1. லஸுணவக்³கோ³

1. பட²மஸிக்கா²பத³-அத்த²யோஜனா

திம்ஸகானந்தரம் திம்ஸகானம் அனந்தரே காலே ச²ஸட்டி²ஸதஸங்க³ஹா ச²உத்தரஸட்டி²அதி⁴கஸதேஹி ஸிக்கா²பதே³ஹி ஸங்க³ஹிதா யே த⁴ம்மா ஸங்கீ³திகாரேஹி ஸங்கீ³தா, தா³னி இமஸ்மிம் காலே தேஸம்பி த⁴ம்மானம் அயம் வண்ணனா ஹோதீதி யோஜனா.

793. தத்தா²தி தேஸு ச²ஸட்டி²ஸதஸங்க³ஹேஸு ஸிக்கா²பதே³ஸு, பட²மஸிக்கா²பதே³தி ஸம்ப³ந்தோ⁴. ‘‘த்³வே தயோ’’தி ஏத்த² வாஸத்³தோ³ லுத்தனித்³தி³ட்டோ²தி ஆஹ ‘‘த்³வே வா தயோ வா’’தி. போ²டலகேதி கந்தே³, மிஞ்ஜே வா. ஏதந்தி ‘‘க³ண்டி³கே’’தி ஏதம் நாமம். ‘‘பமாண’’ந்திஇமினா மத்தஸத்³தோ³ பமாணத்தோ²வ, ந அப்பத்தோ², நாபி அவதா⁴ரணத்தோ²தி த³ஸ்ஸேதி. லஸுணந்தி ஸேதவண்ணமூலம் மஹாகந்த³ம். மஹாகந்தோ³ ஹி ப்³யஞ்ஜனஸம்பாகாதீ³ஸு ஆமக³ந்தா⁴னம் அபி⁴ப⁴வனத்தா லஸீயதி கந்தீயதீதி லஸுணந்தி வுச்சதி.

ஸுவண்ணஹம்ஸயோனிந்தி ஸுவண்ணமயேன பத்தேன யுத்தம் ஹம்ஸயோனிம். ஜாதிஸ்ஸரோதி ஜாதிம் ப⁴வம் ஸரதி ஜானாதீதி ஜாதிஸ்ஸரோ. அதா²தி ஜாதிஸ்ஸரஸ்ஸ நிப்ப²ன்னத்தா. நிப்ப²ன்னத்தோ² ஹி அத²ஸத்³தோ³. புப்³ப³ஸினேஹேனாதி புப்³பே³ மனுஸ்ஸப⁴வே பா⁴விதேன ஸினேஹேன. தாஸந்தி பஜாபதியா ச திஸ்ஸன்னம் தீ⁴தரானஞ்ச. தம் பனாதி பத்தம் பன.

795. மக³தே⁴ஸூதி மக³த⁴ரட்டே² டி²தேஸு ஜனபதே³ஸு. ஹீதி ஸச்சம், யஸ்மா வா. இதா⁴தி ‘‘லஸுணம் கா²தே³ய்யா’’திபதே³. தம்பீதி மாக³த⁴கம்பி. க³ண்டி³கலஸுணமேவாதி க³ண்டோ³ போ²டோ ஏதஸ்ஸத்தீ²தி க³ண்டி³கம். க³ண்ட³ஸத்³தோ³ ஹி போ²டபரியாயோ, ப³ஹுத்தே² இகபச்சயோ. ப³ஹுக³ண்டி³கலஸுணந்தி ஹி வுத்தம் ஹோதி. க³ண்ட³ஸத்³தோ³ ஹி போ²டே ச கபோலே சாதி த்³வீஸு அத்தே²ஸு வத்ததி, இத⁴ பன போ²டே வத்ததீதி த³ட்ட²ப்³ப³ம். போத்த²கேஸு பன ஓட்ட²ஜேன சதுத்த²க்க²ரேன பாடோ² அத்தி², ஸோ வீமம்ஸித்வா க³ஹேதப்³போ³. ப³ஹூஸு ஹி புப்³ப³போத்த²கேஸு கண்ட²ஜோ ததியக்க²ரோ ச ஓட்ட²ஜோ சதுத்த²க்க²ரோ சாதி த்³வே அக்க²ரா அஞ்ஞமஞ்ஞம் பரிவத்தித்வா திட்ட²ந்தி. ந ஏகத்³விதிமிஞ்ஜகந்தி ஏகமிஞ்ஜோ பலண்டு³கோ ந ஹோதி, த்³விமிஞ்ஜோ ப⁴ஞ்ஜனகோ ந ஹோதி, திமிஞ்ஜோ ஹரிதகோ ந ஹோதீதி அத்தோ². குருந்தி³யம் பன வுத்தந்தி ஸம்ப³ந்தோ⁴. ஸங்கா²தி³த்வாதி த³ந்தேஹி சுண்ணவிசுண்ணம் கத்வா.

