178. ஸீஹஸேனாபதிவத்து²கதா²

290. த⁴ம்மஸ்ஸ ச அனுத⁴ம்மந்தி ஏத்த² த⁴ம்மஸத்³தோ³ காரணத்தோ²தி ஆஹ ‘‘காரணஸ்ஸ அனுகாரண’’ந்தி. ‘‘பரேஹீ’’தி பத³ம் ‘‘வுத்த’’இதி பதே³ கத்தா. ‘‘வுத்தகாரணேனா’’திபத³ம் ‘‘ஸகாரணோ’’திபதே³ கரணம். கோசி அப்பமத்தகோபி தும்ஹாகம் வாதோ³தி யோஜனா. ‘‘விஞ்ஞூஹீ’’தி பத³ம் ‘‘க³ரஹிதப்³ப³’’இதி பதே³ கத்தா. ‘‘க³ரஹிதப்³ப³காரண’’ந்தி பத³ம் ‘‘ந ஆக³ச்ச²தீ’’தி பதே³ கம்மம். அனப்³ப⁴க்கா²துகாமாதி ஏத்த² அபி⁴த்யூபஸக்³கோ³ அபி⁴ப⁴வனத்தோ² ஆபுப்³போ³ கா²தா⁴து பகத²னத்தோ²தி ஆஹ ‘‘அபி⁴ப⁴வித்வா ந ஆசிக்கி²துகாமா’’தி.

293. அனுவிச்சகாரந்தி ஏத்த² அனுவிச்சஸத்³தோ³ விசதா⁴து த்வாபச்சயந்தோதி ஆஹ ‘‘அனுவிசித்வா’’தி. ‘‘சிந்தேத்வா’’தி இமினா விசதா⁴துயா ஞாணத்த²ம் த³ஸ்ஸேதி. ‘‘காதப்³ப³’’ந்தி இமினா காதப்³ப³ந்தி காரந்தி வசனத்த²ம் த³ஸ்ஸேதி. படாகந்தி த⁴ஜபடாகம். ‘‘ஆஹிண்டே³ய்யு’’ந்தி இமினா பரியாயேய்யுந்தி ஏத்த² பரிபுப்³ப³ஆபுப்³ப³ யாதா⁴துயா க³த்யத்த²ம் த³ஸ்ஸேதி. பாளியம் ‘‘பரிஹரேய்யு’’ந்திபி பாடோ². ஆஹிண்டே³ய்யுந்தி ஆஹிண்ட³ந்தி. முத்³த⁴ஜோ ததியக்க²ரோ. ஓபானபூ⁴தந்தி ஏத்த² ஓபானோ விய பூ⁴தோ ஓபானபூ⁴தோதி அத்த²ம் த³ஸ்ஸேந்தோ ஆஹ ‘‘படியத்தஉத³பானோ விய டி²த’’ந்தி. ‘‘உத³பானோ’’தி இமினா ஓபானஸத்³தோ³ உத³பானத்தோ²தி த³ஸ்ஸேதி. உத³பானோ ஹி ஸப்³பே³ ஜனா ஓஸரித்வா பிவந்தி ஏத்தா²தி ஓபானோதி வுச்சதி. இமேஸந்தி நிக³ண்டா²னம். ஹீதி ஸச்சம், யஸ்மா வா. ஸம்பத்தானம் தா³னம் தா³தப்³ப³மேவ, தஸ்மா மா உபச்சி²ந்தி³த்தா²தி யோஜனா. உத்³தி³ஸ்ஸாதி த்வாபச்சயந்தஸத்³தோ³ ‘‘கத’’ந்தி உத்தரபதே³ன ஸமாஸோதி ஆஹ ‘‘உத்³தி³ஸித்வா கத’’ந்தி. ஏஸேவ நயோ ‘‘படிச்சகம்ம’’ந்தி ஏத்தா²பி.

294. படிச்சகம்மந்தி ஏதம் நாமம் நிமித்தகம்மஸ்ஸ அதி⁴வசனந்தி யோஜனா. யோதி யோ கோசி ஜனோ. வத⁴கஸ்ஸ பாணகா⁴தகம்மம் ஹோதி விய, தஸ்ஸாபி ஹோதீதி யோஜனா. ந ஜீரந்தீதி ஏத்த² ஜரதா⁴து க³த்யத்தோ²தி ஆஹ ‘‘ந க³ச்ச²ந்தீ’’தி.