50. மாதுகா⁴தகாதி³வத்து²கதா²

112. நிக்க²ந்திந்தி ஏத்த² ‘‘இமஸ்ஸ பாபகம்மஸ்ஸா’’தி ச²ட்டீ²யோக³த்தா பா⁴வத்தே² திபச்சயோதி ஆஹ ‘‘நிக்க²மன’’ந்தி. அபவாஹனந்தி அபாயபடிஸந்தி⁴வஹனதோ அபக³மனம். யேனாதி மனுஸ்ஸபூ⁴தேன யேன ஜீவிதா வோரோபிதாதி ஸம்ப³ந்தோ⁴. மனுஸ்ஸித்தி²பூ⁴தாதி மனுஸ்ஸித்தீ² ஹுத்வா பூ⁴தா, மனுஸ்ஸித்தீ²பா⁴வம் வா பூ⁴தா பத்தா. இமினா திரச்சா²னக³தித்தி²ஆத³யோ நிவத்தேதி. ‘‘ஜனிகா’’தி இமினா போஸாவனிகமாதாத³யோ நிவத்தேதி. ஸயம்பீதி ஏத்த² பிஸத்³தோ³ ந கேவலம் மாதாயேவ, அத² கோ² புத்தேனாபீதி த³ஸ்ஸேதி. ஸதாதி ஸந்தேன. மனுஸ்ஸஜாதிகேனேவ ஸதா மனுஸ்ஸஜாதிகோ ஏவ ஹுத்வா வோரோபிதாதி யோஜனா. அனந்தரே ப⁴வே ப²லம் நிப்³ப³த்தேதீதி ஆனந்தரியம், மாதுகா⁴தககம்மம், தேன ஜாதிஸாமஞ்ஞம்பி அஜனிகம் கா⁴தேந்தோ ச ஜனிகம்பி ஜாதிபே⁴த³ம் கா⁴தேந்தோ ச ந அனந்தரிகோ ஹோதி, தஸ்ஸ பப்³ப³ஜ்ஜா ச உபஸம்பதா³ ச ந வாரிதாதி த³ஸ்ஸேந்தோ ஆஹ ‘‘யேன பனா’’திஆதி³. தத்த² போஸேதி வத்³தே⁴தீதி போஸாபனியா, ஸா ஏவ போஸாவனிகா பகாரஸ்ஸ வகாரம், யகாரஸ்ஸ ச ககாரம் கத்வா, போஸாவனிகா ச ஸா மாதா சேதி போஸாவனிகமாதா. அஸ்ஸாதி புத்தஸ்ஸ. இத³ம் பத³ம் புப்³பா³பராபேக்க²ம். தத்த² புப்³ப³பதே³ பா⁴வஸம்ப³ந்தோ⁴, பச்சி²மபதே³ ஸாமிஸம்ப³ந்தோ⁴. ஸப்³ப³தா² ஏஸேவ நயோ ஹோதீதி ஆஹ ‘‘ஸசேபீ’’திஆதி³. வேஸியாதி உபலக்க²ணவஸேன வுத்தம். யாய காயசி இத்தி²யா புத்தஸ்ஸாபி க³ஹேதப்³ப³த்தா. ‘‘அயம் மே பிதா’’தி அஜானனமேவ ஹி பமாணம். அனேனாதி இமினா புத்தேன. ‘‘பிதுகா⁴தகோத்வேவ ஸங்க்²யம் க³ச்ச²தீ’’தி இமினா மாதுகா⁴தகேபி ‘‘அயம் மே மாதா’’தி அஜானித்வா கா⁴தேந்தோபி மாதுகா⁴தகோத்வேவ ஸங்க்²யம் க³ச்ச²தீதி த³ஸ்ஸேதி.

