100. ஸீமோக்கந்திகபேய்யாலகதா²

177. ஆவாஸிகேனஆக³ந்துகபேய்யாலே ஸப்³ப³ம் வேதி³தப்³ப³ந்தி ஸம்ப³ந்தோ⁴. வேதி³தப்³பா³காரம் ஸஹ உபமாய த³ஸ்ஸேந்தோ ஆஹ ‘‘யதா²’’திஆதி³. ஆக³ந்துகேனஆவாஸிகபேய்யாலே பன ஆனேதப்³ப³ந்தி ஸம்ப³ந்தோ⁴. புரிமபேய்யாலேதி ஆவாஸிகேனஆக³ந்துகபேய்யாலே. ஆக³ந்துகேனஆக³ந்துகபேய்யாலே பன யோஜேதப்³போ³தி ஸம்ப³ந்தோ⁴. ஏத்த² ச பேய்யாலந்தி ஸதி³ஸனயஸ்ஸ ச தம்ஜானனஞாணஸ்ஸ ச பாதப்³ப³ம் ரக்க²னம் பேய்யம், பேய்யம், பேய்யே வா, பேய்யாய வா அலதி ஸமத்தே²தீதி பேய்யாலந்தி வசனத்தோ² காதப்³போ³.

178. ஆவாஸிகானம் சாதுத்³த³ஸோ ஹுத்வா கஸ்மா ஆக³ந்துகானம் பன்னரஸோதி ஆஹ ‘‘யேஸ’’ந்திஆதி³. தத்த² யேஸந்தி ஆக³ந்துகானம். திரோரட்ட²தோதி ஆவாஸிகானம் ரட்ட²ஸ்ஸ அஞ்ஞரட்ட²தோ. திரோஜனபத³தோதி ஏகரட்டே²பி அஞ்ஞஜனபத³தோ. சாதுத்³த³ஸிகம் அகம்ஸூதி ஸஞ்ஞானானத்தவஸேன சாதுத்³த³ஸிகம் அகம்ஸு. அனுவத்திதப்³ப³ந்தி அனுமதிம் வத்திதப்³ப³ம். ந படிக்கோஸிதப்³ப³ந்தி ‘‘ந சாதுத்³த³ஸோ’’தி வத்வா ந வாரிதப்³ப³ம். ந அகாமாதி ஏத்த² கமுதா⁴து இச்ச²த்தோ², கரணத்தே² ச நிஸ்ஸக்கவசனந்தி ஆஹ ‘‘ந அனிச்சா²ய தா³தப்³பா³’’தி.