9. பாதிமோக்க²ட்ட²பனக்க²ந்த⁴கம்

1. பாதிமோக்கு²த்³தே³ஸயாசனகதா²

383. பாதிமோக்க²ட்ட²பனக்க²ந்த⁴கே நந்தி³முகி²யா ரத்தியாதி ஏத்த² நந்தி³யதி துஸியதீதி நந்தி³, இகாரந்தோயம் நபும்ஸகலிங்கோ³. ‘‘நந்தி³ஸேனோ (ஜா. அட்ட². 3.4.1) நந்தி³விஸாலோ’’திஆதீ³ஸு இகாரந்தோயம் புல்லிங்கோ³ ஹோதி, இத⁴ பன முக²ம் அபேக்கி²த்வா இகாரந்தோ நபும்ஸகலிங்கோ³ ஹோதி. அருணுட்டி²தகாலே ஓதா³ததி³ஸாமுக²தாய நந்தி³ முக²ம் ஏதிஸ்ஸம் ரத்தியந்தி நந்தி³முகீ², ரத்தி, தாய நந்தி³முகி²யா ரத்தியா, தேன வுத்தம் ‘‘அருணுட்டி²தகாலேபி ஹி நந்தீ³முகா² விய ரத்தி கா²யதீ’’தி. அந்தோபூதிந்தி ஏத்த² காயஸ்ஸ அந்தோ குணபபூதிந்தி அத்த²ம் படிபக்கி²பந்தோ ஆஹ ‘‘அத்தசித்தஸந்தானே’’திஆதி³. ‘‘கிலேஸவஸ்ஸனவஸேனா’’தி இமினா உத³கவஸ்ஸனவஸேனாதி அத்த²ம் படிக்கி²பதி. அவஸ்ஸுதந்தி திந்தம், கிலின்னந்தி அத்தோ². கஸம்பு³ஜாதந்தி ஏத்த² கஸம்பூ³தி ஸங்காரோ. ஸோ ஹி ஸம்முஞ்சனியா கஸியமானே விலேகி²யமானே ஸம்ப³தி ஸத்³த³ம் கரோதீதி கஸம்பு³, தம் விய ஜாதந்தி கஸம்பு³ஜாதந்தி அத்தோ² த³ட்ட²ப்³போ³. அட்ட²கதா²யம் பன அதி⁴ப்பாயவஸேன ‘‘ஆகிலிட்ட²ஜாத’’ந்தி வுத்தம், அதிவிய கிலிட்ட²ஜாதந்தி அத்தோ². ‘‘ஆகிண்ணதோ³ஸதாய கிலிட்ட²ஜாத’’ந்திபி பாடோ². ‘‘யாவ பா³ஹாக³ஹணாபி நாமா’’தி இமினா பாடே²ன த³ஸ்ஸேதீதி ஸம்ப³ந்தோ⁴. ஹீதி பத³பூரணமத்தம். தேனாதி மோக⁴புரிஸேன. ‘‘யாவா’’தி நிபாதபயோக³த்தா ‘‘பா³ஹாக³ஹணாபீ’’தி ஏத்த² பஞ்சமீவிப⁴த்தி அவதி⁴அத்தே² ஹோதி. நாம-ஸத்³தோ³ க³ரஹத்த²ஜோதகோ, தஸ்ஸ பயோக³த்தா ‘‘ஆக³மேஸ்ஸதீ’’தி ஏத்த² அதீதத்தே² அனாக³தவசனம் (ஸத்³த³னீதிஸுத்தமாலாய 893 ஸுத்தே). ஆக³மேஸ்ஸதி நாமாதி யோஜனா. ஆக³மேஸ்ஸதீதி ஈஸம் அதி⁴வாஸேஸ்ஸதி. ‘‘ஆதோ க³முஈஸமதி⁴வாஸனே’’தி ஹி தா⁴துபாடே²ஸு (ஸத்³த³னீதிதா⁴துமாலாயம் 18 மகாரந்ததா⁴து) வுத்தம்.

