214. ப⁴ண்டா³கா³ரஸம்முதிஆதி³கதா²

343. யோ விஹாரோ வா யோ அட்³ட⁴யோகோ³ வா ஹோதி, ஸோ விஹாராதி³கோ ஸம்மனிதப்³போ³தி யோஜனா. ‘‘ஆராமிகஸாமணேராதீ³ஹீ’’தி பத³ம் விவித்தத்தே² அபாதா³னம், கரணம்பி யுஜ்ஜதி. பச்சந்தஸேனாஸனம் பன ந ஸம்மனிதப்³ப³ம் சோராதி³உபத்³த³வத்தா. விஹாரமஜ்ஜே²யேவாதி ப⁴ண்டா³கா³ரவிஹாரமஜ்ஜே²யேவ.

யஸ்ஸாதி ப⁴ண்டா³கா³ரஸ்ஸ. இத³ம் பத³ம் ‘‘ச²த³னாதீ³ஸூ’’தி பதே³ ஸாமீ, ‘‘நத்தீ²’’தி பதே³ ஸம்பதா³னம். யஸ்ஸ பனாதி ப⁴ண்டா³கா³ரஸ்ஸ பன. யத்த² கத்த²சீதி யஸ்மிம் கஸ்மிம்சி டா²னே. யேனாதி பதிதஹேதுனா. மூஸித்வா கா²த³தீதி மூஸிகோ. ஆதி³ஸத்³தே³ன கோ³தா⁴மங்கு³ஸாத³யோ ஸங்க³ண்ஹாதி. உப பு⁴ஸம், உபகு³ஹித்வா வா சினந்தீதி உபசிகா. தந்தி ஓவஸ்ஸனாதி³ம். ஹீதி ஸச்சம், யஸ்மா வா. ஏவந்திஆதி³ நிக³மனம்.

சீவரபடிக்³கா³ஹகாதீ³ஹீதி ஆதி³ஸத்³தே³ன சீவரனித³ஹகப⁴ண்டா³கா³ரிகே ஸங்க³ண்ஹாதி. தத்தா²தி தேஸு. சீவரபடிக்³கா³ஹகேன ந க³ண்ஹிதப்³ப³ந்தி ஸம்ப³ந்தோ⁴. தாவாதி சீவரனித³ஹகப⁴ண்டா³கா³ரிகானம், தேஹி வா பட²மம். யம் யந்தி சீவரம். ததே²வாதி யதா² விஸும் விஸும் கத்வா க³ண்ஹதி, ததே²வ. சீவரனித³ஹகேனாபீதி பிஸத்³தோ³ ந கேவலம் படிக்³கா³ஹகேனேவ, அத² கோ² நித³ஹகேனபீதி ஸம்பிண்டே³தி. ததே²வாதி யதா² நித³ஹகோ ஆசிக்க²தி, ததே²வ. ததோதி தேஹி சீவரேஹி, விப⁴த்தஅபாதா³னம், தேஸு சீவரேஸு வா நித்³தா⁴ரணம். ததே³வாதி ஸங்கே⁴ன வுத்தசீவரமேவ.

இதீதிஆதி³ நிக³மனம். ப⁴க³வதா அனுஞ்ஞாதோதி ஸம்ப³ந்தோ⁴. ப⁴ண்டா³கா³ரந்தி ப⁴ண்ட³ஸ்ஸ ட²பனோகாஸம் அகா³ரம். ப⁴ண்டா³கா³ரிகோதி ப⁴ண்டா³கா³ரே நியுத்தோ. பா³ஹுல்லிகதாயாதி பச்சயபா³ஹுல்லேன நியுத்தபா⁴வத்த²ம். ஏவம் ஸந்தே கிமத்தா²ய அனுஞ்ஞாதோதி ஆஹ ‘‘அபி சா’’திஆதி³. அனுக்³க³ஹாய அனுஞ்ஞாதோதி ஸம்ப³ந்தோ⁴. ஹீதி வித்தா²ரோ. நேவ ஜானேய்யுந்தி யோஜனா. த்³வே த்³வே வா சீவரேதி ஸம்ப³ந்தோ⁴. ஸங்க³ஹம் காதுந்தி ஸங்கே⁴ன ஸங்க³ஹம் காதும்.

