7. நிஸீத³னஸிக்கா²பத³ம்

531. ஸத்தமே கத்தா²தி கிஸ்மிம் க²ந்த⁴கே, கிஸ்மிம் வத்து²ஸ்மிம் வா. ஹீதி ஸச்சம். தத்தா²தி சீவரக்க²ந்த⁴கே, பணீதபோ⁴ஜனவத்து²ஸ்மிம் வா. ‘‘யதா² நாமா’’தி இமினா ‘‘ஸேய்யதா²பீ’’தி பத³ஸ்ஸ அத்த²ம் த³ஸ்ஸேதி, ‘‘புராணோ சம்மகாரோ’’தி இமினா ‘‘புராணாஸிகோட்டோ²’’தி பத³ஸ்ஸ. சம்மகாரோ ஹி அஸினா சம்மம் குடதி சி²ந்த³தீதி ‘‘அஸிகோட்டோ²’’தி வுச்சதி. வத்து²ப்பன்னகாலமுபனிதா⁴ய வுத்தம் ‘‘புராணோ’’தி. தமேவூபமம் பாகடம் கரோந்தோ ஆஹ ‘‘யதா² ஹீ’’தி. ஹீதி தப்பாகடீகரணம், தம் பாகடம் கரிஸ்ஸாமீதி ஹி அத்தோ². சம்மகாரோ கட்³ட⁴தீதி ஸம்ப³ந்தோ⁴. வித்த²தந்தி விஸாலம். ஸோபீதி உதா³யீபி. தம் நிஸீத³னம் கட்³ட⁴தீதி யோஜனா. தேனாதி கட்³ட⁴னஹேதுனா. தந்தி உதா³யிம். ஸந்த²தஸதி³ஸந்தி ஸந்த²தேன ஸதி³ஸம். ஏகஸ்மிம் அந்தேதி ஏகஸ்மிம் கோட்டா²ஸே, பா²லேத்வாதி ஸம்ப³ந்தோ⁴தி. ஸத்தமம்.