384. ந ஆயதகேனேவ பபாதோதி ஏத்த² தீ³கே⁴னேவ பபாதோதி த³ஸ்ஸேந்தோ ஆஹ ‘‘ந பட²மமேவ க³ம்பீ⁴ரோ’’தி. ஆயதஸத்³தோ³ ஹி தீ³க⁴பரியாயோ. ‘‘ந ஆயதகேன கீ³தஸ்ஸரேன த⁴ம்மோ கா³யிதப்³போ³’’திஆதீ³ஸு (சூளவ. 249) விய பபாதோ தீ³கே⁴ன தீரஸ்ஸ ஆதி³ம்ஹி ந ஹோதீதி வுத்தம் ஹோதி. பட²மமேவாதி தீரஸ்ஸ ஆதி³ம்ஹியேவ. ‘‘அனுபுப்³பே³ன க³ம்பீ⁴ரோ’’தி இமினா ‘‘ந பட²மமேவ க³ம்பீ⁴ரோ’’தி வசனஸ்ஸ அதி⁴ப்பாயத்த²ம் த³ஸ்ஸேதி. டி²தத⁴ம்மோதி தீரஸ்ஸ அந்தோயேவ டி²தஸபா⁴வோ. வேலம் நாதிவத்ததீதி ஏத்த² வேலாஸத்³த³ஸ்ஸ தீரமரியாத³த்தே²ஸு பவத்தபா⁴வம் த³ஸ்ஸேந்தோ ஆஹ ‘‘ஓஸக்கனகந்த³ரம் மரியாத³வேல’’ந்தி. தத்த² ‘‘ஓஸக்கனகந்த³ர’’இதி பதே³ன தீரத்த²ம் த³ஸ்ஸேதி, ‘‘மரியாத³’’ இதி பதே³ன மரியாத³த்த²ம். கேன உத³கேன த³ரிதப்³போ³தி கந்த³ரோ, உத³கேன ஓஸக்கனோ கந்த³ரோ ஏத்தா²தி ஓஸக்கனகந்த³ரம், தீரம். ஓஸக்கனகந்த³ரபூ⁴தஞ்ச மரியாத³பூ⁴தஞ்ச வேலம் தீரம் நாதிக்கமதீதி அத்தோ². தீரம் வாஹேதீதி ஏத்த² வஹதா⁴துயா பாபுணனத்த²ம் த³ஸ்ஸேந்தோ ஆஹ ‘‘தீரம் அப்பேதீ’’தி. தத்த² அப்பேதீதி பாபுணாபேதி. ‘‘உஸ்ஸாரேதீ’’தி இமினா பாளியம் ‘‘த²லம் உஸ்ஸாரேதீ’’தி பதே³ன ‘‘தீரம் வாஹேதீ’’தி பத³ஸ்ஸ அத்த²ம் த³ஸ்ஸேதீதி அத்தோ² த³ஸ்ஸிதோ. உஸ்ஸாரேதீதி உத்³த⁴ரித்வா க³மாபேதி. அஞ்ஞாபடிவேதோ⁴தி ஏத்த² ஆஜானாதி, ஆஜானித்தா²தி வா அஞ்ஞம் அரஹத்தமக்³கோ³ வா அரஹத்தப²லம் வா, தஸ்ஸ படிவிஜ்ஜ²னம் அஞ்ஞாபடிவேதோ⁴, ஸுகு²ச்சாரணத்த²ம் மஜ்ஜே² தீ³கோ⁴, அஞ்ஞாபடிவேதோ⁴ நாம அரஹத்துப்பத்தியேவ ஹோதி. தேன வுத்தம் ‘‘அரஹத்துப்பத்தீ’’தி.

385. ச²ன்னமதிவஸ்ஸதீதி உதா³னபாளியா ஸந்தா⁴யபா⁴ஸிதபாளிபா⁴வம் த³ஸ்ஸேந்தோ ஆஹ ‘‘ஆபத்தி’’ந்திஆதி³. தத்த² இத³ந்தி ‘‘ச²ன்னமதிவஸ்ஸதீ’’தி வசனம் வுத்தந்தி ஸம்ப³ந்தோ⁴. ஏதந்தி நவாபத்திஆபஜ்ஜனம் ஸந்தா⁴யாதி ஸம்ப³ந்தோ⁴.

4. பாதிமோக்க²ஸவனாரஹகதா²

386. புரே வா பச்சா² வாதி ஞத்திதோ புரே வா பச்சா² வா. கே²த்தேதி பாதிமோக்க²ட்ட²பனஸ்ஸ கே²த்தே. கே²த்தம் த³ஸ்ஸேந்தோ ஆஹ ‘‘தஸ்மா’’திஆதி³. ரேகாரம் ப⁴ணதீதி ச²த்திம்ஸத்யக்க²ரேஸு ரே-காரம் ஞத்திட்ட²பனகோ ப⁴ணதி. இத³ந்தி பஞ்சதிம்ஸத்யக்க²ரானம் உச்சாரணட்டா²னம். வுத்தேதி ஞத்திட்ட²பனகேன வுத்தே. ‘‘ஸுணாது மே’’தி வசனே அனாரத்³தே⁴யேவாதி யோஜனா.

