9. சம்பேய்யக்க²ந்த⁴கம்

234. கஸ்ஸபகோ³த்தபி⁴க்கு²வத்து²கதா²

380. சம்பேய்யக்க²ந்த⁴கே க³க்³க³ராய போக்க²ரணியாதி ஏத்த² க³க்³க³ரஸத்³த³ஸ்ஸ நாமஸத்³த³பா⁴வம் த³ஸ்ஸேந்தோ ஆஹ ‘‘க³க்³க³ரனாமிகாய இத்தி²யா’’தி. இமினா க³க்³க³ரஸத்³தோ³ க³க்³க³ரஇதி நாமம் பவத்தினிமித்தம் கத்வா இத்தி²த³ப்³ப³ம் வத³தீதி த³ஸ்ஸேதி. தந்திபடிப³த்³தோ⁴தி தந்தியா படிப³த்³தோ⁴. ‘‘உஸ்ஸுக்கம்பி அகாஸி யாகு³யா’’திஆதீ³ஸு ஏவம் வினிச்ச²யோ வேதி³தப்³போ³தி யோஜனா. தஸ்ஸ பி⁴க்கு²னோதி கஸ்ஸபகோ³த்தனாமகஸ்ஸ தஸ்ஸ பி⁴க்கு²னோ. தத்தே²வாதி வாஸப⁴கா³மேயேவ.

382. அத⁴ம்மேன வக்³க³கம்மம் கரோந்தீதிஆதீ³னம் நானாகரணந்தி ஸம்ப³ந்தோ⁴.

236. ஞத்திவிபன்னகம்மாதி³கதா²

385. அஞ்ஞத்ராபி த⁴ம்மாதி ஏத்த² த⁴ம்மாதி உபயோக³த்தே² நிஸ்ஸக்கவசனமேதந்தி ஆஹ ‘‘அஞ்ஞத்ர த⁴ம்ம’’ந்தி. ‘‘அஞ்ஞத்ரா’’தி நிபாதபயோகே³ து³தியாததியாபஞ்சமீஸு அஞ்ஞதரஸ்ஸ ஸம்ப⁴வதோ உபயோக³வசனம்பி ஹோதி. தஸ்மா வுத்தம் ‘‘அயமேவ வா பாடோ²’’தி. ‘‘பூ⁴தேன வத்து²னா’’தி இமினா த⁴ம்மஸத்³த³ஸ்ஸ ஸச்சத்த²ம் த³ஸ்ஸேதி. ‘‘ஏஸேவ நயோ’’தி இமினா ஸத்³த³ஸபா⁴வமேவ ஸந்தா⁴ய அதிதி³ஸதி, ந அத்த²ம். தேன வுத்தம் ‘‘ஏத்த² பனா’’திஆதி³. ஸத்து²ஸாஸனந்தி ஸத்து² ஆணா. ஸத்து²ஆணா நாம ஞத்திஅனுஸாவனானம் ஸம்பதா³தி ஆஹ ‘‘ஞத்திஸம்பதா³ அனுஸாவனஸம்பதா³ சா’’தி. ‘‘படிகுட்ட²ஞ்சேவ கதஞ்சா’’தி இமினா படிகுட்ட²கதந்தி பத³ஸ்ஸ த்³வந்த³வாக்யம் த³ஸ்ஸேதி. படிகுஸிதப்³ப³ந்தி படிகுட்ட²ம், கத்தப்³ப³ந்தி கதம், கம்மம். தமேவத்த²ம் த³ஸ்ஸேந்தோ ஆஹ ‘‘யம் அஞ்ஞேஸூ’’திஆதி³. தத்த² யந்தி கம்மம்.

