3. வஸ்ஸூபனாயிகக்க²ந்த⁴கம்

107. வஸ்ஸூபனாயிகானுஜானனகதா²

184. வஸ்ஸூபனாயிகக்க²ந்த⁴கே ‘‘அனனுஞ்ஞாதோ’’தி இமினா அபஞ்ஞத்தோதி ஏத்த² ஞாதா⁴துயா அனுஜானனத்த²ம் த³ஸ்ஸேதி, ‘‘அஸம்விஹிதோ’’தி இமினா ஞாதா⁴துயா ட²பனத்த²ம். தேதா⁴தி தே இத⁴. இத⁴ஸத்³தோ³ ஸாஸனஞ்ச லோகஞ்ச தே³ஸஞ்ச பத³பூரணஞ்ச உபாதா³ய வத்ததி, இத⁴ பன பத³பூரணேதி த³ஸ்ஸேந்தோ ஆஹ ‘‘இத⁴ஸத்³தோ³ நிபாதமத்தோ’’தி. ஸம்ஹனனம் ஸங்கா⁴தோ, வினாஸோதி அத்தோ². இதி இமமத்த²ம் த³ஸ்ஸேதி ‘‘வினாஸ’’ந்தி இமினா. ஸகுந்தகஸத்³தோ³ ஸகுணபரியாயோதி ஆஹ ‘‘ஸகுணா’’தி. ஸகுணாதி ச விஹங்க³மா. தே ஹி ஆகாஸே க³ந்தும் ஸக்கோந்தீதி ஸகுணாதி வுச்சந்தி. ஸம்கஸாயிஸ்ஸந்தீதி ஏத்த² ‘‘ஸம் கஸே அச்ச²னே’’தி தா⁴துபாடே²ஸு (ஸத்³த³னீதிதா⁴துமாலாயம் 16 ஸகாரந்ததா⁴து) வுத்தத்தா ஸம்புப்³போ³ கஸேதா⁴து அச்ச²னத்தோ²தி ஆஹ ‘‘வஸிஸ்ஸந்தீ’’தி. ஏகாரந்தோயம் தா⁴து. நிப³த்³த⁴வாஸந்தி நிச்சவாஸம். வஸ்ஸானனாமகேதி வஸ்ஸானஉதுனாமகே. வஸ்ஸானஸ்ஸ சதுமாஸத்தா ‘‘தேமாஸே’’தி வுத்தம். வஸ்ஸூபனாயிகாதி ஏத்த² நீதா⁴து க³மனத்தோ²தி ஆஹ ‘‘வஸ்ஸூபக³மனானீ’’தி. அபரஜ்ஜூதி புண்ணமிதோ அபரம் அஹந்தி அபரஜ்ஜு, அஹத்தே² ஜ்ஜுபச்சயோ, அத்த²தோ பாடிபத³தி³வஸோ. அயம் அபரஜ்ஜுஸத்³தோ³ பட²மந்தனிபாதோ. அஸ்ஸாதி ஆஸள்ஹீபுண்ணமியா. அஸமானாதி⁴கரணவிஸயோ பா³ஹிரத்த²ஸமாஸோயம், அதிக்கந்தாய ஸதியாதி யோஜனா. அபரஸ்மிம் தி³வஸேதி பாடிபத³தி³வஸே. அஸ்ஸாதி ஸாவணமாஸபுண்ணமியா. தஸ்மாதி யஸ்மா ச அபரஜ்ஜுக³தா, யஸ்மா ச மாஸக³தா, தஸ்மா. ‘‘அனந்தரே பாடிபத³தி³வஸே’’தி இமினா பாளியம் அபரஜ்ஜுக³தாய ஆஸள்ஹியா அனந்தரே பாடிபத³தி³வஸே புரிமிகா உபக³ந்தப்³பா³தி அத்த²ம் த³ஸ்ஸேதி. ஆஸள்ஹியாதி ஆஸள்ஹீபுண்ணமியா. பச்சி²மனயேபி மாஸக³தாய ஆஸள்ஹியா அனந்தரே பாடிபத³தி³வஸே பச்சி²மிகா உபக³ந்தப்³பா³தி அத்தோ² த³ட்ட²ப்³போ³. ஆஸள்ஹியாதி ஆஸள்ஹீபுண்ணமியா ஸமீபே பவத்தத்தா ஆஸள்ஹீஸங்கா²தாய ஸாவணபுண்ணமியாதி அத்தோ². பாடிபத³தி³வஸேயேவ வஸ்ஸம் உபக³ந்தப்³ப³ந்தி ஸம்ப³ந்தோ⁴. ஸகிம் வாதிஆதீ³ஸு வாஸத்³தோ³ அனியமவிகப்பத்தோ². நிச்சா²ரேத்வாதி நிச்சாரேத்வா, உச்சாரேத்வாதி அத்தோ². அபு²ட்ட²க்க²ரஸஞ்ஞோகே³ஹி பரோ க்வசி பு²ட்ட²த்தமாபஜ்ஜதி ‘‘நிக்க²மதீ’’திஆதீ³ஸு விய. தஸ்மா பரஸ்ஸ சகாரஸ்ஸ ச²காரம் கத்வா ‘‘நிச்சா²ரேத்வா’’தி வுத்தம்.