797. பலண்டு³கோதி ஸுகந்த³கோ ஏகோ லஸுணவிஸேஸோ. ப⁴ஞ்ஜனகாதீ³னி லோகஸங்கேதோபதே³ஸதோ த³ட்ட²ப்³பா³னி. ஹீதி ஸச்சம். தஸ்ஸாதி சாபலஸுணஸ்ஸ. ஸபா⁴வேனேவாதி ஸூபஸம்பாகாதி³ம் வினா அத்தனோ ஸபா⁴வதோ ஏவ. தந்தி மாக³த⁴கம், பக்கி²பிதுந்தி ஸம்ப³ந்தோ⁴. ஹீதி ஸச்சம். யத்த² கத்த²சீதி யேஸு கேஸுசீதி. பட²மம்.

2. து³தியஸிக்கா²பத³ம்

799. து³தியே ஸம்த³ஸ்ஸனம் பா³த⁴தி நிஸேதே⁴தி அஸ்மிம் டா²னேதி ஸம்பா³த⁴ந்தி வசனத்தே²ன படிச்ச²ன்னோகாஸோ ஸம்பா³தோ⁴ நாமாதி த³ஸ்ஸேந்தோ ஆஹ ‘‘படிச்ச²ன்னோகாஸே’’தி. உபோ⁴ உபகச்ச²காதி த்³வே பா³ஹுமூலா. தே ஹி உபரி யம்கிஞ்சி வத்து²ம் கசதி ப³ந்த⁴தி ஏத்தா²தி உபகச்ச²காதி வுச்சந்தி. முத்தகரணந்தி பஸ்ஸாவமக்³கோ³. ஸோ ஹி முத்தம் கரோதி அனேனாதி முத்தகரணந்தி வுச்சதி. லோமோ கத்தீயதி சி²ந்தீ³யதி இமாயாதி கத்தரி, தாய வா, ஸுட்டு² த³ள்ஹம் லோமம் ட³ம்ஸதீதி ஸண்டா³ஸோ, ஸோயேவ ஸண்டா³ஸகோ, தேன வா, கு²ரதி லோமம் சி²ந்த³தீதி கு²ரோ, தேன வா ஸம்ஹராபேந்தியாதி ஸம்ப³ந்தோ⁴. ஸம்ஹராபேந்தியாதி அபனேந்தியாதி. து³தியம்.

3. ததியஸிக்கா²பத³ம்

803. ததியே முத்தகரணதலகா⁴தனேதி முத்தகரணஸ்ஸ தலம் ஹனனம் பஹரணம் முத்தகரணதலகா⁴தனம், தஸ்மிம் முத்தகரணதலகா⁴தனே நிமித்தபூ⁴தே. தாவ மஹந்தந்தி அதிவிய மஹந்தம். கேஸரேனாபீதி கிஞ்ஜக்கே²னாபி. ஸோ ஹி கே ஜலே ஸரதி பவத்ததீதி கேஸரோதி வுச்சதி.

805. க³ண்ட³ம் வாதி பீளகம் வா. வணம் வாதி அரும் வாதி. ததியம்.

4. சதுத்த²ஸிக்கா²பத³ம்

806. சதுத்தே² ரஞ்ஞோ ஓரோதா⁴ ராஜோரோதா⁴, புராணே ராஜோரோதா⁴ புராணராஜோரோதா⁴தி வசனத்த²ம் த³ஸ்ஸேந்தோ ஆஹ ‘‘புராணே’’திஆதி³. ‘‘கி³ஹிபா⁴வே’’தி இமினா புராணேதி ஏத்த² ணபச்சயஸ்ஸ ஸரூபம் த³ஸ்ஸேதி. சிராசிரந்தி நிபாதபடிரூபகம். தேன வுத்தம் ‘‘சிரேன சிரேனா’’தி. ‘‘ஸக்கோதா²’’தி இமினா கத²ம் தும்ஹே ராக³சித்தம் படிஹனித்வா அத்தானம் தா⁴ரேத² தா⁴ரேதும் ஸக்கோதா²தி அத்த²ம் த³ஸ்ஸேதி. அனாரோசிதேபீதி பூ⁴ததோ அனாரோசிதேபி.

