57. ஹத்த²ச்சி²ன்னாதி³வத்து²கதா²

119. ஹத்த²ச்சி²ன்னாதி³வத்தூ²ஸு ஹத்தா² சி²ன்னா யஸ்ஸாதி ஹத்த²ச்சி²ன்னோதிஆதி³வசனத்த²ம் த³ஸ்ஸேந்தோ ஆஹ ‘‘யஸ்ஸா’’திஆதி³. மணிப³ந்தே⁴தி பகோட்ட²ந்தே. ஸோ ஹி யஸ்மா ஏத்த² மணிஸங்கா²தம் அலங்காரவிகதிம் ப³ந்த⁴தி, தஸ்மா மணிப³ந்தோ⁴தி வுச்சதி. கப்பரேதி கபோணியம். ஸா ஹி பரேஸம் பிட்டீ²ஸு கபதி ஹிம்ஸதி அனேனாதி ‘‘கப்பரோ’’தி வுச்சதி. யஸ்ஸ ஹத்தா² சி²ன்னா ஹோந்தி, அயம் ஹத்த²ச்சி²ன்னோ நாமாதி யோஜனா. ஏஸேவ நயோ ஸேஸேஸுபி. ஏகோ வா பாதோ³தி யோஜனா. ஹேட்டா² ‘‘ஏகோ வா த்³வே வா ஹத்தா²’’தி ஏத்தா²பி ஏஸேவ நயோ. சதூஸு ஹத்த²பாதே³ஸு த்³வே வாதி ஏகோ ஹத்தோ², ஏகோ பாதோ³தி த்³வே வா. கண்ணாதி ஸத்³த³க்³க³ஹா. தே ஹி கண்ணதி ஸவதி ஏதேஹீதி கண்ணாதி வுச்சந்தி. கண்ணாப³த்³தே⁴தி கண்ணச்சி²த்³த³ஸ்ஸ ஆப³த்³தே⁴. ஸங்கா⁴டேதுந்தி ஸங்க⁴டனம் காதும், ஆப³ந்த⁴னம் காதுந்தி அத்தோ². அஜபத³கேதி அஜபத³ஸண்டா²னே டா²னே. நாஸாதி கா⁴னானி. தானி ஹி நாஸதி அப்³யத்தஸத்³த³ம் கரோதி ஏதாஹீதி நாஸாதி வுச்சந்தி. நாஸிகாதி நாஸாயேவ. ஸண்டா²பேதுந்தி ஸுட்டு² ட²பேதும், பகதியா ட²பேதுந்தி அத்தோ². நக²ஸேஸந்தி நகோ²யேவ ஸேஸோ சி²ன்னங்கு³லிதோதி நக²ஸேஸோ, தம். அக்³கே³ புரே உட்ட²ஹதீதி அங்கு³ட்டோ². ‘‘வுத்தனயேனேவா’’தி இமினா ‘‘நக²ஸேஸம் அத³ஸ்ஸேத்வா’’தி வசனம் அதிதி³ஸதி. கண்ட³ரனாமகாதி மஹாஸிரனாமகா. தே ஹி கம் ஸரீரம் தா⁴ரேந்தீதி கண்ட³ராதி வுச்சந்தி த⁴காரஸ்ஸ ட³காரம் கத்வா. யேஸூதி கண்ட³ரேஸு, நித்³தா⁴ரணே பு⁴ம்மம்.

யஸ்ஸ வக்³கு³லிபக்க²கா விய அங்கு³லியோ ஸம்ப³ந்தோ⁴ ஹோந்தி, அயம் ப²ணஹத்த²கோ நாமாதி யோஜனா. ஏதந்தி ப²ணஹத்த²கம். ச²ளங்கு³லாத³யோபி ப²ணஹத்த²கேயேவ ஸங்க³ஹேதப்³பா³தி ஆஹ ‘‘யஸ்ஸபி ச² அங்கு³லியோ’’திஆதி³. யஸ்ஸபி ச² அங்கு³லியோ ஹோந்தி, அயம்பி ப²ணஹத்த²கோ நாம உபசாரேன.

