71. ஸீமானுஜானனகதா²

138. நிமித்தா கித்தேதப்³பா³தி நிமித்தானி கித்தேதப்³பா³னி. நிகாரஸ்ஸ ஹி ஆகாரோ. நிமித்தம் கதோதி ஏஸோ பப்³ப³தோ நிமித்தம் கதோதி யோஜனா. ஏஸேவ நயோ பரதோபி. ‘‘ஏஸேவ நயோ’’தி இமினா ‘‘புரத்தி²மாய தி³ஸாய கிம் நிமித்தம்? பாஸாணோ ப⁴ந்தே, ஏஸோ பாஸாணோ நிமித்த’’ந்தி அத்த²ம் அதிதி³ஸதி. ஏஸேவ நயோ ஸேஸேஸுபி. கேவலம் பன வனஉத³கேஸு ‘‘ஏதம் வனம், ஏதம் உத³க’’ந்தி வத்தப்³ப³ம். நதி³யம் ‘‘ஏஸா நதீ³’’தி வத்தப்³பா³. ஏத்த² பனாதி ஏதிஸ்ஸம் உத்தராயம் அனுதி³ஸாயம் பன. ஹீதி ப²லஜோதகோ. தத்தா²தி ‘‘நிமித்தா கித்தேதப்³பா³’’தி வசனே. ஸீமமண்ட³லந்தி ஸீமபி³ம்ப³ம். ஸம்ப³ந்த⁴ந்தேனாதி புரிமனிமித்தேன பச்சி²மனிமித்தம் ஸம்ப³ந்த⁴ந்தேன. இமினா ஏகந்தரிகாதி³வஸேன நிமித்தகித்தனம் ந வட்டதி நிமித்தேனபி நிமித்தானம் ஸம்ப³ந்தா⁴பா⁴வதோதி த³ஸ்ஸேதி. புரிமனிமித்தேன பச்சி²மனிமித்தஸ்ஸ ஸம்ப³ந்தே⁴ ஸதி அஜ்ஜ ஏகம் நிமித்தம் கித்தேத்வா ஸ்வே ஏகம் நிமித்தம் கித்தேத்வாதி ஏவம் காலந்தரேபி நிமித்தம் கித்தேத்வா ஸம்மனிதும் வட்டதீதி வத³ந்தி.

பப்³ப³தோதி ஏத்த² பப்³ப³ம் வுச்சதி ப²ளு, தம் ஏதஸ்மிம் அத்தீ²தி பப்³ப³தோ. வாலிகராஸிஸ்ஸ ஸுத்³த⁴பம்ஸுபப்³ப³தபஸங்க³த்தா வுத்தம் ‘‘வாலிகராஸி பன ந வட்டதீ’’தி. இதரோபீதி வாலிகராஸிதோ அஞ்ஞோபி திவிதோ⁴ பப்³ப³தோ. ஹத்தி²ப்பமாணதோதி அட்³ட⁴ட்ட²மரதனஹத்தி²பமாணதோ. சதூஸு தி³ஸாஸூதி விஹாரஸ்ஸ சதூஸு தி³ஸாஸு. சதூஹி வா தீஹி வாதி ஏத்த² வாஸத்³தே³ன ததோ அதி⁴கானிபி க³ஹேதப்³பா³னி. ஏகேன வா நிமித்தேனாதி யோஜனா. இதோதி பப்³ப³தனிமித்ததோ. தஸ்மாதி யஸ்மா ஏகேன நிமித்தேன ந வட்டதி, தஸ்மா. தந்தி பப்³ப³தம். தஸ்மாதி ஏகஸ்ஸேவ நிமித்தஸ்ஸ கித்திதத்தா. யோ பப்³ப³தோ அத்தி², தம் பப்³ப³தந்தி யோஜனா. அந்தோதி பப்³ப³தஸ்ஸ அந்தோ.

ததியபா⁴க³ம் வாதி ஏத்த² வாஸத்³தே³ன பட²மபா⁴கோ³பி ஏகதே³ஸோபி க³ஹேதப்³போ³. தஸ்ஸாதி தத்தகஸ்ஸ பதே³ஸஸ்ஸ. ததியபா⁴கா³தி³தோ அபரம் ஸப்³ப³பப்³ப³தம் அந்தோகத்வா ஸம்மதம் த³ஸ்ஸேந்தோ ஆஹ ‘‘ஸசே’’திஆதி³.

பாஸாணனிமித்தே ஏவம் வினிச்ச²யோ வேதி³தப்³போ³தி யோஜனா. பஸதி க⁴னபா⁴வேன ப³ந்த⁴தீதி பாஸாணோ. அயகு³ளோபி பாஸாணஸங்க²மேவ க³ச்ச²தி தேன தஸ்ஸ ஸதி³ஸத்தா. அயகு³ளோபீதி ஏத்த² பிஸத்³தே³ன தம்ப³கம்ஸவட்டலோஹஸுவண்ணரஜதாத³யோபி ஸங்க³ண்ஹாதி. யோ கோசீதி ஸிலாபவாளமணிஆதீ³ஸு யோ கோசி. த்³வத்திம்ஸபலகு³ளபிண்ட³பரிமாணதா ஸண்டா²னதோ க³ஹேதப்³பா³, ந துலித்வா க³ணனவஸேன. கு²த்³த³கதரோ பாஸாணோதி யோஜனா. யோ பிட்டி²பாஸாணோ வா யோ உட்டி²தபாஸாணோ வாதி யோஜனா காதப்³பா³ – உத்தரவாக்யே தஸத்³த³ஸ்ஸ அனியமனித்³தே³ஸவசனத்தா ‘‘பாஸாணஸங்க²ம்யேவா’’தி ஏத்த² ஏவகாரேன ‘‘ந பப்³ப³தஸங்க²’’ந்தி அத்த²ம் த³ஸ்ஸேதி. மஹதோ பிட்டி²பாஸாணஸ்ஸாதி ஆயாமவித்தா²ருப்³பே³த⁴தோ மஹந்தஸ்ஸ பிட்டி²பாஸாணஸ்ஸ ஸக்கஸ்ஸ பண்டு³கம்ப³லபிட்டி²பாஸாணஸ்ஸ விய. தந்தி பிட்டி²பாஸாணம். ந வட்டதீதி கித்தேதும் ந வட்டதி. ஹீதி லத்³த⁴தோ³ஸஜோதகோ. தந்தி பிட்டி²பாஸாணம். ஸீமாயாதி ஸீமதோ. விஹாரோபீதி ந கேவலம் நிமித்தமேவ, விஹாரோபி. பிட்டி²பாஸாணோ ந கித்தேதப்³போ³தி ஸம்ப³ந்தோ⁴. கித்தேத்வாதி ஏத்த² ‘‘பிட்டி²பாஸாண’’ந்தி யோஜேதப்³ப³ம்.

