3. நக்³க³வக்³கோ³

1. பட²மஸிக்கா²பத³-அத்த²யோஜனா

883. நக்³க³வக்³க³ஸ்ஸ பட²மே ப்³ரஹ்மசரியேன சிண்ணேனாதி சிண்ணேன ப்³ரஹ்மசரியேன கிம் நு கோ² நாமாதி அத்தோ². ‘‘ப்³ரஹ்மசரியஸ்ஸ சரணேனா’’தி இமினா சிண்ணஸத்³த³ஸ்ஸ சரணம் சிண்ணந்தி வசனத்த²ம் த³ஸ்ஸேதி. ‘‘ந அஞ்ஞம் சீவர’’ந்தி இமினா ஏவத்த²ம் த³ஸ்ஸேதி, அஞ்ஞத்தா²போஹனம் வாதி. பட²மம்.

2. து³தியஸிக்கா²பத³ம்

887. து³தியே அனுத்தானட்டா²னம் நத்தீ²தி. து³தியம்.

3. ததியஸிக்கா²பத³ம்

893. ததியே அனந்தராயிகினீதி ஏத்த² நத்தி² அந்தராயோ ஏதிஸ்ஸாதி அனந்தராயா, ஸா ஏவ அனந்தராயிகினீதி வசனத்த²ம் த³ஸ்ஸேந்தோ ஆஹ ‘‘அனந்தராயா’’தி. ததியம்.

4. சதுத்த²ஸிக்கா²பத³ம்

898. சதுத்தே² பஞ்சாஹந்தி ஸமாஹாரதி³கு³, ணிகபச்சயோ ஸ்வத்தோ². ஸங்கா⁴டிசாரோதிஏத்த² கேனட்டே²ன ஸங்கா⁴டி நாம, சாரஸத்³தோ³ கிமத்தோ²தி ஆஹ ‘‘பரிபோ⁴க³வஸேன வா’’திஆதி³. தத்த² ஸங்க⁴டிதட்டே²னாதி ஸம்ஹரிதட்டே²ன. இமினா ‘‘கேனட்டே²ன ஸங்கா⁴டி நாமா’’தி புச்ச²ம் விஸஜ்ஜேதி. ‘‘பரிவத்தன’’ந்தி இமினா ‘‘சாரஸத்³தோ³ கிமத்தோ²’’தி சோத³னம் பரிஹரதி. பஞ்சஸூதி திசீவரம் உத³கஸாடிகா ஸம்கச்சிகாதி பஞ்சஸூதி. சதுத்த²ம்.

5. பஞ்சமஸிக்கா²பத³ம்

903. பஞ்சமே ‘‘சீவரஸங்கமனீய’’ந்திஏத்த² ஸங்கமேதப்³ப³ம் படிதா³தப்³ப³ந்தி ஸங்கமனீயந்தி கமுதா⁴துஸ்ஸ படிதா³னத்த²ஞ்ச அனீயஸத்³த³ஸ்ஸ கம்மத்த²ஞ்ச, ‘சீவரஞ்ச தம் ஸங்கமனீயஞ்சே’தி சீவரஸங்கமனீயந்தி விஸேஸனபரபத³பா⁴வஞ்ச த³ஸ்ஸேந்தோ ஆஹ ‘‘ஸங்கமேதப்³ப³ம் சீவர’’ந்தி. தத்த² ‘‘ஸங்கமேதப்³ப³ம் சீவர’’ந்தி இமினா கம்மத்த²ஞ்ச விஸேஸனபரபத³பா⁴வஞ்ச த³ஸ்ஸேதி. ‘‘படிதா³தப்³ப³சீவர’’ந்தி இமினா கமுதா⁴துயா அத்த²ம் த³ஸ்ஸேதி அதி⁴ப்பாயவஸேனாதி. பஞ்சமம்.

6. ச²ட்ட²ஸிக்கா²பத³ம்

909. ச²ட்டே² ‘‘அஞ்ஞம் பரிக்கா²ர’’ந்திஏத்த² பரிக்கா²ரஸ்ஸ ஸரூபம் த³ஸ்ஸேந்தோ ஆஹ ‘‘யம்கிஞ்சீ’’திஆதி³. யம்கிஞ்சி அஞ்ஞதரந்தி ஸம்ப³ந்தோ⁴. கித்தகம்அக்³க⁴னகந்தி கிம் பமாணேன அக்³கே⁴ன அரஹம் சீவரம். தா³துகாமத்தா²தி தும்ஹே தா³துகாமா ப⁴வதா²தி அத்தோ². கதிபாஹேனாதி கதிபயானி அஹானி கதிபாஹம், யகாரலோபோ. கதிபயஸத்³தோ³ஹி த்³விதிவாசகோ ரூள்ஹீஸத்³தோ³, தேன கதிபாஹேன. ஸமக்³க⁴ந்தி அப்பக்³க⁴ம். ஸம்ஸத்³தோ³ ஹி அப்பத்த²வாசகோதி. ச²ட்ட²ம்.

