154. உச்சாஸயனமஹாஸயனபடிக்கே²பகதா²

254. உச்சம் ஆஸயனம் உச்சாஸயனம். மஹந்தம் ஆஸயனம் மஹாஸயனம். ஆஸந்தி³ஆதீ³ஸு ஏவம் வினிச்ச²யோ வேதி³தப்³போ³தி யோஜனா. பமாணாதிக்கந்தாஸனந்தி தீ³கா⁴ஸனம். தஞ்ஹி ஆக³ம்ம ஸத³தி நிஸீத³தீதி ஏத்த², ஆயதம் வா ஸுட்டு²ம் த³தா³தீதி ஆஸந்தீ³தி வுச்சதி. வாளரூபானீதி ஸீஹப்³யக்³கா⁴தி³வாளரூபானி. பாதே³ஸு வாளரூபானி பரிச்சி²ந்தி³த்வா அங்கீயதி லக்கீ²யதீதி பல்லங்கோ. கோ³னகோதி க³வதி தீ³க⁴லோமேஹி உக்³க³ச்ச²தி ஏத்தா²தி கோ³னகோ. கோஜவோதி குயம் பூ⁴மியம் ஜவதி க³ச்ச²தீதி கோஜவோ. தஸ்ஸாதி கோ³னகஸ்ஸ. லோமானி சதுரங்கு³லாதி⁴கானி ஹோந்தி கிராதி யோஜனா. வானசித்ரஉண்ணாமயத்த²ரணோதி வானேன ஸிப்³ப³னேன ஸஞ்ஜாதம் சித்ரரூபமேத்தா²தி வானசித்ரம், உண்ணாய நிப்³ப³த்தோ உண்ணாமயோ, ஸோயேவ அத்த²ரணோ உண்ணாமயத்த²ரணோ, வானசித்ரஞ்ச தம் உண்ணாமயத்த²ரணோ சேதி வானசித்ரஉண்ணாமயத்த²ரணோ. ஸேதத்த²ரணோதி ஸேதத்தி²கேஹி ஸேவீயதீதி ஸோதோ, ஸோயேவ அத்த²ரணோ ஸேதத்த²ரணோ. இமினா அத்தே²ன படதி ஸேதபா⁴வம் க³ச்ச²தீதி படிகாதி காதப்³ப³ம். படிகாஸத்³தோ³யம் அட்³டே⁴ந்து³பாஸாணேபி பவத்ததி. க⁴னபுப்ப²கோதி க⁴னம் கதி²னம் புப்ப²மேத்தா²தி க⁴னபுப்ப²கோ. இமினா க⁴னபுப்ப²ஸங்கா²தம் படலமேத்த² அத்தீ²தி படலிகாதி த³ஸ்ஸேதி. ஸோதி அத்த²ரணோ. ஆமலகபடோதி ஆமலகபுப்ப²ம் த³ஸ்ஸேத்வா கதோ படோ. தூலிகாதி தூலம் பூரேத்வா கதா தூலிகா. விகதிகாதி ஸீஹப்³யக்³கா⁴தி³ரூபேஹி (தீ³. நி. அட்ட². 1.15) விசித்தாகாரேன கரீயதீதி விகதிகா. தீ³க⁴னிகாயட்ட²கதா²யம் ‘‘உத்³த³லோமீதி உப⁴தோத³ஸம் உண்ணாமயத்த²ரணம். ஏகந்தலோமீதி ஏகதோத³ஸம் உண்ணாமயத்த²ரண’’ந்தி வுத்தம். இத⁴ பன ‘‘உத்³த³லோமீதி ஏகதோ உக்³க³தலோமம் உண்ணாமயத்த²ரணம், ஏகந்தலோமீதி உப⁴தோ உக்³க³தலோமம் உண்ணாமயத்த²ரண’’ந்தி வுத்தம். தஸ்மா த்³வே அட்ட²கதா²யோ அஞ்ஞமஞ்ஞம் விஸதி³ஸா ஹோந்தி. ஏத்த² தீ³க⁴னிகாயட்ட²கதா²னயேன வசனத்த²ம் கரிஸ்ஸாமி. உட்டி²தம் த்³வீஹி பக்கே²ஹி, த்³வீஸு வா த³ஸாஸங்கா²தம் லோமமேத்தா²தி உத்³த³லோமீ. நிக்³க³ஹிதாக³மம் கத்வா ‘‘உந்த³லோமீ’’திபி பாடோ², அயமேவத்தோ². ஏகஸ்மிம் அந்தே த³ஸாஸங்கா²தம் லோமமேத்தா²தி ஏகந்தலோமீதி. கோஸேய்யகட்டிஸ்ஸமயந்தி ஏத்த² கோஸேய்யந்தி கோஸியஸுத்தம். கட்டிஸ்ஸந்தி கட்டிஸ்ஸனாமகம் வாகம். இமினா கோஸேய்யஞ்ச கட்டிஸ்ஸஞ்ச கட்டிஸ்ஸானீதி விரூபேகஸேஸம் கத்வா கட்டிஸ்ஸேஹி பகதம் அத்த²ரணம் கட்டிஸ்ஸந்தி அத்த²ம் த³ஸ்ஸேதி. ஸுத்³த⁴கோஸேய்யந்தி ரதனஅபரிஸிப்³பி³தம் ஸுத்³த⁴கோஸேய்யம். இமினா ஸுத்³த⁴கட்டிஸ்ஸம்பி வட்டதீதி த³ஸ்ஸேதி.

