3. முசலிந்த³கதா²

5. அகாலமேகோ⁴தி ஏத்த² வப்பாதி³காலஸ்ஸ அபா⁴வா ந அகாலோ ஹோதி, அத² கோ² வஸ்ஸகாலே அஸம்பத்தத்தா அகாலோதி ஆஹ ‘‘அஸம்பத்தே வஸ்ஸகாலே’’தி. ‘‘உப்பன்னமேகோ⁴’’தி இமினா அகாலே உப்பன்னோ மேகோ⁴ அகாலமேகோ⁴தி வசனத்த²ம் த³ஸ்ஸேதி. கி³ம்ஹானம் பச்சி²மே மாஸேதி ஜேட்ட²மூலமாஸே. தஸ்மிந்தி மேகே⁴. ஸீதவாதது³த்³தி³னீதி ஏத்த² ஸீதேன வாதேன தூ³ஸிதம் தி³னம் இமிஸ்ஸா வட்டலிகாயாதி ஸீதவாதது³த்³தி³னீதி வசனத்த²ம் த³ஸ்ஸேந்தோ ஆஹ ‘‘ஸா ச பனா’’திஆதி³. ஸா ச பன ஸத்தாஹவட்டலிகா ஸீதவாதது³த்³தி³னீ நாம அஹோஸீதி ஸம்ப³ந்தோ⁴. ‘‘ஸமீபே போக்க²ரணியா நிப்³ப³த்தோ’’தி இமினா முசலிந்த³ஸ்ஸ ஸமீபே நிப்³ப³த்தோ முசலிந்தோ³தி வசனத்த²ம் த³ஸ்ஸேதி. முசலிந்தோ³தி ச நிசுலோ. ஸோ நீபோதி ச பியகோதி ச வுச்சதி. நாக³ஸ்ஸ போ⁴கோ³ ஏகோபி ஸத்தாபு⁴ஜத்தா ‘‘போ⁴கே³ஹீ’’தி ப³ஹுவசனவஸேன வுத்தம். தஸ்மிந்தி நாக³ராஜே டி²தே ஸதீதி யோஜனா. தஸ்ஸாதி நாக³ராஜஸ்ஸ. தஸ்மாதி யஸ்மா ப⁴ண்டா³கா³ரக³ப்³ப⁴பமாணம் அஹோஸி, தஸ்மா. டா²னஸ்ஸ காரணம் பரிதீ³பேதி அனேனாதி டா²னகாரணபரிதீ³பனம் ‘‘மா ப⁴க³வந்தம் ஸீத’’ந்திஆதி³வசனம். ஸோதி நாக³ராஜா. ஹீதி ஸச்சம். பாளியம் ‘‘பா³த⁴யித்தா²’’தி கிரியாபத³ம் அஜ்ஜா²ஹரிதப்³ப³ந்தி ஆஹ ‘‘மா ஸீதம் ப⁴க³வந்தம் பா³த⁴யித்தா²’’தி. தத்தா²தி ‘‘மா ப⁴க³வந்தம் ஸீத’’ந்திஆதி³வசனே. ஸத்தாஹவட்டலிகாய ஸதீதி ஸம்ப³ந்தோ⁴. தம்பீதி உண்ஹம்பி. நந்தி ப⁴க³வந்தம். தஸ்ஸாதி நாக³ராஜஸ்ஸ. உப்³பி³த்³த⁴ந்தி உத்³த⁴ம் சி²த்³த³ம். வித்³த⁴சி²த்³த³ஸத்³தா³ ஹி பரியாயா. ஆகாஸம் மேக⁴படலபடிச்ச²ன்னம் ஆஸன்னம் விய ஹோதி, மேக⁴படலவிக³மே தூ³ரம் விய உபட்டா²தி, தஸ்மா வுத்தம் ‘‘மேக⁴விக³மேன தூ³ரீபூ⁴த’’ந்தி. விக³தவலாஹகந்தி ஏத்த² விக³தஸத்³தோ³ அபக³தத்த²வாசகோ, வலாஹகஸத்³தோ³ மேக⁴பரியாயோதி ஆஹ ‘‘அபக³தமேக⁴’’ந்தி. இந்த³னீலமணி விய தி³ப்³ப³தீதி தே³வோதி வசனத்தே²ன ஆகாஸோ தே³வோ நாமாதி ஆஹ ‘‘தே³வந்தி ஆகாஸ’’ந்தி. அத்தனோ ரூபந்தி அத்தனோ நாக³ஸண்டா²னம். இமினா ஸகவண்ணந்தி ஏத்த² ஸகஸத்³தோ³ அத்தவாசகோ, வண்ணஸத்³தோ³ ஸண்டா²னவேவசனோதி த³ஸ்ஸேதி.

