216. சி²ன்னகசீவரானுஜானனகதா²

345. தீ³க⁴மரியாத³ப³த்³த⁴ந்தி தீ³கே⁴ன மரியாதே³ன ப³த்³த⁴ம். சதுக்கஸண்டா²னந்தி சதுன்னம் மக்³கா³னம் ஸமோதா⁴னஸண்டா²னம். உஸ்ஸஹஸி த்வந்தி ஏத்த² உபுப்³போ³ ஸஹதா⁴து ஸமத்த²த்தோ²தி ஆஹ ‘‘ஸக்கோஸி த்வ’’ந்தி. பபுப்³போ³ பன அபி⁴ப⁴வனத்தோ² ஹோதி ‘‘பஸஹதீ’’திஆதீ³ஸு. யோ நாமாதி யோ ஆனந்தோ³ ஆஜானிஸ்ஸதி நாம, ஸோ ஆனந்தோ³ பண்டி³தோதி யோஜனா. ‘‘குஸீ’’தி ஏதம் நாமம் அதி⁴வசனந்தி யோஜனா. அனுவாதாதீ³னந்தி ஆதி³ஸத்³தே³ன பரிப⁴ண்டா³தீ³னி ஸங்க³ண்ஹாதி. ‘‘அட்³ட⁴குஸீ’’தி ஏதந்தி யோஜனா.

கீ³வேய்யகந்தி ஏத்த² கீ³வாயம் ஸுத்தஸம்ஸிப்³பி³தம் கீ³வேய்யகந்தி வசனத்த²ம் த³ஸ்ஸேந்தோ ஆஹ ‘‘கீ³வாவேட²னட்டா²னே’’திஆதி³. ‘‘ஆக³ந்துகபட்ட’’ந்தி இமினா ஏய்யகபச்சயஸ்ஸ ஸரூபம் த³ஸ்ஸேதி. ஏஸேவ நயோ ஜங்கே⁴ய்யகந்தி ஏத்தா²பி. ஏதம் நாமந்தி ‘‘கீ³வேய்யகம், ஜங்கே⁴ய்யக’’ந்தி ஏதம் நாமம். இதீதி ஏவம். ஏதந்தி ‘‘அனுவிவட்ட’’ந்திஆதி³ ஏதம். ‘‘அனுவிவட்ட’’ந்தி ஏதம் நாமந்தி யோஜனா. விவட்டஸ்ஸாதி மஜ்ஜி²மக²ண்ட³கஸ்ஸ. பா³ஹந்தந்தி ஏத்த² பா³ஹாய உபரி ட²பிதா அந்தா பா³ஹந்தாதி வசனத்த²ம் த³ஸ்ஸேந்தோ ஆஹ ‘‘பா³ஹாயா’’திஆதி³. தேஸந்தி உபி⁴ன்னமந்தானம். ஏதந்தி ‘‘பா³ஹந்த’’ந்தி ஏதம்.