வனனிமித்தே ஏவம் வினிச்ச²யோ வேதி³தப்³போ³தி யோஜனா. வனியதி மயூரகோகிலாதீ³ஹி ஸத்தேஹி ஸம்ப⁴ஜியதீதி வனம், வனந்தி ஸம்ப⁴ஜந்தி ஏத்தா²தி வா வனம். தசோ ஏவ ஸாரோ ஏதேஸந்தி தசஸாரோ, தாலனாளிகேராத³யோ. ஆதி³ஸத்³தே³ன வேணுஆத³யோ ஸங்க³ண்ஹாதி. அந்தோ ஸாரோ ஏதேஸந்தி அந்தோஸாரா, ஸாகஸாலாத³யோ. ஆதி³ஸத்³தே³ன க²தி³ராத³யோ ஸங்க³ண்ஹாதி. அந்தோஸாரமிஸ்ஸகானந்தி அந்தோஸாரேஹி ருக்கே²ஹி மிஸ்ஸகானம். ருக்கா²னம் வனந்தி ஏத்த² அவயவஅவயவிபா⁴வேன ஸம்ப³ந்தோ⁴ வேதி³தப்³போ³. இமினா திணவனம் ருக்க²வனந்தி ஏத்த² ‘‘திணானம் வன’’ந்தி வா ‘‘ருக்கா²னம் வன’’ந்தி வா அத்த²ம் த³ஸ்ஸேதி. திணமேவ வனம், ருக்கோ²யேவ வனந்தி அத்தோ²பி யுஜ்ஜதேவ. சத்தாரோ வா பஞ்ச வா ருக்கா²தி சதுபஞ்சருக்கா², தே மத்தம் பமாணமேத்தா²தி சதுபஞ்சருக்க²மத்தம் வனம், ததோதி சதுபஞ்சருக்க²மத்ததோ. ஏகதே³ஸந்தி வனஸ்ஸ ஏகதே³ஸம். வனமஜ்ஜே²தி வனஸ்ஸ வேமஜ்ஜே², வனஸ்ஸூபரீதி அத்தோ². ருக்க²ந்தரேஸு ஏவ ஹி விஹாரம் கரோந்தி. ஏகதே³ஸந்தி வனஸ்ஸ ஏகதே³ஸம். தத்தா²தி வனே. ‘‘டி²தவன’’ந்தி பத³ம் ‘‘கித்தேத்வா’’தி பதே³ அவுத்தகம்மம், ‘‘ந கித்தேதப்³ப³’’ந்தி பதே³ வுத்தகம்மம்.

ருக்க²னிமித்தே ஏவம் வினிச்ச²யோ வேதி³தப்³போ³தி யோஜனா. ருக்கி²யதி ப²லாதி³காமேஹி ஸம்வரியதி ரக்கி²யதீதி ருக்கோ², மஹியம் ருஹதீதி வா ருக்கோ². ஜீவமானகோதி லோகவோஹாரவஸேன மூலங்குராதி³ஹரிதஸங்கா²தஜீவமானகோ. பரிணாஹதோதி விஸாலபா⁴வதோ. ஸூசித³ண்ட³கபமாணோதி ஸூசியா லேக²னியா த³ண்ட³பூ⁴தவேளுபமாணோ. ஸோ வேளு கனிட்ட²ங்கு³லிபமாணோதி த³ட்ட²ப்³போ³. ததோதி அட்ட²ங்கு³லுப்³பே³த⁴ஸூசித³ண்ட³கபமாணபரிணாஹருக்க²தோ. வம்ஸனளகஸராவாதீ³ஸூதி வம்ஸோ ச நளகோ ச ஸராவோ ச வம்ஸனளகஸராவா, தே ஆத³யோ யேஸம் கபாலாதீ³னந்தி வம்ஸனளகஸராவாத³யோ, தேஸு. ததோதி வம்ஸாதி³தோ. தம்க²ணம்பீதி தஸ்மிம் நிமித்தக்க²ணேபி. அகாரணந்தி அபமாணம். ஏதந்தி நவமூலஸாகா²னிக்³க³மனம். வத்தும் வட்டதீதி ஸாமஞ்ஞனாமேனபி விஸேஸனாமேனபி வத்தும் வட்டதி. இமினா பப்³ப³தாதீ³ஸுபி ‘‘பப்³ப³தோ’’தி ஸாமஞ்ஞனாமேனபி ‘‘வங்கபப்³ப³தோ வேபுல்லபப்³ப³தோ’’தி விஸேஸனாமேனபி வத்தும் வட்டதீதி த³ஸ்ஸேதி.

மக்³க³னிமித்தே ஏவம் வினிச்ச²யோ வேதி³தப்³போ³தி யோஜனா. மக்³கி³யதி பதி²கேஹி, மக்³க³மூள்ஹேஹி வா அன்வேஸியதீதி மக்³கோ³. யோ யாதி³ஸோ ஜங்க⁴மக்³கோ³ வா ஸகடமக்³கோ³ வா வினிவிஜ்ஜி²த்வா த்³வே தீணி கா³மந்தரானி க³ச்ச²தி, ஸோ தாதி³ஸோ ஜங்க⁴மக்³கோ³ வா ஸகடமக்³கோ³ வா வட்டதீதி யோஜனா. உக்கமித்வாதி பக்கமித்வா. யோ ஜங்க⁴மக்³கோ³ ஓதரதி, ஸோ ந வட்டதீதி யோஜனா. அவளஞ்ஜாதி அபரிபோ⁴கா³. க³மனம் ஜனேதீதி ஜங்கோ⁴. ஜண்ணுகோ³ப்ப²கானம் மஜ்ஜ²பதே³ஸோ. ஸஹ அத்தே²ன பணியத⁴னேனாதி ஸத்தோ², ஜங்கே⁴ன விசரந்தோ ஸத்தோ² ஜங்க⁴ஸத்தோ². ஸகதி ஸமத்தே²தி பா⁴ரம் வஹிதுந்தி ஸகடோ, தேன விசரந்தோ ஸத்தோ² ஸகடஸத்தோ². ஜங்க⁴ஸத்தோ² ச ஸகடஸத்தோ² ச ஜங்க⁴ஸகடஸத்தா², தேஹி. ஹீதி ஸச்சம், யஸ்மா வா. ஏதந்தி நிமித்தம்.

கோணந்தி விஹாரகோணம். க³தம் பன மக்³க³ந்தி யோஜனா. பரபா⁴கே³தி விஹாரம் பரிக்கி²பித்வா க³ச்ச²ந்தேஹி சதூஹி மக்³கே³ஹி பரபா⁴கே³. த³ஸஸு நாமேஸூதி ஸதிபட்டா²னட்ட²கதா²தீ³ஸு ஆக³தேஸு ‘‘மக்³கோ³ பந்தோ² பதோ² பஜ்ஜோ’’திஆதீ³ஸு, அபி⁴தா⁴னாதீ³ஸு (தீ³. நி. அட்ட². 2.373; ம. நி. அட்ட². 1.106) ச ஆக³தேஸு ‘‘மக்³கோ³ பந்தோ² பதோ² அத்³தா⁴’’திஆதீ³ஸு த³ஸஸு மக்³க³னாமேஸு. யேன கேனசி நாமேனாதி இமினா பப்³ப³தாதீ³ஸுபி ‘‘பப்³ப³தோ கி³ரி ஸேலோ அத்³தி³ நகோ³ அசலோ ஸிலுச்சயோ ஸிக²ரீ பூ⁴த⁴ரோ’’திஆதீ³ஸு அனேகேஸு நாமேஸு யேன கேனசி நாமேன கித்தேதும் வட்டதீதி த³ஸ்ஸேதி.

