179. கப்பியபூ⁴மிஅனுஜானனகதா²

295. ப³ஹாராமகோட்ட²கேதி ஏத்த² ஸமீபத்தே² பு⁴ம்மவசனந்தி ஆஹ ‘‘ப³ஹாராமகோட்ட²கஸமீபேதி ஆராமகோட்ட²கஸ்ஸ ப³ஹி ஸமீபேதி அத்தோ²’’தி. அச்ச²ந்தீதி வஸந்தி. ஏதந்தி ‘‘பச்சந்திம’’ந்தி ஏதம் வசனம். து⁴ரவிஹாரோபீதி பதா⁴னவிஹாரோபி. தத்த² தத்தா²தி தஸ்மிம் தஸ்மிம் டா²னே. அனுபகே³யேவாதி பாதோயேவ. ஓரவஸத்³த³ந்தி உச்சரவஸங்கா²தம் ஸத்³த³ம். கபிலஸுத்தபரியோஸானேதி ஸுத்தனிபாதே (ஸு. நி. அட்ட². 2.கபிலஸுத்தவண்ணனா) ஸங்க³ஹிதஸ்ஸ கபிலஸுத்தஸ்ஸ பரியோஸானே. பஞ்சஸதானம் கேவட்டபுரிஸானந்தி ஸம்ப³ந்தோ⁴.

உஸ்ஸாவனந்திகாதீ³ஸு ஏவம் வினிச்ச²யோ வேதி³தப்³போ³தி யோஜனா. யோ விஹாரோ கரியதீதி ஸம்ப³ந்தோ⁴. பூ⁴மியா க³தி விய க³தி ஏதேஸந்தி பூ⁴மிக³திகா. பதிட்டா²பேந்தேஹி ப³ஹூஹி பி⁴க்கூ²ஹி பதிட்டா²பேதப்³போ³தி ஸம்ப³ந்தோ⁴. நிச்சா²ரேந்தேஹி பி⁴க்கூ²ஹீதி யோஜனா. ஸயந்தி பி⁴க்கு². தம் பனாதி ‘‘ஸங்க⁴ஸ்ஸ கப்பியகுடிம் அதி⁴ட்டா²மீ’’தி வசனம் பன. அவத்வாபீதி பிஸத்³தோ³ ததா² ‘‘வத்வாபீ’’தி அத்த²ம் ஸம்பிண்டே³தி. அட்ட²கதா²ஸூதி மஹாஅட்ட²கதா²தீ³ஸு தீஸு அட்ட²கதா²ஸு. ஏத்தா²தி உஸ்ஸாவனந்திககுடியம். ‘‘ஸமகாலம் வட்டதீ’’தி வசனம் த³ள்ஹீகரோந்தோ ஆஹ ‘‘ஸசே ஹீ’’திஆதி³. வசனேதி ‘‘கப்பியகுடிம் கரோமா’’தி வசனே. தஸ்மிந்தி த²ம்பே⁴. தேனேவாதி அகதபா⁴வேனேவ. ஹீதி ஸச்சம். ஏத்தா²தி ப³ஹூஸு.

யதோதி இட்ட²கஸிலாமத்திகாபிண்ட³தோ. வுத்தனயேனேவாதி ‘‘ப³ஹூஹி ஸம்பரிவாரேத்வா கப்பியகுடிம் கரோமா’’தி வுத்தனயேனேவ. இட்ட²காத³யோதி ‘‘கப்பியகுடிம் கரோமா’’தி அதி⁴ட்டா²தப்³ப³இட்ட²காத³யோ. அந்த⁴கட்ட²கதா²யம் வுத்தந்தி ஸம்ப³ந்தோ⁴. ததா²தி யதா² அந்த⁴கட்ட²கதா²யம் வுத்தம், ததா². த²ம்பா⁴தீ³னி உக்கி²பித்வா பதிட்டா²பனஞ்ச ‘‘கப்பியகுடிம் கரோமா’’தி ஸாவனஞ்ச அந்தம் பரியோஸானமேதிஸ்ஸாதி உஸ்ஸாவனந்திகா.