கு²ஜ்ஜோதி ஏத்த² கு²ஜ்ஜோ ஸரீரோ யஸ்ஸத்தீ²தி கு²ஜ்ஜோதி வசனத்த²ம் த³ஸ்ஸேந்தோ ஆஹ ‘‘கு²ஜ்ஜஸரீரோ’’தி. கஸ்மா கு²ஜ்ஜோதி ஆஹ ‘‘உரஸ்ஸ வா’’திஆதி³. யஸ்ஸ பன வங்கம், அயம்பி கு²ஜ்ஜோ நாமாதி யோஜனா. வங்கந்தி ச குடிலம். ஹீதி ஸச்சம், யஸ்மா வா. ப்³ரஹ்முஜுக³த்தோதி உஜும் க³த்தம் உஜுக³த்தம், ப்³ரஹ்முனோ உஜுக³த்தம் விய உஜுக³த்தம் இமஸ்ஸ மஹாபுரிஸஸ்ஸாதி ப்³ரஹ்முஜுக³த்தோ, மஹாபுரிஸோ.

ஸம்கே²பேன வுத்தமத்த²ம் வித்தா²ரேன த³ஸ்ஸேந்தோ ஆஹ ‘‘ஜங்க⁴வாமனஸ்ஸ ஹீ’’திஆதி³. யேஸந்தி உபி⁴ன்னம் காயானம். பூ⁴தானந்தி அமனுஸ்ஸானம் பிஸாசகபேதானம். அத்தபா⁴வோ ஹோதி வியாதி யோஜனா. பரிவடுமோதி பரிஸமந்ததோ வட்டுலஸரீரோ.

க³லக³ண்டீ³தி ஏத்த² க³லே க³ண்டோ³ யஸ்ஸத்தீ²தி க³லக³ண்டீ³தி வசனத்த²ம் த³ஸ்ஸேந்தோ ஆஹ ‘‘யஸ்ஸா’’திஆதி³. ஏதந்தி ‘‘க³லக³ண்டீ³’’தி ஏதம் வசனம். தத்தா²தி க³லக³ண்டி³பப்³பா³ஜனே. யந்தி வசனம்.

ஸிபதீ³தி ஏத்த² ஸிதி²லம் பத³ம் இமஸ்ஸாதி ஸிபதீ³தி வுத்தே பா⁴ரபாதோ³யேவ க³ஹேதப்³போ³தி ஆஹ ‘‘பா⁴ரபாதோ³ வுச்சதீ’’தி. பா⁴ரம் பாத³ம் யஸ்ஸாதி பா⁴ரபாதோ³. ஏதே த்³வே தூ²லபாத³ரோகீ³ஸு வத்தந்தீதி த³ட்ட²ப்³ப³ம். ஸஞ்ஜாதபிளகோதி ஸஞ்ஜாதபோ²டோ. உபனாஹந்தி பு⁴ஸம் ப³ந்த⁴னம். உத³கஆவாடேதி உத³கேன புண்ணாயம் காஸுயம். உத³கவாலிகாயாதி உத³கதிந்தேன மருனா. யதா² ஸிரா பஞ்ஞாயந்தி, ஏவம் மிலாபேதுந்தி யோஜனா. ஈதி³ஸந்தி ஸிராபஞ்ஞாயனஜங்க⁴தேலனாளிகஸபா⁴வம். ததா²தி யதா² பப்³ப³ஜ்ஜாகாலே கரோதி, ததா² கத்வாதி அத்தோ².

பாபரோகீ³தி ஏத்த² பாபரோக³ஸ்ஸ ஸரூபம் த³ஸ்ஸேந்தோ ஆஹ ‘‘அரிஸ’’இதிஆதி³. தத்த² அரிஸோ ச ப⁴க³ந்த³ரோ ச பித்தஞ்ச ஸேம்ஹோ ச காஸோ ச ஸோஸோ சாதி த்³வந்தோ³, தே ஆத³யோ யேஸம் தேதி அரிஸ…பே… ஸோஸாத³யோ. ஆதி³ஸத்³தே³ன ஹேட்டா² வுத்தே ஆபா³தே⁴ ஸங்க³ண்ஹாதி. தத்த² பித்தஸேம்ஹஸத்³தே³ஹி தம்ஸமுட்டா²னோ ரோகோ³ க³ஹேதப்³போ³. ‘‘நிச்சாதுரோ’’தி இமினா பாபரோகீ³தி ஏத்த² மந்துத்தே² பவத்தஸ்ஸ ஈபச்சயஸ்ஸ நிச்சயோக³த்த²ம் த³ஸ்ஸேதி.