387. பாளியாதி வினயபாளியா. யந்தி கம்மம், ந கரியதீதி ஸம்ப³ந்தோ⁴. ஏத்தா²தி அட்ட²கதா²யம். ஸோ ச கோ²தி ஸோ ச வித்தா²ரோ, ஆக³தோதி ஸம்ப³ந்தோ⁴. கஸ்மா ஞத்திது³தியஞத்திசதுத்த²கம்மானமேவ வஸேன ஆக³தோ, நனு ஞத்திஅபலோகனகம்மவஸேனபி ஆக³தேன ப⁴விதப்³ப³ந்தி ஆஹ ‘‘யஸ்மா பனா’’திஆதி³. ஞத்திது³தியஞத்திசதுத்தே²ஸு ஹாபனம் வா அஞ்ஞதா² கரணம் வா அத்தி² விய ஞத்திகம்மே நத்தீ²தி யோஜனா. ஞத்திகம்மே ஞத்திட்ட²பனதோ அஞ்ஞகிச்சஸ்ஸ அஸம்ப⁴வதோ ஹாபனம் வா அஞ்ஞதா² கரணம் வா நத்தீ²தி அதி⁴ப்பாயோ. தானீதி ஞத்திகம்மஅபலோகனகம்மானி. ஸப்³பே³ஸம்பி கம்மானந்தி ஸப்³பே³ஸம்பி சதுன்னம் கம்மானம். பரதோதி பரஸ்மிம் பரிவாராவஸானே (பரி. அட்ட². 482).

237. சதுவக்³க³கரணாதி³கதா²

388. யதி³த³ம் கம்மந்தி யோஜனா. தேஸந்தி ஸங்கா⁴னம். கம்மப்பத்தோதி ஏத்த² கம்மேன, கம்மஸ்ஸ வா பத்தோதி அத்த²ம் படிக்கி²பந்தோ ஆஹ ‘‘கம்மம் பத்தோ’’தி. ‘‘ஸப்³ப³கம்மேஸு கம்மபத்தோ’’தி பாளினயேன ‘‘கம்மேஸு பத்தோ’’தி அத்தோ²பி யுஜ்ஜதி. லோகவோஹாரவஸேன ‘‘கம்மேன கம்மஸ்ஸ வா பத்தோ’’தி அத்தோ²பி யுஜ்ஜதேவ.

389. பரிஸதோதி பரிஸகாரணா. தத்தா²தி ‘‘சதுவக்³க³கரணஞ்சே பி⁴க்க²வே’’திஆதி³பாடே², சதுவீஸதிபுக்³க³லேஸு வா. கம்மனானாஸம்வாஸகோதி உக்கே²பனீயகம்மகதோ. லத்³தி⁴னானாஸம்வாஸகோதி உக்கி²த்தானுவத்தகோ. ‘‘ஹுத்வா’’தி இமினா ‘‘பி⁴க்கு²னீசதுத்தோ²’’திஆதீ³ஸு சதுவீஸதியா டா²னேஸு கிரியாவிஸேஸனபா⁴வம் த³ஸ்ஸேதி. பி⁴க்கு²னீ சதுத்தீ² ஏதஸ்ஸாதி பி⁴க்கு²னீசதுத்தோ², சதுவக்³கோ³ ஸங்கோ⁴திஆதி³னா வசனத்தோ² காதப்³போ³.

393. பரிவாஸாதீ³திஆதி³ஸத்³தே³ன மூலாயகஸ்ஸனமானத்தஅப்³பா⁴னானி ஸங்க³ண்ஹாதி. தேஸந்தி பரிவாஸாதி³கம்மானம். பரதோதி பரஸ்மிம் சூளவக்³கே³ (சூளவ. அட்ட². 75 ஆத³யோ).