ந வுட்டா²பேதப்³போ³தி ஏத்த² அத்து²த்³தா⁴ரவஸேன அஞ்ஞேபி அவுட்டா²பனீயே த³ஸ்ஸேந்தோ ஆஹ ‘‘அஞ்ஞேபீ’’திஆதி³. ஹீதி வித்தா²ரோ. தத்தா²தி சதூஸு. ஸங்கோ⁴ பன தே³தீதி ஸம்ப³ந்தோ⁴. உபகாரதாய சாதி ஸங்க⁴ஸ்ஸ உபகாரதாய ச. ஏத்த² ச புரிமேஸு தீஸு ஏகோயேவ ஹேது, பச்சி²மே பன த்³வே ஹேதவோதி த³ட்ட²ப்³ப³ம்.

ஸம்முகீ²பூ⁴தேனாதி அஞ்ஞமஞ்ஞஸ்ஸ முகே² ஸம்விஜ்ஜமானோ, ஸன்னிபதிதோ வா ஸம்முகோ², ஸம்முகோ² ஹுத்வா பூ⁴தோ ஸம்முகீ²பூ⁴தோ. பூ⁴ஸத்³த³யோக³த்தா அகாரஸ்ஸீகாரோ ஹோதி, அந்தோஉபசாரஸீமாயம் டி²தோ ஸங்கோ⁴. தமத்த²ம் த³ஸ்ஸேந்தோ ஆஹ ‘‘அந்தோஉபசாரஸீமாயம் டி²தேனா’’தி. கோலாஹலந்தி ப³ஹுஜனேஹி ஸன்னிபதித்வா ஏகதோ கதம் அப்³யத்தஸத்³த³ம். ததா³காரம் த³ஸ்ஸேந்தோ ஆஹ ‘‘அம்ஹாக’’ந்திஆதி³. ‘‘சீவரபா⁴ஜகேஸூ’’திஆதி³னா அக³திக³மனாகாரம் த³ஸ்ஸேதி, தம் ஸுவிஞ்ஞேய்யமேவ. துலாபூ⁴தோதி துலாய ஸதி³ஸோ ஹுத்வா பூ⁴தோ, துலாய ஸதி³ஸபா⁴வம் பத்தோ வா. மஜ்ஜ²த்தோதி மஜ்ஜே² டி²தோ அத்தா ஸபா⁴வோ ஏதஸ்ஸாதி மஜ்ஜ²த்தோ.

இத³ந்தி சீவரம். க⁴னந்தி நிரந்தரம். தனுகந்தி விரளம். ஏத்த² ‘‘உச்சினித்வா’’தி இமினா வத்த²ஸ்ஸ பமாணேன உச்சினனம் த³ஸ்ஸேதி. ‘‘துலயித்வா’’தி இமினா அக்³கே⁴ன துலனம் த³ஸ்ஸேதி. வண்ணாவண்ணம் கத்வாதி வண்ணஞ்ச அவண்ணஞ்ச கு²த்³த³கஞ்ச பமாணம், மஹந்தஞ்ச பமாணம் கத்வாதி அத்தோ². ஏகச்சானி சீவரானி அப்பக்³கா⁴னி ஹோந்தி, ஏகச்சானி மஹக்³கா⁴னீதி வுத்தம் ஹோதி. த³ஸத³ஸஅக்³க⁴னகந்தி த³ஸஹி த³ஸஹி கஹாபணேஹி அக்³க⁴னகம். யந்தி சீவரம், ப³ந்தி⁴த்வாதி நவக்³க⁴னகம் ஏகக்³க⁴னகேன, அட்ட²க்³க⁴னகஞ்ச த்³விஅக்³க⁴னகேன ப³ந்தி⁴த்வாதி அத்தோ². ஸமே படிவீஸேதி ஸமபமாணே படிவீஸே ட²பேத்வா, இமினா ‘‘வண்ணாவண்ண’’ந்தி ஏத்த² வண்ணஸத்³தோ³ பமாணத்தோ²தி தீ³பேதி. த³ஸ த³ஸ பி⁴க்கூ²தி இத³ம் உபலக்க²ணவஸேன வுத்தம் அஞ்ஞேனாகாரேனாபி க³ணேதும் ஸக்குணேய்யத்தா. ப⁴ண்டி³கந்தி சீவரப⁴ண்டே³ன நியுத்தம் புடம். குஸோதி ஸலாகத³ண்டோ³.