108. வஸ்ஸானேசாரிகாபடிக்கே²பாதி³கதா²

185. ஆபத்தி வேதி³தப்³பா³தி அனபேக்க²க³மனேன உபசாராதிக்கமே ஸாபேக்க²க³மனேன அஞ்ஞத்த² அருணுட்டா²பனே ஆபத்தி வேதி³தப்³பா³. விஹாரக³ணனாய ஆபத்தியோ வேதி³தப்³பா³தி ஏத்த² வஸ்ஸூபனாயிகதி³வஸே வஸ்ஸம் அனுபக³ந்துகாமதாசித்தேன விஹாரம் அதிக்கமேய்ய, விஹாரக³ணனாய ஆபத்தியோ வேதி³தப்³பா³. தமேவத்த²ம் வித்தா²ரேந்தோ ஆஹ ‘‘ஸசே ஹீ’’திஆதி³. தம் தி³வஸந்தி தஸ்மிம் வஸ்ஸூபக³மனதி³வஸே. ஸதம் ஆபத்தியோதி ஏத்த² ஸதந்தி ஸங்க்²யாபதா⁴னத்தா ஏகவசனந்தி ஸத்³த³ஸத்தே²ஸு வுத்தம். ஏகா ஏவ ஆபத்தீதி அத்தனோ விஹாரஸ்ஸ அதிக்கமனேயேவ ஏகா ஏவ ஆபத்தி. கேனசி அந்தராயேன அனுபக³தேனாதி ஸம்ப³ந்தோ⁴.

வஸ்ஸனாமோ இமஸ்ஸத்தீ²தி வஸ்ஸோதி வசனத்த²ம் த³ஸ்ஸேந்தோ ஆஹ ‘‘வஸ்ஸனாமக’’ந்தி. ‘‘பட²மம் மாஸ’’ந்தி இமினா அஞ்ஞபத³ஸ்ஸ ஸரூபம் த³ஸ்ஸேதி. பட²மம் மாஸந்தி சதூஸு வஸ்ஸமாஸேஸு பட²மம் மாஸம். உக்கட்³டி⁴துகாமோதி உபரி கட்³டி⁴துகாமோ. ஆஸள்ஹீமாஸமேவ, ந ஸாவணமாஸந்தி அத்தோ². ஜுண்ஹஸத்³தோ³ சந்த³பபா⁴யுத்தோ மாஸோதி ஆஹ ‘‘மாஸே’’தி. சந்த³பபா⁴யுத்தோ மாஸோதி ஆஹ ‘‘மாஸே’’தி. சந்த³பபா⁴யுத்தோ ஹி மாஸோ ஜோததி தி³ப்பதீதி ஜுண்ஹோதி வுச்சதி. தஸ்மா ‘‘மாஸே’’தி ஸாமஞ்ஞதோ வுத்தேபி புண்ணமியுத்தோ மாஸோவ க³ஹேதப்³போ³. காசி பரிஹானி நாமாதி கிஞ்சி ஸீலாதீ³னம் ஹாயனம் நாம. அஞ்ஞஸ்மிம்பீதி வஸ்ஸூபக³மனதோ அஞ்ஞஸ்மிம்பி. த⁴ம்மிகேதி த⁴ம்மேன யுத்தே.