394. படிகுட்ட²கதகம்மஸ்ஸாதி படிகுட்ட²ஸ்ஸ ஹுத்வா கதஸ்ஸ கம்மஸ்ஸ. பகதத்தஸ்ஸாதி ஏத்த² பகதிஸீலஸங்கா²தோ அத்தா ஸபா⁴வோ ஏதஸ்ஸாதி பகதத்தோதி அத்த²ம் த³ஸ்ஸேந்தோ ஆஹ ‘‘அவிபன்னஸீலஸ்ஸா’’தி. ஸங்கா⁴தி³ஸேஸம் அனாபஜ்ஜந்தஸ்ஸாபி அவிபன்னஸீலத்தா வுத்தம் ‘‘பாராஜிகம் அனஜ்ஜா²பன்னஸ்ஸா’’தி. இமினா ஸங்கா⁴தி³ஸேஸம் ஆபஜ்ஜந்தோபி பகதத்தோயேவாதி த³ஸ்ஸேதி. ஸோபி ஹி இத⁴ அவிபன்னஸீலோ நாம, அஞ்ஞத்த² பன ஸங்கா⁴தி³ஸேஸஸ்ஸ ஸீலவிபத்திபா⁴வதோ தம் ஆபஜ்ஜந்தோபி விபன்னஸீலோயேவ நாம. ஆனந்தரிகஸ்ஸாதி ஏத்த² அனந்தரஸத்³த³ஸ்ஸ ஸம்ப³ந்த⁴ஞ்ச ணிகபச்சயஸ்ஸ அத்த²ஞ்ச த³ஸ்ஸேந்தோ ஆஹ ‘‘அத்தனோ அனந்தரம் நிஸின்னஸ்ஸா’’தி. தத்த² ‘‘அத்தனோ’’தி இமினா அனந்தரஸத்³த³ஸ்ஸ ஸம்ப³ந்த⁴ம் த³ஸ்ஸேதி. ‘‘நிஸின்னஸ்ஸா’’தி இமினா ணிகபச்சயஸ்ஸ அத்த²ம் த³ஸ்ஸேதி.

239. த்³வேனிஸ்ஸாரணாதி³கதா²

395. வத்து²தோதி வத்து²காரணா. தத்தா²தி ‘‘த்³வேமா பி⁴க்க²வே’’திஆதி³பாடே². ‘‘ஸந்தா⁴ய வுத்த’’ந்தி இமினா ‘‘அப்பத்தோ’’திஆதி³ஸுத்தஸ்ஸ நேய்யத்த²பா⁴வம் த³ஸ்ஸேதி. ஹீதி ஸச்சம், யஸ்மா வா. தந்தி பப்³பா³ஜனீயகம்மம். புன தந்தி பப்³பா³ஜனீயகம்மமேவ. ஏஸ பி⁴க்கு² அப்பத்தோதி ஸம்ப³ந்தோ⁴. கஸ்மா அப்பத்தோதி ஆஹ ‘‘யஸ்மா’’திஆதி³. ஆவேணிகலக்க²ணேனாதி அவினா ஹுத்வா பவத்தேன லக்க²ணேன. அத்தனா அவினா ஹுத்வா அத்தனோ ஸந்தகேன விஸும் பூ⁴தேன லக்க²ணேனாதி வுத்தம் ஹோதி. யதி³ அப்பத்தோ, கஸ்மா ஸுனிஸ்ஸாரிதோதி ஆஹ ‘‘யஸ்மா பனஸ்ஸா’’திஆதி³. அஸ்ஸாதி பி⁴க்கு²ஸ்ஸ, கரேய்யாதி ஸம்ப³ந்தோ⁴. தம் சே ஸங்கோ⁴ தஜ்ஜனீயகம்மாதி³வஸேன நிஸ்ஸாரேதி, ஸுனிஸ்ஸாரிதோதி ஸம்ப³ந்தோ⁴. ஸோதி பி⁴க்கு². யஸ்மா அனுஞ்ஞாதா, தஸ்மா ஸுனிஸ்ஸாரிதோதி யோஜனா. கித்தகேன அங்கே³ன அனுஞ்ஞாதாதி ஆஹ ‘‘ஏகேனபி அங்கே³னா’’தி.

