10. பி⁴க்கு²னிக்க²ந்த⁴கம்

மஹாபஜாபதிகோ³தமீவத்து²கதா²

402. பி⁴க்கு²னிக்க²ந்த⁴கே கஸ்மா படிக்கி²பதீதி சோத³னம் த³ஸ்ஸேத்வா தஸ்ஸா ஆபோ⁴க³ம் த³ஸ்ஸேந்தோ ஆஹ ‘‘நனூ’’திஆதி³. ‘‘காம’’ந்திஆதி³னா அப்⁴யூபக³மபரிஹாரவஸேன விஸ்ஸஜ்ஜேதி. தத்த² காமம்ஸத்³தோ³ அனுக்³க³ஹத்தோ², பன ஸத்³தோ³ க³ரஹத்தோ², பன ததா²பி படிக்கி²பதீதி ஸம்ப³ந்தோ⁴. தந்தி மஹாபஜாபதிம் கோ³தமிம். யாசிதேன ஹுத்வா அனுஞ்ஞாதந்தி யோஜனா. அயந்தி பப்³ப³ஜ்ஜா. ப⁴த்³த³கம் கத்வாதி லத்³த⁴கம் கத்வா, மனாபம் கத்வாதி அத்தோ².

403. கும்ப⁴தே²னகேஹீதி ஏத்த² கும்பே⁴ தீ³பம் ஜாலேத்வா தேனாலோகேன தே²னேந்தீதி கும்ப⁴தே²னகாதி த³ஸ்ஸேந்தோ ஆஹ ‘‘கும்பே⁴ தீ³பம் ஜாலேத்வா’’திஆதி³.

நாளிமஜ்ஜ²க³தந்தி ஸஸ்ஸனாளஸ்ஸ மஜ்ஜே² க³தம். க³ண்டி²ந்தி ப²ளும். ‘‘கண்ட³’’ந்திபி பாடோ², த³ண்ட³ந்தி அத்தோ². யேனாதி பாணகேன. அயஞ்ஹி யம்ஸத்³தோ³ தம்ஸத்³தா³னபேக்கோ²தி த³ட்ட²ப்³போ³.

அந்தோரத்தபா⁴வோதி அந்தோலோஹிதபா⁴வோ. ஏதமத்த²ந்தி ஏதம் வக்க²மானம் அத்த²ம். ஆளியாதி ஆவரணாய. அப³த்³தா⁴யபீதி பிஸத்³தோ³ அனுக்³க³ஹத்தோ², ப³த்³தா⁴ய பன பகே³வாதி அத்தோ². கிஞ்சீதி அப்பமத்தகம். யந்தி உத³கம். தம்பீதி உத³கம்பி. பிஸத்³தோ³ அப³த்³தா⁴ய டி²தம் கிஞ்சி உத³கம் அபேக்க²தி. யே இமே க³ருத⁴ம்மா பஞ்ஞத்தாதி யோஜனா. படிகச்சேவாதி பகே³வ, பட²மமேவாதி அத்தோ². தேஸூதி க³ருத⁴ம்மேஸு. அபஞ்ஞத்தேஸு ஸந்தேஸுபீதி யோஜனா. பட²மம் வுத்தந்திஆதி³ வுத்தம், வஸ்ஸஸஹஸ்ஸமேவ ட²ஸ்ஸதி இதி இமமத்த²ம் த³ஸ்ஸேதீதி யோஜனா. ‘‘வஸ்ஸஸஹஸ்ஸ’’ந்தி ச ஏதம் வசனம் வுத்தந்தி ஸம்ப³ந்தோ⁴. ததோதி வஸ்ஸஸஹஸ்ஸதோ. பரியத்தித⁴ம்மோபீதி பிஸத்³தோ³ படிவேத⁴ஸத்³த⁴ம்மம் அபேக்க²தி. த்³வீஸு ஸத்³த⁴ம்மேஸு டி²தேஸு படிபத்திஸத்³த⁴ம்மோ டி²தோயேவாதி கத்வா ந வுத்தம். தானியேவாதி பஞ்சவஸ்ஸஸஹஸ்ஸானியேவ. பரியத்தியா ஸதி படிவேதோ⁴ ந ஹோதீதி நாபி வத்தப்³போ³தி யோஜனா. லிங்க³ந்தி ஸமணவேஸம், ஸமணாகாரந்தி அத்தோ².