109. ஸத்தாஹகரணீயானுஜானனகதா²

187. ஸத்தாஹகரணீயேஸு ஏவம் வினிச்ச²யோ வேதி³தப்³போ³தி யோஜனா. ‘‘ஸத்தாஹகரணீயேனா’’தி பத³ஸ்ஸ ஸத்தமீஸமாஸஞ்ச அனீயஸத்³த³ஸ்ஸ கம்மத்த²ஞ்ச த³ஸ்ஸேந்தோ ஆஹ ‘‘ஸத்தாஹப்³ப⁴ந்தரே யம் கத்தப்³ப³’’ந்தி. தத்த² ‘‘ஸத்தாஹப்³ப⁴ந்தரே’’தி இமினா ஸத்தமீஸமாஸம் த³ஸ்ஸேதி, ‘‘கத்தப்³ப³’’ந்தி இமினா கம்மத்த²ம். ‘‘ஸத்தாஹப்³ப⁴ந்தரே’’தி இமினா ஸத்தாஹஸ்ஸ அப்³ப⁴ந்தரம் ஸத்தாஹந்தி உத்தரபத³லோபம் த³ஸ்ஸேதி. பஹிதே க³ந்துந்தி ஏத்த² பஹிதேஸத்³த³ஸ்ஸ கத்துகம்மானி த³ஸ்ஸேதும் வுத்தம் ‘‘பி⁴க்கு²ஆதீ³ஹி தூ³தே’’தி. தத்த² ‘‘பி⁴க்கு²ஆதீ³ஹீ’’தி இமினா கத்தாரம் த³ஸ்ஸேதி, ‘‘தூ³தே’’தி இமினா கம்மம். ஸத்தாஹந்தி ஏத்த² உத்தரபத³லோபஞ்ச பு⁴ம்மத்தே² உபயோக³வசனஞ்ச த³ஸ்ஸேந்தோ ஆஹ ‘‘அந்தோஸத்தாஹேயேவா’’தி. தத்தே²வாதி தஸ்மிம் பஹிதட்டா²னேயேவ. ‘‘ந உட்டா²பேதப்³போ³’’தி இமினா ‘‘ஸத்தாஹேயேவா’’தி ஏத்த² ஏவஸத்³த³ஸ்ஸ ப²லம் த³ஸ்ஸேதி.

189. ரஸோ ஏதஸ்மிம் அத்தீ²தி ரஸவதீதி வுத்தே ப⁴த்தகே³ஹம் க³ஹேதப்³ப³ந்தி ஆஹ ‘‘ப⁴த்தகே³ஹம் வுச்சதீ’’தி. ப⁴த்தகே³ஹந்தி ப⁴த்தபசனகே³ஹம். புராயம் ஸுத்தந்தோதி ஏத்த² புரா அயந்தி பத³ச்சே²த³ம் கத்வா புராஸத்³தோ³ யாவபரியாயோதி ஆஹ ‘‘யாவ அயம் ஸுத்தந்தோ’’தி. ந பலுஜ்ஜதீதி ஏத்த² லுஜதா⁴து வினாஸத்தோ²தி ஆஹ ‘‘ந வினஸ்ஸதீ’’தி. பரிஸங்க²தந்தி பரிஸங்க²ரிதப்³ப³ம். ஸப்³ப³த்தா²தி ஸப்³பே³ஸு பஹிதேஸு. இமினாவ கப்பியவசனேனாதி இமினா ஏவ கப்பியேன திவாக்யஸங்கா²தேன வசனேன. ஏதேஸந்தி ஏதேஸம் திண்ணம் வாக்யானம். வேவசனேனாதி ‘‘யஞ்ஞஞ்ச யஜிதும், ஸுத்தஞ்ச உக்³க³ண்ஹிதும், ஸமணே ச த³ஸ்ஸிது’’ந்தி பரியாயேன. ஸத்தஸூதி உபாஸக உபாஸிக பி⁴க்கு²பி⁴க்கு²னீ ஸிக்க²மான ஸாமணேர ஸாமணேரீ ஸங்கா²தாஸு ஸத்தஸு.

