58. அலஜ்ஜீனிஸ்ஸயவத்து²கதா²

120. ‘‘அலஜ்ஜீனம் ஓவாத³’’ந்தி பாட²ஸேஸேன யோஜிதே ஸாம்யத்தே² ஸாமிவசனம்பி யுஜ்ஜதேவ. தம் நயம் அத³ஸ்ஸேத்வா ‘‘உபயோக³த்தே² ஸாமிவசன’’ந்தி வுத்தம். ‘‘பி⁴க்கூ²ஹி ஸபா⁴க³த’’ந்தி இமினா பி⁴க்கூ²ஹி ஸமானோ ஸீலாதி³கு³ணஸங்கா²தோ பா⁴கோ³ இமஸ்ஸாதி பி⁴க்கு²ஸபா⁴கோ³, தஸ்ஸ பா⁴வோ பி⁴க்கு²ஸபா⁴க³தந்தி வசனத்த²ம் த³ஸ்ஸேதி. ‘‘லஜ்ஜிபா⁴வ’’ந்தி இமினா பா⁴வபச்சயஸ்ஸ ஸரூபம் த³ஸ்ஸேதி. நவட்டா²னந்தி அபி⁴னவட்டா²னம். க³தேன பி⁴க்கு²னாதி ஸம்ப³ந்தோ⁴.

தே²ரோதி நிஸ்ஸயதா³யகோ தே²ரோ. க³ஹேதுகாமோதி நிஸ்ஸயம் க³ஹேதுகாமோ. ஆசாரந்தி நிஸ்ஸயபடிபன்னஸ்ஸ ஆசாரம். தத³ஹேவாதி தஸ்மிம் க³தஅஹனி ஏவ. ஆபோ⁴க³ஸ்ஸ கதத்தா, அருணுக்³க³மனஸ்ஸ ச அஜானனத்தா வுத்தம் ‘‘அனாபத்தீ’’தி. அருணுக்³க³மனம் அஜானந்தோபி ஆபோ⁴க³ஸ்ஸ அகதத்தா வுத்தம் ‘‘அருணுக்³க³மனே து³க்கட’’ந்தி. ‘‘த்³வே தீணி தி³வஸானீ’’தி பதே³ன சது பஞ்ச ச² தி³வஸானிபி க³ஹேதப்³பா³னி லக்க²ணஹாரனயேன அனிஸ்ஸிதேன வஸிதப்³ப³பா⁴வேன ஸமானப²லத்தா. தேனாஹ ‘‘ஸத்தாஹம் வஸிஸ்ஸாமீ’’தி. லத்³த⁴பரிஹாரோதி லத்³தோ⁴ பரிஹாரோ ஆபத்திஅபனயனம் யேனாதி லத்³த⁴பரிஹாரோ.