215. சீவரரஜனகதா²

344. கி³ஹிபரிபு⁴த்தம் பனாதி கி³ஹினா பரிபு⁴த்தம் வத்த²ம் பன, கிஞ்சி ப²லந்தி ஸம்ப³ந்தோ⁴.

ஸீதுத³காதி ஸீதம் உத³கம். லிங்க³விபல்லாஸோ ஹி அயம். உத்தராளும்பந்தி ஏத்த² உத்தர உளும்பந்தி பத³ச்சே²த³ம் கத்வா அகாரதோ உகாரஸ்ஸ லோபம் கத்வா, புப்³ப³ஸரஸ்ஸ ச தீ³க⁴ம் கத்வா ‘‘உத்தராளும்ப’’ந்தி வுச்சதி. உத்தராளூதி உத்தரஉத³கம். உளுஸத்³தோ³ ஹி உத³கவாசகோ, தம் பாதி ரக்க²தீதி உத்தராளும்பம். தஸ்ஸ ஸரூபம் த³ஸ்ஸேந்தோ ஆஹ ‘‘வட்டாதா⁴ரக’’ந்தி. ரஜனந்தி ரஜனச²ல்லிம். ஹீதி ப²லஜோதகோ. ரஜனந்தி ரஜனுத³கம். ஹீதி வித்தா²ரோ. தே²வோதி ரஜனபி³ந்து³. ந விஸரதீதி ந பக்³க⁴ரதி. ரஜனாளுங்கந்தி ஏத்தா²பி புரிமனயேனேவ பத³ஸித்³தி⁴ வேதி³தப்³பா³. ரஜனஉளுங்கந்தி ரஜனஸங்கா²தஸ்ஸ உத³கஸ்ஸ க³ஹணத்தா²ய கரியதீதி ரஜனஉளுங்கம். த³ண்ட³கேன நியுத்தம் தா²லகம் த³ண்ட³கதா²லகந்தி த³ஸ்ஸேந்தோ ஆஹ ‘‘தமேவ ஸத³ண்ட³க’’ந்தி. ரஜனகுண்ட³ந்தி ரஜனபக்கி²பனம் மஹாக⁴டம். அஞ்ஞத்ராதி அஞ்ஞம் டா²னம். பத்தி²ன்னஸத்³தோ³ த²த்³த⁴பரியாயோதி ஆஹ ‘‘த²த்³த⁴’’ந்தி. த³ந்தகாஸாவானீதி ஏத்த² த³ந்தஸத்³தே³ன தஸ்ஸ வண்ணோ க³ஹேதப்³போ³, ஸோ ஏதேஸமத்தீ²தி த³ந்தானி, த³ந்தானி ச தானி காஸாவானி சேதி த³ந்தகாஸாவானி, தமத்த²ம் த³ஸ்ஸேந்தோ ஆஹ ‘‘த³ந்தவண்ணானீ’’தி. த³ந்தவண்ணானி காஸாவானி தா⁴ரேந்தீதி ஸம்ப³ந்தோ⁴.