110. பஞ்சன்னம் அப்பஹிதேபி அனுஜானனகதா²

193. பகே³வ பஹிதேதி இமினா ‘‘அபஹிதேபி க³ந்தப்³ப³’’ந்தி ஏத்த² பிஸத்³த³ஸ்ஸ ஸம்பா⁴வனத்த²ம் த³ஸ்ஸேதி. பஞ்சன்னம் ஸஹத⁴ம்மிகானம் ஸந்திகம் க³ந்தப்³ப³பா⁴வஸ்ஸ காரணம் விப⁴ஜித்வா த³ஸ்ஸேந்தோ ஆஹ ‘‘பி⁴க்கு² கி³லானோ ஹோதீ’’திஆதி³. த³ஸஹீதி ‘‘ஸங்கோ⁴ கம்மம் கத்துகாமோ ஹோதி, கதம் வா ஸங்கே⁴ன கம்மம் ஹோதீ’’தி இத³ம் அங்க³ம் ஏகம் கத்வா த³ஸஹி. நவஹீதி பரிவாஸாரஹம் அபனேத்வா நவஹி. சதூஹீதி கி³லானஅனபி⁴ரதிகுக்குச்சதி³ட்டி²க³தஉப்பன்னஸங்கா²தேஹி சதூஹி. இதி இமேஹி ச²ஹீதி யோஜனா. ஸாமணேரஸ்ஸபி ச²ஹீதி ஏத்த² ச²ன்னம் ஸரூபம் வித்தா²ரேத்வா த³ஸ்ஸேந்தோ ஆஹ ‘‘ஆதி³தோ’’திஆதி³. தம் ஸுவிஞ்ஞேய்யமேவ. ஸாமணேரியா ஸந்திகம் பஞ்சஹி க³ந்தப்³ப³ந்தி யோஜனா. பரதோதி பரஸ்மா, பரஸ்மிம் வா. அந்த⁴கட்ட²கதா²யம் வுத்தந்தி ஸம்ப³ந்தோ⁴. யே ஞாதகா வா யே அஞ்ஞாதகா வா அத்தி², தேஸம்பீதி யோஜனா. தந்தி வசனம்.

112. பஹிதேயேவஅனுஜானனகதா²

199. பி⁴க்கு²க³திகோதி பி⁴க்கு² ஏவ க³தி பதிட்டா² ஏதஸ்ஸாதி பி⁴க்கு²க³திகோதி வுத்தே பி⁴க்கு²னிஸ்ஸிதகோ புரிஸோதி ஆஹ ‘‘பி⁴க்கூ²ஹி ஸத்³தி⁴ம் வஸனகபுரிஸோ’’தி. பலுஜ்ஜதீதி வினஸ்ஸதி. ப⁴ண்ட³ம் சே²தா³பிதந்தி ஏத்த² ப⁴ண்ட³ஸத்³தோ³ பரிக்கா²ரத்தோ² ஏவ, ந மூலத⁴னத்தோ²தி ஆஹ ‘‘த³ப்³ப³ஸம்பா⁴ரப⁴ண்ட³’’ந்தி. சே²தா³பிதந்தி சுராதி³க³ணிகதா⁴தும் ‘‘சி²ந்தா³பித’’ந்தி ருதா⁴தி³க³ணிகதா⁴துயா வண்ணேதி. த³ஜ்ஜாஹந்தி ஏகாரலோபஸந்தீ⁴தி ஆஹ ‘‘த³ஜ்ஜே அஹ’’ந்தி. ‘‘த³ஜ்ஜேஹ’’ந்திபி பாடோ². ஏவஞ்ஹி ஸதி அகாரலோபஸந்தி⁴. த³ஜ்ஜேதி த³தே³ய்யம், த³தா³மி வா. ஸங்க⁴கரணீயேனாதி ஸங்க⁴ஸ்ஸ காதப்³பே³ன கிச்சேன. தமத்த²ம் த³ஸ்ஸேந்தோ ஆஹ ‘‘யம்கிஞ்சீ’’திஆதி³. தத்த² யம்கிஞ்சி காதப்³ப³ந்தி யோஜனா. சேதியச²த்தவேதி³காதீ³ஸூதி சேதியஸ்ஸ ச²த்தே ச வேதி³காய ச. ஆதி³ஸத்³தே³ன ஸுதா⁴லிம்பாத³யோ ஸங்க³ண்ஹாதி. தஸ்ஸாதி ஸங்க⁴கரணீயஸ்ஸ. நிப்பா²த³னத்த²ம் க³ந்தப்³ப³ந்தி ஸம்ப³ந்தோ⁴.

