8. வத்தக்க²ந்த⁴கம்

1. ஆக³ந்துகவத்தகதா²

357. வத்தக்க²ந்த⁴கே ஆராமந்தி உபசாரஸீமம் ஸந்தா⁴ய வுத்தந்தி ஆஹ ‘‘உபசாரஸீமஸமீப’’ந்தி. ‘‘க³ஹேத்வா’’தி பத³ஸ்ஸ ‘‘உபாஹனா’’தி கம்மம் பாகடம், கரணம் பன அபாகடம். தஸ்மா கரணம் த³ஸ்ஸேந்தோ ஆஹ ‘‘உபாஹனத³ண்ட³கேன க³ஹேத்வா’’தி. இமினா ‘‘ஹத்தே²னா’’தி கரணம் நிவத்தேதி. படிக்கமந்தீதி ஏத்த² பவிஸந்தீதி ச அபக்கமந்தீதி ச அத்த²ம் படிக்கி²பந்தோ ஆஹ ‘‘ஸன்னிபதந்தீ’’தி. உபாஹனா…பே… புச்சி²தப்³பா³தி ஏத்த² ‘‘புச்சி²தப்³பா³’’தி பத³ஸ்ஸ ஸஹ கம்மேன புச்சி²தப்³பா³காரம் த³ஸ்ஸேந்தோ ஆஹ ‘‘கதரஸ்மிம் டா²னே’’திஆதி³. தத்த² ‘‘கதரஸ்மிம்…பே… சோளக’’ந்தி இமினா புச்சி²தப்³பா³காரம் த³ஸ்ஸேதி. ‘‘ஆவாஸிகா பி⁴க்கூ²’’தி இமினா கம்மம் த³ஸ்ஸேதி. ‘‘பத்த²ரிதப்³ப³’’ந்தி இமினா விஸ்ஸஜ்ஜேதப்³ப³ந்தி ஏத்த² ஸஜதா⁴துயா சஜனத்த²ம் படிக்கி²பதி. கோ³சரோ புச்சி²தப்³போ³தி ஏத்த² கோ³சரஸத்³தோ³ பி⁴க்கா²சாரஸத்³தே³ன அத்த²தோ ஏகந்தி த³ஸ்ஸேந்தோ ஆஹ ‘‘பி⁴க்கா²சாரோ புச்சி²தப்³போ³’’தி. பி⁴க்கா²ய சரந்தி ஏத்தா²தி பி⁴க்கா²சாரோ, கோ³சரகா³மோ. யத்தா²தி யஸ்மிம் கா³மே. ‘‘கி’’ந்திஆதி³னா பானீயம் புச்சி²தப்³ப³ந்திஆதீ³ஸு புச்சி²தப்³பா³காரம் த³ஸ்ஸேதி. கம் காலந்தி கஸ்மிம் காலே.

ப³ஹி நிக்க²மந்தஸ்ஸாதி விஹாரதோ ப³ஹி நிக்க²மந்தஸ்ஸ. நில்லோகேதப்³போ³தி ஓலோகேதப்³போ³. ‘‘யதி³ ஸக்கோதீ’’தி இமினா ஸசே உஸ்ஸஹதீதி ஏத்த² ஸசேஸத்³தோ³ யதி³பரியாயோ, உஸ்ஸஹதிஸத்³தோ³ ஸக்கோதி பரியாயோதி த³ஸ்ஸேதி. ஸக்கோந்தஸ்ஸ விஹாரஸோத⁴னவத்தேதி ஸம்ப³ந்தோ⁴.