வம்மிகனிமித்தே ஏவம் வினிச்ச²யோ வேதி³தப்³போ³தி யோஜனா. உபசிகாஹி வமியதி, ஸரபூ³க⁴ரகோ³லிகாத³யோ ஸத்தே வமதீதி வா வம்மிகோ. தம்தி³வஸஜாதோதி தஸ்மிம் நிமித்தகித்திததி³வஸே ஜாதோ. ததோதி அட்ட²ங்கு³லுப்³பே³த⁴கோ³விஸாணபமாணவம்மீகதோ.

நதீ³னிமித்தே ஏவம் வினிச்ச²யோ வேதி³தப்³போ³தி யோஜனா. நத³தி ஸந்த³தீதி நதீ³, நத³ந்தோ ஏதி க³ச்ச²தீதி வா நதீ³. யஸ்ஸாதி நதி³யா, ஸோதந்தி ஸம்ப³ந்தோ⁴. ‘‘அன்வத்³த⁴மாஸ’’ந்திஆதி³னா ஏகபக்கே² திக்க²த்தும் ஏகமாஸே ச²க்க²த்தும் வஸ்ஸந்தபா⁴வம் தீ³பேதி. விக³தமத்தே ஸதீதி ஸம்ப³ந்தோ⁴. ‘‘ஈதி³ஸே’’தி இமினா ‘‘அன்வத்³த⁴மாஸ’’ந்திஆதி³அத்த²ம் அதிதி³ஸதி. திமண்ட³லந்தி ஹேட்டா² ஜாணுமண்ட³லம், உபரி நாபி⁴மண்ட³லந்தி திமண்ட³லம். யத்த² கத்த²சீதி தித்தே² வா அதித்தே² வா. உத³கேன தேமியதீதி யோஜனா, திந்தியதீதி அத்தோ². ந கேவலம் நிமித்தேயேவ அயம் நதீ³ ஹோதி, அத² கோ² நதீ³பாரக³மனாதி³கேபீதி ஆஹ ‘‘பி⁴க்கு²னியா’’திஆதி³. இத³ம் ‘‘நதீ³பாரக³மனேபீ’’தி பதே³னேவ ஸம்ப³ந்தி⁴தப்³ப³ம்.

யா பனாதி நதீ³ பன, க³தாதி யோஜனா. தந்தி நதி³ம். வதிந்தி பாளிம். ருக்க²பாதே³தி ருக்க²ஸ்ஸ மூலே. உத³கஞ்ச ஆவரணம் அஜ்ஜோ²த்த²ரித்வா பவத்ததியேவாதி யோஜனா. யதா²தி யேனாகாரேன. அபவத்தமானா ஹோதீதி ஸம்ப³ந்தோ⁴.

து³ப்³பு³ட்டி²காலேதி கி³ம்ஹஸதி³ஸே து³ப்³பு³ட்டி²காலே. ‘‘நிருத³கபா⁴வேனா’’தி இமினா ‘‘ஆவரணபா⁴வேனா’’தி விஸேஸனம் நிவத்தேதி. ஸாதி உத³கமாதிகா. ஸம்பாதே³ந்தீ ஹுத்வா நிச்சம் பவத்ததீதி யோஜனா. நிமித்தம் காதும் ந வட்டதீதி மனுஸ்ஸேஹி நீஹடத்தா, ஸயஞ்ச அக³மனத்தா ந வட்டதி. யா பனாதி உத³கமாதிகா பன. மூலேதி பட²மகாலே. காலந்தரேன நதீ³ ஹோதீதி ஸம்ப³ந்தோ⁴. தந்தி உத³கமாதிகம்.

உத³கனிமித்தே ஏவம் வினிச்ச²யோ வேதி³தப்³போ³தி யோஜனா. உத³தி பஸவதீதி உத³கம். பூ⁴மிக³தமேவ உத³கந்தி ஸம்ப³ந்தோ⁴. தஞ்சாதி பூ⁴மிக³தஉத³கஞ்ச. ஆவாட…பே… ஸமுத்³தா³தீ³ஸு டி²தம் அபவத்தனகஉத³கந்தி யோஜனா. உக்கே²பிமந்தி உக்கி²பித்வா க³ஹிதம். தந்தி வசனம். ஸூகரக²தாயபீதி ஸூகரேஹி க²தாய வாபியாபி. தம்க²ணஞ்ஞேவாதி தஸ்மிம் நிமித்தே கித்தனக்க²ணேயேவ. ஆவாடோயேவ கு²த்³த³கட்டே²ன ஆவாடகம். தந்தி நிமித்தஸஞ்ஞாகரணம். காதுஞ்சாதி ஸயம் காதுஞ்ச. காராபேதுஞ்சாதி பரேஹி காராபேதுஞ்ச. கஸ்மா லாப⁴ஸீமாயம் ந வட்டதி? லாப⁴ஸீமா ஹி அஞ்ஞேஸம் பீளனம் கரோதீதி. இதி இமமத்த²ம் நயதோ த³ஸ்ஸேந்தோ ஆஹ ‘‘ஸமானஸம்வாஸகஸீமா’’திஆதி³. ஏத்தா²தி ஸமானஸம்வாஸகஸீமாயம்.

அட்ட²தி³ஸம் ஸந்தா⁴ய அட்ட² நிமித்தானி வுத்தானீதி த³ட்ட²ப்³ப³ம். ஸாதி ஸீமா. ஏகேன வா நிமித்தேனாதி யோஜனா. திண்ணம் நிமித்தானம் கித்தனே நிமித்தானம் டி²ததி³ஸம் ஸல்லக்கே²த்வா ‘‘புரத்தி²மாய தி³ஸாயா’’திஆதி³னா கித்தேதப்³ப³ம். நிமித்தானம் ஸதகித்தனே ஸீமாய அட்ட²தி³ஸம் ஸல்லக்கே²த்வா ஏகிஸ்ஸாயபி தி³ஸாய ப³ஹுனிமித்தானி கித்தேதப்³பா³னி. ஸிங்கா⁴டகஸண்டா²னாதி திண்ணம் மக்³கா³னம் ஸமாக³மட்டா²னே ஸிங்கா⁴டகஸண்டா²னா, திகோணா நாம ஹோதீதி அதி⁴ப்பாயோ. சதுரஸ்ஸாதி ஸமசதுரஸ்ஸா. ஸிங்கா⁴டகஸண்டா²னாதி சதுன்னம் மக்³கா³னம் ஸமோதா⁴னட்டா²னே ஸிங்கா⁴டகஸண்டா²னா. அட்³ட⁴சந்த³முதி³ங்கா³தி³ஸண்டா²னா பன நிமித்தானம் டி²தஸண்டா²னேன ஹோதீதி த³ட்ட²ப்³பா³. தந்தி ஸீமம். ப³ந்தி⁴துகாமேஹி நிஸ்ஸஞ்சாரஸமயே ப³ந்தி⁴தப்³பா³தி ஸம்ப³ந்தோ⁴. ப³த்³த⁴ஸீமவிஹாரானந்தி ப³த்³தா⁴ ஸீமா ஏதேஸூதி ப³த்³த⁴ஸீமா, தே ஏவ விஹாராதி ப³த்³த⁴ஸீமவிஹாரா, தேஸம். தி³ஸாசாரிகபி⁴க்கூ²னந்தி தி³ஸாஸு சாரிகபி⁴க்கூ²னம். தத்தா²தி தஸ்மிம் ஏககா³மகே²த்தே, பி⁴க்கூ²னம் பேஸேதப்³ப³ந்தி ஸம்ப³ந்தோ⁴. ஏகஜ்ஜ²ந்தி ஏகதோ. அஞ்ஞானிபீதி ஸீமப³ந்த⁴கா³மகே²த்ததோ அஞ்ஞானிபி. மஹாபது³மத்தே²ரோ பன ஆஹாதி யோஜனா. ததோதி தேஹி நானாகா³மகே²த்தேஹி. ஆக³ந்தப்³ப³ந்தி ஸாமீசித³ஸ்ஸனவஸேன வுத்தம். தேனாஹ ‘‘ஆக³மனம்பி அனாக³மனம்பி வட்டதீ’’தி. ஏகஸீமபா⁴வதோ வுத்தம் ‘‘அந்தோனிமித்தக³தேஹி ஆக³ந்தப்³ப³’’ந்தி.

