6. தஸ்ஸபாபியஸிகாகதா²

207. அஸுசீதி ஏத்த² நத்தி² ஸுசீனி காயவசீகம்மானி ஏதஸ்ஸாதி அஸுசீதி வசனத்த²ம் த³ஸ்ஸேந்தோ ஆஹ ‘‘அஸுசீஹி காயவசீகம்மேஹி ஸமன்னாக³தோ’’தி. ஏஸேவ நயோ அலஜ்ஜீதி ஏத்தா²பி. ஸானுவாதோ³தி ஏத்த² அனுவாத³உபவாத³ஸத்³தா³னம் பரியாயத்தா வுத்தம் ‘‘ஸஉபவாதோ³’’தி. இதி பஞ்சாதி இமானி பஞ்ச அங்கா³னி. ஏத்தா²தி தஸ்ஸபாபியஸிககம்மே. இத³ந்தி கம்மம் வுச்சதீதி ஸம்ப³ந்தோ⁴. ஹீதி வித்தா²ரோ. யோ புக்³க³லோ பாபியோதி யோஜனா. பாபுஸ்ஸன்னதாயாதி லாமகுஸ்ஸன்னதாய. இமினா அயஞ்ச பாபோ அயஞ்ச பாபோ, அயமிமேஸம் விஸேஸேன பாபோதி பாபியோதி ச பாபானம் அதிஸயேன பாபோதி பாபியோதி ச வசனத்தோ² த³ஸ்ஸிதோ. தஸ்ஸாதி புக்³க³லஸ்ஸ. இமினா தஸ்ஸ பாபியஸ்ஸ கத்தப்³ப³ம் தஸ்ஸபாபியஸிகம், தமேவ கம்மம் தஸ்ஸபாபியஸிககம்மந்தி வசனத்த²ம் த³ஸ்ஸேதி. கேஸுசி போத்த²கேஸு யகாரே த்³வேபா⁴வோ அத்தி², ஸோ அயுத்தோயேவ. ‘‘யேபு⁴ய்யஸிகா’’தி ஏத்த² யகாரே த்³வேபா⁴வஸ்ஸ த³ஸ்ஸனதோ ஏத்தா²பி த்³வேபா⁴வோ யுத்தோ ப⁴வேய்யாதி லிக²ந்தீதி த³ட்ட²ப்³ப³ம்.