2. ஆவாஸிகவத்தகதா²

359. ஆவாஸிகவத்தே ஏவம் வினிச்ச²யோ வேதி³தப்³போ³தி யோஜனா. ஸப்³ப³ம் காதப்³ப³ந்தி ஸம்ப³ந்தோ⁴. தஸ்ஸாதி வுட்³ட⁴தரஸ்ஸ ஆக³ந்துகஸ்ஸ. ‘‘பண்டி³தோ’’திஆதி³னா ஸசே பா³லோ ‘‘ஸம்மஜ்ஜாஹி தாவ சேதியங்க³ண’’ந்தி ந வத³தி, ஸம்மஜ்ஜனிம் நிக்கி²பித்வா தஸ்ஸ வத்தமேவ காதப்³ப³ந்தி த³ஸ்ஸேதி. பே⁴ஸஜ்ஜமேவ காதப்³ப³ந்தி ஸஹாவதா⁴ரணேன வுத்தத்தா பா³லோ ‘‘கரோஹி தாவ பே⁴ஸஜ்ஜ’’ந்தி அவத³ந்தோபி பே⁴ஸஜ்ஜமேவ காதப்³ப³ம். ‘‘பண்டி³தோ ஹீ’’திஆதி³னா பன ஆக³ந்துகஸ்ஸ வத்தப்³ப³பா⁴வமத்தமேவ த³ஸ்ஸேதி. பாளிமுத்தகவத்தம் த³ஸ்ஸேந்தோ ஆஹ ‘‘அபிசா’’திஆதி³. பீ³ஜனேனாதி பீ³ஜனியா. ‘‘பீ³ஜன’’ந்தி ஹி நபும்ஸகலிங்கோ³, ‘‘பீ³ஜனீ’’தி இத்தி²லிங்கோ³. ‘‘பீ³ஜிதப்³போ³’’தி ச ‘‘பீ³ஜிதப்³ப³’’ந்தி ச இமினா அட்ட²கதா²வசனேன பீ³ஜியதி அனேனாதி பீ³ஜனம், பீ³ஜியதி ஏதாயாதி பீ³ஜனீதி வசனத்தோ² காதப்³போ³. அஸ்ஸாதி வுட்³ட⁴தரஆக³ந்துகஸ்ஸ. மக்கே²தப்³பா³தி அஞ்ஜேதப்³பா³. ஹீதி ஸச்சம். ஏத்தா²தி உபாஹனபுஞ்ச²னே. கத்தா²தி கஸ்மிம் விஹாரே. புச்சி²தேன ஆவாஸிகேனாதி ஸம்ப³ந்தோ⁴.

‘‘அத்தனோ ஸந்திகம்…பே… ந லப⁴தீ’’தி இமினா அத்தானம் ஸந்தா⁴ய அனாக³ச்ச²ந்தோபி அத்தனோ ஸந்திகம் ஸம்பத்தஸ்ஸ ஆக³ந்துகஸ்ஸ வத்தம் அகாதும் ந லப⁴தீதி த³ஸ்ஸேதி.

3. க³மிகவத்தகதா²

360. க³மிகவத்தே ஏவம் வினிச்ச²யோ வேதி³தப்³போ³தி யோஜனா. தத்தா²தி ஸேனாஸனக்க²ந்த⁴கே. தம் ஸப்³ப³ம் படிஸாமேத்வாதி ஸம்ப³ந்தோ⁴. யத்த² யேஸு பாஸாணபிட்டி²பாஸாணத்த²ம்பே⁴ஸு உபசிகா நாரோஹந்தி, தஸ்ஸம் பாஸாணபிட்டி²யம் வா தேஸு பாஸாணத்த²ம்பே⁴ஸு வா யம் கதஸேனாஸனம் அத்தி², தம் அனாபுச்ச²ந்தஸ்ஸாபி அனாபத்தீதி யோஜனா. சதூஸு பாஸாணேஸூதிஆதி³ வுத்தந்தி ஸம்ப³ந்தோ⁴, உபசிகானம் உப்பத்திட்டா²னே கதேதி ஸம்ப³ந்தோ⁴. அயந்தி ஆனிஸம்ஸோ. ஓவஸ்ஸககே³ஹே பன ட²பிதானம் மஞ்சபீடா²னந்தி ஸம்ப³ந்தோ⁴.

4. அனுமோத³னவத்தகதா²

362. இத்³த⁴ம் அஹோஸீதி ஏத்த² இத⁴தா⁴துயா வட்³ட⁴னத்த²ம் படிக்கி²பந்தோ ஆஹ ‘‘ஸம்பன்னம் அஹோஸீ’’தி. ஸங்க⁴த்தே²ரே நிஸின்னேதி ஸம்ப³ந்தோ⁴. அனுதே²ரே அனுமோத³னத்தா²ய நிஸின்னேதி யோஜனா. ஸங்க⁴த்தே²ரேன அஜ்ஜி²ட்டே²பீதி ஸம்ப³ந்தோ⁴. அனுமோத³கோ வத³தீதி ஸம்ப³ந்தோ⁴. அனு புனப்புனம், பச்சா² வா தா³யகே த⁴ம்மகதா²ய மோதே³தீதி அனுமோத³கோ. ‘‘க³ச்ச²தா²’’தி ஸசே வத³தி அனுமோத³கோதி யோஜனா. தஸ்ஸாதி அனுமோத³கஸ்ஸ. மனுஸ்ஸா காரேந்தீதி ஸம்ப³ந்தோ⁴. ‘‘ஏகேனா’’தி பத³ம் ‘‘காரேந்தீ’’தி பதே³ காரிதகம்மம். தஸ்ஸாதி காரிதபி⁴க்கு²ஸ்ஸ. அனுமோத³னதோதி அனுமோத³னகாரணா. உபனிஸின்னகதா²தி உபஸமீபே நிஸின்னானம் கதி²யதி ஏதாயாதி உபனிஸின்னகதா². அனுமோத³னாயாதி அனுமோத³னத்தா²ய. அஜ்ஜி²ட்டோ²வாதி ஸயம் அஜ்ஜி²ட்டோ² ஏவ. ஏத்தா²தி அனுமோத³னவத்து²ஸ்மிம். ‘‘ஸஞ்ஜாதவச்சோ’’தி இமினா வச்சோ ஸஞ்ஜாதோ இமஸ்ஸாதி வச்சிதோதி கத்வா ஸஞ்ஜாதத்தே² இத பச்சயோதி த³ஸ்ஸேதி.