ஏவம் ஸன்னிபதிதேஸு ஸந்தேஸு ஸீமா ப³ந்தி⁴தப்³பா³தி ஸம்ப³ந்தோ⁴. பரியந்தம் கத்வாதி ஹேட்டி²மபரியந்தம் கத்வா.

பப்³ப³ஜ்ஜூபஸம்பதா³தீ³னந்தி ஏத்த² ப⁴ண்டு³கம்மாபுச்ச²னம் (மஹாவ. அட்ட². 98; வி. ஸங்க³. அட்ட². 144) ஸந்தா⁴ய பப்³ப³ஜ்ஜாக³ஹணம் வுத்தம். க²ண்ட³ஸீமாதி விஹாரபச்சந்தம் க²ண்டி³தம் விய சி²ந்தி³தம் விய பவத்தா ஸீமா க²ண்ட³ஸீமா. தந்தி க²ண்ட³ஸீமம். வத்தம் ஜானிதப்³ப³ந்தி ஏத்த² வத்தம் வித்தா²ரேந்தோ ஆஹ ‘‘ஸசே ஹீ’’திஆதி³. ஸீமந்தி க²ண்ட³ஸீமம். யதா²தி யேனாகாரேன ப³ந்தி⁴யமானேதி ஸம்ப³ந்தோ⁴. தஸ்ஸா பமாணம் த³ஸ்ஸேந்தோ ஆஹ ‘‘ஸா’’திஆதி³. ஸாதி க²ண்ட³ஸீமா. அப்³பா⁴னகம்மே ஸத்³தி⁴ம் கம்மாரஹேன வீஸதி பி⁴க்கூ² ஸந்தா⁴ய வுத்தம் ‘‘ஏகவீஸதி பி⁴க்கூ²’’தி. ததோதி ஏகவீஸதிபி⁴க்கு²தோ. க³ண்ஹந்தீபீதி ஏத்த² பிஸத்³தோ³ ஸஹஸ்ஸதோ ஓரம் பன பகே³வாதி த³ஸ்ஸேதி. ஸஹஸ்ஸதோ அதி⁴கம் க³ண்ஹந்தீபி விஹாரபச்சந்தே க²ண்டி³தே க²ண்ட³ஸீமாயேவ நாம. தந்தி க²ண்ட³ஸீமம்.

தத்ராதி க²ண்ட³ஸீமமஹாஸீமாஸு ஆதா⁴ரே பு⁴ம்மம். அதா²தி அனந்தரம். ஏவந்தி இமாய அவிப்பவாஸகம்மவாசாய ஸம்மனியமானே. ஹீதி ப²லஜோதகோ. ஸீமந்தி ஸமானஸம்வாஸகஸீமம். ந ஸக்கி²ஸ்ஸந்தீதி பட²மம் அவிப்பவாஸம் அஸமூஹனித்வா ஸீமம் ஸமூஹனிதும் ந ஸக்கி²ஸ்ஸந்தி. ஸீமந்தரிகபாஸாணாதி த்³வின்னம் ஸீமானம் அந்தரே வேமஜ்ஜே² ட²பிதா பாஸாணா. சதுரங்கு³லபமாணாபீதி பிஸத்³தோ³ ஏகங்கு³லிபமாணாபி வட்டதீதி த³ஸ்ஸேதி.

ஸமந்தாதி க²ண்ட³ஸீமாய ஸமந்தா. அனுபரியாயந்தேஹீதி அனுக்கமேன க²ண்ட³ஸீமபரியாயந்தேஹி பி⁴க்கூ²ஹீதி ஸம்ப³ந்தோ⁴. ததோதி தேஹி ஸீமந்தரிகபாஸாணேஹி, த்³வின்னம் ஸீமானம் நிமித்தானி பட²மம் கித்தேத்வா பச்சா² தாஸு யம் இச்ச²ந்தி, தம் ப³ந்தி⁴தப்³ப³பா⁴வம் த³ஸ்ஸேந்தோ ஆஹ ‘‘ஸசே பனா’’திஆதி³. யதி²ச்சி²தம் ப³ந்தி⁴தும் வட்டந்தோபி போராணாசிண்ணம் த³ஸ்ஸேதும் வுத்தம் ‘‘ஏவம் ஸந்தேபீ’’திஆதி³. உபி⁴ன்னம்பீதி த்³வீஸு ஸீமாஸு டி²தானம் உபி⁴ன்னம்பி கம்மந்தி ஸம்ப³ந்தோ⁴. ஹீதி ஸச்சம், யஸ்மா வா.

சஸத்³தோ³ வாக்யாரம்ப⁴ஜோதகோ. ஏஸா ஸீமா நாமாதி யோஜனா. தத்தா²தி பிட்டி²பாஸாணாதீ³ஸு பஞ்சஸு டா²னேஸு. நிமித்தபாஸாணா யதா²டா²னே ந திட்ட²ந்தீதி பிட்டி²பாஸாணஸ்ஸுபரி நிமித்தபாஸாணம் ட²பிதமத்தம் ஸந்தா⁴ய வுத்தம். பிட்டி²பாஸாணம் பன விஜ்ஜி²த்வா நிமித்தபாஸாணம் தத்த² நிக²ணித்வா யதா² டா²னா ந சாவேந்தி, ததா² ட²பேந்தி. ஏவம் ஸந்தே யதா²டா²னே திட்ட²ந்தியேவாதி த³ட்ட²ப்³ப³ம். ந ஸீமாதி ஸீமாய பத²விஸந்தா⁴ரகம் உத³கம் பரியந்தம்கத்வா க³தத்தா ஸீமா ந ஜா²யதி.

