அபரது³தியகா³தா²ஸங்க³ணிகம்

(1) காயிகாதி³ஆபத்திவண்ணனா

474. ச² ஆபத்தியோ காயிகாதி ஏத்த² ச² ஆபத்தியோ நாம காதி ஆஹ ‘‘அந்தரபேய்யாலே’’திஆதி³. அந்தரபேய்யாலே வுத்தாதி ஸம்ப³ந்தோ⁴. ‘‘காயத்³வாரே ஸமுட்டி²தத்தா’’தி இமினா காயே ஸமுட்ட²ந்தீதி காயிகாதி வசனத்த²ம் த³ஸ்ஸேதி. தஸ்மிம்யேவ அந்தரபேய்யாலே வுத்தாதி ஸம்ப³ந்தோ⁴. ‘‘வஜ்ஜபடிச்சா²தி³காயா’’திஆதி³னா சா²தே³ந்தஸ்ஸ திஸ்ஸோதி ஏத்த² திண்ணம் ஸரூபம் த³ஸ்ஸேதி. ‘‘பி⁴க்கு²னியா’’திஆதி³னா பஞ்ச ஸம்ஸக்³க³பச்சயாதி ஏத்த² பஞ்சன்னம் ஸரூபம் த³ஸ்ஸேதி.

‘‘ஏகரத்த’’இதிஆதி³னா அருணுக்³கே³ திஸ்ஸோதி ஏத்த² திண்ணம் ஸரூபம் த³ஸ்ஸேதி. த்³வே யாவததியகாதி ஸம்வண்ணேதப்³பே³ன ‘‘ஏகாத³ஸ யாவததியகா நாமா’’தி ஸம்வண்ணனாய விருத்³த⁴பா⁴வம் படிக்கி²பந்தோ ஆஹ ‘‘பஞ்ஞத்திவஸேன பனா’’திஆதி³. ‘‘இமஸ்மிம் ஸாஸனே’’தி இமினா ஏத்த²ஸத்³த³ஸ்ஸ விஸயம் த³ஸ்ஸேதி. ஏகேன ஸப்³ப³ஸங்க³ஹோதி ஏத்த² ஏகோ நாம கோ, ஸப்³பா³னி நாம கானீதி ஆஹ ‘‘யஸ்ஸ ஸியா’’திஆதி³. ‘‘நிதா³னுத்³தே³ஸேனா’’தி இமினா ஏகஸ்ஸ ஸரூபம் த³ஸ்ஸேதி. ‘‘ஸிக்கா²பதா³னஞ்ச பாதிமோக்கு²த்³தே³ஸானஞ்சா’’தி இமேஹி பதே³ஹி ஸப்³ப³ஸரூபம் த³ஸ்ஸேதி. ஸங்க³ஹ ஸத்³தே³ன கம்மச²ட்டீ²ஸமாஸோ.

‘‘வஜ்ஜபடிச்சா²தி³காயா’’திஆதி³னா த்³வே து³ட்டு²ல்லச்சா²த³னாதி ஏத்த² த்³வின்னம் ஸரூபம் த³ஸ்ஸேதி.

‘‘பி⁴க்கு² பி⁴க்கு²னியா’’திஆதி³னா கா³மந்தரே சதஸ்ஸோதி ஏத்த² சதஸ்ஸன்னம் ஸரூபம் த³ஸ்ஸேதி. புன ‘‘பி⁴க்கு² பி⁴க்கு²னியா’’திஆதி³னா சேதஸ்ஸா நதி³பாரபச்சயாதி ஏத்த² சதஸ்ஸன்னமேவ ஸரூபம் த³ஸ்ஸேதி. ‘‘சீவரதா³னே பாசித்திய’’ந்தி இமினா பாசித்தியபா⁴வேன ஸதி³ஸத்தா ஸங்க்²யாவிஸேஸோ ந காதப்³போ³தி த³ஸ்ஸேதி.

(2) தே³ஸனாகா³மினியாதி³வண்ணனா

475. ஏகேத்தா²தி ஏத்த²ஸத்³தோ³ ஸாஸனவிஸயோ.

ஏகஸிக்கா²பத³ம்பி நத்தீ²தி பிஸத்³தோ³ ப³ஹுஸிக்கா²பதா³னி பன பகே³வாதி ச ஆபத்தி பன பகே³வாதி ச ஆபத்தீபி நத்தீ²தி ச அத்த²ம் த³ஸ்ஸேதி.

