2. அஜபாலகதா²

4. ந ப⁴க³வாதி ஏத்த² நகாரோ ‘‘உபஸங்கமீ’’தி பதே³ன யோஜேதப்³போ³, ந உபஸங்க²மீதி ஹி அத்தோ². தம்ஹா ஸமாதி⁴ம்ஹாதி ததோ அரஹத்தப²லஸமாபத்திஸமாதி⁴தோ. அனந்தரமேவ அனுபஸங்கமனம் உபமாய ஆவிகரோந்தோ ஆஹ ‘‘யதா² பனா’’திஆதி³. இச்சேவம் வுத்தம் ந ஹோதீதி யோஜனா. இத³ந்தி இத³ம் அத்த²ஜாதம். ஏத்தா²தி ‘‘பு⁴த்வா ஸயதீ’’தி வாக்யே. ஏவந்தி உபமேய்யஜோதகோ. இதா⁴பீதி இமிஸ்ஸம் ‘‘அத² கோ² ப⁴க³வா’’திஆதி³பாளியம்பி. இத³ந்தி அயமத்தோ² தீ³பிதோ ஹோதீதி யோஜனா. ஏத்தா²தி ‘‘அத² கோ² ப⁴க³வா’’திஆதி³பாடே².

அபரானிபீதி பல்லங்கஸத்தாஹதோ அஞ்ஞானிபி. தத்ராதி ‘‘அபரானிபீ’’திஆதி³வசனே. ப⁴க³வதி நிஸின்னே ஸதீதி யோஜனா. கிரஸத்³தோ³ வித்தா²ரஜோதகோ. கிம் நு கோ²தி பரிவிதக்கனத்தே² நிபாதோ. ஏகச்சானந்தி அப்பேஸக்கா²னம் ஏகச்சானம். தாஸந்தி தே³வதானம். ப³லாதி⁴க³மட்டா²னந்தி ப³லேன தேஜஸா அதி⁴க³மட்டா²னம். அனிமிஸேஹீதி உம்மிஸேஹி. ஸத்தாஹந்தி கம்மத்தே² சேதம் உபயோக³வசனம், அச்சந்தஸம்யோகே³ வா. ஏவஞ்ஹி ஸதி ‘‘கால’’ந்தி கம்மம் வேதி³தப்³ப³ம். தம் டா²னந்தி அனிமிஸேஹி அக்கீ²ஹி ஓலோகியமானட்டா²னம். அதா²தி அனிமிஸஸத்தாஹஸ்ஸ அனந்தரே. ரதனசங்கமேதி ரதனமயே சங்கமே. தம் டா²னந்தி சங்கமட்டா²னம். ததோதி சங்கமஸத்தாஹதோ. ரதனக⁴ரந்தி ரதனமயம் கே³ஹம். தத்தா²தி ரதனக⁴ரே அபி⁴த⁴ம்மபிடகம் விசினந்தோதி ஸம்ப³ந்தோ⁴. ஏத்தா²தி ரதனக⁴ரே, அபி⁴த⁴ம்மபிடகே வா, நித்³தா⁴ரணே சேதம் பு⁴ம்மவசனம். தம் டா²னந்தி அபி⁴த⁴ம்மபிடகவிசினனட்டா²னம்.

ஏவந்திஆதி³ புப்³ப³வசனஸ்ஸ நிக³மவஸேன பச்சி²மவசனஸ்ஸ அனுஸந்தி⁴னித³ஸ்ஸனம். தேனாதி அஜபாலானம் நிஸீத³னகாரணேன. அஸ்ஸாதி நிக்³ரோத⁴ஸ்ஸ. ‘‘அஜபாலனிக்³ரோதோ⁴த்வேவ நாம’’ந்தி இமினா உபசாரவஸேன நாமலப⁴னம் த³ஸ்ஸேதி. அஜபா ப்³ராஹ்மணா லந்தி நிவாஸம் க³ண்ஹந்தி ஏத்தா²தி அஜபாலோ, உண்ஹகாலே வா அந்தோபவிட்டே² அஜே அத்தனோ சா²யாய பாலேதீதி அஜபாலோ, அஜபாலோ ச ஸோ நிக்³ரோதோ⁴ சேதி அஜபாலனிக்³ரோதோ⁴தி வசனத்தா²னிபி பகரணந்தரேஸு (உதா³. அட்ட². 4) த³ஸ்ஸிதானி. தத்ராபீதி அஜபாலனிக்³ரோதே⁴பி. போ³தி⁴தோதி போ³தி⁴ருக்க²தோ. ஏத்தா²தி அஜபாலனிக்³ரோதே⁴. ப⁴க³வதி நிஸின்னேதி யோஜனா. தத்தா²தி ‘‘அத² கோ² அஞ்ஞதரோ’’திஆதி³வசனே. ஸோதி ப்³ராஹ்மணோ. தி³ட்ட²மங்க³லிகோ நாமாதி தி³ட்ட²ஸுதமுதஸங்கா²தேஸு தீஸு மங்க³லிகேஸு தி³ட்ட²மங்க³லிகோ நாம கிராதி அத்தோ². ‘‘மானவஸேன…பே… வுச்சதீ’’தி இமினா ‘‘ஹும்ஹு’’ந்தி கரோதீதி ஹும்ஹுங்கோ, ஹும்ஹுங்கோ ஜாதி ஸபா⁴வோ இமஸ்ஸாதி ஹும்ஹுங்கஜாதிகோதி வசனத்த²ம் த³ஸ்ஸேதி.

