3. ததியஸங்கா⁴தி³ஸேஸஸிக்கா²பத³ம்

692. ததியே து³தியேன பாதே³ன அதிக்கந்தமத்தேதி ஸம்ப³ந்தோ⁴. பரிக்கே²பாரஹட்டா²னம் நாம க⁴ரூபசாரதோ பட²மலேட்³டு³பாதோ. ஸங்கே²பதோ வுத்தமத்த²ம் வித்தா²ரதோ த³ஸ்ஸேந்தோ ஆஹ ‘‘அபி சேத்தா²’’திஆதி³. ஏத்தா²தி இமஸ்மிம் ஸிக்கா²பதே³. உபசாரே வாதி அபரிக்கி²த்தஸ்ஸ கா³மஸ்ஸ பரிக்கே²பாரஹட்டா²னே வா. ததோதி கா³மந்தரதோ, க²ண்ட³பாகாரேன வா வதிசி²த்³தே³ன வா பவிஸிதுந்தி ஸம்ப³ந்தோ⁴.

ஸம்ப³த்³தா⁴ வதி ஏதேஸந்தி ஸம்ப³த்³த⁴வதிகா, த்³வே கா³மா. விஹாரந்தி பி⁴க்கு²னிவிஹாரம். ததோ பன கா³மதோதி ததோ இதரகா³மதோ பன, நிக்க²ந்தாய பி⁴க்கு²னியா டா²தப்³ப³ந்தி ஸம்ப³ந்தோ⁴. உஸ்ஸாரணா வாதி மனுஸ்ஸானம் உஸ்ஸாரணா வா.

ஜனாதி கா³மபோ⁴ஜகா ஜனா. ஏகம் கா³மந்தி யம்கிஞ்சி இச்சி²தம் ஏகம் கா³மம். ததோதி கா³மதோ. ‘‘கஸ்மா’’தி இமாய புச்சா²ய ‘‘விஹரதோ ஏகம் கா³மம் க³ந்தும் வட்டதீ’’தி வசனஸ்ஸ காரணம் புச்ச²தி. ‘‘விஹாரஸ்ஸ சதுகா³மஸாதா⁴ரணத்தா’’திஇமினா விஸஜ்ஜனேன தம் புச்ச²ம் விஸஜ்ஜேதி.

யத்தா²தி யஸ்ஸம் நதி³யம். உத்தரந்தியா ஏகத்³வங்கு³லமத்தம்பி அந்தரவாஸகோ தேமியதி, ஸா நதீ³ நாமாதி யோஜனா. யதா² நிவஸியமானாய திமண்ட³லபடிச்சா²த³னம் ஹோதி, ஏவம் நிவத்தா²யாதி யோஜனா. பி⁴க்கு²னியா உத்தரந்தியா அந்தரவாஸகோதி ஸம்ப³ந்தோ⁴. யத்த² கத்த²சீதி யஸ்மிம் கிஸ்மிம்சி டா²னே. ‘‘ஸேதுனா க³ச்ச²தி, அனாபத்தீ’’திஇமினா பத³ஸா உத்தரந்தியா ஏவ ஆபத்தீதி த³ஸ்ஸேதி. உத்தரணகாலேதி நதி³தோ உத்தரணகாலே. ஆகாஸக³மனந்தி இத்³தி⁴யா க³மனம். ஆதி³ஸத்³தே³ன ஹத்தி²பிட்டி²ஆத³யோ ஸங்க³ண்ஹாதி. அக்கமந்தியாதி அதிக்கமந்தியா. ஏத்தா²தி த்³வீஸு தீஸு பி⁴க்கு²னீஸு. ஓரிமதீரமேவாதி அபாரதீரமேவ. தமேவ தீரந்தி ஓரிமதீரமேவ. பச்சுத்தரதீதி படினிவத்தித்வா உத்தரதி.

குருமானா பி⁴க்கு²னீ கரோதீதி யோஜனா. அஸ்ஸாதி பி⁴க்கு²னியா அஜானந்தியா ஏவ சாதி ஸம்ப³ந்தோ⁴, அனாத³ரே சேதம் ஸாமிவசனம். அத² பனாதி அத²ஸத்³தோ³ யதி³பரியாயோ, கிரியாபதே³ன யோஜேதப்³போ³. அத² அச்ச²தி, அத² ந ஓதரதீதி அத்தோ². அச்ச²தீதி வஸதி. ஹீதி ஸச்சம். இதா⁴தி ‘‘ஏகா வா ரத்திம் விப்பவஸேய்யா’’திபதே³.

ஏவம் வுத்தலக்க²ணமேவாதி ஏவம் அபி⁴த⁴ம்மபரியாயேன வுத்தலக்க²ணமேவ. தம் பனேதந்தி தம் பன அரஞ்ஞம். தேனேவாதி ஆபன்னஹேதுனா ஏவ. அட்ட²கதா²யந்தி மஹாஅட்ட²கதா²யம். பி⁴க்கு²னீஸு பவிஸந்தீஸூதி ஸம்ப³ந்தோ⁴, நித்³தா⁴ரணத்தே² சேதம் பு⁴ம்மவசனம். ஏத்தா²தி த³ஸ்ஸனூபசாரஸவனூபசாரேஸு. யத்த² ஓகாஸே டி²தம் து³தியிகா பஸ்ஸதி, ஸோ ஓகாஸோ த³ஸ்ஸனூபசாரோ நாமாதி யோஜனா. ஸாணிபாகாரந்தரிகாபீதி ஸாணிபாகாரேன ப்³யவஹிகாபி. யத்த² ஓகாஸே டி²தா…பே… ஸத்³த³ம் ஸுணாதி, ஸோ ஓகாஸோ ஸவனூபசாரோ நாமாதி யோஜனா. மக்³க³மூள்ஹஸத்³தே³னாதி மக்³கே³ மூள்ஹானம் ஸத்³தே³ன. த⁴ம்மஸ்ஸவனாரோசனஸத்³தே³னாதி த⁴ம்மஸ்ஸவனத்தா²ய ஆரோசனானம் ஸத்³தே³ன. மக்³க³மூள்ஹஸத்³தே³ன ஸத்³தா³யந்தியா ஸத்³த³ம் ஸுணாதி விய ச த⁴ம்மஸ்ஸவனாரோசனஸத்³தே³ன ஸத்³தா³யந்தியா ஸத்³த³ம் ஸுணாதி விய ச ‘‘அய்யே’’தி ஸத்³தா³யந்தியா ஸத்³த³ம் ஸுணாதீதி யோஜனா. ஸத்³தா³யந்தியாதி ஸத்³த³ம் கரோந்தியா. நாமதா⁴து ஹேஸா. ஏவரூபேதி ‘‘மக்³க³மூள்ஹஸத்³தே³ன வியா’’திஆதி³னா வுத்தே ஏவரூபே.

தித்தா²யதனம் ஸங்கந்தா வாதி தித்தீ²னம் வாஸட்டா²னம் ஸங்கந்தா வா. இமினா ‘‘பக்க²ஸங்கந்தா’’தி ஏத்த² பக்க²ஸத்³த³ஸ்ஸ படிபக்க²வாசகத்தா தேன ஸாஸனபடிபக்கா² தித்தி²யா ஏவ க³ஹேதப்³பா³தி த³ஸ்ஸேதி. தித்தி²யா ஹி ஸாஸனஸ்ஸ படிபக்கா² ஹோந்தீதி. ததியம்.