‘‘ஸகலேபி வினயே’’தி இமினா த்³வேத்தா²தி பாடே² ஏத்த²ஸத்³த³ஸ்ஸ விஸயம் த³ஸ்ஸேதி. உபி⁴ன்னந்தி பி⁴க்கு²பி⁴க்கு²னீனம். அஞ்ஞதா² பன கித்தகா பட²மாபத்திகாதி ஆஹ ‘‘இதரதா² பனா’’திஆதி³. தத்த² இதரதா²தி பஞ்ஞத்திதோ அஞ்ஞேன பகாரேன. கம்மஞ்சாதி கம்மஞத்தி ச. கம்மபாதி³கா சாதி கம்மபாத³ஞத்தி ச. நவஸு டா²னேஸூதி ஓஸாரணாதீ³ஸு நவஸு டா²னேஸு. த்³வீஸூதி ஞத்திது³திய, ஞத்திசதுத்த²கம்மேஸு.

வஜ்ஜபடிச்சா²தி³காய பாராஜிகம், உக்கி²த்தானுவத்திகாய பாராஜிகம், அட்ட²வத்து²காய பாராஜிகந்தி இதி இமே தயோதி யோஜனா. காரணபூ⁴தேனாதி ஹேதுபூ⁴தேன, ‘‘கரணபூ⁴தேனா’’திபி பாடோ², ஸாத⁴கதமஸத்திபூ⁴தேனாதி அத்தோ².

தேஸந்தி அத்³தா⁴னஹீனாதீ³னம். ஏத்தா²தி ‘‘தயோ புக்³க³லா ந உபஸம்பாதே³தப்³பா³’’தி பாடே², ஏதேஸு அங்க³ஹீனாதீ³ஸு வா. யோதி புக்³க³லோ. அபரிபூரோ ந யாசதீதி ஸம்ப³ந்தோ⁴. மாதுகா⁴தகாத³யோ கரணது³க்கடகா சாதி யோஜனா. தத்தா²தி தேஸு ஞத்திகப்பனாதீ³ஸு. ஞத்திகப்பனாதி ஞத்திவிதி⁴. விப்பகதபச்சத்தந்தி விப்பகதம் பச்சத்தம். அதீதகரணந்தி அதீதஸ்ஸ கரணம். வித்தா²ரேந்தோ ஆஹ ‘‘வத்து²ஸம்பன்னம் ஹீ’’திஆதி³. தயோ கம்மான ஸங்க³ஹாதி ஏத்த² ச²ந்த³பே⁴த³ரக்க²னத்தா²ய நகாரே நிக்³க³ஹிதலோபோ. நாஸிதகாதி நாஸேதப்³பா³ புக்³க³லா, நாஸிதப்³பா³தி நாஸிதா, நாஸிதா ஏவ நாஸிதகா. திண்ணம் ஜனானந்தி திண்ணம் உபஸம்பதா³பேக்க²ஜனானம் ஏகூபஜ்ஜா²யேன நானாசரியேன ஹுத்வாதி யோஜனா. ஏகானுஸ்ஸாவனாதி ஏகதோ அனுஸ்ஸாவனா.

பாதோ³ நாம கஹாபணஸ்ஸ சதுத்த²பா⁴கோ³. மாஸகோ நாம பாத³ஸ்ஸ பஞ்சமபா⁴கோ³. பாராஜிகந்தி வனப்பதிம் சி²ந்த³ந்தஸ்ஸ து³தியபாராஜிகம் (பாரா. 110). அனோதி³ஸ்ஸாதி ‘‘மனுஸ்ஸோ மரதூ’’திஆதி³னா ந உத்³தி³ஸித்வா. தேனாதி விஸேன.

பி⁴க்கு²னோவாத³கவக்³க³ஸ்மிந்தி ஸாமஞ்ஞாதா⁴ரோ. த³ஸஸு ஸிக்கா²பதே³ஸூதி விஸேஸாதா⁴ரோ. பட²மஸிக்கா²பத³ம்ஹியேவாதி த³ஸஸு ஸிக்கா²பதே³ஸு பட²மஸிக்கா²பத³ம்ஹியேவ. உபஸம்பன்னாய பி⁴க்கு²னியாதி ஸம்ப³ந்தோ⁴. ‘‘ஆபத்தி ஹோதீ’’தி இமினா ‘‘சீவரேனா’’தி பத³ஸ்ஸ ஸம்ப³ந்த⁴ட்டா²னம் த³ஸ்ஸேதி.

‘‘சதஸ்ஸோ ஏவா’’தி இமினா தத்திகாதி ஏத்த² தஸத்³த³ஸ்ஸ விஸயம் த³ஸ்ஸேதி. தா சதஸ்ஸோ பரிமாணா யாஸம் ஆபத்தீனந்தி தத்திகா. நிபன்னஸ்ஸாபி தத்திகாதி ஏத்தா²பி ஏஸேவ நயோ. ஸாதி பி⁴க்கு²னீ.