5. ப⁴த்தக்³க³வத்தகதா²

364. ப⁴த்தக்³க³வத்தேதி ப⁴த்தம் க³ண்ஹந்தி ஏத்தா²தி ப⁴த்தக்³க³ம், பரிவிஸனட்டா²னம். தஸ்மிம் கத்தப்³ப³ம் வத்தம் ப⁴த்தக்³க³வத்தம், தஸ்மிம் ப⁴த்தக்³க³வத்தே ஏவம் வினிச்ச²யோ வேதி³தப்³போ³தி யோஜனா. மனுஸ்ஸானம் பரிவிஸனட்டா²னம் நாம யத்த² மனுஸ்ஸா ஸபுத்ததா³ரா ஆவஸித்வா பி⁴க்கூ²போ⁴ஜேந்தி. ‘‘அதிஅல்லீயித்வா’’தி இமினா அனுபக²ஜ்ஜாதி ஏத்த² க²த³தா⁴துஸ்ஸ ஹிம்ஸனம் நாம அதிஅல்லீயனந்தி த³ஸ்ஸேதி. ஆஸனேஸு ஸதீதி ஆஸனேஸு ஸந்தேஸு. நிஸீத³ந்தஸ்ஸ நவகஸ்ஸாதி ஸம்ப³ந்தோ⁴. ஆபஜ்ஜதீதி ஆபத்திம் ஆபஜ்ஜதி. ஆபுச்சி²தே அனனுஜானந்தோ தே²ரோ ஆபஜ்ஜதீதி யோஜனா. ஸங்கா⁴டிந்தி பாருதஸங்கா⁴டிம்.

பத்ததோ⁴வனஉத³கந்தி பு⁴ஞ்ஜனத்தா²ய பத்தானம் தோ⁴வனஉத³கம். க³ஹேதப்³ப³ந்தி ஹத்தே²ன க³ஹேதப்³ப³ம்.

யதா² க³ண்ஹியமானேதி யோஜனா. மத்தாயாதி பமாணாய. ஸப்³பி³ஆதீ³ஸு ஏவாதி ஏவஸத்³தோ³ அஜ்ஜா²ஹரிதப்³போ³. ஸப்³பி³ஆதீ³ஸூதி ஸப்³பி³தேலஉத்தரிப⁴ங்கே³ஸு, நித்³தா⁴ரணே பு⁴ம்மம். யந்தி ஸப்³பி³ஆதி³கம். அப்பஹோதீதி ஸப்³பே³ஸம் பி⁴க்கூ²னம் நப்பஹோதி. தந்தி ஸப்³பி³ஆதி³கம், ஸம்பாதே³ஹீதி ஸம்ப³ந்தோ⁴. தாதி³ஸம் ஸப்³பி³ஆதி³கந்தி ஸம்ப³ந்தோ⁴.

யம் ப⁴த்தக்³க³ந்தி யோஜனா. ஹத்த²தோ⁴வனஉத³கந்தி பு⁴த்தாவீனம் ஹத்த²ஸ்ஸ தோ⁴வனஉத³கம். அந்தராதி போ⁴ஜனஸ்ஸ மஜ்ஜே². பிபாஸிதேனாதி பிவிதும் இச்ச²ந்தேன. க³லேதி கண்டே².

