151. அஜ்ஜா²ராமே உபாஹனபடிக்கே²பகதா²

248. ‘‘யேன ஸிப்பேனா’’திஆதி³னா அபி⁴ அதி⁴கம் ஜீவந்தி அனேனாதி அபி⁴ஜீவனம், கிம்தம்? ஸிப்பந்தி அத்த²ம் த³ஸ்ஸேதி. தஸ்ஸாதி ஸிப்பஸ்ஸ. இதா⁴தி இமஸ்மிம் ஸாஸனே. யம்ஸத்³தோ³ வசனவிபல்லாஸோதி ஆஹ ‘‘யே தும்ஹே’’தி. ஹீதி ஸச்சம். யம்னிபாதோதி யம்இதி நிபாதோ யதி³ஸத்³த³ஸ்ஸ அத்தே² பவத்ததீதி யோஜனா. ஆசரியா ஏவாதி ஏவஸத்³தே³ன ஆசரியமத்தபா⁴வம் படிக்கி²பதி. ஹீதி ஸச்சம். ஸோதி அவஸ்ஸிகோ. தந்தி ச²ப்³ப³ஸ்ஸம். நிஸ்ஸாய வச்ச²தீதி அவஸ்ஸிகஸ்ஸ சதுவஸ்ஸகாலே ச²ப்³ப³ஸ்ஸஸ்ஸ த³ஸவஸ்ஸிகத்தா தம் நிஸ்ஸாய வஸதி. உபஜ்ஜா²யமத்தம் த³ஸ்ஸேந்தோ ஆஹ ‘‘உபஜ்ஜா²யஸ்ஸா’’திஆதி³. மஹந்ததராதி அத்தனோ வுட்³ட⁴தரா. உபஜ்ஜா²யஸ்ஸ மத்தம் பமாணமேதேஸந்தி உபஜ்ஜா²யமத்தா.

249. பாத³தோ நிக்க²ந்தேன கீ²லஸதி³ஸேன மம்ஸேன பவத்தோ ஆபா³தோ⁴ பாத³கீ²லாபா³தோ⁴தி வசனத்த²ம் த³ஸ்ஸேந்தோ ஆஹ ‘‘பாத³தோ’’திஆதி³. பாத³தோ நிக்க²ந்தந்தி ஸம்ப³ந்தோ⁴.

251. திணபாது³காதிஆதீ³ஸு திணேன கதா பாது³கா திணபாது³காதி வசனத்தா²தி³ம் த³ஸ்ஸேந்தோ ஆஹ ‘‘யேன கேனசி திணேனா’’திஆதி³. தம் ஸுவிஞ்ஞேய்யமேவ. ‘‘பூ⁴மியம் ஸுப்பதிட்டி²தாதி’’ஆதி³னா ந ஸங்கமிதப்³பா³தி அஸங்கமனீயாதி அத்த²ம் த³ஸ்ஸேதி.

252. அங்க³ஜாதேனேவாதி அத்தனோ அங்க³ஜாதேன ஏவ. அங்க³ஜாதந்தி கா³வீனம் அங்க³ஜாதம். ஓகா³ஹேத்வாதி ஏத்த² ஓத்யூபஸக்³கோ³ த³ள்ஹத்தோ²தி ஆஹ ‘‘த³ள்ஹம் க³ஹேத்வா’’தி.