5. த⁴ம்மிகாத⁴ம்மிகபாதிமோக்க²ட்ட²பனகதா²

387. தேன புக்³க³லேனாதி தேன சுதி³தகேன புக்³க³லேன. ஸா விபத்தீதி ஸீலவிபத்திஆதி³ஸங்கா²தா ஸா விபத்தி. ஸஞ்ஞாஅமூலிகவஸேனாதி ‘‘கதா’’ இதி ஸஞ்ஞாய அமூலிகவஸேன. கதஞ்சாதி ஏகந்தேன கதஞ்ச. அகதஞ்சாதி ஏகந்தேன அகதஞ்ச.

கோபேதுகாமதாய நேவ ஆக³ச்ச²தீதி ஸம்ப³ந்தோ⁴. தேனாதி அனாக³மனாதி³காரணேன. ஆபஜ்ஜதீதி பாதிமோக்க²ட்ட²பனகோ ஆபஜ்ஜதி. இச்சஸ்ஸாபீதி இதி ஏவம் அஸ்ஸ பாதிமோக்க²ட்ட²பனகஸ்ஸாபி. பச்சாதி³யதீதி பதி ஆதி³யதி, ‘‘அகதம் கம்மம், புன காதப்³ப³ம் கம்ம’’ந்திஆதி³னா புன ஆதீ³யதி, புன ஆரப⁴தீதி அத்தோ².

6. த⁴ம்மிகபாதிமோக்க²ட்ட²பனகதா²

388. மக்³க³படிபாத³னாதீ³ஸூதி மக்³க³ஸ்மிம் படிபாத³னாதீ³ஸு. ஆதி³ஸத்³தே³ன தே²ய்யசித்தேன அவஹாராத³யோ ஸங்க³ண்ஹாதி. ஆகாராதி³ஸஞ்ஞாதி ஆகாரஸஞ்ஞா லிங்க³ஸஞ்ஞா நிமித்தஸஞ்ஞா. தந்தி பரிஸங்கம் ஸந்தா⁴யாதி ஸம்ப³ந்தோ⁴.

7. அத்தாதா³னஅங்க³கதா²

398. அத்தாதா³னம் ஆதா³துகாமேனாதி ஏத்த² கிம் அத்தாதா³னந்தி ஆஹ ‘‘ஸாஸனம் ஸோதே⁴துகாமோ’’திஆதி³. இமினா பரம் சோதே³தும் அத்தனா ஆதா³தப்³ப³ம் அதி⁴கரணம் அத்தாதா³னந்தி வுச்சதீதி த³ஸ்ஸேதி. அகாலோ இமம் அத்தாதா³னம் ஆதா³துந்தி ஏத்த² அகாலம் த³ஸ்ஸேந்தோ ஆஹ ‘‘ராஜப⁴ய’’ந்திஆதி³. தத்த² வஸ்ஸாரத்தோதி வஸ்ஸகாலோ. ஸோ ஹி வஸ்ஸோ அதிவிய ரஞ்ஜதி ஏத்த² காலேதி வஸ்ஸாரத்தோதி வுச்சதி. வஸ்ஸாரத்தோபி அதி⁴கரணவூபஸமத்த²ம் லஜ்ஜிபரிஸாய தூ³ரதோ ஆனயனஸ்ஸ து³க்கரத்தா அகாலோ நாம. இதீதி அயம் ராஜப⁴யாதி³காலோதி அத்தோ². விபரீதோதி ராஜப⁴யாதீ³னம் அபா⁴வகாலோ.

அபூ⁴தம் இத³ம் அத்தாதா³னந்தி ஏத்த² அபூ⁴தஸத்³தோ³ அவிஜ்ஜமானபரியாயோதி ஆஹ ‘‘அஸந்தமித³’’ந்தி, இத³ம் அத்தாதா³னம் அவிஜ்ஜமானந்தி அத்தோ². மயா க³ஹிதோதி ஸம்ப³ந்தோ⁴. ஸீலவா புக்³க³லோதி யோஜனா. யந்தி அத்தாதா³னம் ஸம்வத்ததீதி ஸம்ப³ந்தோ⁴. இத³ந்தி அத்தாதா³னம்.