(3) பாசித்தியவண்ணனா

476. பஞ்ச பே⁴ஸஜ்ஜானீதி ஸப்³பி³ஆதீ³னி பஞ்ச பே⁴ஸஜ்ஜானி. இமம் ஆபத்திந்தி ஸம்ப³ந்தோ⁴. பச்சா² ஆபன்னோதி யோஜனா.

ஏகம் கப³ளந்தி ஏகம் ஆலோபம், தும்ஹமூலேதி தும்ஹம் ஸந்திகே.

யதா²வத்து²கந்தி வத்து²அனுலோமம், ஆபத்தியோ தே³ஸிதாவ ஹோந்தீதி யோஜனா.

கோகாலிகாதீ³னந்திஆதி³ஸத்³தே³ன கடமோத³கதிஸ்ஸகாத³யோ (பாரா. 417) ஸங்க³ண்ஹாதி. பாபிகாய தி³ட்டி²யா அப்படினிஸ்ஸக்³கே³ பாசித்தியஞ்ச சண்ட³காளிகாய பி⁴க்கு²னியா பாசித்தியஞ்சாதி யோஜனா. பயுத்தவாசாபச்சயாதி விஞ்ஞத்தினிமித்தாதீ³ஹி பகாரேன யுத்தாய வாசாய பச்சயா. ஆபத்தி பாராஜிகஸ்ஸாதி பாராஜிகஸ்ஸ ஆபஜ்ஜனம். அத²வா பாராஜிகஸ்ஸாதி அஸ்ஸ பி⁴க்கு²ஸ்ஸ பாராஜிகா ஆபத்தி ஹோதீதி வா பாராஜிகா ஆபத்தி அஸ்ஸ ப⁴வதீதி வா யோஜனா காதப்³பா³. இதீதி இமா ச² ஆபத்தியோ ஆபஜ்ஜதீதி யோஜனா.

போ⁴ஜனம் க³ஹேத்வா அஜ்ஜோ²ஹரமானாதி ஸம்ப³ந்தோ⁴. ததே²வாதி யதா² கா²த³னே, ததே²வ மம்ஸம் லஸுணம் அஜ்ஜோ²ஹரமானாதி யோஜனா. ‘‘பணீதபோ⁴ஜனானீ’’தி ச ‘‘அகப்பியமம்ஸ’’ந்தி ச பதா³னி ‘‘அஜ்ஜோ²ஹரமானா’’தி பதே³ன ஸம்ப³ந்தி⁴தப்³பா³னி.

பஞ்ச டா²னானீதி பஞ்ச ஆபத்திஸங்கா²தானி டா²னானி. தத்தா²தி பஞ்சஸு ஸஹத⁴ம்மிகேஸு. த்³வின்னந்தி பி⁴க்கு²பி⁴க்கு²னீனம். தேஸந்தி ஸிக்க²மானாதீ³னம். பஞ்சன்னமேவாதி ஸஹத⁴ம்மிகானம்யேவ. வினிச்ச²யவோஹாரோதி வினிச்ச²யவசனம். இமினா சத்தாரி அதி⁴கரணானி படிக்கி²பதி. அட்³ட³கம்மம் நாமாதி அபி⁴யுஞ்ஜந்தானம் கம்மம் நாம.

‘‘ஸஹத⁴ம்மிகான’’ந்தி இமினா பஞ்ஜன்னம் வினிச்ச²யோதி ஏத்த² பஞ்சஸரூபம் த³ஸ்ஸேதி. ஸோப⁴ணபா⁴வம் வித்தா²ரேந்தோ ஆஹ ‘‘கதவீதிக்கமோ ஹீ’’திஆதி³. அப்³பு⁴ண்ஹஸீலோதி அபி⁴னவுப்பன்னஸீலோ. அப்³பு⁴ண்ஹஸீலோ நாம அத்த²தோ பாகதிகஸீலோதி ஆஹ ‘‘பாகதிகோ’’தி, பகதிஸீலேன நியுத்தோதி அத்தோ².

‘‘காயத்³வாரஸம்ப⁴வா’’தி இமினா காயிகாதி பத³ஸ்ஸ தத்³தி⁴தபா⁴வம் த³ஸ்ஸேதி. முக²ம் ஓலோகேதப்³ப³ந்தி ஏத்த² வுத்தாதி ஸம்ப³ந்தோ⁴.