நிவத்தந்தேனாதி ஏத்த² கஸ்மா டா²னா நிவத்தந்தேனாதி ஆஹ ‘‘ப⁴த்தக்³க³தோ’’தி. கத²ம் கேனாகாரேன நிவத்திதப்³ப³ந்தி யோஜனா. கஸ்மா நவகேஹி பி⁴க்கூ²ஹி பட²மதரம் நிவத்திதப்³ப³ந்தி ஆஹ ‘‘ஸம்பா³தே⁴ஸு ஹீ’’திஆதி³. நிக்க²மனோகாஸோதி பட²மதரம் நிக்க²ந்தோகாஸோ. படிபாடியாதி வுட்³ட⁴படிபாடியா. து⁴ரேதி கே³ஹத்³வாரஸ்ஸ ஸமீபே. து⁴ரஸத்³தோ³ ஹி இத⁴ ஸமீபவாசகோ. நவகா அந்தோகே³ஹே சே நிஸின்னா ஹோந்தீதி யோஜனா. அந்தரேனாதி பி⁴க்கூ²னம் விவரேன, மஜ்ஜே²ன வா. விரளாயாதி தனுகாய.

6. பிண்ட³சாரிகவத்தகதா²

366. பிண்ட³சாரிகவத்தே ஏவம் வினிச்ச²யோ வேதி³தப்³போ³தி யோஜனா. கப்பாஸம் வா க³ஹேத்வாதி ஸம்ப³ந்தோ⁴. யஞ்சாதி யஞ்ச கிஞ்சி வத்து²ம், க³ஹேத்வாதி ஸம்ப³ந்தோ⁴. கரோந்தீ டி²தா வாதி கரோந்தீ ஹுத்வா டி²தா வா. தந்தி கம்மம். ந ச பி⁴க்கா²தா³யிகாயாதி இத்தி²லிங்க³வஸேன வுத்தத்தா இத்தி²யா ஏவ முக²ம் ந உல்லோகேதப்³ப³ந்தி அத்த²ம் படிக்கி²பந்தோ ஆஹ ‘‘இத்தீ² வா ஹோதூ’’திஆதி³. ‘‘பி⁴க்கா²தா³னஸமயே’’தி இமினா அஞ்ஞஸ்மிம் ஸமயே ஓலோகேந்தோபி நத்தி² தோ³ஸோதி த³ஸ்ஸேதி. ஏகஸ்மிம் காலே பி⁴க்கா²ய த³த³மானாய ஸப்³ப³காலம்பி ந ஓலோகேதப்³ப³ந்தி அனிச்சி²தத்த²ம் படிக்கி²பதி.

7. ஆரஞ்ஞிகவத்தகதா²

368. ஆரஞ்ஞிகவத்தே ஏவம் வினிச்ச²யோ வேதி³தப்³போ³தி யோஜனா. ஸேனாஸனா ஓதரிதப்³ப³ந்தி ஏத்த² அரஞ்ஞே ருக்க²மூலாதீ³ஸு நிஸின்னஸ்ஸ விஹாராபா⁴வதோ ஸேனாஸனம் நாம வஸனட்டா²னம் ஸந்தா⁴ய வுத்தந்தி ஆஹ ‘‘வஸனட்டா²னதோ நிக்க²மிதப்³ப³’’ந்தி.

பத்தம் த²விகாய பக்கி²பித்வாதி ஏத்த² கத²ம் பத்தோ த²விகாய பக்கி²பிதப்³போ³தி ஆஹ ‘‘ஸசே ப³ஹீ’’திஆதி³. தத்த² பத்தோ பக்கி²பிதப்³போ³தி ஸம்ப³ந்தோ⁴. தோ⁴வித்வா கத்வாதி பதே³ஸு ‘‘பத்தம் வோத³க’’ந்தி விப⁴த்திபரிணாமம் கத்வா ஸம்ப³ந்தி⁴தப்³ப³ம். தம்பீதி வேளுனாளிகம்பி. ஸமீபேதி ஆரஞ்ஞகஸ்ஸ ஸேனாஸனஸ்ஸ ஸமீபே. யதா² ச ஆரஞ்ஞகஸ்ஸ அரணிஸஹிதம் இச்சி²தப்³ப³ம், ஏவம் கந்தாரம் படிபன்னஸ்ஸாபி அரணிஸஹிதம் இச்சி²தப்³ப³ந்தி யோஜனா. க³ணவாஸினோதி க³ணேன ஸஹ வாஸினோ, ஆரஞ்ஞகஸ்ஸாதி ஸம்ப³ந்தோ⁴. தேனாதி அரணிஸஹிதேன. ‘‘நக்க²த்தானேவ நக்க²த்தபதா³னீ’’தி இமினா அஸ்ஸயுஜாதி³னக்க²த்தானேவ (அபி⁴தா⁴னப்பதீ³பிகாயம் 58-60 கா³தா²ஸு) தி³ஸாபா⁴க³ஜானனஸ்ஸ, ச ஸமயஜானனஸ்ஸ ச காரணத்தா நக்க²த்தபதா³னி நாமாதி த³ஸ்ஸேதி.