807. ஜதுனாதி லாகா²ய. பட்ட²த³ண்ட³கேதி படுபா⁴வேன டா²தி பவத்ததீதி பட்டோ², ஸோயேவ த³ண்டோ³ பட்ட²த³ண்டோ³, தஸ்ஸ பவேஸனம் பட்ட²த³ண்ட³கம், தஸ்மிம் நிமித்தபூ⁴தே. ஏதந்தி ‘‘ஜதுமட்ட²கே’’தி ஏதம் வசனந்தி. சதுத்த²ம்.

5. பஞ்சமஸிக்கா²பத³ம்

810. பஞ்சமே ‘‘அதிக³ம்பீ⁴ர’’ந்திபத³ம் கிரியாவிஸேஸனந்தி ஆஹ ‘‘அதிஅந்தோ பவேஸேத்வா’’தி. ‘‘உத³கேன தோ⁴வனம் குருமானா’’தி இமினா ‘‘உத³கஸுத்³தி⁴க’’ந்திபத³ஸ்ஸ உத³கேன ஸுத்³தி⁴யா கரணந்தி அத்த²ம் த³ஸ்ஸேதி.

812. த்³வங்கு³லபப்³ப³பரமந்தி ஏத்த² த்³வே அங்கு³லானி ச த்³வே பப்³பா³னி ச த்³வங்கு³லபப்³ப³ம், உத்தரபதே³ புப்³ப³பத³லோபோ. த்³வங்கு³லபப்³ப³ம் பரமம் பமாணம் ஏதஸ்ஸ உத³கஸுத்³தி⁴கஸ்ஸாதி த்³வங்கு³லபப்³ப³பரமம். வித்தா²ரதோ த்³வங்கு³லபரமம், க³ம்பீ⁴ரதோ த்³விபப்³ப³பரமந்தி வுத்தம் ஹோதி. தேனாஹ ‘‘வித்தா²ரதோ’’திஆதி³. அங்கு³லம் பவேஸேந்தியாதி ஸம்ப³ந்தோ⁴. ஹீதி ஸச்சம். ‘‘சதுன்னம் வா’’தி இத³ம் உக்கட்ட²வஸேன வுத்தம், திண்ணம்பி பப்³ப³ம் ந வட்டதி, சதுன்னம் பன பகே³வாதி அத்தோ²தி. பஞ்சமம்.

6. ச²ட்ட²ஸிக்கா²பத³ம்

815. ச²ட்டே² ப⁴த்தஸ்ஸ விஸ்ஸஜ்ஜனம் ப⁴த்தவிஸ்ஸக்³கோ³தி வுத்தே ப⁴த்தகிச்சந்தி த³ஸ்ஸேந்தோ ஆஹ ‘‘ப⁴த்தகிச்ச’’ந்தி. பானீயஸத்³தே³ன பானீயதா²லகம் க³ஹேதப்³ப³ம், விதூ⁴பனஸத்³தே³ன பீ³ஜனீ க³ஹேதப்³பா³, உபஸத்³தோ³ ஸமீபத்தோ²தி ஸப்³ப³ம் த³ஸ்ஸேந்தோ ஆஹ ‘‘ஏகேன ஹத்தே²னா’’திஆதி³. ‘‘அச்சாவத³தீ’’திபத³ஸ்ஸ அதிக்கமித்வா வத³னாகாரம் த³ஸ்ஸேதி ‘‘புப்³பே³பீ’’திஆதி³னா.

817. ‘‘ஸுத்³த⁴உத³கம் வா ஹோதூ’’திஆதி³னா ‘‘பானீயேனா’’தி வசனம் உபலக்க²ணம் நாமாதி த³ஸ்ஸேதி. த³தி⁴மத்தூ²தி த³தி⁴மண்ட³ம் த³தி⁴னோ ஸாரோ, த³தி⁴ம்ஹி பஸன்னோத³கந்தி வுத்தம் ஹோதி. ரஸோதி மச்ச²ரஸோ மம்ஸரஸோ. ‘‘அந்தமஸோ சீவரகண்ணோபீ’’தி இமினா ‘‘விதூ⁴பனேனா’’தி வசனம் நித³ஸ்ஸனம் நாமாதி த³ஸ்ஸேதி.

