1. பட²மஸங்கா⁴தி³ஸேஸஸிக்கா²பத³-அத்த²யோஜனா

பாராஜிகானந்தரஸ்ஸாதி பாராஜிகானம் அனந்தரே ட²பிதஸ்ஸ, ஸங்கீ³தஸ்ஸ வா, ஸங்கா⁴தி³ஸேஸகண்ட³ஸ்ஸாதி ஸம்ப³ந்தோ⁴. அயம் ஈதி³ஸா அனுத்தானத்த²வண்ணனா அனுத்தானானம் பதா³னம் அத்த²ஸ்ஸ வண்ணனா தா³னி இமஸ்மிம்காலே ப⁴விஸ்ஸதீதி யோஜனா.

678. பட²மே உத³கம் வஸிதம் அச்சா²த³னம் அனேன கதந்தி உதோ³ஸிதோதி வசனத்தே²ன ப⁴ண்ட³ஸாலா உதோ³ஸிதம் நாமாதி த³ஸ்ஸேந்தோ ஆஹ ‘‘உதோ³ஸிதந்தி ப⁴ண்ட³ஸாலா’’தி. ஏத்த² ஹி உத³ஸத்³தோ³ உத³கபரியாயோ. ஸம்யோகோ³ ந யுத்தோயேவ. ப⁴ண்ட³ஸாலாதி யானாதீ³னம் ப⁴ண்டா³னம் ட²பனஸாலா. அச்சாவத³தா²தி ஏத்த² அதீத்யூபஸக்³கோ³ அதிக்கமனத்தோ², ஆத்யூபஸக்³கோ³ தா⁴த்வத்தா²னுவத்தகோதி ஆஹ ‘‘அதிக்கமித்வா வத³தா²’’தி.

679. உஸ்ஸயவஸேன வத³னம் உஸ்ஸயவாதோ³, ஸோயேவ உஸ்ஸயவாதி³காதி த³ஸ்ஸேந்தோ ஆஹ ‘‘உஸ்ஸயவாதி³கா’’திஆதி³. ‘‘மானுஸ்ஸயவஸேன கோது⁴ஸ்ஸயவஸேனா’’தி இமினா உஸ்ஸயபே⁴த³ம் த³ஸ்ஸேதி. ஸாதி உஸ்ஸயவாதி³கா. அத்த²தோதி ஸரூபதோ. ஏத்தா²தி பத³பா⁴ஜனே. அட்³ட³னம் அபி⁴யுஞ்ஜனம் அட்³டோ³தி கத்வா த்³வின்னம் ஜனானம் அட்³டோ³ வோஹாரிகானம் வினிச்ச²யகாரணம் ஹோதி, தஸ்மா வுத்தம் ‘‘அட்³டோ³தி வோஹாரிகவினிச்ச²யோ வுச்சதீ’’தி, முத்³த⁴ஜததியக்க²ரோயேவ. யந்தி அட்³ட³ம். யத்தா²தி யஸ்மிம் கிஸ்மிம்சி டா²னே. த்³வின்னம் அட்³ட³காரகானம் வோஹாரம் ஜானந்தீதி வோஹாரிகா, அக்க²த³ஸ்ஸா, தேஸம். த்³வீஸு ஜனேஸூதி அட்³ட³காரகேஸு ஜனேஸு த்³வீஸு. யோ கோசீதி அட்³ட³காரகோ வா அஞ்ஞோ வா யோ கோசி.

ஏத்தா²தி ‘‘ஏகஸ்ஸ ஆரோசேதீ’’திஆதி³வசனே. யத்த² கத்த²சீதி யம்கிஞ்சி டா²னம் ஆக³தேபீதி ஸம்ப³ந்தோ⁴. அதா²தி பச்சா². ஸாதி பி⁴க்கு²னீ. ஸோதி உபாஸகோ.

‘‘கப்பியகாரகேனா’’திபத³ம் ‘‘கதா²பேதீ’’திபதே³ காரிதகம்மம். தத்தா²தி கப்பியகாரகஇதரேஸு. வோஹாரிகேஹி கதேதி ஸம்ப³ந்தோ⁴. க³திக³தந்தி சிரகாலபத்தம். ஸுதபுப்³ப³ந்தி புப்³பே³ ஸுதம். அதா²தி ஸுதபுப்³ப³த்தா ஏவ. தேதி வோஹாரிகா, தே³ந்தீதி ஸம்ப³ந்தோ⁴.