குடிகே³ஹேபீதி ஏத்த² குடீதி ச கே³ஹந்தி ச அகா³ரஸ்ஸேவ நாமம். அகா³ரஞ்ஹி ஸீதாதி³து³க்க²ஸ்ஸ குடனட்டே²ன சி²ந்த³னட்டே²ன ச நானாத³ப்³ப³ஸம்பா⁴ரஸ்ஸ க³ஹணட்டே²ன ச குடிகே³ஹந்தி வுச்சதி. குடி ஏவ கே³ஹம் குடிகே³ஹம், தஸ்மிம்பி. பி⁴த்திம் அகித்தேத்வாதி இத³ம் இட்ட²கதா³ருமயம் பி⁴த்திம் ஸந்தா⁴ய வுத்தம். ஸசே ஸிலாமயா பி⁴த்தி நிமித்தூபகா³ ப⁴வேய்ய, பி⁴த்திபி கித்தேதப்³பா³. அந்தோ கரித்வாதி குடிகே³ஹஸ்ஸ பி⁴த்தியா வா அந்தோ கத்வா. பமுகே²தி குடிகே³ஹஸ்ஸ ஆலிந்தே³. நிப்³போ³த³கபதனட்டா²னேதி நிக்³க³லித்வா உத³கஸ்ஸ பதனட்டா²னே. ஏவம் ஸம்மதாய ஸீமாயாதி யோஜனா.

‘‘குட்டம் அகித்தேத்வா’’தி இத³ம் புரிமனயேனேவ வேதி³தப்³ப³ம். அந்தோதி லேணஸ்ஸ, குட்டஸ்ஸ வா அந்தோ. ஓகாஸேதி ஏகவீஸதியா பி⁴க்கூ²னம் ஓகாஸே. ஏவந்தி இமினாகாரேன ஸம்மனியமானே. அந்தோதி பி⁴த்தியா அந்தோ.

ஹேட்டா² ந ஓதரதீதி ஹேட்டா² ஆகாஸதலத்தா ந ஓதரதி. நனு த²ம்பே⁴ அனுஸாரித்வா ஓதரணோ ப⁴வேய்ய, கஸ்மா ந ஓதரதீதி? த²ம்பா⁴னமுபரி ஏகவீஸதியா பி⁴க்கூ²னம் ஓகாஸாபா⁴வதோதி த³ட்ட²ப்³ப³ம். ஹேட்டா² ஓதரணாகாரம் த³ஸ்ஸேந்தோ ஆஹ ‘‘ஸசே பனா’’திஆதி³. துலானந்தி த²ம்பா⁴னமுபரி திரியவஸேன டி²தானம் ருக்க²விஸேஸானம். உட்ட²ஹித்வாதி பூ⁴மிதோ உட்ட²ஹித்வா. துலாருக்கே²ஹீதி துலாஸங்கா²தேஹி ருக்கே²ஹி. ‘‘ஏகஸம்ப³ந்தோ⁴’’தி இமினா ந கேவலம் துலாருக்கே²ஹேவ ஏகஸம்ப³ந்தோ⁴, சதூஸு தி³ஸாஸு சதுன்னம் பி⁴த்தீனம் அஞ்ஞமஞ்ஞம்பி ஸம்ப³ந்தோ⁴தி த³ஸ்ஸேதி. ஹேட்டா²பி ஓதரதீதி பி⁴த்தீனமுபரி ஏகவீஸதியா பி⁴க்கூ²னம் ஓகாஸபஹோனகத்தா வுத்தம். ஸசே த²ம்ப⁴மத்த²கே…பே… ஹோதீதி இமினா ப³ஹூஹி த²ம்பே⁴ஹி கதபாஸாத³ஸ்ஸ ஏகேகஸ்மிம் த²ம்ப⁴மத்த²கே ஏகவீஸதியா பி⁴க்கூ²னம் ஓகாஸே ஸதி ஹேட்டா² ஓதரதீதி த³ஸ்ஸேதி. நிய்யூஹகாதீ³ஸூதி நாக³த³ந்தகாதீ³ஸு. ஆதி³ஸத்³தே³ன பி⁴த்திகி²லாத³யோ ஸங்க³ண்ஹாதி. பி⁴த்தி சாதி இட்ட²கதா³ருமயா பி⁴த்தி ச. ஸசே ஸிலாமயா பி⁴த்தி ச த²ம்பா⁴ ச ஹோந்தி, கித்தேதப்³பா³. பி⁴த்திலக்³கே³தி பி⁴த்தீஸு லக்³கே³, பி⁴த்தீனம் வா லக்³க³ட்டா²னே. ஹேட்டா²பாஸாத³ஸ்ஸாதி ஹேட்டா²பாஸாதே³ ‘‘டி²த’’இதி பதே³ ஸம்ப³ந்தோ⁴. ஹேட்டா²பாஸாத³ஸ்ஸ வா த²ம்பா⁴னந்தி யோஜனா. ஹேட்டா² ஸம்மதாய ஸீமாய உபரி ஆரோஹனாகாரம் த³ஸ்ஸேந்தோ ஆஹ ‘‘ஸசே பனா’’திஆதி³. நிப்³போ³த³கபதனட்டா²னேதி ச²த³னகோடியம்.

தத்தா²தி தஸ்மிம் தலே. பிட்டி²பாஸாணே ஸீமம் ப³ந்த⁴ந்தி விய ப³ந்த⁴ந்தீதி யோஜனா. தேனேவ பரிச்சே²தே³னாதி தேனேவ தலபரிச்சே²தே³ன. தாலமூலபப்³ப³தேபீதி ஏத்த² தாலமூலம் நாம ஹேட்டா² மஹந்தம் ஹுத்வா அனுபுப்³பே³ன தனுகம் ஹோதி, தேன ஸதி³ஸே பப்³ப³தேபி. விதானஸண்டா²னோதி உல்லோசஸ்ஸ ஸண்டா²னோ. சதூஸு தி³ஸாஸு நிக்³க³தஸாக²ருக்க²ஸண்டா²னோ வா கு²ஜ்ஜருக்க²ஸண்டா²னோ வா ஹோதி. யதா² பப்³ப³தோ விதானஸண்டா²னோ ஹோதி, ஏவம் முதி³ங்க³ஸண்டா²னோ வா ஹோதி பணவஸண்டா²னோ வாதி யோஜனா. தத்த² முதி³ங்கோ³ மஜ்ஜே² தூ²லோ ஹோதி, மூலே ச அந்தே ச தனுகோ. பணவோ மஜ்ஜே² தனுகோ ஹோதி, மூலே ச அக்³கே³ ச தூ²லோ. தேஸம் ஸண்டா²னோ முதி³ங்க³ஸண்டா²னோ வா பணவஸண்டா²னோ வா. ஹேட்டா² வாதி முதி³ங்க³ஸண்டா²னஸ்ஸ பப்³ப³தஸ்ஸ ஹேட்டா² வா. மஜ்ஜே² வாதி பணவஸண்டா²னஸ்ஸ மஜ்ஜே² வா. த்³வே கூடானீதி த்³வே ஸிக²ரானி. கூடந்தரந்தி கூடானம் மஜ்ஜ²ம். சினித்வா வாதி இட்ட²கஸிலாஹி சினித்வா வா. பூரேத்வா வாதி பம்ஸுவாலிகாஹி பூரேத்வா வா.