பி⁴க்கு²னீஉபஸம்பதா³னுஜானனகதா²

404. இமாய அனுபஞ்ஞத்தியாதி மஹாபஜாபதியா அட்ட²க³ருத⁴ம்மபடிக்³க³ஹணூபஸம்பத³ம் உபனிதா⁴ய அயம் பஞ்ஞத்தி அனுபஞ்ஞத்தி நாம, தாய அனுபஞ்ஞத்தியா உபஸம்பாதே³துந்தி அத்தோ². மஹாபஜாபதியா ஸத்³தி⁴விஹாரினியோ கத்வாதி மஹாபஜாபதிம் உபஜ்ஜ²ம் கத்வா பஞ்சஸதா ஸாகியானியோ தஸ்ஸா ஸத்³தி⁴விஹாரினியோ கத்வாதி அத்தோ². இதீதி தஸ்மா அஹேஸுந்தி ஸம்ப³ந்தோ⁴. இமினா ஓவாதே³னாதி ப⁴க³வதோ இமினா ஓவாதே³ன.

410. ஏதிஸ்ஸாதி ஏதிஸ்ஸா பி⁴க்கு²னியா. தந்தி கம்மம். அஞ்ஞஸ்மிந்தி அஞ்ஞஸ்மிம் கம்மே. அஞ்ஞந்தி ரோபிதப்³ப³கம்மதோ அஞ்ஞம் கம்மம்.

411. கத்³த³மோத³கேனாதி கத்³த³மேன ஆலுளிதேன உத³கேனேவ. கத்³த³மாதீ³ஸுபீதி பீஸத்³தோ³ ‘‘யேன கேனசீ’’தி ஏத்த² யோஜேதப்³போ³. யேன கேனசிபீதி ஹி அத்தோ². ஸன்னிபதித்வாதி பி⁴க்கு²னிஸங்கே⁴ன ஸன்னிபதித்வா. அபஸாத³னீயந்தி அபஸாதே³தப்³ப³ம் கம்மம். ஏத்தாவதாதி ஏத்தகேன ஸாவனமத்தேன. அவந்தி³யோதி ந வந்தே³தப்³போ³, வந்தி³தும் ந அரஹோதி அத்தோ². ததோதி திக்க²த்தும் ஸாவேதப்³ப³தோ. ந வந்த³ந்தீதி பி⁴க்கு²னியோ ந வந்த³ந்தி. தி³ஸ்வாபீதி தம் பி⁴க்கு²ம் தி³ஸ்வாபி. தேன பி⁴க்கு²னாதி அபஸாத³னீயம் த³ஸ்ஸேந்தேன பி⁴க்கு²னா, க²மாபேதப்³ப³ந்தி ஸம்ப³ந்தோ⁴. விஹாரேயேவாதி பி⁴க்கூ²னம் விஹாரேயேவ. தேன பி⁴க்கு²னாதி உபஸங்கமிதப்³பே³ன பி⁴க்கு²னா, வத்தப்³ப³ந்தி ஸம்ப³ந்தோ⁴. ததோதி வத்தப்³ப³காலதோ. ஸோதி அபஸாத³னீயம் த³ஸ்ஸேந்தோ பி⁴க்கு². ஏத்தா²தி பி⁴க்கு²னிக்க²ந்த⁴கே. கம்மவிப⁴ங்கே³தி பரிவாராவஸானே கம்மானம் விப⁴ங்க³ட்டா²னே (பரி. அட்ட². 495-496).