ஏத்தா²தி வஸ்ஸூபனாயிகக்க²ந்த⁴கே. ‘‘அனிமந்திதேனா’’தி பத³ம் ‘‘க³ந்து’’ந்தி பதே³ பா⁴வகத்தா. க³ந்துந்தி க³மிதும், க³மனம் வா ‘‘ந வட்டதீ’’தி பதே³ கத்தா. பட²மம்யேவாதி த⁴ம்மஸ்ஸவனதோ பட²மமேவ. ஸன்னிபதிதப்³ப³ம் இதி கதிகா கதா ஹோதீதி யோஜனா. ப⁴ண்ட³கந்தி சீவராதி³ப⁴ண்ட³கம். க³ந்தும் ந வட்டதீதி ஸயமேவ க³ந்தும் ந வட்டதீதி அத்தோ² த³ட்ட²ப்³போ³. தேன வுத்தம் ‘‘ஸசே பனா’’திஆதி³. தத்தா²தி தம் விஹாரம். ‘‘வட்டதீ’’தி இமினா வஸ்ஸச்சே²தோ³ ச ஆபத்தி ச ந ஹோதீதி த³ஸ்ஸேதி. அத்தா²யபீதி பிஸத்³தே³ன ‘‘ப⁴ண்ட³கம் தோ⁴விஸ்ஸாமீ’’தி அத்த²ம் அபேக்க²தி. நந்தி அந்தேவாஸிகம். வட்டதீதி ஆசரியஸ்ஸ ஆணாய ஸத்தாஹே அனதிக்கந்தே வட்டதி, வஸ்ஸச்சே²தோ³ ச ஆபத்தி ச ந ஹோதி. ஸத்தாஹே அதிக்கந்தே வஸ்ஸச்சே²தோ³வ ஹோதி, ந ஆபத்தீதி அதி⁴ப்பாயோ.

113. அந்தராயே அனாபத்திவஸ்ஸச்சே²த³கதா²

201. அவிதூ³ரேதி ஆஸன்னே. தத்தா²தி கா³மே. ஸத்தாஹவாரேனாதி ஸத்தாஹே ஏகவாரேன. அருணோ உட்டா²பேதப்³போ³தி விஹாரே அருணோ உட்டா²பேதப்³போ³. தத்ரேவாதி கா³மேயேவ. மயந்தி பி⁴க்கூ² ஸந்தா⁴ய வுத்தம். புன மயந்தி மனுஸ்ஸே ஸந்தா⁴ய வுத்தம். தேஸம்யேவாதி வஸ்ஸச்சே²த³பி⁴க்கூ²னம் ஏவ. தந்தி ஸலாகப⁴த்தாதி³ம். வஸ்ஸக்³கே³னாதி வஸ்ஸக³ணனாய.

வஸ்ஸாவாஸிகந்தி வஸ்ஸாவாஸானம் தா³தப்³ப³ம் சீவரம். தத்தா²தி தஸ்மிம் விஹாரே. யேஸம் பாபிதந்தி ஸம்ப³ந்தோ⁴. விஹாரேதி வுட்டி²தகா³மவிஹாரே. உபனிக்கி²த்தகம் ப⁴ண்ட³ந்தி ஸம்ப³ந்தோ⁴. இதா⁴தி பி⁴க்கு²னோ நிவாஸட்டா²னே. யம் சீவராதி³வேப⁴ங்கி³யப⁴ண்ட³ம் அத்தி², தந்தி யோஜனா. தத்தே²வாதி வுட்டி²தகா³மவிஹாரே ஏவ. இதோதி கே²த்தவத்து²ஆதி³தோ. கப்பியகாரகானம் ஹத்தே²தி ஸம்ப³ந்தோ⁴. தத்ருப்பாதே³பீதி தஸ்ஸ விஹாரஸ்ஸ தி³ன்னகே²த்தவத்து²ஆதி³தோ உப்பாதே³ பச்சயேபி. ‘‘தத்தே²வ க³ந்த்வா அபலோகேத்வா பா⁴ஜேதப்³ப³’’ந்தி வசனஸ்ஸ யுத்திம் த³ஸ்ஸேந்தோ ஆஹ ‘‘ஸங்கி⁴கஞ்ஹீ’’திஆதி³. அந்தோவிஹாரே வாதி அந்தோஸீமாய வா. உப⁴யத்தா²தி அந்தோஸீமப³ஹிஸீம ஸங்கா²தேஸு த்³வீஸு டா²னேஸு டி²தம் வேப⁴ங்கி³யப⁴ண்ட³ந்தி ஸம்ப³ந்தோ⁴.