ந லபி⁴ஸ்ஸாமி ஸந்தி³ட்டே², லபி⁴ஸ்ஸாமி ஸந்தி³ட்டே²தி ஏத்த² ‘‘ந லபி⁴ஸ்ஸாமி, லபி⁴ஸ்ஸாமீ’’தி இத³ம் கிம் ஸந்தா⁴ய வுத்தந்தி ஆஹ ‘‘அப்பேகதா³ ஹீ’’திஆதி³. தத்த² அப்பேகதா³தி அபி ஏகதா³. ஹிஸத்³தோ³ வித்தா²ரஜோதகோ. ஏவரூபாதி ஸந்தி³ட்ட²ஸம்ப⁴த்தஸபா⁴வா. தந்தி உபத்த²ம்ப⁴கபி⁴க்கு²லப⁴னம் ஸந்தா⁴யாதி ஸம்ப³ந்தோ⁴. ‘‘ந லபி⁴ஸ்ஸாமீ’’தி இத³ம் வசனம் வுத்தந்தி ஸம்ப³ந்தோ⁴.

கோஸம்ப³கானம் ப⁴ண்ட³னாதி³ ப⁴வதி விய ப⁴ண்ட³னாதி³ ப⁴விஸ்ஸதீதி யோஜனா. பச்சா²பி அவிப்படிஸாரகரம் ப⁴விஸ்ஸதீதி ஏத்த² கேஸம் அவிப்படிஸாரகரம் ப⁴வதி விய பஞ்சங்க³ஸம்பன்னாக³தம் அத்தாதா³னம் ஆதி³யதோ பச்சா²பி அவிப்படிஸாரகரம் ப⁴வதீதி ஆஹ ‘‘ஸுப⁴த்³த³ம் வுட்³ட⁴பப்³ப³ஜித’’ந்திஆதி³. தத்த² பஞ்சஸதிகஸங்கீ³திந்தி பஞ்சஸதேஹி மஹாகஸ்ஸபாதீ³ஹி கத்தப்³ப³ம் ஸங்கீ³திம். மஹாகஸ்ஸபத்தே²ரஸ்ஸ பச்சா² ஸமனுஸ்ஸரணகரம் ஹோதி இவ ஹோதீதி யோஜனா. ஏஸேவ நயோ ஸேஸேஸுபி. ஸமனுஸ்ஸரணகரந்தி ஸம்மோத³வஸேன புனப்புனம் அனுஸ்ஸரணஸ்ஸ கரம். இமினா ‘‘அவிப்படிஸாரகர’’ந்தி பத³ஸ்ஸ அத்த²ம் த³ஸ்ஸேதி. பச்சா²பீதி ஏத்த² பிஸத்³த³ஸ்ஸ அவுத்தஸம்பிண்ட³னத்த²ம் த³ஸ்ஸேந்தோ ஆஹ ‘‘ஸாஸனஸ்ஸ சா’’திஆதி³. தத்த² ஸாஸனஸ்ஸ ச ஸஸ்ஸிரிகதாயாதி ஸம்ப³ந்தோ⁴. விக³தஉபக்கிலேஸசந்தி³மஸூரியானம் விய ஸாஸனஸ்ஸ ச ஸஸ்ஸிரிகதாய ஸம்வத்ததீதி அதி⁴ப்பாயோ.

8. சோத³கேன பச்சவேக்கி²தப்³ப³த⁴ம்மகதா²

399. ‘‘அச்சி²த்³தே³ன அப்படிமம்ஸேனா’’திஆதீ³ஸு ஏவமத்தோ² வேதி³தப்³போ³தி யோஜனா. சி²த்³த³ஸப்படிமம்ஸம் பட²மம் த³ஸ்ஸேத்வா விபரீதவஸேன அச்சி²த்³த³அப்படிமம்ஸம் த³ஸ்ஸேந்தோ ஆஹ ‘‘யேனா’’திஆதி³. தத்த² யேன கதானீதி ஸம்ப³ந்தோ⁴. சி²ஜ்ஜதீதி சி²த்³தோ³, படி புனப்புனம் மஸியதி ஆமஸியதீதி படிமம்ஸோ, நிக்³க³ஹிதாக³மோ, பா⁴வப்பதா⁴னோயம் கம்மனித்³தே³ஸோ. ஸஹ படிமம்ஸேனாதி ஸப்படிமம்ஸோ, காயஸமாசாரோ. விபரீதோதி விபரிவத்தவஸேன இதோ பவத்தோ, காயஸமாசாரோதி அத்தோ². அமூலகானுத்³த⁴ம்ஸனாதீ³ஹீதி ஆதி³ஸத்³தே³ன து³ட்டு²ல்லவாசாத³யோ ஸங்க³ண்ஹாதி.