819. தே³தீதி ஸயம் தே³தி. தா³பேதீதி அஞ்ஞேன தா³பேதி. உப⁴யம்பீதி பானீயவிதூ⁴பனத்³வயம்பீதி. ச²ட்ட²ம்.

7. ஸத்தமஸிக்கா²பத³ம்

822. ஸத்தமே ‘‘பயோக³து³க்கடம் நாமா’’தி இமினா ஹேட்டா² வுத்தேஸு அட்ட²ஸு து³க்கடேஸு புப்³ப³பயோக³து³க்கடம் த³ஸ்ஸேதி. ந கேவலம் புப்³ப³பயோக³து³க்கடம் ஏத்தகமேவ, அத² கோ² அஞ்ஞம்பி ப³ஹு ஹோதீதி த³ஸ்ஸேந்தோ ஆஹ ‘‘தஸ்மா’’திஆதி³. ஸங்க⁴ட்டனேஸுபீதி விலோளனேஸுபி. த³ந்தேஹி ஸங்கா²த³தீதி த³ந்தேஹி சுண்ணவிசுண்ணம் கரோதி. ஏத்தா²தி இமஸ்மிம் ஸிக்கா²பதே³, அஞ்ஞாய பி⁴க்கு²னியா காராபேத்வாதி ஸம்ப³ந்தோ⁴. ‘‘அஞ்ஞாயா’’திபத³ம் ‘‘விஞ்ஞாபேத்வா’’தி பதே³ காரிதகம்மம். மாதரம்பீதி ஏத்த² பிஸத்³தோ³ அஞ்ஞம் விஞ்ஞாபேத்வா பு⁴ஞ்ஜந்தியா பகே³வாதி த³ஸ்ஸேதி. தாய வாதி விஞ்ஞாபிதபி⁴க்கு²னியா வா. தந்தி ஆமகத⁴ஞ்ஞம். தந்தி மஹாபச்சரியம் வுத்தவசனம். புப்³பா³பரவிருத்³த⁴ந்தி புப்³பா³பரதோ விருத்³த⁴ம். ‘‘அஞ்ஞாய…பே… து³க்கடமேவா’’தி புப்³ப³வசனே து³க்கடமேவ வுத்தம், புன ‘‘அஞ்ஞாய…பே… து³க்கட’’ந்தி ச பச்சி²மவசனே பாசித்தியஞ்ச து³க்கடஞ்ச வுத்தம், தஸ்மா புப்³பா³பரவிருத்³த⁴ந்தி வுத்தம் ஹோதி. ஹீதி ஸச்சம், யஸ்மா வா.

823. லப்³ப⁴மானம் ஆமகத⁴ஞ்ஞந்தி ஸம்ப³ந்தோ⁴. அஞ்ஞம் வா யம்கிஞ்சீதி முக்³க³மாஸாதீ³ஹி வா லாபு³கும்ப⁴ண்டா³தீ³ஹி வா அஞ்ஞம் யம்கிஞ்சி திலாதி³ம் வாதி. ஸத்தமம்.

8. அட்ட²மஸிக்கா²பத³ம்

824. அட்ட²மே நிப்³பி³ட்ட²ராஜப⁴டோதி ஏத்த² உத்தரபத³ஸ்ஸ ச²ட்டீ²ஸமாஸஞ்ச புப்³ப³பதே³ன பா³ஹிரத்த²ஸமாஸஞ்ச த³ஸ்ஸேந்தோ ஆஹ ‘‘நிப்³பி³ட்டோ²’’திஆதி³. தத்த² ‘‘ரஞ்ஞோ ப⁴தீ’’தி இமினா ரஞ்ஞோ ப⁴டோ ராஜப⁴டோதி ச²ட்டீ²ஸமாஸம் த³ஸ்ஸேதி, ‘‘ஏதேனா’’தி இமினா பா³ஹிரத்த²ஸமாஸம். நிப்³பி³ட்டோ²தி நிவிட்டோ² பதிட்டா²பிதோதி அத்தோ². கேணீதி ரஞ்ஞோ தா³தப்³ப³ஸ்ஸ ஆயஸ்ஸேதமதி⁴வசனம். ஏதேனாதி ப்³ராஹ்மணேன. ததோதி டா²னந்தரதோ. ப⁴டஸங்கா²தாய கேணியா பத²த்தா காரணத்தா டா²னந்தரம் ப⁴டபத²ந்தி ஆஹ ‘‘தம்யேவ டா²னந்தர’’ந்தி.