தேனாதி ப்³ராஹ்மணேன. ஸிகா²ப்பத்தந்தி அக்³க³ப்பத்தம். தஸ்ஸாதி உதா³னஸ்ஸ. யோதி புக்³க³லோ, படிஜானாதீதி ஸம்ப³ந்தோ⁴. ‘‘ந தி³ட்ட²மங்க³லிகதாயா’’தி இமினா அவதா⁴ரணப²லம் த³ஸ்ஸேதி. ‘‘பா³ஹிதபாபத⁴ம்மத்தா’’தி இமினா பா³ஹிதோ பாபோ த⁴ம்மோ அனேனாதி பா³ஹிதபாபத⁴ம்மோதி வசனத்த²ம் த³ஸ்ஸேதி. ‘‘ஹும்ஹுங்காரபஹானேனா’’தி இமினா நத்தி² ஹும்ஹுங்காரோ இமஸ்ஸாதி நிஹும்ஹுங்கோதி வசனத்த²ம் த³ஸ்ஸேதி. ராகா³தி³கஸாவாபா⁴வேனாதி இமினா நத்தி² ராகா³தி³கஸாவோ இமஸ்ஸாதி நிக்கஸாவோதி வசனத்த²ம் த³ஸ்ஸேதி. ‘‘பா⁴வனானுயோக³யுத்தசித்ததாயா’’தி இமினா யதம் அனுயுத்தம் அத்தம் சித்தம் இமஸ்ஸாதி யதத்தோதி வசனத்த²ம் த³ஸ்ஸேதி. ஏத்த² ஹி யதஸத்³தோ³ வீரியவாசகோ, யததா⁴துயா நிப்ப²ன்னோ, அத்தஸத்³தோ³ சித்தபரியாயோ. யதஸத்³த³ஸ்ஸ யமுதா⁴துயா ச நிப்ப²ன்னபா⁴வம் த³ஸ்ஸேதும் வுத்தம் ‘‘ஸீலஸம்வரேன வா’’திஆதி³. ‘‘ஸஞ்ஞதசித்ததாயா’’தி இமினா யமதி ஸம்யமதீதி யதம், யதம் அத்தம் சித்தம் இமஸ்ஸாதி யதத்தோதி வசனத்த²ம் த³ஸ்ஸேதி. ஸச்சானி வித³ந்தி ஜானந்தீதி வேதா³னீதி வசனத்தே²ன மக்³க³ஞாணானி வேதா³னி நாமாதி த³ஸ்ஸேந்தோ ஆஹ ‘‘சதுமக்³க³ஞாணஸங்கா²தேஹி வேதே³ஹீ’’தி. ‘‘சதுமக்³க³ஞாணஸங்கா²தான’’ந்தி விப⁴த்திபரிணாமம் கத்வா ‘‘வேதா³ன’’ந்திபதே³ன யோஜேதப்³போ³. அந்தந்தி நிப்³பா³னம். தஞ்ஹி யஸ்மா ஸங்கா²ரானம் அவஸானே ஜாதம், தஸ்மா அந்தந்தி வுச்சதி. புன அந்தந்தி அரஹத்தப²லம். தஞ்ஹி யஸ்மா மக்³க³ஸ்ஸ பரியோஸானே பவத்தம், தஸ்மா அந்தந்தி வுச்சதி. ‘‘மக்³க³ப்³ரஹ்மசரியஸ்ஸ வுஸிதத்தா’’தி இமினா வுஸிதம் மக்³க³ஸங்கா²தம் ப்³ரஹ்மசரியம் அனேனாதி வுஸிதப்³ரஹ்மசரியோதி வசனத்த²ம் த³ஸ்ஸேதி. த⁴ம்மேன ப்³ரஹ்மவாத³ம் வதே³ய்யாதி வுத்தவசனஸ்ஸ அத்த²ம் த³ஸ்ஸேந்தோ ஆஹ ‘‘ப்³ராஹ்மணோ அஹந்தி ஏதம் வாத³ம் த⁴ம்மேன வதே³ய்யா’’தி. த⁴ம்மேனாதி பூ⁴தேன ஸபா⁴வேன. லோகேதி ஏத்த² ஸத்தலோகோவாதி⁴ப்பேதோதி ஆஹ ‘‘ஸகலே லோகஸன்னிவாஸே’’தி.