396. ஓஸாரணாதி ஏத்த² ஓத்யூபஸக்³க³வஸேன ஸரதா⁴து பவேஸனத்தோ²தி ஆஹ ‘‘பவேஸனா’’தி. தத்தா²தி ‘‘ஓஸாரணா’’திஆதி³பாடே². ஓஸாரேதீதி ஏத்த² அப்³பா⁴னாதி³வஸேன பவேஸனம் படிக்கி²பந்தோ ஆஹ ‘‘உபஸம்பத³கம்மவஸேனா’’தி. ஸஹஸ்ஸக்க²த்தும்பீதி பிஸத்³தோ³ க³ரஹத்தோ². ஏகவாராதி³கே பன கா நாம கதா²தி த³ஸ்ஸேதி. ஸாதிஸாராதி ஸதோ³ஸா. ததா²தி யதா² ஆசரியுபஜ்ஜா²யா ஸாதிஸாரா, ததா². ஸேஸோ காரகஸங்கோ⁴ ஸாதிஸாரோதி ஸம்ப³ந்தோ⁴. ‘‘ஹத்த²ச்சி²ன்னாத³யோ பன த்³வத்திம்ஸ ஸுஓஸாரிதா’’தி வுத்தத்தா அந்த⁴மூக³ப³தி⁴ரானம் அபப்³ப³ஜிதானம்பி உபஸம்பதா³ ருஹதீதி த³ட்ட²ப்³ப³ம். தேதி ஹத்த²ச்சி²ன்னாத³யோ த்³வத்திம்ஸ.

397. அபூ⁴தவத்து²வஸேனாதி அஸச்சவத்து²வஸேன, அஸம்விஜ்ஜமானவத்து²வஸேன வா. தத்தா²தி ‘‘இத⁴ பன பி⁴க்க²வே’’திஆதி³பாடே². படினிஸ்ஸஜ்ஜிதாதி ஏத்த² தபச்சயஸ்ஸ கம்மத்தே² பவத்தபா⁴வம் த³ஸ்ஸேந்தோ ஆஹ ‘‘படினிஸ்ஸஜ்ஜிதப்³பா³’’தி.

241. உபாலிபுச்சா²கதா²

400. தத்தா²தி உபாலிபஞ்ஹேஸு. தஸ்ஸபாபியஸிகாதீ³ஹி ஸத்³தி⁴ம் ஏகா புச்சா² கதாதி யோஜனா. பி⁴க்கூ²னம்பி வாரேதி ஸம்ப³ந்தோ⁴. பிஸத்³தே³ன ‘‘ந கேவலம் உபாலிபஞ்ஹேஸுயேவ யோஜேதப்³பா³னி, அத² கோ² பி⁴க்கூ²னம் வாரேபீ’’தி த³ஸ்ஸேதி.

242. தஜ்ஜனீயகம்மகதா²

407. ‘‘இத⁴ பன பி⁴க்க²வே பி⁴க்கு² ப⁴ண்ட³னகாரகோ’’திஆதி³ வுத்தந்தி ஸம்ப³ந்தோ⁴. தத்தா²தி ‘‘இத⁴ பன பி⁴க்க²வே’’திஆதி³பாடே². அனபதா³னோதி ஏத்த² அபபுப்³போ³ தா³ஸத்³தோ³ அவக²ண்ட³னத்தோ²தி ஆஹ ‘‘அபதா³னம் வுச்சதி பரிச்சே²தோ³’’தி. நத்தி² அபதா³னம் அவக²ண்ட³னம் ஆபத்திபரியந்தோ ஏதஸ்ஸாதி அனபதா³னோதி வசனத்தோ² காதப்³போ³. ஸாயேவ பாளி வுத்தாதி ஸம்ப³ந்தோ⁴. தத்தா²தி தஸ்ஸம் பாளியம். கிஞ்சி அத்த²வினிச்ச²யம் பாளிஅனுஸாரேன விதி³தும் ந ஸக்கா ந ஹோதீதி யோஜனா.

இதி சம்பேய்யக்க²ந்த⁴கவண்ணனாய யோஜனா ஸமத்தா.