ஓபா⁴ஸந்தீதி அவ ஹீனேன பா⁴ஸந்தீதி த³ஸ்ஸேந்தோ ஆஹ ‘‘அஸத்³த⁴ம்மேன ஓபா⁴ஸந்தீ’’தி. ‘‘பி⁴க்கு²னீஹி ஸத்³தி⁴ம் ஸம்பயோஜேந்தீ’’தி ஏத்த² கம்மகரணே த³ஸ்ஸேந்தோ ஆஹ ‘‘புரிஸே அஸத்³த⁴ம்மேனா’’தி. ஏத்த² ‘‘புரிஸே’’தி இமினா கம்மம் த³ஸ்ஸேதி, ‘‘அஸத்³த⁴ம்மேனா’’தி இமினா கரணம். விஹாரப்பவேஸனேதி பி⁴க்கூ²னம் விஹாரப்பவேஸனே. ஓவாத³ம் ட²பேதுந்தி ஏத்த² ஓவாத³ட்ட²பனாகாரம் த³ஸ்ஸேந்தோ ஆஹ ‘‘ந பி⁴க்கு²னுபஸ்ஸய’’ந்திஆதி³. ஓவாத³த்தா²யாதி ஓவாத³படிக்³க³ஹணத்தா²ய. மா கரித்தா²தி மா கரேய்யாத².

416. கி³ஹிதா³ரிகாயோதி கி³ஹிபூ⁴தா தா³ரிகாயோ ப³ந்த⁴ந்தி வியாதி யோஜனா. க⁴னபட்டகேனாதி க⁴னபூ⁴தேன பட்டேன நியுத்தேன. ஏகபரியகந்தி ஏத்த² ஏகவாரம் கடியம் பரிக்கி²பித்வா கதம் காயப³ந்த⁴னம் ஏகபரியகந்தி த³ஸ்ஸேந்தோ ஆஹ ‘‘ஏகவாரம் பரிக்கி²பனக’’ந்தி. தத்த² பரிக்கி²பனகந்தி கடியம் பரிக்கி²பனாரஹம்.

விலீவேனாதி ஏத்த² ப³ஹுத்தே² ஏகவசனந்தி ஆஹ ‘‘ஸண்ஹேஹி விலீவேஹீ’’தி. ‘‘கதபட்டேனா’’தி இமினா பாளியம் ‘‘கதேனா’’தி பாட²ஸேஸம் த³ஸ்ஸேதி. ஸேதவத்த²பட்டேனாதி ஸேதவத்தே²ன கதேன பட்டேன. கதவேணியாதி கதாய வேணியா. இமினா து³ஸ்ஸேன கதா வேணி து³ஸ்ஸவேணீதி வசனத்த²ம் த³ஸ்ஸேதி. ஏஸேவ நயோ புரிமபச்சி²மபதே³ஸுபி. சோளகாஸாவந்தி சோளமேவ கஸாவேன ரத்தத்தா சோளகாஸாவம்.

அட்டி²ல்லேனாதி அத்³தே³ன அட்டி²னா. ‘‘கோ³ஜங்க⁴ட்டி²கே’’தி இமினா அட்டி²னோ ஸம்ப³ந்த⁴ம் த³ஸ்ஸேதி. ஹத்த²ம் கோட்டாபேந்தீதி ஏத்த² ஹத்த²ம் நாம அக்³க³பா³ஹமேவாதி⁴ப்பேதம், ந கப்பரதோ பட்டா²யாதி த³ஸ்ஸேந்தோ ஆஹ ‘‘அக்³க³பா³ஹ’’ந்தி. பிட்டி²ஹத்த²ந்தி ஹத்த²பிட்டி²ம். பிட்டி²பாத³ந்தி பாத³பிட்டி²ம்.

