153. யானாதி³படிக்கே²பகதா²

253. இத்தி²யுத்தேனாதி ஏத்த² ரூளீவஸேன தே⁴னுபி இத்தீ² நாமாதி ஆஹ ‘‘தே⁴னுயுத்தேனா’’தி. புரிஸந்தரேனாதி ஏத்த² புரிஸோ ஏவ அந்தரோ அஞ்ஞோ ஏத்தா²தி புரிஸந்தரம் யானம். புரிஸந்தரோ நாம அத்த²தோ ஸாரதீ²தி ஆஹ ‘‘புரிஸஸாரதி²னா’’தி, யானேனாதி யோஜனா. க³ங்கா³மஹியாயாதி ஏத்த² க³ங்கா³ ச மஹீ ச க³ங்கா³மஹீ, தத்த² கீளிகா க³ங்கா³மஹியாதி அத்த²ம் த³ஸ்ஸேந்தோ ஆஹ ‘‘க³ங்கா³மஹீகீளிகாயா’’தி. தத்த² ஹி இத்தி²புரிஸா யானேஹி உத³ககீளம் கீளந்தி. புரிஸயுத்தம் ஹத்த²வட்டகந்தி ஏத்த² ‘‘அனுஜானாமி பி⁴க்க²வே புரிஸயுத்தஞ்ச ஹத்த²வட்டகஞ்சா’’தி த³ஸ்ஸேந்தோ ஆஹ ‘‘ஏத்தா²’’திஆதி³. தத்த² புரிஸயுத்தந்தி புரிஸேன யுஜ்ஜிதப்³ப³ந்தி புரிஸயுத்தம் யானம். ஹத்த²வட்டகந்தி ஹத்தே²ன வட்டேதப்³ப³ந்தி ஹத்த²வட்டகம் யானம். யானுக்³கா⁴தேனாதி யானஸ்ஸ உல்லங்கி⁴த்வா க³மனேன. ஹனதா⁴து ஹி க³த்யத்தோ². தமத்த²ம் த³ஸ்ஸேந்தோ ஆஹ ‘‘யானம் அபி⁴ருஹந்தஸ்ஸா’’திஆதி³. ‘‘தப்பச்சயா’’தி இமினா யானுக்³கா⁴தேனாதி ஏத்த² ஹேத்வத்தே² கரணவசனந்தி த³ஸ்ஸேதி. பீட²கஸிவிகந்தி பீடே²ன ஸஹ கதம் ஸிவிகம். படபோடலிகந்தி படமயம் போடலிகம்.