ஸப்பப²ணஸதி³ஸோதி ஸப்பஸ்ஸ ப²ணேன ஸதி³ஸோ, கு²ஜ்ஜோ பப்³ப³தோதி அத்தோ². ஆகாஸபப்³பா⁴ரந்தி பி⁴த்தியா அபரிக்கி²த்தம் ஆகாஸஸங்கா²தம் பப்³பா⁴ரம். ஸீமப்பமாணோதி ஸத்³தி⁴ம் அந்தோஸுஸிரேன ஸீமப்பமாணோ. அக்³க³கோடிந்தி அக்³க³ஸங்கா²தம் கோடிம். ஸசே பன பப்³ப³தஸ்ஸ ஹேட்டா² அந்தோலேணம் ஹோதீதி ஸம்ப³ந்தோ⁴. உபரிமஸ்ஸாதி அந்தோலேணஸ்ஸ உபரி டி²தஸ்ஸ. பாரதோதி பா³ஹிரதோ. அஸ்ஸாதி பப்³ப³தஸ்ஸ ப³ஹீதி ஸம்ப³ந்தோ⁴. ஓரதோதி அந்ததோ. லேணம் ஹோதீதி ஸம்ப³ந்தோ⁴. கித்தகம் மஹந்தந்தி ஆஹ ‘‘ஸீமாபரிச்சே²த³மதிக்கமித்வா டி²த’’ந்தி. கித்தகம் கு²த்³த³கந்தி ஆஹ ‘‘ஸப்³ப³பச்சி²மஸீமாபரிமாண’’ந்தி. தந்தி கு²த்³த³கம் லேணம். அதிகு²த்³த³கந்தி ஸப்³ப³பச்சி²மஸீமாபரிமாணாபா⁴வதோ அதிகு²த்³த³கம். ததோதி உபரிஸீமதோ. ப³ஹீதி ஸீமதோ ப³ஹி. ‘‘யதி³ ஸீமப்பமாணம், ஸீமா ஹோதியேவா’’தி இமினா யதி³ ந ஸீமப்பமாணம், ந ஸீமா ஹோதியேவாதி த³ஸ்ஸேதி.

தந்தி க²ண்ட³ஸீமம். பூரேத்வாதி இட்ட²கமத்திகாதீ³ஹி பூரேத்வா. அட்டம் ப³ந்தி⁴த்வாதி அட்டாலகம் ப³ந்தி⁴த்வா. உமங்க³னதீ³தி ஏத்த² உகாரோ ஓகாரவிபரீதோ, தஸ்மா பத²வியம் ஓதரித்வா பவிஸித்வா மங்க³தி க³ச்ச²தீதி உமங்கா³தி அத்தோ² த³ட்ட²ப்³போ³. உமங்கா³ச ஸா நதீ³ சேதி உமங்க³னதீ³. தத்தா²தி உமங்க³னதி³யம். ஹேட்டா²பத²விதலே டி²தோதி ஸீமாய ஹேட்டா²பத²விதலே இத்³தி⁴யா டி²தோ.

ஸீமாமாளகேதி க²ண்ட³ஸீமாய மாளகே. வடருக்கோ²தி நிக்³ரோத⁴ருக்கோ². ததோதி வடருக்க²தோ. நிக்³க³தபாரோஹோதி பவத்³த⁴ம்வ ஹுத்வா ருக்கோ² ஆரோஹதி அனேனாதி பாரோஹோ, ஏகோ மூலவிஸேஸோ. நிக்³க³தோ பாரோஹோ நிக்³க³தபாரோஹோ. மஹாஸீமம் ஸோதே⁴த்வாதி ஏத்த² ஸோத⁴னம் நாம மஹாஸீமக³தானம் பி⁴க்கூ²னம் ஹத்த²பாஸானயனம், ஸீமதோ வா ப³ஹிகரணம். ப³ஹித்³தா⁴தி த்³வீஹி ஸீமாஹி ப³ஹித்³தா⁴. ‘‘ப³ஹிட்டா²’’திபி பாடோ². ப³ஹி டி²தா காதப்³பா³தி அத்தோ². அனாஹச்சாதி மஹாஸீமாய பத²வீதலம் வா தத்த²ஜாதருக்கா²தீ³னி வா ந ஆஹனித்வா. ஏவந்தி யதா² க²ண்ட³ஸீமாய, ஏவம் ததா²தி அத்தோ². ஸீமாமாளகேதி க²ண்ட³ஸீமாமாளகே.

ஸீமாமாளகேதி த்³வின்னம் ஸீமானம் அங்க³ணே. ஸீமாமாளகஸ்ஸாதி கம்மஸ்ஸ கதட்டா²னஸ்ஸ ஸீமாமாளகஸ்ஸ. வேஹாஸட்டி²தஸாகா²யாதி கம்மஸ்ஸ அகதட்டா²னே ஸீமாமாளகே உட்டி²தாய வேஹாஸே டி²தாய ஸாகா²ய. தஸ்ஸாதி பி⁴க்கு²னோ பாதா³ வா நிவாஸனபாருபனம் வாதி ஸம்ப³ந்தோ⁴. புரிமனயேபீதி ‘‘ஸீமாமாளகே வடருக்கோ² ஹோதீ’’திஆதி³னா வுத்தே புரிமனயேபி. தத்ராதி புரிமனயே. உக்கி²பாபேத்வா காதும் ந வட்டதீதி த்³வீஹி ஸீமாஹி உட்டி²தருக்க²ஸ்ஸ ஸாகா² வா ததோ நிக்³க³தபாரோஹோ வா த்³வீஸு ஸீமாஸு பத²வீதலம் வா தத்த² ஜாதருக்கா²தீ³னி வா ஆஹச்ச டி²தத்தா உக்கி²பாபேத்வா காதும் ந வட்டதி. ஆனேதப்³போ³தி ஏத்த² த்³விகம்மிகாய நீதா⁴துயா அபதா⁴னகம்மஸ்ஸேவ வுத்தத்தா ‘‘பி⁴க்கூ²’’தி பதா⁴னகம்மம் அஜ்ஜா²ஹரிதப்³ப³ம். அப்³பு⁴க்³க³ச்ச²தீதி அப்³ப⁴ம் ஆகாஸம் உக்³க³ச்ச²தி. தத்ராதி பப்³ப³தே. கஸ்மா ஆனேதப்³போ³தி ஆஹ ‘‘ப³ஜ்ஜ²மானாயேவ ஹீ’’திஆதி³. தத்த² ப³ஜ்ஜ²மானாயேவாதி கம்மவாசாய ப³ஜ்ஜ²மானாயேவ. இமினா அப³த்³த⁴ஸீமா பமாணரஹிதம் தே³ஸம் ஓதரதீதி த³ஸ்ஸேதி. யம்கிஞ்சீதி யம்கிஞ்சி பப்³ப³தாதி³. யத்த² கத்த²சீதி யஸ்மிம் கஸ்மிம்சி டா²னே. ஏகஸம்ப³ந்தே⁴னாதி ப³த்³த⁴ஸீமாய ஏகஸம்ப³ந்தே⁴ன. இதீதி தஸ்மா ஆனேதப்³போ³தி யோஜனா.

140. தீணி யோஜனானி தியோஜனம். ‘‘பமாண’’ந்தி இமினா பரமஸத்³த³ஸ்ஸ அதிரேகஉத்தமத்தே² நிவத்தேதி. ஏதிஸ்ஸாதி ஸீமாய. ஸம்மனந்தேன பி⁴க்கு²னாதி ஸம்ப³ந்தோ⁴. கோணதோ மினிதம் கோணந்தி யோஜனா. ஹீதி ஸச்சம், யஸ்மா வா. ஆபத்திஞ்சாதி து³க்கடாபத்திஞ்ச.