பரிஸதூ³ஸனோதி ஏத்த² இதிஸத்³தோ³ நாமபரியாயோ, பரிஸதூ³ஸனோ நாமாதி ஹி அத்தோ². யோ அத்தனோ விரூபதாய பரிஸம் தூ³ஸேதி, அயம் பரிஸதூ³ஸனோ நாமாதி யோஜனா. ச²ஸரீரதோ³ஸம் ஆதி³ம் கத்வா பரிஸதூ³ஸனபா⁴வம் வித்தா²ரேந்தோ ஆஹ ‘‘அதிதீ³கோ⁴ வா’’திஆதி³. அதிதீ³கோ⁴ வாதி ஏத்த² ந கேவலம் பரேஸம் த்³வங்கு³லாதி³மத்ததீ³கோ⁴, அத² கோ² தி³கு³ணாதி³தீ³கோ⁴வாதி⁴ப்பேதோதி ஆஹ ‘‘அஞ்ஞேஸ’’ந்திஆதி³. நாபி⁴பதே³ஸோதி அத்தனோ நாபி⁴பதே³ஸோ. யதா² ஹி அதிதீ³கே⁴ பரவசனேன அதிதீ³க⁴ஸ்ஸ ஸரூபம் வேதி³தப்³ப³ம், ததா² அதிரஸ்ஸாதீ³ஸுபி அதிரஸ்ஸஸரூபந்தி த³ட்ட²ப்³ப³ம். மஹோத³ரோதி மஹாஉத³ரோ. கப்பஸீஸோ வாதி ஹத்தி²ஸீஸோ விய யுக³ஸீஸோ வா. கப்பஸத்³தோ³ ஹேத்த² யுக³த்த²வாசகோ. கண்ணிககேஸோ வாதி கண்ணிகஸதி³ஸேஹி கேஸேஹி ஸமன்னாக³தோ. ‘‘ஜாதிபலிதேஹீ’’தி இமினா ஜராவாதேன பஹதம் பலிதம் நிவத்தேதி. பகதிதம்ப³கேஸோதி ஏத்த² பகதிஸத்³தே³ன கேனசி பயோகே³ன தம்ப³கேஸம் நிவத்தேதி. ஆவட்டஸீஸோதி புனப்புனம் வட்டதீதி ஆவட்டோ, கேஸாவட்டோ, ஸோ ஏதஸ்ஸ ஸீஸே அத்தீ²தி ஆவட்டஸீஸோ. உத்³த⁴க்³கே³ஹீதி உத்³த⁴ம் கோடீஹி. ஜாலப³த்³தே⁴ன வியாதி ஜாலேன ப³த்³தே⁴ன இவ.

