101. லிங்கா³தி³த³ஸ்ஸனகதா²

179. ‘‘ஆவாஸிகானம் ஆகார’’ந்தி இமினா ஆவாஸிகாகாரந்தி பத³ஸ்ஸ ச²ட்டீ²ஸமாஸம் த³ஸ்ஸேதி. ஸப்³ப³த்தா²தி ஸப்³பே³ஸு ‘‘ஆவாஸிகலிங்க³’’ந்திஆதீ³ஸு. யேனாதி ஸுபஞ்ஞத்தமஞ்சபீடா²தி³னா, க³ண்ஹதீதி ஸம்ப³ந்தோ⁴. தேஸந்தி ஆவாஸிகானம். ஆசாரஸண்டா²னந்தி ஆசாரஸண்டி²திம். ஸோ ஸுபஞ்ஞத்தமஞ்சபீடா²தி³கோ ஆகாரோ நாமாதி யோஜனா. யந்தி ஸுபஞ்ஞத்தமஞ்சபீடா²தி³ம், க³மயதீதி ஸம்ப³ந்தோ⁴. தத்த² தத்தா²தி தஸ்மிம் தஸ்மிம் டா²னே. லீனே ஆவாஸிகேதி ஸம்ப³ந்தோ⁴. தம் ஸுபஞ்ஞத்தமஞ்சபீடா²தி³ லிங்க³ம் நாமாதி யோஜனா. ‘‘அதி³ஸ்ஸமானே’’தி இமினா லீனேதி பத³ஸ்ஸ அத்த²ம் த³ஸ்ஸேதி. ‘‘ஜானாபேதீ’’தி இமினா க³மயதீதி பத³ஸ்ஸ ஞாணத்த²ம் த³ஸ்ஸேதி. யந்தி ஸுபஞ்ஞத்தமஞ்சபீடா²தி³ம். தேதி ஆவாஸிகா. தம் ஸுபஞ்ஞத்தமஞ்சபீடா²தி³ நிமித்தம் நாமாதி யோஜனா. யேனாதி ஸுபஞ்ஞத்தமஞ்சபீடா²தி³னா. தேதி ஆவாஸிகா உத்³தி³ஸியந்தி, ஸோ ஸுபஞ்ஞத்தமஞ்சபீடா²தி³கோ உத்³தே³ஸோ நாமாதி யோஜனா. இமேஹி பதே³ஹி ஆகிரியந்தி பகாஸியந்தி ஏதேனாதி ஆகாரோ, லீனே க³மயதி போ³தே⁴தீதி லிங்க³ம். நிமியந்தி பரிச்சி²ஜ்ஜ ஞாயந்தி ஏதேனாதி நிமித்தம், உத்³தி³ஸியந்தி அபதி³ஸியந்தி ஏதேனாதி உத்³தே³ஸோதி வசனத்த²ம் த³ஸ்ஸேதி. ஸப்³ப³மேதந்தி ‘‘ஆவாஸிகாகார’’ந்திஆதி³ ஏதம் ஸப்³ப³ம். யதா²யோக³ந்தி பாளியம் யோகா³னுரூபம். தத்தா²தி ஆக³ந்துகாகாராதீ³ஸு. ‘‘அம்ஹாகம் இத³’’ந்தி ந ஞாதப்³ப³ந்தி அஞ்ஞாதம், ததே³வ அஞ்ஞாதகம், நிஸீத³னாதி³. ‘‘அம்ஹாகம் இத³’’ந்தி அஜானனம் நாம அத்தனோ அஸந்தகத்தா, அஞ்ஞேஸமேவ ஸந்தகத்தா ஹோதீதி ஆஹ ‘‘அஞ்ஞேஸம் ஸந்தக’’ந்தி. உத³கனிஸ்ஸேகந்தி ஸிஞ்சனவிரஹிதம் உத³கம். ப³ஹுவசனஸ்ஸாதி ‘‘தோ⁴தான’’ந்தி ஏத்த² ச²ட்டீ²ப³ஹுவசனஸ்ஸ. ஏகவசனந்தி ‘‘தோ⁴தஸ்ஸா’’தி ஏகவசனம். பச்சி²மபாடே² மலம் து⁴னாதி அனேனாதி தோ⁴தம், தோ⁴தஞ்ச தம் உத³கஞ்சேதி தோ⁴தஉத³கம், தமேவ நிஸ்ஸேகம் தோ⁴தஉத³கனிஸ்ஸேகம்.

180. ஸமானஸம்வாஸகதி³ட்டி²ந்தி பத³ஸ்ஸ இதிலோபஸமாஸம் த³ஸ்ஸேந்தோ ஆஹ ‘‘ஸமானஸம்வாஸகா ஏதேதி தி³ட்டி²’’ந்தி. ஏதேதி ஆவாஸிகா பி⁴க்கூ². ‘‘லத்³தி⁴’’ந்தி இமினா ந புச்ச²ந்தீதி பத³ஸ்ஸ கம்மம் த³ஸ்ஸேதி. நானாஸம்வாஸகபா⁴வந்தி தேஸம் லத்³தி⁴னானாஸம்வாஸகபா⁴வம். ‘‘மத்³தி³து’’ந்தி இமினா நாபி⁴விதரந்தீதி ஏத்த² அபி⁴ஸத்³த³ஸ்ஸத்த²ம் த³ஸ்ஸேதி. ‘‘அபி⁴ப⁴விது’’ந்தி இமினா ச ததே³வத்த²ம் த³ஸ்ஸேதி. நானாஸம்வாஸகபா⁴வஸ்ஸ மத்³த³னம் நாம லத்³தி⁴னிஸ்ஸஜ்ஜாபனந்தி ஆஹ ‘‘தம் தி³ட்டி²ம் ந நிஸ்ஸஜ்ஜாபேந்தீ’’தி.