(1) அவிப்பவாஸபஞ்ஹாவண்ணனா

479. ஸேத³மோசிககா³தா²ஸூதி அதி⁴ப்பாயத்த²ஸ்ஸ க³ம்பீ⁴ரத்தா தம் சிந்தேந்தானம் வினயத⁴ரானம் காயே ஸேத³ம் மோசேதீதி ஸேத³மோசிகா, ஸாயேவ கா³தா² ஸேத³மோசிககா³தா², தாஸு. ‘‘அகப்பியஸம்போ⁴கோ³ ந லப்³ப⁴தீ’’தி இமினா கப்பியஸம்போ⁴கோ³ லப்³ப⁴தீதி த³ஸ்ஸேதி. கப்பியஸம்போ⁴க³ம் த³ஸ்ஸேதும் ‘‘நஹாபனபோ⁴ஜனாதீ³’’தி வுத்தம். அனாபத்தீதி மாதுபி⁴க்கு²னியா அனாபத்தி. ஏஸா பஞ்ஹாதி ஏத்த² பஞ்ஹஸத்³தோ³ ஸபா⁴வதிலிங்கோ³தி ஸத்³த³ஸத்தே²ஸு (ஸத்³த³னீதிதா⁴துமாலாயம் 16 ஹகாரந்ததா⁴து; அபி⁴தா⁴னப்பதீ³பிகாயம் 115 கா³தா²யம்) வுத்தோ, இத⁴ இத்தி²லிங்க³வஸேன வுத்தோ. ‘‘பண்டி³தேஹீ’’தி இமினா குஸலஸ்ஸ காரணம் த³ஸ்ஸேதி, பண்டி³தத்தா குஸலோதி அதி⁴ப்பாயோ. அஸ்ஸாதி பஞ்ஹாய. ஏதந்தி விஸ்ஸஜ்ஜனம். அஸ்ஸாதி கா³தா²ய.

ஏகாத³ஸ விவஜ்ஜியாதி அவிப⁴த்திகனித்³தே³ஸோ, ஏகாத³ஸ விவஜ்ஜியேதி அத்தோ². தேன வுத்தம் ‘‘யே’’திஆதி³. தேபீதி பிஸத்³தோ³ கா³தா²யம் லுத்தனித்³தி³ட்ட²க³ம்யமானபா⁴வம் த³ஸ்ஸேதி.

அயந்தி ந்ஹாபிதபுப்³ப³கோ பி⁴க்கு². நிம்மிதபு³த்³த⁴ந்தி பு³த்³தே⁴ன நிம்மிதம் பு³த்³த⁴ரூபம்.

விவஜ்ஜியாதி ஏத்த² யகாரோ த்வாபச்சயஸ்ஸ காரியோதி ஆஹ ‘‘விவஜ்ஜேத்வா’’தி. அஸீஸகம் யம் தம் கப³ந்த⁴ம் அத்தீ²தி யோஜனா. அஸீஸகத்தா கேன ஸரீரேன ஜீவிதம் ப³ந்த⁴தீதி கப³ந்தோ⁴. யஸ்ஸாதி கப³ந்த⁴ஸ்ஸ.

ஹீதி ஸச்சம். தேதி அப⁴ப்³ப³புக்³க³லா.

வாசாதி ஏத்த² யகாரலோபோதி ஆஹ ‘‘வாசாயா’’தி. இதி மேதி ஏவம் மம. ஏவம் வத³மானே மம வசனந்தி யோஜனா. அத²வா இதிமேதி ஏவம் இமே, ஏவம் வத³மானே இமே ஜனாதி யோஜனா. ஸத்³த³ம்பீதி இமினா கி³ரஸத்³தோ³ ஸத்³த³பரியாயோதி த³ஸ்ஸேதி. ஹீதி ஸச்சம். துண்ஹீபூ⁴தஸ்ஸ நிஸின்னஸ்ஸ தஸ்ஸ பி⁴க்கு²னோதி யோஜனா. யதி³ மனோத்³வாரே ஆபத்தி நாம நத்தி², ஏவம் ஸதி கஸ்மா ஆபஜ்ஜேய்ய வாசஸிகந்தி வுத்தந்தி ஆஹ ‘‘யஸ்மா பனா’’திஆதி³. தேனாதி தஸ்மா. அஸ்ஸாதி பி⁴க்கு²ஸ்ஸ.

ஸாதி பி⁴க்கு²னீ, ஆபஜ்ஜதீதி ஸம்ப³ந்தோ⁴. வுத்தப்பகாரந்தி ‘‘கா³மந்தரபரியாபன்ன’’ந்தி வுத்தப்பகாரம்.

தாஸூதி த்³வீஸு பி⁴க்கு²னீஸு.

சதுரோ ஜனாதி ஏத்த² சதுன்னம் ஜனானம் ஸரூபம் த³ஸ்ஸேந்தோ ஆஹ ‘‘ஆசரியோ ச தயோ ச அந்தேவாஸிகா’’தி. ஸாஹத்தி²காதி ஸஹத்தா² அவஹரிதா. ஆணத்தியாபீதி ஆணத்தேன அவஹரிதாபி. இதரேஸந்தி அந்தேவாஸிகானம், ஏகேகோ மாஸகோதி ஸம்ப³ந்தோ⁴. ஏத்தா²தி பரிவாரே ஸேத³மோசிககா³தா²யம்.