ஸோளஸ நாடகித்தி²யோ ட²த்வா நச்சம் கரோந்தி ஏத்தா²தி குத்தகந்தி அத்த²ம் த³ஸ்ஸேந்தோ ஆஹ ‘‘ஸோளஸன்ன’’ந்திஆதி³. அஜினசம்மேஹீதி அஜினமிக³சம்மேஹி, கதஇதி ஸம்ப³ந்தோ⁴. பவேணீதி து³பட்டதிபட்டாதீ³ஹி பரம்பரவஸேன கதத்தா ‘‘பவேணீ’’தி வுச்சதி. அஜினசம்மானி ஹி ஸுகு²மதரானி, தஸ்மா து³பட்டதிபட்டாதீ³னி கத்வா பவேணிவஸேன கதானி. தஸ்மா வுத்தம் ‘‘அஜினபவேணீ’’தி. ‘‘கத³லிமிக³சம்மம் நாமா’’தி இமினா தஸ்ஸ சம்மம் கத³லிமிக³இதி க³ஹேதப்³ப³ம் உத்தரபத³லோபவஸேன வா உபசாரேன வாதி த³ஸ்ஸேதி. பவரஸத்³தோ³ உத்தமத்தோ²தி ஆஹ ‘‘உத்தமபச்சத்த²ரண’’ந்தி. தந்தி கத³லிமிக³பவரபச்சத்த²ரணம். ஸஉத்தரச்ச²த³ந்தி ஏத்த² ஸகாரோ ஸஹஸத்³த³காரியோதி த³ஸ்ஸேந்தோ ஆஹ ‘‘ஸஹ உத்தரச்ச²தே³னா’’தி. ‘‘உபரீ’’தி இமினா உத்தரஸத்³த³ஸ்ஸ ஸேட்டா²த³யோ நிவத்தேதி. ‘‘ஸத்³தி⁴’’ந்தி இமினா ஸஹஸத்³த³ஸ்ஸ துல்யத்த²ம் நிவத்தேதி. ‘‘ஸேத…பே… ந வட்டதீ’’தி இமினா ரத்தவிதானம் ஹேட்டா² கப்பியபச்சத்த²ரணே ஸதிபி ந வட்டதீதி த³ஸ்ஸேதி. கஸ்மா? ரத்தவிதானஸ்ஸ அகப்பியத்தா. உப⁴தோலோஹிதகூபதா⁴னந்தி ஏத்த² உப⁴ஸரூபம் த³ஸ்ஸேதும் வுத்தம் ‘‘ஸீஸூபதா⁴னஞ்ச பாதூ³பதா⁴னஞ்சா’’தி. ஸீஸோ உபக³ந்த்வா திட்ட²தி ஏத்தா²தி உபதா⁴னம், உப பு⁴ஸம் வா ஸுக²ம் தா⁴ரேதீதி உபதா⁴னம், பி³ப்³போ³ஹனம். ஸசே பமாணயுத்தம், தம் உபதா⁴னம் வட்டதீதி யோஜனா.