தாஸூதி த்³வீஸு கோ³னிஸாதி³காஸு. யத்தா²தி குடியம். நேவ ஆராமோ பரிக்கி²த்தோ ஹோதீதி ஸம்ப³ந்தோ⁴. புன யத்தா²தி குடியம். அயந்தி குடி. உப⁴யத்தா²பீதி ஆராமவிஹாரகோ³னிஸாதி³காஸு த்³வீஸுபி. ப³ஹுதரம் பரிக்கி²த்தோபி பரிக்கி²த்தோயேவ நாமாதி யோஜனா. ஏத்தா²தி உபட்³ட⁴பரிக்கி²த்தப³ஹுதரபரிக்கி²த்தஆராமே. கா³வோ பவிஸித்வா யதா²ஸுக²ம் நிஸீத³ந்தி ஏத்தா²தி கோ³னிஸாதா³ கோ³ஸாலா. கோ³னிஸாதா³ வியாதி கோ³னிஸாதி³கா குடி.

மனுஸ்ஸா வத³ந்தீதி ஸம்ப³ந்தோ⁴. ஏஸாதி குடி. வுத்தேபீதி பிஸத்³தே³, ‘‘கப்பியகுடிம் தே³மா’’தி வாக்யம் அபேக்க²தி. அந்த⁴கட்ட²கதா²யம் வுத்தந்தி ஸம்ப³ந்தோ⁴. யஸ்மா வட்டதி, தஸ்மாதி யோஜனா. தேஸந்தி ஸேஸஸஹத⁴ம்மிகதே³வமனுஸ்ஸானம். தேஹீதி ஸேஸஸஹத⁴ம்மிகதே³வமனுஸ்ஸேஹி. புனபி வுத்தம், கிம் வுத்தந்தி ஆஹ ‘‘பி⁴க்கு²ஸ்ஸ…பே… ஹோதீ’’தி. அபீதி தத³ஞ்ஞேஸம். தந்தி வசனம். ஹீதி ஸச்சம், யஸ்மா வா. ஸங்க⁴ஸ்ஸ ஸந்தகமேவ வா பி⁴க்கு²ஸ்ஸ ஸந்தகமேவ வாதி யோஜனா. இதி தஸ்மா ஸுவுத்தந்தி ஸம்ப³ந்தோ⁴. க³ஹபதீனம் ஸந்தகம் க³ஹபதி குடி. ‘‘கம்மவாசம் ஸாவேத்வா’’தி இத³ம் உபலக்க²ணமத்தம் கம்மவாசமவத்வா அபலோகனேனபி கப்பியத்தா. கம்மவாசாய வா அபலோகனேன வா ஸம்மனிதப்³பா³தி ஸம்முதி குடி. இதிஸத்³தோ³ பரிஸமாபனத்தோ².

யம் ஆமிஸம் வுத்த²ம், ஸப்³ப³ம் தம் ஆமிஸந்தியோஜனா. அகப்பியபூ⁴மியம் ஸஹஸேய்யபஹோனகே கே³ஹே வுத்த²ம் ட²பிதந்தி ஸம்ப³ந்தோ⁴. யம் பன ஸங்கி⁴கம் வா புக்³க³லிகம் வா அத்தீ²தி யோஜனா. தேஸம்யேவாதி பி⁴க்கு²பி⁴க்கு²னீனமேவ. ஏகரத்தம்பி ட²பிதம் யம் ஸந்தகம் அத்தீ²தி யோஜனா. தந்தி ஸங்கி⁴காதி³. தத்தா²தி அகப்பியபூ⁴மியம் ஸஹஸேய்யபஹோனககே³ஹே. ஏதந்தி அந்தோவுத்த²அந்தோபக்கஸங்கா²தம் யாவயாமகாலிகம், ‘‘ந கப்பதீ’’தி ப்³யதிரேகஸ்ஸ அன்வயம் த³ஸ்ஸேந்தோ ஆஹ ‘‘ஸத்தாஹகாலிகம் பனா’’திஆதி³.