ஸம்ப³த்³த⁴ப⁴முகோ வாதி அஞ்ஞமஞ்ஞஸம்ப³த்³த⁴ப⁴முகோ வா. மக்கடப⁴முகோதி மக்கடஸ்ஸ ப⁴மு விய ப⁴மு ஏதஸ்ஸாதி மக்கடப⁴முகோ. வாஸிகோணேனாதி தச்ச²னீகோடியா. விஸமசக்கலோதி ஏத்த² சக்காகாரேன லாதி பவத்ததி, சக்காகாரம் வா லாதி க³ண்ஹாதீதி சக்கலோ. கேகரோதி வலிரோ. ஸோ ஹி குச்சி²தம் கரோதீதி கேகரோதி வுச்சதி. கக்கடஸ்ஸேவாதி கக்கடஸ்ஸ இவ. மூஸிககண்ணோதி ஆகு²கண்ணோ. ஜடுககண்ணோதி வக்³கு³லிகண்ணோ. அவித்³த⁴கண்ணோதி அச்சி²த்³த³கண்ணோ. ஹீதி ஸச்சம், யஸ்மா வா. ஸோதி அவித்³த⁴கண்ணோ. கண்ணே ப⁴க³ந்த³ரோ ஏதஸ்ஸாதி கண்ணப⁴க³ந்த³ரோ, ஸோயேவ கண்ணப⁴க³ந்த³ரிகோ. க³ண்டோ³ கண்ணே ஏதஸ்ஸாதி க³ண்ட³கண்ணோ. பக்³க⁴ரிதபுப்³பே³னாதி பக்³க⁴ரிதபூயேன. டங்கிதோ கண்ணோ யஸ்ஸாதி டங்கிதகண்ணோ. கோ³ப⁴த்தனாளிகாயாதி கு³ன்னம் ப⁴த்தபானத்த²ம் கதாய நாளிகாய. பி³ளாரக்கி² விய அதிபிங்க³லம் அக்கி² ஏதஸ்ஸாதி அதிபிங்க³லக்கி². மது⁴வண்ணோ விய பிங்க³லம் அக்கி² ஏதஸ்ஸாதி மது⁴பிங்க³லக்கி². நிப்பகு²மக்கீ²தி ஏத்த² பகு²மம் வுச்சதி அக்க²ம்ஹி ஜாதம் லோமம். தஞ்ஹி அக்கி²னோ பக்க²த்³வயே ஜாதத்தா பகு²மந்தி வுச்சதி. நத்தி² பகு²மம் அக்கி²ம்ஹி ஏதஸ்ஸாதி நிப்பகு²மக்கி². அஸ்ஸுபக்³க⁴ரணம் அக்கி²ம்ஹா ஏதஸ்ஸாதி அஸ்ஸுபக்³க⁴ரணக்கி². புப்ப²ம் ஸஞ்ஜாதம் யஸ்ஸ அக்கி²னோதி புப்பி²தம். புப்பி²தம் அக்கி² யஸ்ஸாதி புப்பி²தக்கி². அக்கி²பாகேனாதி அக்கி²னோ த³லபரியந்தேஸு பச்சனகேன ரோகே³ன.

சிபிடனாஸிகோதி அனுன்னதனாஸிகோ. ஸுகதுண்ட³ஸதி³ஸாயாதி ஸுவானம் முகே²ன ஸதி³ஸாய.

படங்க³மண்டூ³கஸ்ஸேவாதி படங்க³னாமகஸ்ஸ மண்டூ³கஸ்ஸ முக²னிமித்தம் இவ முக²னிமித்தம்யேவாதி யோஜனா. உக்க²லிமுக²வட்டிஸதி³ஸேஹீதி உக்க²லியா முக²வட்டினா ஸதி³ஸேஹி. பே⁴ரிசம்மஸதி³ஸேஹீதி பே⁴ரியா முகே² நஹிதசம்மேன ஸதி³ஸேஹி. ஏளமுகோ²தி ஏளாய நிச்சபக்³க⁴ரிதம் முக²மேதஸ்ஸேதி ஏளமுகோ². உப்பக்கமுகோ²தி உப்பக்கம் குதி²கம் முக²மேதஸ்ஸாதி உப்பக்கமுகோ². ஸங்க²துண்ட³கோதி ஸங்க²ஸ்ஸ துண்டே³ன ஸதி³ஸோ ஓட்டோ² ஏதஸ்ஸாதி ஸங்க²துண்ட³கோ.

அட்ட²கத³ந்தஸதி³ஸேஹீதி அட்ட²கனாமகஸ்ஸ நங்க³லஸ்ஸ த³ந்தேஹி ஸதி³ஸேஹி. த³ந்தே பித³ஹிதுந்தி ஸம்ப³ந்தோ⁴. த³ந்தந்தரேதி த³ந்தவிவரே, த³ந்தமஜ்ஜே² வா. கலந்த³கத³ந்தோ வியாதி காளகானம் த³ந்தோ விய.

