா²ஸு பச்சி²மத்³தோ⁴. ஸோ ஹி இத⁴ அத்த²தோ அதி⁴க³தத்தா அனந்தரஸுத்தே ச வுத்தத்தா அதிதி³ஸிதோ.

அச்சேந்திஸுத்தவண்ணனா நிட்டி²தா.