417. வுத்தனயானேவாதி ச²ப்³ப³க்³கி³யானம் முக²லிம்பனாதீ³ஸு (சூளவ. அட்ட². 247) வுத்தனயானேவ. அங்க³தே³ஸேதி ஸரீரப்பதே³ஸே. க³ண்ட³ப்பதே³ஸேதி கபோலப்பதே³ஸே. ஸாலோகே திட்ட²ந்தீதி ஏத்த² ஸம்விஜ்ஜதி ஆலோகோ ஏத்தா²தி ஸாலோகந்தி கத்வா த்³வாரம் க³ஹேதப்³ப³ம். தேன வுத்தம் ‘‘த்³வாரம் விவரித்வா’’தி. வுட்டா²பேந்தீதி உபஸம்பாதே³ந்தி. ஸூனம் ட²பேந்தீதி ஏத்த² ஸூனாஸத்³தோ³ மம்ஸபரியாயோதி ஆஹ ‘‘மம்ஸம் விக்கிணந்தீ’’தி. தேனாதி தா³ஸேன. இத³ம் பத³ம் ‘‘காரேந்தீ’’தி பதே³ காரிதகம்மம். ‘‘ஹரிதகஞ்சேவ பக்கஞ்சா’’தி இமினா ஹரிதகபக்கிகந்தி பத³ஸ்ஸ த்³வந்த³வாக்யம் த³ஸ்ஸேதி. தத்த² ஹரிதகந்தி ஹரிதமேவ பண்ணம். பக்கந்தி ஸேதி³தம் பண்ணம்.

418. கதி²தாயேவாதி சீவரக்க²ந்த⁴கே கதி²தாயேவ.

419. பாளிமுத்தகவினிச்ச²யோதி பாளியம் வுத்தவினிச்ச²யதோ முத்தோ வினிச்ச²யோ. பாளிமுத்தகவினிச்ச²யம் வித்தா²ரேந்தோ ஆஹ ‘‘ஸசே ஹீ’’திஆதி³. யோ கோசி காலம் கரோந்தோ வத³தீதி ஸம்ப³ந்தோ⁴. மமச்சயேனாதி மம அதிக்கமேன. அஞ்ஞஸ்ஸாதி வுத்தேஹி உபஜ்ஜா²யாதீ³ஹி அஞ்ஞஸ்ஸ. தேஸந்தி உபஜ்ஜா²யாதீ³னம். ந ஹோதீதி பரிக்கா²ரோ ந ஹோதி. ஹீதி ஸச்சம், யஸ்மா வா. அச்சயதா³னந்தி அச்சயேன ஹோதூதி தா³னம். ந ருஹதீதி பஞ்சன்னம் ஸஹத⁴ம்மிகானம் பப்³ப³ஜிதஸ்ஸ வா க³ஹட்ட²ஸ்ஸ வா யஸ்ஸ கஸ்ஸசி அச்சயதா³னம் தேஸம் ந ருஹதி, ஸங்க⁴ஸ்ஸேவ ருஹதீதி அதி⁴ப்பாயோ. கி³ஹீனம் பன அச்சயதா³னந்தி ஸம்ப³ந்தோ⁴. ருஹதீதி கி³ஹீனம் பப்³ப³ஜிதஸ்ஸ வா க³ஹட்ட²ஸ்ஸ வா யஸ்ஸ கஸ்ஸசி அச்சயதா³னம் தேஸம் ருஹதி, தேஸம்யேவ ஸந்தகோ ஹோதீதி அதி⁴ப்பாயோ.

420. புராணமல்லீதி ஏத்த² மல்லஸ்ஸ ப⁴ரியா மல்லீ, புராணே மல்லீ புராணமல்லீதி த³ஸ்ஸேந்தோ ஆஹ ‘‘புராணே’’திஆதி³. ‘‘கி³ஹிகாலே’’தி இமினா ‘‘புராணே’’தி ஏத்த² ணபச்சயஸ்ஸ ஸரூபம் த³ஸ்ஸேதி. மல்லஸ்ஸாதி முட்டி²மல்லஸ்ஸ. புரிஸப்³யஞ்ஜனந்தி ஏத்த² ப்³யஞ்ஜனஸத்³தோ³ நிமித்தபரியாயோதி ஆஹ ‘‘புரிஸனிமித்த’’ந்தி. சித்தந்தி ராக³சித்தம்.

421. யந்தி யம் வத்து², அக்³க³ந்தி பட²மபா⁴க³ம். அஸப்பாயந்தி அத்தனோ அஸப்பாயம்.