பட²மந்தி ஸமனுபா⁴ஸனதோ புப்³ப³ம். ஆபத்தீதி ஆபஜ்ஜனம். ஏதஸ்ஸாதி ஸங்கா⁴தி³ஸேஸஸ்ஸ. அயம் ஹீதி அயம் ஏவ, வக்க²மானோ ஏவாதி அத்தோ². ஏத்தா²தி பத³பா⁴ஜனே. ஸஹ வத்து²ஜ்ஜா²சாராதி வத்து²ஜ்ஜா²சாரேன ஸஹ, வாக்யமேவ, ந ஸமாஸோ. வத்து²ஜ்ஜா²சாராதி கரணத்தே² நிஸ்ஸக்கவசனம் த³ட்ட²ப்³ப³ம். தேன வுத்தம் ‘‘ஸஹ வத்து²ஜ்ஜா²சாரேனா’’தி. பி⁴க்கு²னிந்தி ஆபத்திமாபன்னம் பி⁴க்கு²னிம். ஸங்க⁴தோதி பி⁴க்கு²னிஸங்க⁴ம்ஹா. அனீயஸத்³தோ³ ஹேதுகத்தாபி⁴தா⁴யகோதி ஆஹ ‘‘நிஸ்ஸாரேதீதி நிஸ்ஸாரணீயோ’’தி. பி⁴க்கு²னிஸங்க⁴தோ நிஸ்ஸரதி, நிஸ்ஸாரியதி வா அனேனாதி நிஸ்ஸாரணீயோதி கரணத்தோ²பி யுத்தோயேவ. தத்தா²தி பத³பா⁴ஜனே. யந்தி ஸங்கா⁴தி³ஸேஸம். ஸோதி ஸங்கா⁴தி³ஸேஸோ. பத³பா⁴ஜனஸ்ஸ அத்தோ² காரணோபசாரேன த³ட்ட²ப்³போ³. ஹீதி ஸச்சம். கேனசீதி புக்³க³லேன, ந நிஸ்ஸாரீயதீதி ஸம்ப³ந்தோ⁴. தேன த⁴ம்மேன கரணபூ⁴தேன, ஹேதுபூ⁴தேன வா. ஸோதி த⁴ம்மோ.

அட்³ட³காரகமனுஸ்ஸேஹி வுச்சமானாதி யோஜனா. ஸயந்தி ஸாமம். ததோதி க³மனதோ, பரந்தி ஸம்ப³ந்தோ⁴. பி⁴க்கு²னியா வா கதம் ஆரோசேதூதி யோஜனா.

த⁴ம்மிகந்தி த⁴ம்மேன ஸபா⁴வேன யுத்தம். யதா²தி யேனாகாரேன. தந்தி ஆகாரம். தத்தா²தி ‘‘அனோதி³ஸ்ஸ ஆசிக்க²தீ’’தி வசனே.

து⁴த்தாத³யோதி ஆதி³ஸத்³தே³ன சோராத³யோ ஸங்க³ண்ஹாதி. ஸாதி ஆசிக்க²னா. தந்தி ஆசிக்க²னம். தேஸந்தி கா³மதா³ரகாதீ³னம். த³ண்ட³ந்தி த⁴னத³ண்ட³ம். கீ³வா ஹோதீதி இணம் ஹோதி. அதி⁴ப்பாயே ஸதிபீதி யோஜனா. தஸ்ஸாதி அனாசாரம் சரந்தஸ்ஸ.

கேவலம் ஹீதி கேவலமேவ. தந்தி ரக்க²ம். காரகேதி அனாசாரஸ்ஸ காரகே. தேஸ+?ந்தி காரகானம்.

தேஸந்தி ஹரந்தானம். ‘‘அனத்த²காமதாயா’’தி இமினா ப⁴யாதி³னா வுத்தே நத்தி² தோ³ஸோதி த³ஸ்ஸேதி. ஹீதி லத்³த⁴தோ³ஸஜோதகோ. அத்தனோ வசனகரம்…பே… வத்தும் வட்டதீதி அத்தனோ வசனம் ஆதி³யிஸ்ஸதீதி வுத்தே வசனம் அனாதி³யித்வா த³ண்டே³ க³ஹிதேபி நத்தி² தோ³ஸோ த³ண்ட³க³ஹணஸ்ஸ படிக்கி²த்தத்தா. தா³ஸதா³ஸீவாபிஆதீ³னந்தி ஆதி³ஸத்³தே³ன கே²த்தாத³யோ ஸங்க³ய்ஹந்தி.

வுத்தனயேனேவாதி அதீதம் ஆரப்³ப⁴ ஆசிக்க²னே வுத்தனயேன ஏவ. ‘‘ஆயதிம் அகரணத்தா²யா’’தி இமினா அனாக³தம் ஆரப்³ப⁴ ஓதி³ஸ்ஸ ஆசிக்க²னம் த³ஸ்ஸேதி. ‘‘கேன ஏவம் கத’’ந்தி புச்சா²ய அதீதே கதபுப்³ப³ம் புச்ச²தி. ஸாபீதி பிஸத்³தோ³ வுத்தஸம்பிண்ட³னத்தோ². ஹீதி ஸச்சம், யஸ்மா வா.

வோஹாரிகா த³ண்டே³ந்தீதி ஸம்ப³ந்தோ⁴. த³ண்டே³ந்தீதி வத⁴த³ண்டே³ன ச த⁴னத³ண்டே³ன ச ஆணம் கரோந்தி.

யோ சாயந்தி யோ ச அயம். பி⁴க்கு²னீனம் யோ அயம் நயோ வுத்தோ, ஏஸேவ நயோ பி⁴க்கூ²னம்பி நயோதி யோஜனா. ‘‘ஏஸேவ நயோ’’தி வுத்தவசனமேவ வித்தா²ரேந்தோ ஆஹ ‘‘பி⁴க்கு²னோபி ஹீ’’திஆதி³. ‘‘ததா²’’திஇமினா ‘‘ஓதி³ஸ்ஸா’’திபத³ம் அதிதி³ஸதி. தே சாதி தே ச வோஹாரிகா. ஹீதி ஸச்சம், யஸ்மா வாதி. பட²மம்.