தத்ராதி புரிமவசனாபேக்க²ம். தத்ர வசனேதி ஹி அத்தோ². ஸாமணேரோ தே³தீதி ஸம்ப³ந்தோ⁴. யம்கிஞ்சி தண்டு³லாதி³கம் ஆமிஸந்தி யோஜனா. முக²ஸன்னிதி⁴ நாமாதி ஆபத்தியா முகோ² உபாயோ ஸன்னிதி⁴ நாமாதி அத்தோ². தத்தா²தி மஹாபச்சரியம், முக²ஸன்னிதி⁴அந்தோவுத்தே²ஸு வா. பி⁴க்கு² பசித்வா பரிபு⁴ஞ்ஜதீதி ஸம்ப³ந்தோ⁴. ஆமிஸஸம்ஸட்ட²ந்தி ஆமிஸேன ஸம்ஸக்³க³ம்.

ஜஹிதவத்து²காதி ஜஹிதம் வத்து² ஏதாஸந்தி ஜஹிதவத்து²கா. உஸ்ஸாவனந்திகா கதாதி ஸம்ப³ந்தோ⁴. ஸாதி உஸ்ஸாவனந்திகா. யோ யோதி த²ம்போ⁴ வா பி⁴த்திபாதோ³ வா. இட்ட²காதீ³ஹி கதா உஸ்ஸாவனந்திகாதி யோஜனா. சயஸ்ஸாதி அதி⁴ட்டா²னஸ்ஸ. யேஹி பன இட்ட²காதீ³ஹீதிஆதி³ஸத்³தே³ன த²ம்ப⁴ஸிலாமத்திகாயோ ஸங்க³ண்ஹாதி. தத³ஞ்ஞேஸூதி தேஹி அதி⁴ட்டி²தஇட்ட²காதீ³ஹி அஞ்ஞேஸு.

பாகாராதி³பரிக்கே²பேதி உபசாரஸீமாபரிச்சி²ன்னஸ்ஸ ஆராமஸ்ஸ பாகாராதி³னா பரிக்கே²பே கதே. பாகாராதீ³தி ஆதி³ஸத்³தே³ன வதிம் ஸங்க³ண்ஹாதி. கப்பியகுடிம் லத்³து⁴ம் வட்டதீதி கோ³னிஸாதி³காய அபா⁴வேன ஸேஸாஸு தீஸு கப்பியகுடீஸு யம்கிஞ்சி கப்பியகுடிம் லத்³து⁴ம் வட்டதீதி அத்தோ². தத்த² தத்தா²தி தஸ்மிம் தஸ்மிம் டா²னே. இதரா பனாதி உஸ்ஸாவனந்திககோ³னிஸாதி³காஹி அஞ்ஞா. த்³வேதி உபோ⁴ க³ஹபதிஸம்முதியோ, ஜஹிதவத்து²காவ ஹோந்தீதி ஸம்ப³ந்தோ⁴. பக்க²பாஸகமண்ட³லந்தி த்³வே பக்கே² அபதனத்தா²ய பஸதி ப³ந்த⁴தீதி பக்க²பாஸகோ, மண்ட³லந்தி ச²த³னகோடிகோ³பானஸீனம் உபரி ட²பிதகட்ட²விஸேஸோ, பக்க²பாஸகோ ச மண்ட³லஞ்ச பக்க²பாஸகமண்ட³லம்.

யத்ராதி யஸ்மிம் டா²னே. அனுபஸம்பன்னஸ்ஸ த³த்வாதி அனபேக்க²விஸ்ஸஜ்ஜனேன அனுபஸம்பன்னஸ்ஸ த³த்வா. சீவரவிகப்பனம் விய ஸாபேக்க²விஸ்ஸஜ்ஜனம்பி வட்டதீதி வத³ந்தி. தத்ராதி புரிமவசனாபேக்க²ம். ஸோதி கரவீகதிஸ்ஸத்தே²ரோ, பஸ்ஸித்வா புச்சீ²தி ஸம்ப³ந்தோ⁴. தே²ரோதி மஹாஸிவத்தே²ரோ. லூக²தி³வஸேதி அஸினித்³த⁴தி³வஸே. ததோதி ப்³ரவனதோ, பரந்தி ஸம்ப³ந்தோ⁴. நந்தி மஹாஸிவத்தே²ரம். பமுகே²தி க³ப்³ப⁴ஸ்ஸ பமுகே². தந்தி ஸப்³பி³கும்பி⁴ம். ப³ஹீதி விஹாரஸ்ஸ ப³ஹி. ஸோதி மஹாஸிவத்தே²ரோ.