ஹிய்யோதி அதீதானந்தராஹனி. அஞ்ஞஸ்மிந்தி பி⁴க்கு²னீஹி அஞ்ஞஸ்மிம். ‘‘பி⁴க்கு²னீஹீ’’தி பத³ம் ‘‘படிக்³கா³ஹாபேத்வா’’தி பதே³ காரிதகம்மம். ஹீதி ஸச்சம், யஸ்மா வா.

426. ‘‘போ⁴ஜனகால’’ந்தி இமினா ‘‘காலம் வீதினாமேஸு’’ந்தி ஏத்த² காலவிஸேஸம் த³ஸ்ஸேதி.

புரேதி ஆதி³ம்ஹி. தாஸந்தி அட்ட²ன்னம் பி⁴க்கு²னீனம். அப்³ப⁴ந்தரிமாதி அப்³ப⁴ந்தரே பரியாபன்னா. அஞ்ஞாதி அட்ட²ஹி பி⁴க்கு²னீஹி அஞ்ஞா. நவகதரா ஹோதீதி ஸம்ப³ந்தோ⁴. ‘‘ட²பேத்வா ப⁴த்தக்³க³’’ந்தி இமினா அஞ்ஞத்த² ஸப்³ப³த்த² யதா²வுட்³ட⁴ம் ந படிபா³ஹிதப்³ப³ந்தி ஏத்த² அஞ்ஞஸத்³த³ஸ்ஸ அபாதா³னம் த³ஸ்ஸேதி. அஞ்ஞஸ்மிந்தி ஏத்த² ஸ்மிம்வசனேன த்த²பச்சயஸ்ஸ அத்த²ம் த³ஸ்ஸேதி. ‘‘சதுபச்சயபா⁴ஜனீயட்டா²னே’’தி இமினா ஸரூபம் த³ஸ்ஸேதி.

430. தூ³தேனபி உபஸம்பாதே³துந்தி ஏத்த² கிம் ஸப்³ப³தா² தூ³தேன உபஸம்பதா³ வட்டதீதி ஆஹ ‘‘தூ³தேன…பே… வட்டதீ’’தி. யேன கேனசி அந்தராயேனாதி ஸம்ப³ந்தோ⁴, அஸதி அந்தராயே ந வட்டதீதி அதி⁴ப்பாயோ. கம்மவாசாபரியோஸானே உபஸம்பன்னாவ ஹோதீதி ஸம்ப³ந்தோ⁴. தாவதே³வாதி உபஸம்பன்னக்க²ணேயேவ.

431. நவகம்மம்பீதி பிஸத்³தோ³ உதோ³ஸிதஉபஸ்ஸயே அபேக்க²தி.

432. தஸ்ஸாதி தஸ்ஸா இத்தி²யா. யாவ ஸோ தா³ரகோ விஞ்ஞுதம் பாபுணாதீதி ஏத்த² கத²ம் விஞ்ஞுபா⁴வோ க³ஹேதப்³போ³தி ஆஹ ‘‘யாவ கா²தி³து’’ந்திஆதி³.

ட²பேத்வா ஸாகா³ரந்தி ஏத்த² ஸகாரோ ஸஹஸத்³த³காரியோ, அகா³ரந்தி ச ஸேய்யாகா³ரந்தி த³ஸ்ஸேந்தோ ஆஹ ‘‘ஸஹாகா³ரஸேய்யமத்தம் ட²பேத்வா’’தி. யதா² அஞ்ஞஸ்மிம் புரிஸே படிபஜ்ஜிதப்³ப³ம், ஏவம் ததா²தி யோஜனா. ‘‘அஞ்ஞஸ்மி’’ந்தி இமினா பாளியம் அஞ்ஞே புரிஸேதி ஏத்த² ஸ்மிம்வசனஸ்ஸ ஸப்³ப³னாமதோ ஏகாராதே³ஸோ த³ஸ்ஸிதோ, தம்த³ஸ்ஸனேன ச கச்சாயனே (கச்சாயனே 110 ஸுத்தே) ஸப்³ப³னாமதோ ஸ்மிம்வசனஸ்ஸ ஏகாராதே³ஸனிஸேத⁴னம் அனிச்சந்தி த³ஸ்ஸேதி.