அத்திஸ்ஸராதி அத்தனாவ அத்தானம் இஸ்ஸரா. அஞ்ஞேஸம் வத்தபடிபத்திந்தி ஸம்ப³ந்தோ⁴. உபட்³ட⁴பா⁴கோ³தி பி⁴க்கூ²னம் லத்³த⁴பா⁴க³தோ உபட்³டோ⁴ பா⁴கோ³. யே பனாதி ஸாமணேரா பன. ஸமபா⁴கோ³தி பி⁴க்கூ²னம் பா⁴கே³ன ஸமோ பா⁴கோ³. இத³ஞ்சாதி ‘‘உபட்³ட⁴படிவீஸ’’ந்தி வசனஞ்ச, கதி²தந்தி ஸம்ப³ந்தோ⁴. ஸமகமேவாதி பி⁴க்கு²ஸாமணேரானம் ஸமபமாணமேவ. தத்ருப்பாத³வஸ்ஸாவாஸிகந்தி தஸ்மிம் விஹாரே உப்பாதே³ன மூலேன உப்பாதி³தம் வஸ்ஸாவாஸிகம். பா²திகம்மந்தி வட்³ட⁴னகம்மம் ‘‘யத்தகேன வினயாக³தேன ஸம்முஞ்ஜனிப³ந்த⁴னாதி³னா ஹத்த²கம்மேன விஹாரஸ்ஸ ஊனதா ந ஹோதி, தத்தகம் கத்வாதி அத்தோ². ஏதந்தி பா²திகம்மம் கத்வா க³ஹணம். ஹீதி ஸச்சம். ஏத்தா²தி தத்ருப்பாத³வஸ்ஸாவாஸிகக³ஹணே. ஸப்³பே³ஸந்தி அகி²லானம் பி⁴க்கு²ஸாமணேரானம். ப⁴ண்டா³கா³ரிகசீவரேபீதி ப⁴ண்டா³கா³ரே ட²பிதே அகாலசீவரேபி. பிஸத்³தே³ன தத்ருப்பாத³வஸ்ஸாவாஸிகமபேக்க²தி. ஸாமணேரா உக்குட்டி²ம் கரோந்தீதி ஸம்ப³ந்தோ⁴. அபஹரிதகந்தி ஹரிதவிரஹிதம். ரங்க³ச²ல்லிந்தி ரஜனச்ச²விம். ஏதந்தி உக்குட்டி²கரணதோ ஸமபா⁴க³தா³னம், வுத்தந்தி ஸம்ப³ந்தோ⁴. யே சாதி ஸாமணேரா ச. விரஜ்ஜி²த்வா கரோந்தீதி கத்தப்³ப³காலேஸு அகத்வா யதி²ச்சி²தக்க²ணே கரோந்தி. தேதி ஸாமணேரே. ஸமபடிவீஸோ தா³தப்³போ³தி ‘‘கரிஸ்ஸாமா’’தி படிஞ்ஞாதமத்தேன ஸமோ படிவீஸோ தா³தப்³போ³.