மஹாஹனுகோதி மஹந்தோ ஹனு ஏதஸ்ஸாதி மஹாஹனுகோ. சிபிடஹனுகோதி அனுன்னதஹனுகோ. நிம்மஸ்ஸுதா³டி²கோதி நத்தி² மஸ்ஸு ச தா³டி² ச ஏதஸ்ஸாதி நிம்மஸ்ஸுதா³டி²கோ. ப⁴ட்ட²அம்ஸகூடோதி ப⁴ட்டோ² பதிதோ அம்ஸகூடோ இமஸ்ஸாதி ப⁴ட்ட²அம்ஸகூடோ. கோ³தா⁴க³த்தோதி கோ³தா⁴ய க³த்தம் விய க³த்தம் இமஸ்ஸாதி கோ³தா⁴க³த்தோ. ஸப்³ப³ம்பேதந்தி ஸப்³ப³ம்பி ஏதம் ‘‘கச்சு²க³த்தோ’’திஆதி³வசனம். ஏத்தா²தி ‘‘கச்சு²க³த்தோ’’திஆதி³வசனே. வினிச்ச²யோ வேதி³தப்³போ³தி யோஜனா.

ப⁴ட்ட²கடிகோதி ப⁴ட்டா² பன்னா கடி ஏதஸ்ஸாதி ப⁴ட்ட²கடிகோ. அச்சுக்³க³தேஹி ஆனிஸத³மம்ஸேஹீதி ஸம்ப³ந்தோ⁴. வாதண்டி³கோதி வாதேன பூரிதோ அண்ட³கோஸோ ஏதஸ்ஸாதி வாதண்டி³கோ. ஸங்க⁴ட்டனஜாணுகோதி அந்தோ நதத்தா அஞ்ஞமஞ்ஞம் ஸங்க⁴ட்டனம் ஜாணு ஏதஸ்ஸாதி ஸங்க⁴ட்டனஜாணுகோ. விகடோதி திரியக³மனபாதோ³. உபட்³ட⁴பிண்டி³கஸ்ஸ அத்த²ம் ஸஹ பே⁴தே³ன த³ஸ்ஸேந்தோ ஆஹ ‘‘ஸோ து³விதோ⁴’’திஆதி³. தத்த² து³விதோ⁴ ஸோ உபட்³ட⁴பிண்டி³கோ ஸமன்னாக³தோதி யோஜனா. அத² வா ஸோ உபட்³ட⁴பிண்டி³கோ ஹேட்டா² ஓரூள்ஹாஹி மஹந்தீஹி ஜங்க⁴பிண்டி³காஹி ஸமன்னாக³தோ வா உபரி ஆரூள்ஹாஹி மஹந்தீஹி ஜங்க⁴பிண்டி³காஹி ஸமன்னாக³தோ வாதி து³விதோ⁴தி யோஜனா. பிட்டி²கபாதோ³தி பிட்டி²யம் உட்டி²தோ பாதோ³ ஏதஸ்ஸாதி பிட்டி²கபாதோ³. க³ண்டி³கங்கு³லி வாதி க³ண்டே³ன உட்டி²தோ அங்கு³லி ஏதஸ்ஸாதி க³ண்டி³கங்கு³லி. ஸப்³போ³பேஸாதி ஏஸ ஸப்³போ³பி ஜனோ. பரிஸம் தூ³ஸேதீதி பரிஸதூ³ஸனோ.