434. ‘‘யதே³வ ஸா விப்³ப⁴ந்தா’’தி இமினா த³ஸ்ஸேதீதி ஸம்ப³ந்தோ⁴. ‘‘யஸ்மா’’தி இமினா யதே³வாதி ஏத்த² யம்ஸத்³த³ஸ்ஸ காரணத்த²ம் த³ஸ்ஸேதி. ஓதா³தானி வத்தா²னி நிவத்தா²தி ஸம்ப³ந்தோ⁴. ‘‘தஸ்மாயேவா’’தி இமினா ததே³வாதி பத³ஸ்ஸ காரணத்த²மேவ த³ஸ்ஸேதி. ‘‘ந ஸிக்கா²பச்சக்கா²னேனா’’தி இமினா ஏவத்த²ப²லம் த³ஸ்ஸேதி. ஸா புன உபஸம்பத³ம் ந லப⁴தீதி ஸா விப்³ப⁴ந்தா பி⁴க்கு²னீ புன உபஸம்பத³ம் ந லப⁴தி.

பப்³ப³ஜ்ஜம்பி ந லப⁴தீதி தித்தா²யதனஸங்கந்தா பி⁴க்கு²னீ பப்³ப³ஜ்ஜம்பி ந லப⁴தி, பகே³வ உபஸம்பத³ம்.

பாதே³ ஸம்பா³ஹந்தாதி பி⁴க்கு²னீனம் பாதே³ ஸம்பா³ஹந்தா. கேஸேதி பி⁴க்கு²னீனம் கேஸே. தத்ராதி ‘‘குக்குச்சயந்தா ந ஸாதி³யந்தீ’’தி வசனே. ஏகே ஆசரியா வத³ந்தீதி ஸம்ப³ந்தோ⁴. ஸாரத்தா ஹோந்தீதி யோஜனா. ஏத்தா²தி புரிஸானம் அபி⁴வாத³னாதீ³ஸு. இத³ந்தி புரிஸானம் அபி⁴வாத³னாதி³, ‘‘அனுஞ்ஞாத’’ந்தி பதே³ வுத்தகம்மம் ‘‘வட்டதீ’’தி பதே³ வுத்தகத்தா. அத² வா ஓதி³ஸ்ஸ அனுஞ்ஞாதம் இத³ம் புரிஸானம் அபி⁴வாத³னாதி³ வட்டதீதி யோஜனா. ஏவஞ்ஹி ஸதி ‘‘ஓதி³ஸ்ஸ அனுஞ்ஞாத’’ந்தி பத³ம் ஹேதுஅந்தோக³த⁴விஸேஸனம், ஓதி³ஸ்ஸ அனுஞ்ஞாதத்தா வட்டதீதி அதி⁴ப்பாயோ. தந்தி அட்ட²கதா²ஸு வுத்தவசனம். ஹீதி ஸச்சம், யஸ்மா வா.

435. பல்லங்கேன நிஸீத³ந்தீதி ஏத்த² ஆஸனபல்லங்கம் படிக்கி²பந்தோ ஆஹ ‘‘பல்லங்கம் ஆபு⁴ஜித்வா நிஸீத³ந்தீ’’தி. தத்த² ஆபு⁴ஜித்வாதி ஆப³ந்தி⁴த்வா. கூபோதி வச்சகூபோ. உபரீதி கூபதோ உபரி. ‘‘ஸப்³ப³தி³ஸாஸு பஞ்ஞாயதீ’’தி இமினா படிச்ச²ன்னமேவ அத்தி², ந உபரி ச²ன்னந்தி த³ஸ்ஸேதி.

436. குண்ட³கந்தி கணம். ஏத்தா²தி பி⁴க்கு²னிக்க²ந்த⁴கே.

இதி பி⁴க்கு²னிக்க²ந்த⁴கவண்ணனாய யோஜனா ஸமத்தா.