2. து³தியஸங்கா⁴தி³ஸேஸஸிக்கா²பத³ம்

682. து³தியே வரிதப்³ப³ம் இச்சி²தப்³ப³ந்தி வரம், தமேவ ப⁴ண்ட³ந்தி வரப⁴ண்ட³ந்தி த³ஸ்ஸேந்தோ ஆஹ ‘‘மஹக்³க⁴ப⁴ண்ட³’’ந்தி. ‘‘முத்தா’’திஆதி³னா தஸ்ஸ ஸரூபம் த³ஸ்ஸேதி.

683. ஆபுப்³போ³ லோகஸத்³தோ³ அபி⁴முக²ம் லோகனத்தோ² ஹோதி, உபுப்³போ³ உத்³த⁴ம் லோகனத்தோ², ஓபுப்³போ³ அதோ⁴ லோகனத்தோ², விபுப்³போ³ இதோ சிதோ ச வீதிஹரணலோகனத்தோ², அபபுப்³போ³ ஆபுச்ச²னத்தோ². இத⁴ பன அபபுப்³ப³த்தா ஆபுச்ச²னத்தோ²தி ஆஹ ‘‘அனாபுச்சி²த்வா’’தி. மல்லக³ண ப⁴டிபுத்த க³ணாதி³கந்திஆதீ³ஸு மல்லக³ணோ நாம நாராயனப⁴த்திகோ க³ணோ. ப⁴டிபுத்தக³ணோ நாம குமாரப⁴த்திகோ க³ணோ. ஆதி³ஸத்³தே³ன அஞ்ஞம்பி கா³மனிக³மே அனுஸாஸிதும் ஸமத்த²ம் க³ணம் ஸங்க³ண்ஹாதி. அத² வா மல்லக³ணோதி மல்லராஜூனம் க³ணோ. தே ஹி க³ணம் கத்வா குஸினாராயம் ரஜ்ஜம் அனுஸாஸந்தி, தே ஸந்தா⁴ய வுத்தம் ‘‘மல்லக³ணோ’’தி. ப⁴டிபுத்தக³ணோதி லிச்ச²விக³ணோ பரியாயந்தரேன வுத்தோ. லிச்ச²விராஜூனஞ்ஹி புப்³ப³ராஜானோ ப⁴டினாமகஸ்ஸ ஜடிலஸ்ஸ புத்தா ஹோந்தி, தேஸம் வம்ஸே பவத்தா ஏதரஹி லிச்ச²விராஜானோபி ப⁴டிபுத்தாதி வுச்சந்தி. ஜடிலோ பன பா³ராணஸிரஞ்ஞோ புத்தே நதி³ஸோதேன வுய்ஹமானே நதி³தோ உத்³த⁴ரித்வா அத்தனோ அஸ்ஸமே புத்தம் கத்வா ப⁴ரணத்தா போஸனத்தா ப⁴டீதி வுச்சதி, தஸ்ஸ புத்தத்தா லிச்ச²விக³ணோ ப⁴டிபுத்தோதி வுச்சதி. தேபி க³ணம் கத்வா வேஸாலியம் ரஜ்ஜம் அனுஸாஸந்தி, தம் ஸந்தா⁴ய வுத்தம் ‘‘ப⁴டிபுத்தக³ணோ’’தி. த⁴ம்மக³ணோ நாம ஸாஸனத⁴ம்மப⁴த்திகோ க³ணோ. க³ந்தி⁴கஸேணீதி க³ந்த⁴காரானம் ஸமஜாதிகானம் ஸிப்பிகானம் க³ணோ. து³ஸ்ஸிகஸேணீதி து³ஸ்ஸகாரானம் ஸமஜாதிகானம் பேஸகாரானம் க³ணோ. ஆதி³ஸத்³தே³ன தச்ச²கஸேணிரஜகஸேணிஆத³யோ ஸங்க³ய்ஹந்தி. யத்த² யத்தா²தி யஸ்மிம் யஸ்மிம் டா²னே. ஹீதி ஸச்சம். தே ஏவாதி க³ணாத³யோ ஏவ. புன தேதி க³ணாத³யோ. இத³ந்தி ‘‘க³ணம் வா’’திஆதி³வசனம். ஏத்தா²தி ராஜாதீ³ஸு. ஸங்கா⁴புச்ச²னமேவ பதா⁴னகாரணந்தி ஆஹ ‘‘பி⁴க்கு²னிஸங்கோ⁴ ஆபுச்சி²தப்³போ³வா’’தி. கப்பக³திகந்தி கப்பம் க³ச்ச²தீதி கப்பக³தா, ஸா ஏவ கப்பக³திகா, தம்.

கேனசி கரணீயேன க²ண்ட³ஸீமம் அக³ந்த்வா கேனசி கரணீயேன பி⁴க்கு²னீஸு பக்கந்தாஸூதி யோஜனா. நிஸ்ஸிதகபரிஸாயாதி அந்தேவாஸிகபரிஸாய. வுட்டா²பேந்தியாதி உபஸம்பாதே³ந்தியாதி. து³தியம்.