826. சத்தாரிபி வத்தூ²னீதி உச்சாராதீ³னி. பாடேக்கந்தி படிவிஸும் ஏகேகமேவ. உச்சாரம் வாதிஆதீ³ஸு வாஸத்³தே³ன த³ந்தகட்டா²த³யோபி க³ஹேதப்³பா³தி ஆஹ ‘‘த³ந்தகட்ட²…பே… பாசித்தியமேவா’’தி. ஸப்³ப³த்தா²தி ஸப்³பே³ஸு உச்சாராதீ³ஸூதி. அட்ட²மம்.

9. நவமஸிக்கா²பத³ம்

830. நவமே ரோபிமஹரிதட்டா²னேதி ரோபிமட்டா²னே ச ஹரிதட்டா²னே ச. ரோபியதி அஸ்மிந்தி ரோபியம், தம்யேவ ரோபிமம் யகாரஸ்ஸ மகாரம் கத்வா. ஏதானீதி உச்சாராதீ³னி. ஸப்³பே³ஸந்தி பி⁴க்கு²பி⁴க்கு²னீனம். யத்த² பனாதி யஸ்மிம் கே²த்தேதி. நவமம்.

10. த³ஸமஸிக்கா²பத³ம்

835. த³ஸமே ஸோண்டா³ வாதி ஸுராஸோண்டா³ வா. மோரோதி மயூரோ. ஸுவோதி ஸுகோ. மக்கடோதி வானரோ. ஆதி³ஸத்³தே³ன ஸப்பாத³யோ ஸங்க³ண்ஹாதி, மக்கடாத³யோபி நச்சந்தூதி ஸம்ப³ந்தோ⁴. அஸம்யதபி⁴க்கூ²னந்தி வாசஸிககம்மே அஸம்யதானம் பி⁴க்கூ²னம், த⁴ம்மபா⁴ணககீ³தம் வா ஹோதூதி யோஜனா. தந்தியா கு³ணேன ப³த்³தா⁴ தந்திப³த்³தா⁴. ‘‘பி⁴’’ந்திஸங்கா²தோ ராஸத்³தோ³ ஏதிஸ்ஸாதி பே⁴ரி. குடேன கதா பே⁴ரி குடபே⁴ரி, தாய வாதி³தம் குடபே⁴ரிவாதி³தம், தம் வா. உத³கபே⁴ரீதி உத³கேன பக்கி²த்தா பே⁴ரி, தாய வாதி³தம்பி ஹோதூதி ஸம்ப³ந்தோ⁴.

836. தேஸம்யேவாதி யேஸம் நச்சம் பஸ்ஸதி, தேஸம்யேவ. யதி³ பன நச்சகீ³தவாதி³தே விஸும் விஸும் பஸ்ஸதி ஸுணாதி, பாடேக்கா ஆபத்தியோதி த³ஸ்ஸேந்தோ ஆஹ ‘‘ஸசே பனா’’திஆதி³. அஞ்ஞதோதி அஞ்ஞதோ தே³ஸதோ, பஸ்ஸதீதி ஸம்ப³ந்தோ⁴. ‘‘ஓலோகேத்வா’’தி பதே³ அபேக்கி²தே உபயோக³த்தே² தோபச்சயோ ஹோதி. அஞ்ஞம் ஓலோகேத்வாதி ஹி அத்தோ². அஞ்ஞதோ வாதே³ந்தே பஸ்ஸதீதி யோஜனா. பி⁴க்கு²னீ ந லப⁴தீதி ஸம்ப³ந்தோ⁴. அஞ்ஞே வத்தும்பீதி ஸம்ப³ந்தோ⁴. உபஹாரந்தி பூஜம். உபட்டா²னந்தி பாரிசரியம். ஸப்³ப³த்தா²தி ஸப்³பே³ஸு ஸயம் நச்சாதீ³ஸு.

837. அந்தராராமே வாதி ஆராமஸ்ஸ அந்தரே வா. ப³ஹிஆராமே வாதி ஆராமஸ்ஸ ப³ஹி வா. அஞ்ஞேன வாதி ஸலாகப⁴த்தாதீ³ஹி அஞ்ஞேன வா. தாதி³ஸேனாதி யாதி³ஸோ சோராதி³உபத்³த³வோ, தாதி³ஸேனாதி. த³ஸமம்.

லஸுணவக்³கோ³ பட²மோ.