புப்³பா³தீ³ஹீதிஆதி³ஸத்³தே³ன சக்கு²பஸாத³ஸ்ஸ அந்தராயகரானி அஞ்ஞானிபி வத்தூ²னி க³ஹேதப்³பா³னி. த்³வீஹி வா அக்கீ²ஹி, ஏகேன வா அக்கி²னாதி யோஜனா. உப⁴யம்பீதி த்³வின்னம் அட்ட²கதா²சரியானம் உப⁴யம்பி வசனம். பாளியம் ‘‘அந்த⁴ம் பப்³பா³ஜேந்தீ’’தி அவத்வா ‘‘காணம் பப்³பா³ஜேந்தீ’’தி வுத்தத்தா ‘‘பரியாயேனா’’தி வுத்தம். மஹாஅட்ட²கதா²யஞ்ஹி ‘‘ஜச்சந்தோ⁴’’தி இமினா த்³வேஅக்கி²காணம் ஸந்தா⁴ய வுத்தம். குணீதி குணனம் ஸம்கோசனம் குணம், தமேதஸ்ஸத்தீ²தி குணீ. க²ஞ்ஜோதி க²ஞ்ஜதி க³திவேகல்லபா⁴வேன பவத்ததீதி க²ஞ்ஜோ. குண்ட³பாத³கோதி ஏத்த² குண்டோ³தி க²ஞ்ஜஸ்ஸேவ நாமம். க²ஞ்ஜோ ஹி குட³தி க³மனம் படிஹனதீதி குண்டோ³தி வுச்சதி. கஸ்மா குண்ட³பாத³கோ? கஸ்மா பிட்டி²பாத³மஜ்ஜே²ன சங்கமந்தோதி ஆஹ ‘‘மஜ்ஜே² ஸம்குடிதபாத³த்தா’’தி. இமினா ஹி குண்ட³பாத³ஸ்ஸ ச பிட்டி²பாத³மஜ்ஜே²ன சங்கமனஸ்ஸ ச ஹேதும் த³ஸ்ஸேதி. ஏஸேவ நயோ அனந்தரவாக்யேபி. ஸப்³போ³பேஸாதி ஏஸ ஸப்³போ³பி ஜனோ.

பக்க²ஹதோதி ஏத்த² ஏகோ பக்கோ² ஹதோ வினாஸோ ஏதஸ்ஸாதி பக்க²ஹதோதி அத்த²ம் த³ஸ்ஸேந்தோ ஆஹ ‘‘ஏகோ ஹத்தோ² வா’’திஆதி³. ‘‘பக்க²பாதோ’’திபி பாடோ², ஸோ அபாடோ²யேவ. பக்க²ஸத்³தோ³ ஹி கோட்டா²ஸவாசகோ, ந பங்கு³லபரியாயோ, பீட²ஸப்³பீ³ வுச்சதீதி பீடே²ன ஸப்³ப³தி க³ச்ச²தி ஸீலேனாதி பீட²ஸப்³பீ³ வுச்சதி. ‘‘ஜிண்ணபா⁴வேன து³ப்³ப³லோ’’தி இமினா ஜீரணம் ஜரா, தாய து³ப்³ப³லோ ஜராது³ப்³ப³லோதி வசனத்த²ம் த³ஸ்ஸேதி. ப³லவா ஹோதீதி ஆக³ந்துகரோகா³னமபா⁴வேன ப³லவா ஹோதி, ‘‘வசீபே⁴தோ³ நப்பவத்ததீ’’தி இமினா முக²மத்தமேவ க³ச்ச²தி பவத்ததி, ந வசீபே⁴தோ³ ஏத்த² ஜனேதி மூகோ³தி த³ஸ்ஸேதி. யஸ்ஸ வசீபே⁴தோ³ ந பவத்ததி, அயம் மூகோ³ நாமாதி யோஜனா. மம்மனந்தி க²லிதவசனம். யோ ஏகமேவ அக்க²ரம் சதுபஞ்சக்க²த்தும் வத³தி, தஸ்ஸேதமதி⁴வசனம்.

ப³தீ⁴ரோதி ஸுதிஹீனோ. ஸோ ஹி ஹனனம் ஸோதபஸாத³ஸ்ஸ நாஸனம் வதோ⁴, தம் ஈரதி க³ச்ச²தீதி ப³தீ⁴ரோதி வுச்சதி. யோ ஸப்³பே³ன ஸப்³ப³ம் ந ஸுணாதி, அயம் ப³தீ⁴ரோ நாமாதி யோஜனா. இமினா நட்ட²பஸாத³தம் த³ஸ்ஸேதி. உப⁴யதோ³ஸவஸேனாதி உபலக்க²ணவஸேன வுத்தம் அந்த⁴மூக³ப³தி⁴ரபப்³பா³ஜனே திதோ³ஸவஸேனபி வுத்தத்தா. தேதி ஹத்த²ச்சி²ன்னாத³யோ த்³வத்திம்ஸஜனே. ஓஸாரணம் அபத்தோ புக்³க³லோ அத்தி², தம் புக்³க³லம் ஸங்கோ⁴ ஓஸாரேதி சேதி யோஜனா. ஓஸாரேதீதி ஸங்கே⁴ பவேஸேதி.