114. ஸங்கே²பேன வுத்தமத்த²ம் வித்தா²ரேன த³ஸ்ஸேந்தோ ஆஹ ‘‘மனுஸ்ஸஜாதியம் ஹீ’’திஆதி³. அபப்³ப³ஜிதந்தி கி³ஹிபூ⁴தம். பப்³ப³ஜ்ஜா சஸ்ஸாதி ஏத்த² சஸத்³தே³ன உபஸம்பதா³பி வாரிதாதி த³ஸ்ஸேதி. அஸ்ஸாதி அரஹந்தகா⁴தகஸ்ஸ. அவஸேஸந்தி அரஹந்ததோ அவஸேஸம். அஸ்ஸாதி அரியகா⁴தகஸ்ஸ. ஆனந்தரியோ ந ஹோதி திரச்சா²னக³தத்தா பனஸ்ஸ பப்³ப³ஜ்ஜா வாரிதாதி அத்தோ² நேதப்³போ³. ஏத்தா²தி மாதுகா⁴தகாதி³கம்மேஸு. வதா⁴யாதி தத³த்தே² சதுத்தீ²தி ஆஹ ‘‘வத⁴த்தா²யா’’தி. ‘‘மாரேது’’ந்தி இமினா ‘‘வத⁴த்தா²யா’’தி ஏத்த² ஹனதா⁴து ஹிம்ஸனத்தோ²தி த³ஸ்ஸேதி. ‘‘நீயந்தீ’’தி இமினா ஓனீயந்தீதி ஏத்த² ஓத்யூபஸக்³கோ³ தா⁴த்வத்தா²னுவத்தகோதி த³ஸ்ஸேதி. யம் பன வசனம் வுத்தந்தி ஸம்ப³ந்தோ⁴. தஸ்ஸ வசனஸ்ஸ அத்தோ²தி யோஜனா. ‘‘ஸசா ச இதி அயம் நிபாதோ வுத்தோ’’தி இமினா ப⁴யபீளிதத்தா ச நிருத்தீஸு அகுஸலத்தா ச த³வாப⁴ணனேன ரவாப⁴ணனேன அயம் நிபாதோ சோரேஹி வுத்தோதி த³ஸ்ஸேதி. ‘‘ஸசே ச இச்சேவ வா பாடோ²’’தி இமினா தேஹி ததா² வுத்தேபி ஸங்கீ³திகாலே வா போத்த²காரூள்ஹகாலே வா யதா²பூ⁴தம் ஸங்கீ³தத்தா, போத்த²காரூள்ஹத்தா ச யதா²பூ⁴தோ பாடோ² அத்தீ²தி த³ஸ்ஸேதி. தத்தா²தி தேஸு பதே³ஸு. நித்³தா⁴ரணே பு⁴ம்மம். தஸ்ஸாதி ‘‘ஸசஜ்ஜ மய’’ந்தி பாட²ஸ்ஸ. ‘‘ஸசே அஜ்ஜ மய’’ந்தி இமினா ஏகாரலோபஸந்தி⁴ம் த³ஸ்ஸேதி. ‘‘ஸசேஜ்ஜ மய’’ந்தி அகாரலோபஸந்தி⁴னாபி பாடோ² அத்தி².

115. பகதத்தந்தி பகதியா ஸீலஸங்கா²தோ அத்தா ஸபா⁴வோ ஏதிஸ்ஸாதி பகதத்தா, தம். காயஸம்ஸக்³கே³ன பி⁴க்கு²னீனம் பாராஜிகத்தா வுத்தம் ‘‘ஸீலவினாஸம் பாபேதீ’’தி. அனிச்ச²மானம்யேவ பி⁴க்கு²னிந்தி ஸம்ப³ந்தோ⁴.

இச்ச²மானந்தி ஓதா³தவத்த²வஸனம் இச்ச²மானம். யஸ்மா அபி⁴க்கு²னீ ஹோதி, தஸ்மா பி⁴க்கு²னீதூ³ஸகோ ந ஹோதீதி யோஜனா. ஸீலவிபன்னம் பி⁴க்கு²னிந்தி ஸம்ப³ந்தோ⁴.

யோ தே³வத³த்தோ ஸங்க⁴ம் பி⁴ந்த³தி விய, பி⁴ந்த³தீதி யோஜனா. உத்³த⁴ம்மந்தி த⁴ம்மதோ விரஹிதம். உப்³பி³னயந்தி வினயதோ விரஹிதம். சதுன்னம் கம்மானந்தி அபலோகனாதீ³னம் சதுன்னம் கம்மானம்.

யோ தே³வத³த்தோ லோஹிதம் உப்பாதே³தி விய, உப்பாதே³தீதி யோஜனா. து³ட்ட²சித்தேனாதி ஏத்த² ந யம்கிஞ்சி து³ட்ட²சித்தம் து³ட்ட²சித்தம் நாம, அத² கோ² வத⁴கசித்தந்தி ஆஹ ‘‘வத⁴கசித்தேனா’’தி. ஸரீரேதி ஸரீரப்³ப⁴ந்தரே. ததா²க³தஸ்ஸ ஹி அபே⁴ஜ்ஜகாயத்தா பரூபக்கமேன சம்மச்சே²த³ம் கத்வா லோஹிதஸ்ஸ உப்பாத³னம் நாம நத்தி². யோ பன ஜீவகோ பா²ஸும் கரோதி விய, பா²ஸும் கரோதீதி யோஜனா. லோஹிதஞ்சாதி பூதிலோஹிதஞ்ச.