72. உபோஸதா²கா³ராதி³கதா²

141. அனுபரிவேணியந்தி ஏத்த² அனுஸத்³த³ஸ்ஸ விச்ச²த்த²ம், பரிவேணஸத்³த³ஸ்ஸ ச லிங்க³விபல்லாஸபா⁴வம் த³ஸ்ஸேதும் வுத்தம் ‘‘தஸ்மிம் தஸ்மிம் பரிவேணே’’தி. பரிவேணஸத்³தோ³ ஹி நபும்ஸகலிங்கோ³, இத⁴ பன லிங்க³விபல்லாஸம் கத்வா இத்தி²லிங்க³வஸேன வுத்தம். ‘‘ஸங்கேதம் அகத்வா’’தி இமினா அஸங்கேதேனாதி பத³ஸ்ஸ கிரியாவிஸேஸனத்தம் தீ³பேதி. ‘‘கம்மவாசாயா’’தி இமினா ஸமூஹனித்வாதி பத³ஸ்ஸ கரணம் த³ஸ்ஸேதி.

142. யதோதி ஏத்த² தோபச்சயஸ்ஸ காரணத்தே² பவத்தபா⁴வம் த³ஸ்ஸேந்தோ ஆஹ ‘‘யஸ்மா’’தி. ‘‘ஹத்த²பாஸே’’தி இமினா ஹத்த²பாஸதோ ப³ஹி நிஸின்னே அகதோவஸ்ஸ உபோஸதோ² ஹோதீதி த³ஸ்ஸேதி. அஸ்ஸாதி பி⁴க்கு²னோ. வத்து²வஸேனாதி அட்டு²ப்பத்திவஸேன. உபோஸத²ஸ்ஸ பமுக²ஸ்ஸ அப்³போ⁴காஸே வா மாளகாதீ³ஸு வாதி ஸம்ப³ந்தோ⁴. நிமித்துபகா³ வா அனிமித்துபகா³ வாதி ஹேட்டா² அட்ட²ஸு நிமித்தேஸு வுத்தா நிமித்துபகா³ வா அனிமித்துபகா³ வா பப்³ப³தாத³யோ வா அஞ்ஞே வா கித்தேதப்³பா³.

பட²மதரம் ந ஆக³ச்ச²தி, து³க்கடந்தி உபோஸதே² கோ⁴ஸியமானே பட²மதரம் ந ஆக³ச்ச²தி, து³க்கடம். விஹாரஸ்ஸ மஜ்ஜே² ஹோதீதி யோஜனா. ஏத்தா²தி போராணகே ஆவாஸே. தத்தா²தி போராணகே ஆவாஸே. அஸம்பா³தோ⁴தி ஸங்க⁴ஸ்ஸ நிஸஜ்ஜட்டா²னபஹோனகோ. தத்தா²தி பச்சா² உட்டி²தே ஆவாஸே.

ஸப்³பே³ஸம் நிஸஜ்ஜட்டா²னந்தி யோஜனா. தத்தா²தி தே²ரஸ்ஸ விஹாரே. ஸோதி தே²ரஸ்ஸ விஹாரோ. ஏத்தா²தி தும்ஹாகம் விஹாரே. ஸப்³பே³ஸம் ஓகாஸோ நத்தீ²தி ஸம்ப³ந்தோ⁴. தத்தா²தி தம் அஸுகம் நாம ஆவாஸம். ‘‘வட்டதீ’’தி வத்தப்³ப³ந்தி யோஜனா. தஸ்ஸாதி தே²ரஸ்ஸ.