114. ஸங்க⁴பே⁴தே³ அனாபத்திவஸ்ஸச்சே²த³கதா²

202. பி⁴ன்னோதி ஏத்த² தபச்சயஸ்ஸ அதீதத்தே² அயுத்தபா⁴வம் த³ஸ்ஸேந்தோ ஆஹ ‘‘பி⁴ன்னே ஸங்கே⁴ கரணீயம் நத்தீ²’’தி. யோ பனாதி ஸங்கோ⁴ பன. இத³ம் ‘‘பி⁴ஜ்ஜிஸ்ஸதீ’’திபதே³ கத்தா, ‘‘ஆஸங்கிதோ’’திபதே³ கம்மம். ‘‘பி⁴ஜ்ஜிஸ்ஸதீ’’தி இமினா பி⁴ன்னோதி ஏத்த² தபச்சயஸ்ஸ அனாக³தத்தே² பவத்தபா⁴வம் த³ஸ்ஸேதி. பி⁴க்கு²னீஹி ஸங்கோ⁴ பி⁴ன்னோதி ஏத்த² கிம் பி⁴க்கு²னீஹி ஸங்கோ⁴ பி⁴ன்னோதி த³ட்ட²ப்³போ³தி ஆஹ ‘‘ந பி⁴க்கு²னீஹி ஸங்கோ⁴ பி⁴ன்னோதி த³ட்ட²ப்³போ³’’தி. ஏதந்தி பி⁴க்கு²னீஹி அபி⁴ன்னபா⁴வம். ஏதா பனாதி பி⁴க்கு²னியோ பன. தந்தி ஸங்க⁴ம். ஏதந்தி ‘‘ஸம்ப³ஹுலாஹி பி⁴க்கு²னீஹி ஸங்கோ⁴ பி⁴ன்னோ’’தி வசனம்.

115. வஜாதீ³ஸு வஸ்ஸூபக³மனகதா²

203. ‘‘கோ³பாலகானம் நிவாஸட்டா²ன’’ந்தி இமினா கோ³பாலகா கா³வோ விய வஜே நிவஸந்தீதி த³ஸ்ஸேதி.

உபகட்ட²ஸத்³தோ³ ஆஸன்னபரியாயோதி ஆஹ ‘‘ஆஸன்னாயா’’தி. தத்தா²தி குடிகாயம். இதா⁴தி இமிஸ்ஸம் குடிகாயம். அவிஹாரத்தா ‘‘இதா⁴தி’’ஸாமஞ்ஞவஸேன வுத்தம். திக்க²த்துந்தி இத³ம் உக்கட்ட²வஸேன வுத்தம். ஹேட்டா² ஹி ‘‘ஸகிம் வா த்³விக்க²த்தும் வா திக்க²த்தும் வா’’தி (மஹாவ. அட்ட². 184) வுத்தத்தா ஸகிம்பி வட்டதீதி த³ட்ட²ப்³ப³ம். தம்பீதி ஸாலாஸங்கே²பேன டி²தஸகடம்பி. ‘‘ஆலயோ’’தி இமினா ‘‘இத⁴ வஸ்ஸம் உபேமீ’’தி வசீபே⁴தோ³ ந காதப்³போ³தி த³ஸ்ஸேதி. ஆலயோதி ச ஸத்தே² ‘‘இத⁴ வஸ்ஸம் வஸிஸ்ஸாமீ’’தி சித்தஸ்ஸ அல்லீயனம். மக்³க³படிபன்னேயேவ ஸத்தே²தி அனாத³ரே பு⁴ம்மவசனம். தத்தே²வாதி ஸத்தே²யேவ. ஸத்தோ² அதிக்கமதீதி ஸம்ப³ந்தோ⁴. தத்தா²தி பத்தி²தட்டா²னே. விப்பகிரதீதி விஸும் விஸும் க³ச்ச²தி. ஸசே அகா³மகே டா²னே விப்பகிரதி, புரிமம் கா³மம் ஸன்னிவத்திதப்³ப³ம். ந அஞ்ஞகா³மம் க³ந்தப்³ப³ம். ததோதி கா³மதோ.