மேத்தம் நு கோ² மே சித்தந்தி ஏத்த² அப்பனாபா⁴வப்பத்தம் மேத்தசித்தமேவாதி⁴ப்பேதந்தி த³ஸ்ஸேந்தோ ஆஹ ‘‘பலிபோ³தே⁴ சி²ந்தி³த்வா’’திஆதி³. தத்த² பலிபோ³தே⁴தி ஆவாஸபலிபோ³தா⁴தி³கே பலிபோ³தே⁴. ‘‘விக்க²ம்ப⁴னவஸேன விஹதாகா⁴த’’ந்தி இமினா அப்பனாபா⁴வப்பத்தம் மேத்தசித்தமேவ த³ஸ்ஸேதி. இத³ம் பனாவுஸோ கத்த² வுத்தம் ப⁴க³வதாதி ஏத்த² இத³ம்ஸத்³த³கிம்ஸத்³தா³னம் விஸயம் த³ஸ்ஸேந்தோ ஆஹ ‘‘இத³ம் ஸிக்கா²பத³ம் கதரஸ்மிம் நக³ரே’’தி.

9. சோத³கேன உபட்டா²பேதப்³ப³கதா²

400. ‘‘காலேன வக்கா²மீ’’திஆதீ³ஸு சோத³னாய காலஅகாலாதி³ம் த³ஸ்ஸேந்தோ ஆஹ ‘‘ஏகோ ஏக’’ந்திஆதி³. தத்த² ஏகோதி ஏககோ சோத³கோ. ஏகந்தி ஏககம் சுதி³தகம். ஸங்க⁴மஜ்ஜ²…பே… அஸனஸாலாதீ³ஸு வா பரிவாரிதக்க²ணே வாதி யோஜனா. தத்த² ‘‘ஸங்க⁴மஜ்ஜ²…பே… அஸனஸாலாதீ³ஸூ’’தி இமினா டா²னாபா⁴வம் த³ஸ்ஸேதி, ‘‘உபட்டா²கேஹி பரிவாரிதக்க²ணே’’தி இமினா காலாபா⁴வம் த³ஸ்ஸேதி. இமேஹி பதே³ஹி டா²னம்பி காலேன ஸங்க³ஹேத்வா ‘‘காலேன வக்கா²மீ’’தி வுத்தந்தி த³ஸ்ஸேதி. தச்சே²னாதி ஸச்சேன. ஹம்போ⁴தி நிபாதோ பச்சி²மபதே³ஸு பச்சேகம் யோஜேதப்³போ³. ஹம்போ⁴ மஹல்லக, ஹம்போ⁴ பரிஸாவசர, ஹம்போ⁴ பம்ஸுகூலிக, ஹம்போ⁴ த⁴ம்மகதி²காதி ஹி அத்தோ². இத³ந்தி கம்மம். காரணனிஸ்ஸிதந்தி மஹல்லகபா⁴வகாரணாதீ³ஸு நிஸ்ஸிதம். ‘‘ப⁴ந்தே’’தி நிபாதோபி பச்சேகம் யோஜேதப்³போ³. ஏத்த² ச ‘‘ஹம்போ⁴’’தி நிபாதேன லோகவோஹாரவஸேன அனாத³ரஸ்ஸ பகாஸகத்தா ப²ருஸேன வத³தி நாம, ‘‘ப⁴ந்தே’’தி நிபாதேன ஸாத³ரஸ்ஸ பகாஸகத்தா ஸண்ஹேன வத³தி நாம. காரணனிஸ்ஸிதம் கத்வாதி இமஸ்மிம் வீதிக்கமே அயம் நாம தோ³ஸோதி காரணனிஸ்ஸிதம் கத்வா. ‘‘மேத்தசித்தம் உபட்ட²பேத்வா’’தி இமினா மேத்தசித்தோதி பத³ஸ்ஸ ‘‘வக்கா²மீ’’தி பதே³ கிரியாவிஸேஸனபா⁴வம் த³ஸ்ஸேதி. நோ தோ³ஸந்தரோதி ஏத்த² அந்தரஸத்³த³ஸ்ஸ சித்தவாசகபா⁴வம் த³ஸ்ஸேந்தோ ஆஹ ‘‘ந து³ட்ட²சித்தோ’’தி. ‘‘ஹுத்வா’’தி இமினா கிரியாவிஸேஸனபா⁴வம் த³ஸ்ஸேதி.

