சோத³னாகண்ட³ம்

அனுவிஜ்ஜககிச்சவண்ணனா

360-1. இதா³னி ஆரத்³த⁴ந்தி ஸம்ப³ந்தோ⁴. ஏகோ பி⁴க்கு² ஏகேன மாதுகா³மேனாதி யோஜனா. ஸோதி பஸ்ஸந்தோ பி⁴க்கு². தந்தி நிக்க²மந்தம் பவிஸந்தம் வா பி⁴க்கு²ம். இதரோதி சுதி³தகோ. தஸ்ஸாதி சோத³கஸ்ஸ. ந உபேதீதி ந உபக³ச்ச²தி. ந படிஜானாதீதி ந படிஸ்ஸவம் கரோதி. ஏத்தா²தி மாதுகா³மேன நிக்க²மந்தபவிஸந்தட்டா²னே. யந்தி கம்மம். தேனாதி சோத³கேன. தஸ்ஸாதி சோத³கஸ்ஸ வசனேனாதி ஸம்ப³ந்தோ⁴. இதரோதி சுதி³தகோ. அஸுத்³த⁴பரிஸங்கிதோதி அஸுத்³தா⁴ய அட்டா²னே உப்பன்னாய பரிஸங்காய பரிஸங்கிதோ. தத³த்த²ம் த³ஸ்ஸேதி ‘‘அமூலகபரிஸங்கிதோ’’தி இமினா. தஸ்ஸ புக்³க³லஸ்ஸாதி சுதி³தகஸ்ஸ படிஞ்ஞாயாதி ஸம்ப³ந்தோ⁴. ஸப்³ப³த்தா²தி ஸப்³பே³ஸு அனுவிஜ்ஜககிச்சேஸு.

இதி அனுவிஜ்ஜககிச்சவண்ணனாய யோஜனா ஸமத்தா.

சோத³கபுச்சா²விஸ்ஸஜ்ஜனா

362-3. ஸச்சே ச அகுப்பே சாதி பதா⁴னம் ஸம்ப³ந்த⁴ட்டா²னம் த³ஸ்ஸேந்தோ ஆஹ ‘‘பதிட்டா²தப்³ப³’’ந்தி. ‘‘ய’’ந்திஆதி³னா ஸச்சே பதிட்டா²தப்³ப³பா⁴வம் த³ஸ்ஸேதி. யந்தி கம்மம். ‘‘ந சா’’திஆதி³னா அகுப்பே பதிட்டா²தப்³ப³பா⁴வம் த³ஸ்ஸேதி. ஓதிண்ணஞ்சாதி வினிச்ச²யம் ஓதிண்ணஞ்ச. ‘‘வசன’’ந்தி இமினா ஓதிண்ணானோதிண்ணஸரூபம் த³ஸ்ஸேதி. தத்ராதி புரிமவசனாபேக்க²ம். ‘‘ஓதிண்ணானோதிண்ணம் ஜானிதப்³ப³’’ந்தி வசனேதி ஹி அத்தோ². சோத³கஸ்ஸ பமாணந்தி ‘‘த⁴ம்மோ’’தி வா ‘‘அத⁴ம்மோ’’தி வா ‘‘பா³லோ’’தி வா ‘‘பண்டி³தோ’’தி வா சோத³கஸ்ஸ பமாணம். சுதி³தகஸ்ஸ பமாணந்தி த⁴ம்மசுதி³தகோ நு கோ², நோதி சுதி³தகஸ்ஸ பமாணம். அனுவிஜ்ஜகஸ்ஸ பமாணந்தி ஸக்கா நு கோ² வினிச்சி²தும், நோதி அனுவிஜ்ஜகஸ்ஸ பமாணம். அனுவிஜ்ஜகோ வத்தப்³போ³தி ஸம்ப³ந்தோ⁴. யேன த⁴ம்மேனாதிஆதீ³ஸு த⁴ம்மாதீ³னம் ஸரூபம் த³ஸ்ஸேந்தோ ஆஹ ‘‘த⁴ம்மோதி பூ⁴தம் வத்தூ²’’திஆதி³. ஏதேன த⁴ம்மேன ச ஏதேன வினயேன ச ஏதேன ஸத்து²ஸாஸனேன சாதி யோஜனா. தஸ்மா அனுவிஜ்ஜகேன வூபஸமேதப்³ப³ந்தி ஸம்ப³ந்தோ⁴. ஏத்தா²தி அனுவிஜ்ஜகஸ்ஸ படிபஜ்ஜிதப்³ப³ட்டா²னே.