உபக³ந்தப்³ப³ந்தி ‘‘இத⁴ வஸ்ஸம் உபேமீ’’தி திக்க²த்தும் வத்வா உபக³ந்தப்³ப³ம். தத்தே²வாதி ஸமுத்³தே³யேவ. கூலந்தி தீரம். தஞ்ஹி குலதி உத³கம் ஆவரதீதி கூலந்தி வுச்சதி. அயஞ்சாதி நாவாயம் வஸ்ஸூபக³மனபி⁴க்கு². அனுதீரமேவாதி அனுக்கமேன, அனுஸாரேன வா தீரமேவ. அஞ்ஞத்தா²தி பட²மலத்³த⁴கா³மதோ அஞ்ஞஸ்மிம் டா²னே. தத்தே²வாதி பட²மலத்³த⁴கா³மேயேவ.

இதீதிஆதி³ நிக³மனம். பவாரேதுஞ்ச லப⁴தீதி ஏத்த² சஸத்³தோ³ வாக்யஸம்பிண்ட³னத்தோ². புரிமேஸு ச பனாதி ஏத்த² சஸத்³தோ³ ப்³யதிரேகத்தோ², பனஸத்³தோ³ விஸேஸத்த²ஜோதகோ. அனாபத்தி ஹோதீதி அனாபத்திமத்தமேவ ஹோதி.

116. வஸ்ஸம் அனுபக³ந்தப்³ப³ட்டா²னகதா²

204. ருக்க²ஸுஸீரேயேவாதி ருக்க²ஸ்ஸ விவரே ஏவ. விவரஞ்ஹி ஸு ஸம் இரதி க³ச்ச²தீதி ஸுஸீரோதி வுச்சதி. பத³ரச்ச²த³னந்தி ப²லகேஹி சா²தி³தம். பவிஸனத்³வாரந்தி பவிஸனனிக்க²மனத்³வாரம். பவிஸனஞ்ச நிக்க²மனஞ்ச பவிஸனந்தி விரூபேகஸேஸேன காதப்³ப³ம். கா²ணுமத்த²கேதி கா²ணுனோ உபரி. விடபீ⁴தி விடம் அஞ்ஞமஞ்ஞவேத⁴னம் அபதி க³ச்ச²தீதி விடபோ, பகாரஸ்ஸ ப⁴காரம், இத்தி²லிங்க³ஜோதகஈபச்சயஞ்ச கத்வா விடபீ⁴தி வுச்சதி. தத்தா²தி அட்டகே. யஸ்ஸாதி பி⁴க்கு²னோ, நத்தீ²தி ஸம்ப³ந்தோ⁴. பஞ்சன்னம் ச²த³னானந்தி திணபண்ணஇட்ட²காஸிலாஸுதா⁴ஸங்கா²தானம் (சூளவ. 303) பஞ்சன்னம் ச²த³னானம். இத³ஞ்ச யேபு⁴ய்யவஸேன வுத்தம் பத³ரச்ச²த³னாதீ³னம்பி க³ஹிதத்தா. த்³வாரப³ந்த⁴னந்தி த்³வாரேன ப³ந்தி⁴தப்³ப³ம். ச²வகுடிகாதி ச²வானம் ஸயனட்டா²னே ஸுஸானே கதா குடிகா ச²வகுடிகாதி வுச்சதி. டங்கிதமஞ்சாதீ³திஆதி³ஸத்³தே³ன டங்கிதபீட²ம் ஸங்க³ண்ஹாதி. தத்தா²தி ச²வகுடியம். அஞ்ஞம் குடிகந்தி ச²வகுடிதோ அஞ்ஞம் குடிகம். ஆவரணந்தி பி⁴த்திம். த்³வாரந்தி பவிஸனனிக்க²மனத்³வாரம். ச²த்தகுடிகா நாமேஸாதி ஏஸா ச²த்தேன கதா குடிகா நாம. மஹந்தேன கபல்லேன குடிகம் கத்வாதி ஸம்ப³ந்தோ⁴.