பாரயதீதி அஜ்ஜோ²த்த²ரதி. ‘‘கிதகாபி⁴தே⁴ய்யலிங்கா³’’தி (கச்சாயனஸாரே 45 கா³தா²யம்) வசனதோ அபி⁴தே⁴ய்யபூ⁴தம் ஸீமம் ஸந்தா⁴ய இத்தி²லிங்க³வஸேன பாராதி வுத்தம். நதி³யாதி உபயோக³த்தே² ஸாமிவசனம். நதி³ந்தி ஹி அத்தோ². நதி³ம் அஜ்ஜோ²த்த²ரமானம் ஸீமந்தி ஸம்ப³ந்தோ⁴. ஏத்தா²தி நதி³பாரஸீமாயம். யத்த²ஸ்ஸாதி ஏத்த² யத்த² அஸ்ஸாதி பத³விபா⁴க³ம் த³ஸ்ஸேந்தோ ஆஹ ‘‘யத்த² நதி³யா’’திஆதி³. ‘‘நதி³யா’’தி இமினா யம்ஸத்³த³ஸ்ஸ விஸயம் த³ஸ்ஸேதி. து⁴வனாவாதி ஏத்த² து⁴வஸத்³தோ³ நிச்சத்தோ²தி ஆஹ ‘‘நிச்சஸஞ்சரணனாவா’’தி. இமினா து⁴வேன நிச்சேன ஸஞ்சரணனாவா து⁴வனாவாதி வசனத்த²ம் த³ஸ்ஸேதி. அஸ்ஸாதி ஹோதி, ப⁴வேய்ய வா. நாவாய பமாணம் த³ஸ்ஸேந்தோ ஆஹ ‘‘யா’’திஆதி³. தத்த² யாதி நாவா. பாஜனபுரிஸேனாதி ஏத்த² பாஜனம் நாம ஏகோ நாவாய க³மனூபகரணவிஸேஸோ. ஸோ ஹி பஜதி நாவா க³ச்ச²தி அனேனாதி பாஜனந்தி வுச்சதி. ஜகாரஸ்ஸ சகாரம் கத்வா பாசனந்திபி யுஜ்ஜதேவ. தஸ்ஸ கா³ஹகேன புரிஸேன ஸத்³தி⁴ந்தி அத்தோ². ஸா நாவா நீதாதி ஸம்ப³ந்தோ⁴. உத்³த⁴ம் வா அதோ⁴ வாதி நதி³யா படிஸோதம் வா ஹேட்டா²ஸோதம் வா. தே²னேஹி வாதி சோரேஹி வா. கிஞ்சாபி ஹடா, பன ததா²பி அவஸ்ஸம் லப்³ப⁴னேய்யா, து⁴வனாவாவ ஹோதீதி யோஜனா. வாதேன வாதி மாலுதேன வா ‘‘சி²ன்ன’’இதி ஸம்ப³ந்தோ⁴. வீசீஹீதி தரங்கே³ஹி. தரங்கோ³ ஹி விசித்தாகாரேன சினோதி வட்³ட⁴தீதி வீசீதி வுச்சதி. கிஞ்சாபி நதீ³மஜ்ஜ²ம் நீதா, பன ததா²பி அவஸ்ஸம் ஆஹரிதப்³பா³, து⁴வனாவாவ ஹோதீதி யோஜனா. ஓக³தேதி ஓதரித்வா க³தே. த²லம் உஸ்ஸாரிதாதி த²லம் உக்கி²பித்வா ஸாரிதா பாபிதா நாவாபீதி ஸம்ப³ந்தோ⁴. விஸங்க²தபத³ராதி ஸங்க²தவிரஹிதப²லகா வா. து⁴வனாவாவ ஹோதீதி நிமித்தகித்தனகாலே நிச்சஸஞ்சரணனாவத்தா து⁴வனாவாவ ஹோதீதி அதி⁴ப்பாயோ. தத்ராதி ‘‘து⁴வனாவா’’திவசனே. நிமித்தம் வா ஸீமா வா கம்மவாசாய க³ச்ச²தீதி ஏத்த² கிஞ்சாபி ந நிமித்தம் கம்மவாசாய க³ச்ச²தி, ஸீமாய பன அவினாபா⁴வதோ வுத்தம் ‘‘கம்மவாசாய க³ச்ச²தீ’’தி. தஸ்மாதி யஸ்மாவ நாவாய ஆக³ச்ச²ந்தாபி ப⁴க³வதா அனுஞ்ஞாதா, தஸ்மா.

யத்தா²தி நதி³பாரஸீமஸம்மனனட்டா²னே. ருக்க²ஸங்கா⁴டமயோதி ருக்க²ஸமூஹேன கதோ. பத³ரப³த்³தோ⁴தி ப²லகேஹி ப³த்³தோ⁴. ஸஞ்சரணயோக்³கோ³தி ஸஞ்சரணக்க²மோ. பாளியம் ‘‘அஸ்ஸா’’தி டா²னே அட்ட²கதா²யம் ‘‘அத்தீ²’’தி வுத்தத்தா ‘‘அஸ்ஸா’’திபத³ஸ்ஸ ஹோதீதி அத்தோ²யேவ த³ட்ட²ப்³போ³. தம்க²ணஞ்ஞேவாதி தஸ்மிம் நிமித்தகித்தக்க²ணேயேவ. ருக்க²ம் சி²ந்தி³த்வா கதோதி ஸம்ப³ந்தோ⁴. ஏகபதி³கஸேதூதி ஏகேன பதே³ன க³மனயோக்³கோ³ ஏகபதி³கோ, ஸோயேவ ஸேதூதி ஏகபதி³கஸேது. அகப்பியஸேதும் த³ஸ்ஸேந்தோ ஆஹ ‘‘ஸசே பனா’’திஆதி³. தேனாதி ஸேதுனா. ஸஞ்சரிதும் ந ஸக்கா ஹோதீதி யோஜனா.

யத்தா²தி யஸ்மிம் நதி³பாரஸீமஸம்மனனட்டா²னே. அபி⁴முக²தித்தே²யேவாதி ஸீமாய அபி⁴முக²தித்தே² ஏவ. து⁴வனாவா வா து⁴வஸேது வா அபி⁴முக²தித்த²தோ ஈஸகம் உத்³த⁴ம் ஆரோஹந்தோபி அதோ⁴ ஓரோஹந்தோபி கப்பதீதி த³ஸ்ஸேந்தோ ஆஹ ‘‘ஸசே’’திஆதி³. ஈஸகந்தி ஏகஉஸப⁴ த்³விஉஸபா⁴தி³வஸேன மனம் அப்பமத்தம். உத்³த⁴ம் வாதி அபி⁴முக²தித்த²தோ உபரி வா. அதோ⁴ வாதி ததோ ஹேட்டா² வா. கா³வுதமத்தப்³ப⁴ந்தரேதி கா³வுதபமாணஸ்ஸ டா²னஸ்ஸ அப்³ப⁴ந்தரே.