சதுன்னம் தே³ஸனாய சாதி ஏத்த² ‘‘தே³ஸனாயா’’தி பத³ம் ஆதி³பத³லோபந்தி ஆஹ ‘‘அச்சயதே³ஸனாயா’’தி. ஸாதி அச்சயதே³ஸனா. அபி⁴னிலீயித்வா த⁴னுனா மாரேந்தீதி அபி⁴மாரா.

சே²ஜ்ஜம் ஹோதீதி ஏத்த² சே²ஜ்ஜம் நாம பாராஜிகாபஜ்ஜனமேவாதி ஆஹ ‘‘தே³வத³த்தோ விய பாராஜிகம் ஆபஜ்ஜதீ’’தி. இமா பன ஆபத்தியோதி பாராஜிகது²ல்லச்சயாபத்தியோ.

(4) அவந்த³னீயபுக்³க³லாதி³வண்ணனா

477. தேஸந்தி த³ஸன்னம் புக்³க³லானம். ‘‘ஸத்³தி⁴’’ந்தி இமினா ஸாமீசேனாதி ஏத்த² ஸஹத்தே² கரணவசனந்தி த³ஸ்ஸேதி. ஸாமீசேனாதி ச ஸாமீசினா கத்தப்³ப³ம் ஸாமீசம் கம்மம், தேன ஸாமீசேன. த³ஸ சீவரதா⁴ரணாதி பத³ஸ்ஸ ஸமாஸபா⁴வம் படிக்கி²பந்தோ ஆஹ ‘‘த³ஸ தி³வஸானி அதிரேகசீவரஸ்ஸ தா⁴ரணா’’தி.

கதிஸதந்திஆதீ³ஸு த்³வீஸு கா³தா²பாதே³ஸு சதூஸு விப⁴த்யந்தபதே³ஸு புரிமம் புரிமேன, பச்சி²மஞ்ச பச்சி²மேன யதா²க்கமம் யோஜேதப்³ப³ந்தி த³ஸ்ஸேந்தோ ஆஹ ‘‘கதிஸதம் ஆபத்தியோ ரத்திஸதம் சா²த³யித்வானா’’தி. பச்சி²மகா³தா²ய புப்³ப³ட்³டே⁴பி ஏஸேவ நயோ. அயம் ஹீதி அயம் ஏவ வக்க²மானோ. ஏத்தா²தி கா³தா²யம். யோதி பி⁴க்கு², படிச்சா²தே³தீதி ஸம்ப³ந்தோ⁴. இதீதி அயம் ஸங்கே²பத்தோ².

ஹேட்டா² வுத்தேஸு சதூஸு சதுக்கேஸு த⁴ம்மேன ஸமக்³க³ம் அபனேத்வா த்³வாத³ஸ கம்மதோ³ஸா வுத்தாதி த³ட்ட²ப்³ப³ம். அத⁴ம்மேன வக்³க³கம்மம், அத⁴ம்மேன ஸமக்³க³கம்மந்தி யோஜேதப்³ப³ம்.

ஏத்தா²தி ச²ஸு கம்மேஸு. ஏததே³வாதி த⁴ம்மேன ஸமக்³க³கம்மமேவ.