117. அத⁴ம்மிககதிகாகதா²

205. அஞ்ஞாபீதி ‘‘அந்தராவஸ்ஸம் ந பப்³பா³ஜேதப்³ப³’’ந்தி கதிகாய அஞ்ஞாபி. கதிகா ஹோதீதி ஸம்ப³ந்தோ⁴. தஸ்ஸாதி அத⁴ம்மிககதிகாய. வுத்தந்தி சதுத்த²பாராஜிகவண்ணனாயம் (பாரா. அட்ட². 2.226) வுத்தம்.

118. படிஸ்ஸவது³க்கடாபத்திகதா²

207. படிஸ்ஸவே ஆபத்தி து³க்கடஸ்ஸாதி ஏத்த² கிம் வஸ்ஸாவாஸபடிஸ்ஸுதேயேவ து³க்கடாபத்தி ஹோதீதி ஆஹ ‘‘ந கேவல’’ந்திஆதி³. ஏதஸ்ஸேவாதி வஸ்ஸாவாஸஸ்ஸேவ. ஏவமாதி³னாபீதி பிஸத்³தோ³ ‘‘படிஸ்ஸவே’’தி ஏத்த² யோஜேதப்³போ³. ‘‘படிஸ்ஸவேபீ’’தி ஹி அத்தோ². தஸ்ஸ தஸ்ஸாதி கம்மஸ்ஸ. தஞ்ச கோ²தி தஞ்ச து³க்கடம் விஸம்வாத³னபச்சயா ஹோதீதி யோஜனா. பட²மம்பீதி பிஸத்³தோ³ ‘‘பச்சா²பீ’’தி பத³ம் ஸம்பிண்டே³தி. பட²மம்பி ஹி பாசித்தியம், பச்சா²பி து³க்கடந்தி அத்தோ².

ஸோ தத³ஹேவ அகரணீயோதிஆதீ³ஸு ஏவம் வினிச்ச²யோ வேதி³தப்³போ³தி யோஜனா. புரிமிகா ச ந பஞ்ஞாயதீதி ஏத்த² புரே ப⁴வா புரிமா, ஸா ஏவ புரிமிகா, பாடிபத³திதீ². நானாஸீமாய த்³வீஸு ஆவாஸேஸு வஸ்ஸம் உபக³ச்ச²ந்தஸ்ஸ து³தியே ‘‘வஸிஸ்ஸாமீ’’தி பட²மாவாஸஸ்ஸ உபசாரதோ நிக்க²ந்தமத்தே பட²மஸேனாஸனக்³கா³ஹஸ்ஸ பஸ்ஸம்ப⁴னம் ஸந்தா⁴ய வுத்தம் ‘‘புரிமிகா ச ந பஞ்ஞாயதீ’’தி. அருணம் அனுட்டா²பேத்வாதி வஸ்ஸம் உபக³மனவிஹாரே அருணம் அனுட்டா²பேத்வா. தத³ஹேவாதி தஸ்மிம் வஸ்ஸூபக³மனஅஹனி ஏவ, பக்கந்தஸ்ஸாபீதி ஸம்ப³ந்தோ⁴. பிஸத்³த³ஸ்ஸ க³ரஹத்த²ம் த³ஸ்ஸேந்தோ ஆஹ ‘‘கோ பன வாதோ³’’திஆதி³. ஆலயோதி சித்தஸ்ஸ அல்லீயனம். அஸதியாதி ஸதிபமுட்டே²ன. வஸ்ஸம் ந உபேதீதி ‘‘இமஸ்மிம் விஹாரே இமம் தேமாஸம் வஸ்ஸம் உபேமீ’’தி (மஹாவ. அட்ட². 184) வசீபே⁴த³ம் கத்வா வஸ்ஸம் ந உபேதி.

ஸத்தாஹந்தி ஸத்தாஹேன, அனாக³தாயாதி ஸம்ப³ந்தோ⁴. நவமிதோதி புப்³ப³கத்திகமாஸஸ்ஸ ஜுண்ஹபக்க²னவமிதோ, பச்சி²மகத்திகமாஸஸ்ஸ ஜுண்ஹபக்க²னவமிதோ வா. மா வா ஆக³ச்ச²து, அனாபத்தீதி வஸ்ஸம்வுத்த²த்தா மா வா ஆக³ச்ச²து, அனாபத்தீதி அத்தோ².

இதி வஸ்ஸூபனாயிகக்க²ந்த⁴கவண்ணனாய யோஜனா ஸமத்தா.