10. சோத³கசுதி³தகபடிஸம்யுத்தகதா²

401. அஜ்ஜ²த்தந்தி ஏத்த² அத்தஸத்³த³ஸ்ஸ சித்தவாசகபா⁴வஞ்ச ஸத்தமீவிப⁴த்தியாபி அமாதே³ஸபா⁴வஞ்ச த³ஸ்ஸேந்தோ ஆஹ ‘‘அத்தனோ சித்தே’’தி. உப்பாதே³த்வாதி இமினா ‘‘மனஸிகரித்வா’’தி பத³ஸ்ஸ அதி⁴ப்பாயத்த²ம் த³ஸ்ஸேதி. காருஞ்ஞதாதி ஏத்த² த்³வீஸு ண்யபச்சயதாபச்சயேஸு ஏகஸ்ஸேவ பா⁴வவாசகத்தா ஏகோ ஸ்வத்தோ²தி த³ஸ்ஸேந்தோ ஆஹ ‘‘கருணபா⁴வோ’’தி. தத்த² கருணஸ்ஸ புக்³க³லஸ்ஸ பா⁴வோ காருஞ்ஞம், ததே³வ காருஞ்ஞதா. அத² வா கருணோ ஏவ புக்³க³லோ காருஞ்ஞம், தஸ்ஸ பா⁴வோ காருஞ்ஞதாதி வசனத்தோ² காதப்³போ³. இமினாதி ‘‘காருஞ்ஞதா’’தி பதே³ன. கருணஞ்சாதி அப்பனாபத்தம் கருணஞ்ச. கருணாபுப்³ப³பா⁴க³ஞ்சாதி அப்பனாபத்தாய கருணாய புப்³ப³பா⁴கே³ பரிகம்மூபசாரவஸேன பவத்தம் காமாவசரகருணஞ்ச. த்³வீஹிபீதி ‘‘ஹிதேஸிதா, அனுகம்பிதா’’தி த்³வீஹிபி பதே³ஹி. மேத்தஞ்சாதி அப்பனாபத்தமேத்தஞ்ச. மேத்தாபுப்³ப³பா⁴க³ஞ்சாதி அப்பனாபத்தாய மேத்தாய புப்³ப³பா⁴கே³ பரிகம்மூபசாரவஸேன பவத்தம் காமாவசரமேத்தஞ்ச. ஸுத்³த⁴ந்தேதி ஸுத்³தே⁴ கோட்டா²ஸே. படிஞ்ஞம் ஆரோபேத்வாதி சுதி³தகம் படிஞ்ஞம் ஆரோபேத்வா. யே ஏதேதி ‘‘காருஞ்ஞதா’’திஆதி³னா நயேன யே ஏதே பஞ்ச த⁴ம்மா வுத்தாதி யோஜனா. இமினா இமே பஞ்ச த⁴ம்மேதி ஏத்த² இமஸத்³த³ஸ்ஸ அனியமனித்³தே³ஸபா⁴வம் த³ஸ்ஸேதி.

ஸச்சே ச அகுப்பே சாதி ஏத்த² ஸச்சஸத்³த³ஸ்ஸ விரதிஸச்சபரமத்த²ஸச்சானி படிக்கி²பந்தோ ஆஹ ‘‘வசீஸச்சே சா’’தி. ‘‘அகுப்பனதாயா’’தி இமினா நகுபஸ்ஸ பா⁴வோ அகுப்பந்தி கத்வா ண்யபச்சயஸ்ஸ பா⁴வத்த²ம் த³ஸ்ஸேதி. ஹீதி ஸச்சம், வித்தா²ரோ வா. ந பரோ க⁴ட்டேதப்³போ³தி ந பரோ குஜ்ஜா²பேதப்³போ³. ஸப்³ப³த்தா²தி ஸப்³ப³ஸ்மிம் பாதிமோக்க²ட்ட²பனக்க²ந்த⁴கே.

இதி பாதிமோக்க²ட்ட²பனக்க²ந்த⁴கவண்ணனாய யோஜனா ஸமத்தா.