7. ஸத்தமஸிக்கா²பத³ம்

911. ஸத்தமே ‘‘விபக்கமிம்ஸூ’’தி ஏத்த² விவித⁴ம் டா²னம் பக்கமிம்ஸூதி த³ஸ்ஸேந்தோ ஆஹ ‘‘தத்த² தத்த² அக³மம்ஸூ’’தி. அம்ஹாகம்பி ஆக³மனந்தி ஸம்ப³ந்தோ⁴.

915. கதிபாஹேன உப்பஜ்ஜிஸ்ஸதீதி கதிபாஹேன சீவரம் உப்பஜ்ஜிஸ்ஸதி. ததோதி தஸ்மிம் சீவருப்பஜ்ஜனகாலேதி. ஸத்தமம்.

8. அட்ட²மஸிக்கா²பத³ம்

916. அட்ட²மே யே நாடகம் நாடேந்தி, தே நடா நாமாதி யோஜனா. இமினா நடகம் நாடேந்தீதி நடாதி வசனத்த²ம் த³ஸ்ஸேதி. யே நச்சந்தி, தே நாடகா நாமாதி யோஜனா. இமினா ஸயம் நடந்தீதி நாடகாதி வசனத்த²ம் தீ³பேதி. வம்ஸவரத்தாதீ³ஸூதி ஏத்த² வம்ஸோ நாம வேணு. வரத்தா நாம நத்³தி⁴கா. ஆதி³ஸத்³தே³ன ரஜ்ஜுஆத³யோ ஸங்க³ண்ஹாதி. யே லங்க⁴னகம்மம் கரோந்தி, தே லங்க⁴கா நாமாதி யோஜனா. மாயாகாராதி ஏத்த² மாயா நாம மயனாமகேன அஸுரேன ஸுரே சலயிதும் கதத்தா மயஸ்ஸ ஏஸாதி மாயா, தம் கரோதீதி மாயாகாரோ, மயனாமகோ அஸுரோயேவ. அஞ்ஞே பன ரூள்ஹீவஸேன ‘‘மாயாகாரா’’தி வுச்சந்தி. ஸோகேன ஜா²யனம் ட³ய்ஹனம் ஸோகஜ்ஜா²யம், ஸுரானம் ஸோகஜ்ஜா²யம் கரோதீதி ஸோகஜ்ஜா²யிகோ, மயனாமகோ அஸுரோயேவ. அஞ்ஞே பன ரூள்ஹீவஸேன ‘‘ஸோகஜ்ஜா²யிகா’’தி வுச்சந்தி. இதி இமமத்த²ம் த³ஸ்ஸேதும் வுத்தம் ‘‘ஸோகஜ்ஜா²யிகா நாம மாயாகாரா’’தி. கும்ப⁴து²ணிகா நாமாதி ஏத்த² விஸ்ஸட்ட²த்தா த²வீயதீதி து²ணோ, ஸத்³தோ³. கும்ப⁴ஸ்ஸ து²ணோ கும்ப⁴து²ணோ. தேன கீளந்தீதி கும்ப⁴து²ணிகா, இதி இமமத்த²ம் த³ஸ்ஸேதி ‘‘க⁴டகேன கீளனகா’’தி இமினா. பி³ம்பி³ஸகந்தி சதுரஸ்ஸஅம்ப³ணதாளனம், தம் வாதே³ந்தீதி பி³ம்பி³ஸகவாத³காதி. அட்ட²மம்.

9. நவமஸிக்கா²பத³ம்

921. நவமே தேஸந்தி யே ‘‘ந மயம் அய்யே ஸக்கோமா’’தி வத³ந்தி, தேஸம். த³ஸ்ஸதீதி அச்சா²தே³ஸ்ஸதீதி. நவமம்.

10. த³ஸமஸிக்கா²பத³ம்

927. த³ஸமே யஸ்ஸாதி கதி²னஸ்ஸ. உப்³பா⁴ரமூலகோதி உத்³தா⁴ரமூலகோ. ஸத்³தா⁴பரிபாலனத்த²ந்தி கதி²னுத்³தா⁴ரம் யாசந்தஸ்ஸ ஸத்³தா⁴ய பரிபாலனத்த²ந்தி. த³ஸமம்.

நக்³க³வக்³கோ³ ததியோ.