8. ஸேனாஸனவத்தகதா²

369. ஸேனாஸனவத்தே ஏவம் வினிச்ச²யோ வேதி³தப்³போ³தி யோஜனா. த்³வாரம் நாமாதி மஹாத்³வாரம். மஹாவளஞ்ஜந்தி மஹந்தேஹி ஜனேஹி பரிபு⁴ஞ்ஜிதப்³ப³ம். தத்தா²தி த்³வாரே. ஆபுச்சி²த்வாவாதி வுட்³ட⁴ம் ஆபுச்சி²த்வாவ, ஸபா⁴க³ஸ்ஸ வுட்³ட⁴தரஸ்ஸாதி ஸம்ப³ந்தோ⁴. வட்டதியேவாதி யதா²ஸுக²ம் விஹரிதும் வட்டதியேவ. பரிவத்திதப்³ப³ந்தி பரிமுக²ம் வத்திதப்³ப³ம்.

9. ஜந்தாக⁴ரவத்தாதி³கதா²

371. ஜந்தாக⁴ரவத்தே ஏவம் வினிச்ச²யோ வேதி³தப்³போ³தி யோஜனா. ப³ஹிஜக³தீதி ப³ஹிஆலிந்தோ³.

373. ஆசமனவத்து²ஸ்மிம் ஏவமத்தோ² வேதி³தப்³போ³தி யோஜனா. நீஹரித்வாதி உத³கம் நீஹரித்வா. ஆசமிதப்³ப³ந்தி தோ⁴விதப்³ப³ம். ‘‘ஆபுப்³போ³ சமு தோ⁴வனே’’தி ஹி தா⁴துபாடே²ஸு வுத்தம். இத³ம் அதிவிவடந்தி இத³ம் டா²னம் அதிவிவடம், ந கேனசி படிச்ச²ன்னந்தி அத்தோ². உத³கம் அலப⁴ந்தஸ்ஸேவாதி உத³கம் அலப⁴ந்தேயேவ.

374. வச்சகுடிவத்தே ஏவம் வினிச்ச²யோ வேதி³தப்³போ³தி யோஜனா. அயந்தி த³ந்தகட்ட²ம் கா²த³தோ வச்சகரணம். ஸப்³ப³த்தே²வாதி ஸப்³ப³ஸ்மிம் ஏவ டா²னே. ‘‘ந ப²ருஸேன கட்டே²னா’’தி ஏத்த² ந கேவலம் க²ரகட்ட²மேவ, பா²லிதகட்டா²த³யோபி ச²விஅவலேக²னகட்டா² ப²ருஸாயேவ நாமாதி த³ஸ்ஸேந்தோ ஆஹ ‘‘பா²லிதகட்டே²ன வா’’திஆதி³. பவிட்ட²ஸ்ஸாதி வச்சகுடிம் பவிட்ட²ஸ்ஸ.

ஸப்³ப³ஸாதா⁴ரணட்டா²னந்தி ஸப்³பே³ஸம் பி⁴க்கூ²னம், ஸப்³பே³ஹி வா ஸாதா⁴ரணம் வச்சகுடிஸங்கா²தம் டா²னம். தத்ராதி தஸ்மிம் ஸப்³ப³ஸாதா⁴ரணே டா²னே. நிப³த்³த⁴க³மனத்தா²யாதி அத்தனோ நிப³த்³த⁴க³மனத்தா²ய கதம் யம் டா²னம் வா யம் புக்³க³லிகட்டா²னம் வா ஹோதீதி யோஜனா.

உஹதாதி ஏத்த² உபுப்³போ³ ஹத³தா⁴தூதி த³ஸ்ஸேந்தோ ஆஹ ‘‘உஹதி³தா’’தி. ‘‘ஹத³ கரீஸோஸ்ஸக்³கே³’’தி தா⁴துபாடே²ஸு (பாணினீ 977 தா⁴துபாடே²; ஸத்³த³னீதிதா⁴துமாலாயம் 15 த³காரந்ததா⁴து) வுத்தத்தா வச்சகூபதோ ப³ஹி கரீஸஸ்ஸ ஓஸ்ஸஜ்ஜனந்தி ஆஹ ‘‘ப³ஹி வச்சமக்கி²தா’’தி. தோ⁴விதப்³பா³தி உத³கேன தோ⁴விதப்³பா³. ஏதம்பீதி உத³கஸ்ஸ அவிஜ்ஜமானம்பி. ஸப்³ப³த்தா²தி ஸப்³ப³ஸ்மிம் வத்தக்க²ந்த⁴கே.

இதி வத்தக்க²ந்த⁴கவண்ணனாய யோஜனா ஸமத்தா.