‘‘ஸகம் பா⁴க³ம் தா³து’’ந்தி இத³ம் வுத்தந்தி ஸம்ப³ந்தோ⁴. கிம் ஸந்தா⁴ய வுத்தந்தி ஆஹ ‘‘ப⁴ண்டா³கா³ரதோ…பே… ஸந்தா⁴யா’’தி. பஹதாயாதி பஹரிதப்³பா³ய, பஹனிதப்³பா³ய வா. தஸ்மாதி யஸ்மா ஸந்தா⁴ய வுத்தம், தஸ்மா. அனீஹடேஸூதி ப⁴ண்டா³கா³ரதோ அனீஹரிதேஸு. இமஸ்ஸ பி⁴க்கு²னோதி உத்தரிதுகாமஸ்ஸ இமஸ்ஸ பி⁴க்கு²னோ. துலாயாதி மானேன.

தேஸூதி ஸாடகேஸு, ஏகோ ஸாடகோதி யோஜனா. ஸப்³பே³ஸு பாதிதேஸூதி ஸம்ப³ந்தோ⁴. ஏத்தகேனாதி த்³வாத³ஸக்³க⁴னகேன. தம் ஸுத்வாதி பி⁴க்கூ²னம் தம் வசனம் ஸுத்வா. ஸப்³ப³த்தா²தி ஸப்³ப³ஸ்மிம் ஸங்க⁴க³ணஸந்தகே. அனுப்பதா³னேன கி²பியதி பக்கி²பியதீதி அனுக்கே²பந்தி த³ஸ்ஸேந்தோ ஆஹ ‘‘அனுக்கே²பம் நாமா’’திஆதி³. யத்தகம் அக்³க⁴ந்தி ஸம்ப³ந்தோ⁴. தத்தகேன அக்³கே⁴ன அக்³க⁴னகேதி யோஜனா. விகல்லகாதி விகலஸ்ஸ பா⁴வோ விகல்லம், சீவரபுக்³க³லானம் அபஹோனகபா⁴வோ, ததே³வ விகல்லகா. ‘‘தத்தா²’’தி பாட²ஸேஸோ, தேஸு த்³வீஸு விகல்லகேஸூதி அத்தோ². அத்தீ²தி ஸம்விஜ்ஜந்தி, நிபாதோயம். சி²ந்த³ந்தேஹி ச தா³தப்³பா³னீதி ஸம்ப³ந்தோ⁴. தா³தப்³பா³னீதி ச சி²ந்தி³தப்³பா³னி. தா³ஸத்³தோ³ ஹி அவக²ண்ட³னத்தோ². தா³துந்தி அவக²ண்டி³தும். ஏவந்திஆதி³ நிக³மனம். ஏத்தா²தி ஏதேஸு விகல்லகேஸு. தந்தி சீவரம். அதா²தி தோஸிததோ பரம். தத்தா²தி ஏகஸ்ஸ பி⁴க்கு²னோ கோட்டா²ஸே. ஸாமணகந்தி ஸமணஸ்ஸ அனுரூபம். யோதி பி⁴க்கு². தேனாதி பரிக்கா²ரேன. இத³ம்பீதி அஞ்ஞம் ஸாமணகஸ்ஸ பரிக்கா²ரஸ்ஸ ட²பனம்பி. பிஸத்³தே³ன புரிமம் வத்த²சி²ந்த³னமபேக்க²தி.

வக்³க³ந்தி ஸமூஹம். அட்ட² வா நவ வா பி⁴க்கூ² ஹோந்தீதி யோஜனா. தேஸந்தி அட்ட²ன்னம் வா நவன்னம் வா. ஏவந்திஆதி³ நிக³மனம். அயம் அபஹோனகபா⁴வோதி யோஜனா. புன சீவரஸ்ஸேவ விகல்லகபா⁴வம் த³ஸ்ஸேந்தோ ஆஹ ‘‘அத²வா’’திஆதி³. ஏத்த² புரிமனயே சீவரஸ்ஸ ச புக்³க³லஸ்ஸ ச விகல்லகம் ஹோதி, பச்சி²மே சீவரஸ்ஸேவாதி அயமேதேஸம் விஸேஸோ.