ஸஹனிமித்தகித்தனவிதி⁴னா ஸம்மனிதப்³ப³விதி⁴ம் த³ஸ்ஸேந்தோ ஆஹ ‘‘இமஞ்ச பனா’’திஆதி³. த்³வீஸு தீரேஸு டா²துமஸக்குணேய்யத்தா வுத்தம் ‘‘ஏகஸ்மிம் தீரே ட²த்வா’’தி. ததோதி நிமித்ததோ. அத்தானந்தி நிமித்தகித்தனம் வினயத⁴ரம் ஸந்தா⁴ய வுத்தம். பரிக்கி²பந்தேனாதி பரியாயந்தேன. தஸ்ஸாதி தத்தகஸ்ஸ பரிச்சே²த³ஸ்ஸ. ஸம்முக²ட்டா²னேதி அதோ⁴ஸோதே நதி³தீரே டி²தஸ்ஸ நிமித்தஸ்ஸ ஸம்முக²ட்டா²னே. ததோதி நிமித்ததோ. தஸ்ஸாதி தத்தகஸ்ஸ பரிச்சே²த³ஸ்ஸ. ஸம்முகா² நதி³தீரே நிமித்தம் அத்தீ²தி ஸம்ப³ந்தோ⁴. ஸங்க⁴டேதப்³ப³ந்தி ஸம்ப³ந்தி⁴தப்³ப³ம். அதா²தி நிமித்தகித்தனதோ பச்சா². ‘‘ஸப்³ப³னிமித்தானம் அந்தோ டி²தே பி⁴க்கூ² ஹத்த²பாஸக³தே கத்வா’’தி இத³ம் ஸப்³ப³ம் ஏகம் கா³மகே²த்தம் ப்³யாபேத்வா ஸம்மனிதபா⁴வம் ஸந்தா⁴ய வுத்தம். ஸசே ஸகலம் கா³மகே²த்தம் அப்³யாபேத்வா ஏகதே³ஸே ஸம்மனிதம் ஹோதி, நிமித்ததோ ப³ஹி டி²தே பி⁴க்கூ²பி ஹத்த²பாஸக³தே கத்வா ஸம்மனிதப்³பா³. கம்மந்தி ஸீமஸம்முதிகம்மம். ‘‘ட²பேத்வா நதி³’’ந்திவசனஸ்ஸ காரணம் த³ஸ்ஸேந்தோ ஆஹ ‘‘நதீ³ பன ப³த்³த⁴ஸீமஸங்க்²யம் ந க³ச்ச²தீ’’தி.

தீ³பகோ ஹோதீதி ஏத்த² தீ³போதி அந்தரதீ³போ. ஸோ ஹி யஸ்மா ஜலமஜ்ஜே² தி³ப்பதி, யஸ்மா ச த்³விதா⁴ ஆபோ ஏத்த² ஸந்த³தி, தஸ்மா தீ³போதி வுச்சதி, ஸோயேவ கு²த்³த³கட்டே²ன தீ³பகோ. ககாரோ ஹி கு²த்³த³கத்த²வாசகோ. தந்தி தீ³பகம். அத்தனாதி வினயத⁴ரேன. ஓரிமந்தே ச பாரிமந்தே சாதி அதோ⁴ஸோதே நதி³தீரே டி²தஸ்ஸ நிமித்தஸ்ஸ ஸம்முகே² ஓரிமந்தே ச பாரிமந்தே ச. பரதீரே நிமித்தம் கித்தேத்வாதி ஸம்ப³ந்தோ⁴. கிஸ்ஸ ஸம்முக²ட்டா²னே நிமித்தந்தி ஆஹ ‘‘நதி³யா ஓரிமதீரே நிமித்தஸ்ஸ ஸம்முக²ட்டா²னே’’தி. ததோதி நிமித்ததோ. ஸம்முகா² நிமித்தம் அத்தீ²தி ஸம்ப³ந்தோ⁴. பாரிமந்தே ச ஓரிமந்தே சாதி பரதீரே உபரிஸோதே டி²தஸ்ஸ நிமித்தஸ்ஸ ஸம்முகே² பாரிமந்தே ச ஓரிமந்தே ச. பட²மகித்திதனிமித்தேனாதி ஓரிமதீரே உபரிஸோதே பட²மம் கித்திதேன நிமித்தேன. ஏகா ஸீமா இமஸ்ஸாதி ஏகஸீமோ, தீ³பகோ. ‘‘தீரத்³வயஞ்சா’’தி பத³மபேக்கி²த்வா ‘‘ஏகஸீம’’ந்தி ஸம்ப³ந்தி⁴தப்³ப³ம். வச்சமனபேக்கி²த்வா ‘‘ஏகஸீமா’’திபி நிச்சஇத்தி²லிங்க³வஸேன பாடோ² அத்தி².

உத்³த⁴ம் வா அதோ⁴ வாதி ஏத்த² வாஸத்³தோ³ அனியமவிகப்பத்தோ². அதா²தி தஸ்மிம் அதி⁴கதரே ஸதீதி யோஜனா. விஹாரஸீமபரிச்சே²த³னிமித்தஸ்ஸ உஜுகமேவாதி ஸசே தீ³பகோ அதோ⁴ அதி⁴கதரோ ஹோதி, ஓரிமதீரே அதோ⁴ஸோதே டி²தஸ்ஸ விஹாரஸீமபரிச்சே²த³னிமித்தஸ்ஸ உஜுகமேவ. ஸிக²ரந்தி ஸிங்க³ம். தஞ்ஹி ஸிக²ம் மத்த²கம் ராதி க³ண்ஹாதீதி ஸிக²ரந்தி வுச்சதி. ததோதி தீ³பகஸ்ஸ பாரிமந்தனிமித்ததோ. பரதீரனிமித்தானி கித்தேத்வாதி ஸம்ப³ந்தோ⁴. அயம் தீ³பகஸ்ஸ விஹாரஸீமபரிச்சே²த³தோ அதோ⁴ அதி⁴கதரே வினிச்ச²யோ. உத்³த⁴ம் அதி⁴கதரேபி இமினானுஸாரேன வேதி³தப்³போ³தி ஸோ ந த³ஸ்ஸிதோ. பப்³ப³தஸண்டா²னாதி பப்³ப³தேன ஸமம் டா²னம் ஏதிஸ்ஸாதி பப்³ப³தஸண்டா²னா.

உத்³த⁴ம்பி அதோ⁴பீதி பிஸத்³தோ³ ஸமுச்சயத்தோ². உபோ⁴பி ஸிக²ரானீதி உத்³த⁴ம் ஸிக²ரம், அதோ⁴ ஸிக²ரந்தி உபோ⁴பி ஸிக²ரானி. முதி³ங்க³ஸண்டா²னாதி மூலே ச அக்³கே³ ச தனுகஸ்ஸ மஜ்ஜே² தூ²லஸ்ஸ முதி³ங்க³ஸ்ஸ ஸண்டா²னா.

ஸப்³ப³பட²மேன நயேனாதி உத்³த⁴ம் அதி⁴கனயஸ்ஸ, அதோ⁴ அதி⁴கனயஸ்ஸ, உத்³த⁴ம்அதோ⁴அதி⁴கனயஸ்ஸ சாதி ஸப்³பே³ஸம் நயானம் பட²மேன விஹாரஸீமதீ³பகானம் ஸமேன நயேன. பணவஸண்டா²னாதி மூலே ச அக்³கே³ ச தூ²லஸ்ஸ மஜ்ஜே²தனுகஸ்ஸ பணவஸ்ஸ ஸண்டா²னா.