7. திணவத்தா²ரகாதி³கதா²

212. கக்க²ளதாய வாளதாயாதி ஏத்த² கக்க²ளஸ்ஸ பா⁴வோ கக்க²ளதா, வாளஸ்ஸ பா⁴வோ வாளதாதி வசனத்த²ம் த³ஸ்ஸேந்தோ ஆஹ ‘‘கக்க²ளபா⁴வாய சேவ வாளபா⁴வாய சா’’தி. இமினா தாபச்சயஸ்ஸ ஸமூஹத்த²ஞ்ச ஸ்வத்த²ஞ்ச படிக்கி²பதி. ‘‘கக்க²ளதாய வாளதாயா’’தி ப்³யஞ்ஜனதோயேவ நானம், ந அத்த²தோ. பே⁴தா³யாதி ஏத்த² அஞ்ஞஸ்ஸ பே⁴த³ம் படிக்கி²பந்தோ ஆஹ ‘‘ஸங்க⁴பே⁴தா³யா’’தி. கி³லானேபீதி பிஸத்³தோ³ அஞ்ஞே பன கா கதா²தி த³ஸ்ஸேதி. தத்தே²வாதி அதி⁴கரணவூபஸமட்டா²னேயேவ. ‘‘ஏகதோ’’தி இமினா ஏகஜ்ஜ²ந்தி பத³ஸ்ஸ ‘‘ஏகதோ’’தி பதே³ன ஸமானதம் த³ஸ்ஸேதி, ஏகஸத்³த³தோ ஜ்ஜ²பச்சயோ ச தோபச்சயோ ச விஸேஸோ, ‘‘திணவத்தா²ரகஸதி³ஸத்தா’’தி இமினா ஸதி³ஸூபசாரம் த³ஸ்ஸேதி. திணேஹி அவத்த²ரிதப்³ப³ந்தி திணவத்தா²ரம், கூ³த²முத்தம், திணவத்தா²ரமிவ திணவத்தா²ரகம். ஏத்த² அதி⁴கரணமேவ முக்²யதோ லப்³ப⁴தி, ஸமதோ² பன ப²லூபசாரதோ, ஸதி³ஸத்தே² கபச்சயோ. தமேவத்த²ம் பாகடம் கரோந்தோ ஆஹ ‘‘யதா² ஹீ’’திஆதி³. க⁴ட்டியமானம் கூ³த²ம் வா முத்தம் வாதி யோஜனா. ‘‘க⁴ட்டியமான’’ந்தி பத³ம் ஹேதுஅந்தோக³த⁴விஸேஸனம், ‘‘பா³த⁴தீ’’தி இமினா ஸம்ப³ந்தி⁴தப்³ப³ம். ஸுப்படிச்சா²தி³தஸ்ஸ பன அஸ்ஸ கூ³த²முத்தஸ்ஸாதி யோஜனா. ‘‘ஸுப்படிச்சா²தி³தஸ்ஸா’’தி பத³ம்பி ஹேதுஅந்தோக³த⁴விஸேஸனமேவ, ‘‘ந பா³த⁴தீ’’தி இமினா ஸம்ப³ந்தி⁴தப்³ப³ம். யம் அதி⁴கரணம் ஸம்வத்ததீதி ஸம்ப³ந்தோ⁴. மூலானுமூலந்தி மூலஞ்ச அனுமூலஞ்ச மூலானுமூலம். தந்தி அதி⁴கரணம். இமினா கம்மேனாதி திணவத்தா²ரககம்மேன. கூ³த²ம் திணேஹி படிச்ச²ன்னம் ஸுவூபஸந்தம் ஹோதி விய திணவத்தா²ரகேன படிச்ச²ன்னம் ஸுவூபஸந்தம் ஹோதீதி யோஜனா. இதீதி தஸ்மா.

213. து²ல்லவஜ்ஜந்தி ஏத்த² து²ல்லச்சயஸ்ஸாபி து²ல்லவஜ்ஜத்தா இத⁴ பாராஜிகஸங்கா⁴தி³ஸேஸமேவாதி⁴ப்பேதந்தி ஆஹ ‘‘பாராஜிகஞ்சேவ ஸங்கா⁴தி³ஸேஸஞ்சா’’தி. கி³ஹிபடிஸம்யுத்தந்தி ஏத்த² கி³ஹீனம் படிஸம்யுத்தம் கி³ஹிபடிஸம்யுத்தந்தி வசனத்த²ம் த³ஸ்ஸேந்தோ ஆஹ ‘‘கி³ஹீன’’ந்திஆதி³. ‘‘ஹீனேனா’’தி பத³ம் ‘‘கு²ம்ஸனவம்ப⁴ன’’ இதி பதே³னேவ ஸம்ப³ந்தி⁴தப்³ப³ம். த⁴ம்மிகபடிஸ்ஸவேஸூதி நிமித்தத்தே² பு⁴ம்மவசனம்.

214. கம்மவாசாபரியோஸானே வுட்டி²தா ஹோந்தீதி ஸம்ப³ந்தோ⁴. தத்தா²தி அதி⁴கரணவூபஸமட்டா²னே. அஞ்ஞாவிஹிதாபீதி அதி⁴கரணவினிச்ச²யதோ அஞ்ஞஸ்மிம் டா²னே சித்தம் ஆவிஹிதாபி ட²பிதாபி. உபஸம்பத³மண்ட³லதோதி உபஸம்பத³ஸீமபி³ம்ப³தோ, யே பனாதி பி⁴க்கூ² பன, தி³ட்டா²விகம்மம் கரோந்தீதி வா அனாக³தாதி வா நிஸின்னாதி வா ஸம்ப³ந்தோ⁴. தேஹி வாதி அதி⁴கரணம் வினிச்சி²னந்தேஹி பி⁴க்கூ²ஹி வா. தத்தா²தி அதி⁴கரணவினிச்சி²தட்டா²னம். ச²ந்த³ம் த³த்வாதி ச²ந்த³ம் ஸங்க⁴ஸ்ஸ த³த்வா. பரிவேணாதீ³ஸூதிஆதி³ஸத்³தே³ன ஆவாஸாத³யோ ஸங்க³ண்ஹாதி. தேதி பி⁴க்கூ².