54. உப⁴தோப்³யஞ்ஜனகவத்து²கதா²

116. உப⁴தோப்³யஞ்ஜனகோதி ஏத்த² பா³ஹிரத்த²ஸமாஸம் த³ஸ்ஸேந்தோ ஆஹ ‘‘இத்தி²னிமித்துப்பாத³னகம்மதோ சா’’திஆதி³. தத்த² ‘‘இத்தி²…பே… கம்மதோ சா’’தி இமினா உப⁴யஸரூபம் த³ஸ்ஸேதி. உப⁴தோ கம்மதோ பவத்தந்தி பாட²ஸேஸோ யோஜேதப்³போ³. ப்³யஞ்ஜனந்தி நிமித்தம். அஸ்ஸாதி ஜனஸ்ஸ. கரோதிபி காரேதிபீதி ஏத்த² கரதா⁴துயா ஸுத்³த⁴கம்மகாரிதகம்மானி த³ஸ்ஸேந்தோ ஆஹ ‘‘புரிஸனிமித்தேனா’’திஆதி³. தத்த² ‘‘வீதிக்கம’’ந்தி இமினா ஸுத்³த⁴கம்மம் த³ஸ்ஸேதி, ‘‘பர’’ந்தி இமினா காரிதகம்மம் த³ஸ்ஸேதி. ஸமாத³பேத்வாதி உய்யோஜேத்வா. தஸ்ஸ து³வித⁴பா⁴வம் த³ஸ்ஸேந்தோ ஆஹ ‘‘து³விதோ⁴’’திஆதி³. தத்த² இத்தி²பா⁴வேன லக்கி²தோ உப⁴தோப்³யஞ்ஜனகோ இத்தி²உப⁴தோப்³யஞ்ஜனகோ. ஏஸ நயோ இதரத்தா²பி.

தத்தா²தி து³விதே⁴ஸு உப⁴தோப்³யஞ்ஜனகேஸு. இத்தி²னிமித்தந்தி இத்தி²யா அங்க³ஜாதம். ஏஸேவ நயோ ‘‘புரிஸனிமித்த’’ந்தி ஏத்தா²பி. பாகடம் படிச்ச²ன்னந்தி ஸபா⁴வதோ பாகடம் படிச்ச²ன்னம். புன படிச்ச²ன்னம் பாகடந்தி ராக³வஸேன படிச்ச²ன்னம் பாகடம். பரம் க³ண்ஹாபேதீதி பரமேவ க³ண்ஹாபேதீதி அத்தோ². இத³ந்தி காரணம். ஏதேஸந்தி த்³வின்னம் உப⁴தோப்³யஞ்ஜனகானம். குருந்தி³யம் பன வுத்தம், கிம் வுத்தந்தி யோஜனா. தத்தா²தி உப⁴தோப்³யஞ்ஜனகே. விசாரணக்கமோதி வீமம்ஸனானுக்கமோ. ‘‘தத்த² விசாரக்கமோ’’திபி பாடோ². விசாரணக்கமோ த⁴ம்மஸங்க³ஹட்ட²கதா²ய வேதி³தப்³போ³, இத⁴ பன கிம் வேதி³தப்³ப³ந்தி ஆஹ ‘‘இத³மித⁴ வேதி³தப்³ப³’’ந்தி. தத்த² இத³ந்தி நபப்³ப³ஜ்ஜூபஸம்பத³காரணம். இதா⁴தி இமிஸ்ஸம் வினயட்ட²கதா²யம்.