அவஞ்ஞந்தி அவஜானனம். இமேதி தே²ரா. ‘‘க²தத்தா’’தி இமினா அத்தனாவ அத்தா க²ஞ்ஞதீதி க²தோதி வசனத்த²ம் த³ஸ்ஸேதி. உபஹனியந்தீதி உபஹதானி, உபஹதானி இந்த்³ரியானி அனேனாதி உபஹதிந்த்³ரியோ. ‘‘பஞ்ஞாய அபா⁴வதோ’’தி இமினா து³ம்மேதோ⁴தி ஏத்த² து³ஸத்³தோ³ அபா⁴வத்தோ², மேதா⁴ஸத்³தோ³ பஞ்ஞாபரியாயோதி த³ஸ்ஸேதி. நத்தி² மேதா⁴ ஏதஸ்ஸாதி து³ம்மேதோ⁴தி நிப்³ப³சனம் காதப்³ப³ம். க²தோ…பே… து³ம்மேதோ⁴ ஸோ அனுவிஜ்ஜகோ உபக³ச்ச²தீதி யோஜனா. தஸ்மாதி யஸ்மா உபக³ச்ச²தி, தஸ்மா வுத்தந்தி ஸம்ப³ந்தோ⁴. தஸ்ஸாதி பாட²ஸ்ஸ, கா³தா²ய வா. வித்தா²ரம் த³ஸ்ஸேந்தோ ஆஹ ‘‘சுதி³தகசோத³கேஸு ஹீ’’திஆதி³. உபோ⁴பேதேதி உபோ⁴பி ஏதே ஆமிஸபுக்³க³லனிஸ்ஸயே. த⁴ம்மோதி ஸாஸனத⁴ம்மோ. இதீதி அயமத்தோ².

உபகண்ணகம் ஜப்பதீதி ஏத்த² கண்ணஸ்ஸ ஸமீபம் உபகண்ணம், ததே³வ உபகண்ணகந்தி த³ஸ்ஸேந்தோ ஆஹ ‘‘ஏவம் கதே²ஹீ’’திஆதி³. ‘‘கண்ணமூலே’’தி இமினா உபகண்ணகந்தி ஏத்த² உபஸத்³த³ஸ்ஸ ஸமீபத்த²ம் த³ஸ்ஸேதி. மந்தேதீதி கதே²தி. இமினா ஜப்பதா⁴துயா கத²னத்த²ம் த³ஸ்ஸேதி. ஜிம்ஹம் பேக்க²தீதி ஏத்த² ஜிம்ஹஸத்³தோ³ குடிலவாசகோ, குடிலம் நாம அத்த²தோ இத⁴ தோ³ஸோதி ஆஹ ‘‘தோ³ஸமேவா’’தி.

கதா²னுஸந்தீ⁴தி சுதி³தகஅனுவிஜ்ஜகானம் கதா²ய அனுஸந்தி⁴. வினிச்ச²யானுஸந்தீ⁴தி அனுவிஜ்ஜகேன கதஸ்ஸ ஆபத்தானாபத்திவினிச்ச²யஸ்ஸ அனுஸந்தி⁴. ஸப்³ப³த்தா²தி சோத³னாகண்டே³.

இதி சோத³னாகண்ட³வண்ணனாய யோஜனா ஸமத்தா.