ஸுகோ² விவேகோதி ஏத்த² தத³ங்க³ விக்க²ம்ப⁴ன ஸமுச்சே²த³ படிப்பஸ்ஸத்³தி⁴னிஸ்ஸரணவிவேகஸங்கா²தேஸு பஞ்சஸு விவேகேஸு நிப்³பா³னஸங்கா²தோ நிஸ்ஸரணவிவேகோ ச காயசித்தஉபதி⁴விவேகஸங்கா²தேஸு தீஸு விவேகேஸு நிப்³பா³னஸங்கா²தோ உபதி⁴விவேகோ ச க³ஹேதப்³போ³தி ஆஹ ‘‘நிப்³பா³னஸங்கா²தோ உபதி⁴விவேகோ’’தி. ‘‘சதுமக்³க³ஞாணஸந்தோஸேனா’’தி இமினா துட்ட²ஸ்ஸாதி ஏத்த² பிண்ட³பாதஸந்தோஸாதி³கே நிவத்தேதி. ஸுதத⁴ம்மஸ்ஸாதி ஏத்த² ஸுதஸத்³தோ³ விஸ்ஸுதபரியாயோதி ஆஹ ‘‘பகாஸிதத⁴ம்மஸ்ஸா’’தி, பாகடஸச்சத⁴ம்மஸ்ஸாதி அத்தோ². பஸ்ஸதோதி ஏத்த² மம்ஸசக்கு²ஸ்ஸ கரணபா⁴வேன ஆஸங்கா ப⁴வேய்யாதி ஆஹ ‘‘ஞாணசக்கு²னா’’தி. ‘‘அகுப்பனபா⁴வோ’’தி இமினா அப்³யாபஜ்ஜந்தி ஏத்த² ப்³யாபாத³ஸத்³த³ஸ்ஸ தோ³ஸவாசகபா⁴வோ ச ண்யபச்சயஸ்ஸ பா⁴வத்தோ² ச த³ஸ்ஸிதோ. ஏதேனாதி ‘‘அப்³யாபஜ்ஜ’’ந்திபதே³ன. மேத்தாபுப்³ப³பா⁴கோ³தி அப்³யாபஜ்ஜஸ்ஸ புப்³ப³பா⁴கே³ மேத்தாய உப்பன்னபா⁴வோ. பாணபூ⁴தேஸு ஸம்யமோதி ஏத்த² பாணபூ⁴தஸத்³தா³ வேவசனபா⁴வேன ஸத்தேஸு ஏவ வத்தந்தீதி ஆஹ ‘‘ஸத்தேஸு சா’’தி. கருணாபுப்³ப³பா⁴கோ³தி ஸம்யமஸ்ஸ புப்³ப³பா⁴கே³ கருணாய உப்பன்னபா⁴வோ. யாதி யா விராக³தா. அனாகா³மிமக்³க³ஸ்ஸ காமராக³ஸ்ஸ அனவஸேஸபஹானத்தா வுத்தம் ‘‘ஏதேன அனாகா³மிமக்³கோ³ கதி²தோ’’தி. யாதா²வமானஸ்ஸ அரஹத்தமக்³கே³ன நிருத்³த⁴த்தா வுத்தம் ‘‘அஸ்மி…பே… கதி²த’’ந்தி. இதோதி அரஹத்ததோ.