யம் தே³ஸிதாதி ஏத்த² யம்ஸத்³தோ³ வசனவிபல்லாஸோதி ஆஹ ‘‘யானி தே³ஸிதானீ’’தி. ‘‘தே³ஸிதானீ’’தி இமினா தே³ஸிதாதி ஏத்த² நிகாரஸ்ஸ ஆகாராதே³ஸபா⁴வம் த³ஸ்ஸேதி. ‘‘பரியந்தபரிச்சே²த³பா⁴வரஹிதத்தா’’தி இமினா நத்தி² அந்தம் பரியந்தமேதஸ்ஸாதி அனந்தந்தி வசனத்த²ம் த³ஸ்ஸேதி. தந்தி நிப்³பா³னம், ஜிதந்தி ஸம்ப³ந்தோ⁴. கேன கம் கிந்தி கத்வா ஜிதந்தி ஆஹ ‘‘ப⁴க³வதா கிலேஸக³ணம் அபி⁴மத்³தி³த்வா’’தி. கேன கம் கிந்தி கத்வா கிம் ஜிதம் வியாதி ஆஹ ‘‘ரஞ்ஞா ஸபத்தக³ணம் அபி⁴மத்³தி³த்வா ரஜ்ஜம் வியா’’தி. தத்த² ‘‘ரஞ்ஞா’’தி இமினா ‘‘கேனா’’தி புச்ச²ம் விஸ்ஸஜ்ஜேஸி. ‘‘ஸபத்தக³ண’’ந்தி இமினா ‘‘க’’ந்தி புச்ச²ம் விஸ்ஸஜ்ஜேஸி. ‘‘அபி⁴மத்³தி³த்வா’’தி இமினா ‘‘கிந்தி கத்வா’’தி புச்ச²ம் விஸ்ஸஜ்ஜேஸி. ‘‘ரஜ்ஜ’’ந்தி இமினா ‘‘கி’’ந்தி புச்ச²ம் விஸ்ஸஜ்ஜேஸி. ஸபத்தக³ணந்தி வேரிக³ணம். அயம் பனேத்த² யோஜனா – ரஞ்ஞா ஸபத்தக³ணம் அபி⁴மத்³தி³த்வா ரஜ்ஜம் ராஜபா⁴வம் ஜிதம் விய, ப⁴க³வதா கிலேஸக³ணம் அபி⁴மத்³தி³த்வா நிப்³பா³னம் ஜிதந்தி. ஸ்வேவாதி ப⁴க³வா ஏவ. ‘‘நிப்³பி³காரதாயா’’தி இமினா தாதி³ஸத்³தோ³ நிப்³பி³காரத்த²வாசகோ அனிப்ப²ன்னபாடிபதி³கோதி த³ஸ்ஸேதி. ‘‘விவேகபஞ்சக’’ந்தி இமினா காயசித்தஉபதி⁴வஸேன விவேகத்தயம்பி க³ஹேதப்³ப³ம் விவேகபா⁴வேன ஸமானத்தா. தேன ப⁴க³வதாதி ஸம்ப³ந்தோ⁴. ‘‘யானி ஸத்த ஆபத்திக்க²ந்தா⁴னீ’’தி இமினா ஏகேத்தா²தி ஏத்த² ஏகஸத்³த³ஸ்ஸ விஸயம் த³ஸ்ஸேதி. தத்தா²தி ஸத்தஸு ஆபத்திக்க²ந்தே⁴ஸு. ஏத்த² பனாதி ஸமதே²ஸு பன. ஹீதி ஸச்சம். தஸ்ஸாதி ஸம்முகா²வினயஸ்ஸ. அட்ட²கதா²ஸூதி ஸப்³ப³அட்ட²கதா²ஸு. மயம் பனாதி ஸங்க³ஹகாரகா அம்ஹே பன, பு³த்³த⁴கோ⁴ஸனாமகா மயம் பனாதி அத்தோ², ரோசயாமாதி ஸம்ப³ந்தோ⁴. கஸ்ஸ கிமத்த²ம் க³ஹேத்வா ரோசேஸீதி ஆஹ ‘‘வினாதி நிபாதஸ்ஸ படிஸேத⁴னமத்த²மத்த’’ந்தி. ‘‘வினாதி நிபாதஸ்ஸா’’தி பத³ம் ‘‘அத்த²மத்த’’ந்தி பதே³ வாசகஸம்ப³ந்தோ⁴. அத்தனோ ஸாத்⁴யவசனம் பு³த்³த⁴வசனஸங்கா²தேன ஸாத⁴கவசனேன ஸாதே⁴ந்தோ ஆஹ ‘‘வுத்தம்பி சேத’’ந்திஆதி³.

அட்டா²ரஸ அட்ட²கானீதி அத⁴ம்மதி³ட்டி²பே⁴த³, த⁴ம்மதி³ட்டி²பே⁴த³, வேமதிகபே⁴தே³ஸு தீஸு ஏகமேகம் மூலம் கத்வா தயோ தயோ மூலிம் கத்வா நவ ஹோந்தி, தேஸு த⁴ம்மதி³ட்டி²பே⁴தே³ஸு த⁴ம்மதி³ட்டி²பே⁴த³ம் அபனேத்வா அட்ட² ஹோந்தி, தானி அட்டா²ரஸ பே⁴த³கரவத்தூ²ஸு யோஜேத்வா அட்டா²ரஸ அட்ட²கானி ஹோந்தீதி த³ட்ட²ப்³ப³ம். ச²ஊனதி³யட்³ட⁴ஸதந்தி சதுசத்தாலீஸாதி⁴கம் ஸதந்தி வுத்தம் ஹோதி.

ஏகேகவத்து²ஸ்மிந்தி அட்டா²ரஸஸு பே⁴த³கரவத்தூ²ஸு ஏகேகஸ்மிம் வத்து²ஸ்மிம்.

இதி கா³தா²ஸங்க³ணிகவண்ணனாய யோஜனா ஸமத்தா.